Hechos 5
5
Umak ma Ananías xaq i ati Safira
1Xwiri o jun achi chi ma Ananías ub'i, junam ru' rixoqil chi ati Safira. Ike xkik'ayij jun kulew. 2I achi le xkiyijb'a chkiwach ru' rixoqil chi nik'aj che i pwaq kkik'ol kanoq i xa nik'aj kkijach chke i apostolab'. 3Are uri ma Pedro xub'ij che ma Ananías:
—Ma Ananías, ¿B'uchak xok Itzel pak'ux man xu'an chawe chi kat'or i Lo'laj Utewal i Dios, yet o pwaq xak'ol kan che i rajil awulew chi xak'ayij? 4¿Awe ti b'ari i ulew chi xak'ayij le? Are xak'ayij ¿awe ti b'ari i pwaq le? ¿B'uchak uri chi xach'ob' u'anik iri? Yet, are ti yoj xojat'oro, are i Dios xat'oro.
5I ma Ananías are xuta ile lik juntir xtzaq pulew i xkamik. I ni'pa i winaq chi xkita wach xk'ulmaxik le, lik xkixij kib'. 6Are uri xek'un jub'an alab'om xkipasij b'i uch'akul ma Ananías te'uri xe'e chumuqik.
7Kolo oxib' or rik'awik ile, are uri xupon chik rixoqil ma Ananías, xwiri ire reta'am taj wach taq xk'ulmaxik. 8Are uri ma Pedro xutz'onoj che:
—Chab'ij chwe, ¿I ulew chi xik'ayij keje rajil ile pacha xib'ij chqe?
I ixoq xula' uwach che:
—Qatzij, are rajil ile chi qab'im chiwe.
9Are uri ma Pedro xub'ij che:
—¿B'uchak xiyijb'a chiwach chi kik'am taq upam Utewal i Ajwal? Ley xek'un alab'om le chi xeupon chumuqik awachijil; wo'or xaq katkik'am chub'i yet.
10Are xb'itaj ile, juntir xtzaq ati Safira pulew chi raqan ma Pedro xaq xkamik. Are xe'ok b'i i alab'om, xekiriqa ixoq le kamnaq chik, are uri xkik'am chub'ik, xe'e chumuqik chuk'ulel i rachijil. 11Are uri konojel i jutzob'aj re i Dios xaq konojel ni'pa i xkita wach taq xk'ulmaxik, lik xpe jun nim laj xib'rikil chke.
K'iyal nimaq taq il xaq nimaq taq anik
12I apostolab', xki'an k'iyal nimaq taq il xaq nimaq taq anik chkixol i winaq, xaq konojel kkimol kib' chila che jun k'ijib'al chi “uwach ja chi ma Salomón ub'i”. 13Mijun chke jub'an chik winaq kkikowij kib' chuya'ik kiwach ku' ike, xwiri i winaq lik k'ax kekina'o. 14Xwiri lik xek'iyar i winaq chi kekojon che i Dios, che ixoqib' xaq che achiyab' lik xekojon che i Ajwal. 15I winaq kkesaj li iwab'ib' chi taq b'e, xekiya kan chila chwi taq kich'at xaq i ch'at k'amb'al b'i ke man keje ile are kik'aw ma Pedro xa tene uninox kik'aw pkiwi i lik keutzir na. 16Xaq i winaq chi je o pa taq tinimit naqaj che i Jerusalén kekik'am li kiwab'ib' xaq i winaq chi je ch'ujernaq chik kumal itzel taq tew, i lik konojel uri xeutzirik.
I apostolab' lik je terb'em
17Are uri i atz laj rajpatan i Dios junam ku' i rachi'il chi are jutzob'aj aj Saduceo, lik xtitat kipam, 18rumali xekichap i apostolab' le xaq xekimin prexil. 19Xwiri i Ajwal xutaq li jun ángel cha'ab' chi xujaq uchija re i prexil xaq xeresaj b'i i apostolab'. Are uri i ángel xub'ij chke: 20Jix prachoch i Dios, chixtak'al chkiwach i winaq chila xaq chib'ij chke wach taq usuk' i k'ak' laj k'aslemal. 21I apostolab' xki'ano pacha xb'ix chke rumal i ángel. Are xsaqir chukab' ij xe'ok prachoch i Dios xaq xkijeq i k'utunik chke i winaq chila.
Tz'aqat ketijin ike chu'anik ile, i atz laj rajpatan i Dios junam ku' i rachi'il, xkitaq kisik'ixik uwi ujolom re i tinimit aj Judío che jun molb'al ib' ke jutzob'aj unimaqil chi kki'at tzij pkitinimit aj Judío, i xaq xkitaq kik'amik i apostolab' chi je o prexil. 22Xwiri i ajchajinelab' are xeupon prexil, xekiriq ti chik, rumali xetzalij chub'i chub'ixkil i tziji chke: 23Are xojupon chila prexil, xqariq uchija lik tz'apilik xaq i ajchajinelab' is je o chila chwach uchija. Xwiri are xqajaq b'ik, lik mijun o chik chila.
