मरकुस 16
16
यीशु को ज्यूनो हुनो
(मत्ती 28:1-8; लूका 24:1-12; यहूना 20:1-10)
1जब सबत को दिन खतम हो ग्योछ, तब मरियम जो मगदला गौं छी और याकूब की ईजा मरियम और सलोमी ले यीशु की लाश में लगून खिन खुशबुदार चीजून खरीदयान। 2और हफ्ता का पैल दिन रात्तै सूरज निकलून है पैलि उन कब्र में आयान। 3और आपस में यो बात करून मरेछ्या, “हमून खिन कब्र का मुँख में है ठूलो ढूंगास को खिसकालो?” 4लेकिन जब उन कब्र में पुजनान, तब उनूनले देखछ्य, कि कब्र मुँख में भटे ढूंगो हटीना को छै। और उ ढूंगो भौत ठूलो छ्यो। 5और उन स्यैनिन ले कब्र का भितर जाभेरन एक नौ जवान स जेले भौत सफेद कपाड़ा पैनिना का छ्या, दैन तरफ बैठिना को देखछ्य। और उन भौत हैरान हो ग्या। 6उ नौ जवान ले उन स्यैनिनथैं क्योछ, “डरा जन। तुम यीशु नासरी स जैस सूली में चढ़ाईना को छ्यो, ऊस खोजून मरेछा। उ ज्यून है ग्योछ और याँ नाहातिन, देखा यो उई जाग छै जाँ उकी लाश राख रैछी। 7पर तुम जा, पतरस और उक शिष्यून थैं कया, ‘कि यीशु तुमून है पैलि गलील प्रदेश खिन जालो। और जस उले तुमूनथैं कै राँखछ्यो, तुम ले यीशु वाँई देखला।’ ” 8और उन कब्र भटे निकल भेरन दौड़भेरन ग्यान, और उनूनले बाट में कैथैं के नै क्यो क्याखिन उन भौत डरीना का छ्या।
मरियम जो मगदला गौं छी स यीशु को दिखाई दीनो
(मत्ती 28:9-10; यहूना 20:11-18)
9और हफ्ता का पैला दिना रातैनि, यीशु मरिनान में भटे ज्यूनो हो भेरन, सबून है पैलि मरियम जो मगदला गौं छी जेमें भटे उले सात भूतून निकालीना को छ्या, ऊस दिखाई दीछ। 10तब मरियम जो मगदला गौं छी उले यीशु का शिष्यून जो दुखी छ्या, और रून मरेछ्या उनार पास जाभेरन यो समाचार दीछ। 11लेकिन जब उनूनले उथैं सुणछ्य, कि यीशु ज्यून हो ग्योछ, और उले ऊस दिखछ्य, त उनूनले उक बात में विश्वास नै कर्यो।
द्वी शिष्यून यीशु को दिखाई दिन
(लूका 24:13-35)
12फिर येक बाद यीशु द्वी जनून दिखाई दीछ, जो यरूशलम शैहर भटे गौं खिन जानमरेछ्या, लेकिन उनूनले ऊस पैलि बार में नै पछाड़ियो, क्याखिनकि उको भेष-भूसा बदलीना की छी। 13जब उनूनले ऊस पछयाण लीछ, तो उन द्वीवै यरूशलम शैहर खिन वापस ग्यान, उनूनले और शिष्यून ले यो बारिमें बताछ, पर शिष्यून ले उनेरि बातनू में विश्वास नै कर्यो।
इग्यार शिष्यून यीशु को दिखाई दीनो
(मत्ती 28:16-20; लूका 24:36-49; यहूना 20:19-23; प्रेरि. 1:6-8)
14येका बाद फिर यीशु उन इग्यार शिष्यून ले, जब उन खानो खान मरेछ्या दिखाई दीछ, उले उनून डाटछ्य, क्याखिनकि उनार मन भौत कठोर हो गैछ्या, कि उनूनले उन लोगून का बातुन में विश्वास नै कर्यो, जिनूनले यीशु ज्यून हुना का बाद देखछ्य। 15तब यीशु ले उनूनथैं क्योछ, “तुम सारा संसार में जाभेरन सारा लोगून सुसमाचार प्रचार करा। 16जो परमेश्वर में विश्वास करोलो और बपतिस्मा ल्योलो उको उद्धार होलो, लेकिन जो परमेश्वर विश्वास नी करोलो उ अपून पापून की सजा मिलेलि। 17और विश्वास करून वालान में यो चिन होला, कि उन म्यारा नामेले भूतून निकालाल; और नय्या-नय्या भाषा बोलला। 18और स्याँपून उठाला, और अगर उन जहर वाला चीज ले पी ल्याला, तब ले उनेरि कै हानि नी हो और उन बिमारून में हात राखाला, और उन चंगा हो जाला।”
यीशु को स्वर्ग खिन जानो
(लूका 24:50-53; प्रेरि. 1:9-11)
19तब प्रभु यीशु उनार दगाड़ बात करनाका बाद स्वर्ग में उठा ली ग्यान, और परमेश्वरा का दैन तरफ बैठ ग्यान। 20और उन शिष्यून ले जाभेरन हर जाग प्रचार करछ्य, और प्रभु यीशु ले उनून सामर्थ दीछ, और उनार द्वारा करिना का चमत्कारून यो बात साबित करछ्या कि उको संदेश सच्चो छ्यो। आमीन।
Currently Selected:
मरकुस 16: SORNT
Highlight
Share
Copy
Want to have your highlights saved across all your devices? Sign up or sign in
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