24I aj-atzil ke i rajpatan i Dios xaq i kaj-atzil ajchajinelab' prachoch i Dios, are xkita ile lik xkitz'onoj chkiwach chi ipa nawi kuk'isa wi ronojel ile. 25Are uri xupon pan jun achi ku', chi xub'ij chke:
—I achiyab' chi ximin yix prexil je o prachoch i Dios ketijin che i k'utunik chke i winaq.
26Are uri i kaj-atzil ajchajinelab' junam ku' ajchajinelab', xe'e chkitzukuxik i apostolab', xwiri xekiyaj taj man xkixij kib' chke i winaq man moqxa kepuk' che i ab'aj kumal. 27Are xeuponik, xek'am b'i chkiwach i jutz'ob'aj unimaqil chi kki'at tzij pkitinimit aj Judío, are uri i atz laj rajpatan i Dios, xub'ij chke:
28Yoj lik qab'im chik chiwe chi lik kimayij ulapik i Jesús le, i yix xiqelo, xwiri xa ne xixok che i k'utunik chke konojel i winaq aj Jerusalén. Xwi ta la ile xaq kiwaj ne u'ab'axik ukamik i achi le chqij yoj.
29I ma Pedro xaq i jub'an chik apostolab' xkila' uwach chke:
—Lik chqaqul o wi chi kojkojon che i Dios nab'e chkiwach i winaq. 30I Dios ke i qatit qamam ujer are ire xuwalijsaj i Jesús che i kamik chi xirip yix xaq xitz'aw chwach i krus. 31Wo'or i Dios xuyak b'i chikaj xaq xuya puwiqab'im xaq u'anom che aj-ok'al utzam xaq Tol qe, man keje ile aj Israel ketzalij chik ru' i Dios xaq kkiriq ni kuyb'al mak. 32Iri lik qatzij man yoj qilom wach taq x-anik xaq keje i Lo'laj Utewal i Dios, chi i Dios uya'om chke i ni'pa kekojon che utzij.
33Ni'pa i je o pa jutz'ob'aj unimaqil chi kki'at tzij pkitinimit aj Judío, are xkita ile lik xmi' koywal i lik kkaj kikamsaxik. 34Xwiri, chkixol ike le o jun aj fariseo chi mam Gamaliel ub'i chi xaq jun tijonel re ujer atb'al tzij re i Dios, chi lik oksam u'ij kumal i winaq. Ire le xtak'i anoq xaq xutaq ub'ixkil chi kkesaj b'i jub'i' i apostolab' chisaq. 35Te'uri xub'ij chke konojel i atol tzij:
—Ix aj Israel, chi'ana kwent wach ki'an chke i achiyab' le. 36Chk'un chik'ux chi k'amaja naj u'anik, o jun achi chi ma Teudas ub'i, ire xwalijik xukoj uch'ojil chi ire lik nim u'ij, xaq kolo jumo' (400) achiyab' xkiya kiwach ru'. Xwiri ire xkamsaxik xaq ni'pa i je teren te'eq chrij xekicher b'ik i keje usachik kiwach ile. 37X-on chupanoq, che taq i ij are xe'ajlax i winaq pa Israel, xaq o jun achi aj Galilea chi are ma Judas, xtiki che chi o jujun winaq xkiya kiwach ru'. Xwiri xaq xkamsaxik xaq konojel ni'pa je teren te'eq chrij xekicher b'ik. 38Rumali wo'or kwaj kixinpixb'aj ru' iri, chi chiwo'taj b'i achiyab' le xaq mimin iwib' ku'. Man ni'pa ketijin chuk'utik le, we xa pkinojb'al ike petnaq wi xa ksach ni uri uwach, 39xwiri we ru' i Dios petnaq wi, lik kixtiki ti uri yix chki'atixik. Lik chi'ana kwent iwib', man qeta'am taj moqxa chrij i Dios kixtijin wi chu'anik ch'oj —xcha ma Gamaliel. Ike lik xekojon che. 40Rumali xekisik'ij i apostolab', xkiya kilo'xik xaq xkib'ij chke chi lik chkimayij ulapik utzij i Jesús; te'uri xeko'taj b'ik. 41I apostolab' are xe'el ku' jutzob'aj unimaqil chi kki'at tzij pkitinimit aj Judío, lik xekikotik xe'ek, man i Dios uya'om utzil chomal chke chi xkitij b'i kilo'xik rumal ub'ixkil utzij i Jesús. 42Ij ij kkik'utu xaq kkitzijoj utzij i Jesús prachoch i Dios, xaq chi taq ja, chi i Jesús le are i Cristo.
Currently Selected:
Hechos 5: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
