Hechos 7
7
Uto'ik rib' ma Esteban
1I atz laj rajpatan i Dios, xutz'onoj che ma Esteban we lik qatzij ni'pa xkib'ij i achiyab' chrij le, 2are uri ma Esteban xula' uwach che: Ix, wachalal chwach i Cristo xaq i qajawxelab', chinita na: I nim laj qa-Dios xuk'ut rib' che qamam mam Abraham are o chila che i ulew Mesopotamia, are k'amaja k-e pa jeqelem pa ulew Harán, 3i Dios xub'ij che: Chakanaj kan awulew xaq cheakanaj kan awachalal, jat pa jeqelem chwach ulew chi kink'ut ni yin chawe. 4Are uri i mam Abraham xel che i ulew Caldea, x-e pa jeqelem chila Harán, are o chila xkam uqajaw; chrijil chik ile i Dios xuk'am li waral che i ulew pa ix jeqel wi yix wo'or. 5Xwiri i Dios xuya ti che mam Abraham we ku'an taq re che i ulew, mitene jub'i' yab'al raqan. Xwiri, xub'ij che chi k-on panoq, i ulew le kuya ni chke umuq uxikin, chrijil chik ukamik ire. (I Dios are xu'an i sujunik le che i mam Abraham, k'amaja rak'al che taq i ij le). 6Xwi ta la ile, xaq i Dios xub'ij, chi umuq uxikin ke'e ni pa jeqelem che jun chik tinimit chi keta'am ti uwach, k-an ni taqon chke xaq kkitij ni uyej pki'ab' i winaq le jumo' (400) junab'. 7Xwiri i Dios xub'ij che: I tinimit chi kki'an ile chke inwinaq, lik kinya ni utojb'alil chke. Are ke'el li ike chila, kepe chik waral xaq kkikoj ni in-ij. 8I trat chi xu'an i Dios ru' mam Abraham, are u'anik i circuncisión. Rumali ire are o chik wajxaqib' ij che uk'ojol chi a Isaac, xu'an i circuncisión che. Xaq keje ile xu'an ma Isaac che uk'ojol chi a Jacob xaq i ma Jacob keje xu'an chke uk'ojol chi je are kiqajaw i kab'lajuj tzob'aj aj Israel.
9I je uk'ojol ma Jacob le chi je are qatit qamam, tzel xkil kicha' chi ma José rumali xkik'ayij b'ik, xk'am b'i pa Egipto. Xwiri i Dios lik o ru' a José, 10man xresaj pa jalajuj taq k'ax chi xutijo. Xuya unojb'al xaq xuya u'ij, rumali i ma faraón chi ajawinel re Egipto xuya ma José pa aj-ok'al utzam i jalajuj taq tinimit re Egipto xaq pa nim laj rachoch i ajawinel le.
11Are uri xpe i wa'jal, rumali xkitij uyej i winaq aj Egipto xaq aj Canaán, i qatit qamam le lik nti chik kkitijo. 12Xwiri i mam Jacob are xuta chi o i trigo chila pa Egipto, xeutaq b'i uk'ojol chulo'ik i trigo chi je are qatit qamam yoj. Ile are i nab'emul chi xeupon pa Egipto. 13Are xeupon chik che ukamul, i ma José xub'ij chke i ratz chi are ire kicha', keje uri ile i ma faraón xretamaj chi ma José aj Hebreo winaq. 14Chrijil chik ile, i ma José xuya jun taqanik, chi uqajaw xaq ni'pa i rachalal chi je jo'lajuj oxwinaq (75) lok'anij, kek'am b'i pa Egipto. 15Are u'ankil uri chi mam Jacob x-e jeqel chila pa Egipto; chila xkam wi ire xaq keje i ralk'uwal chi je are qatit qamam yoj. 16I kich'akul ike le xek'am b'i pa Siquem, chila xemuq wi chupam i muqb'al kamnaq chi ulo'om kan etz mam Abraham chke i rak'al ma Hamor, chila Siquem.
17Are ya knaqajab' i ij chi k-antaj na pacha usujum i Dios che mam Abraham, i je aj Israel lik je k'iyarnaq chik chila pa Egipto, lik nti chik kisuk', 18xaq che taq i ij le, xok jun k'ak' ajawinel pkiwi aj Egipto chi xretamaj ti uwach i etz ma José. 19I ajawinel le lik xeut'or i qach aj Israel xaq lik xu'an k'ax chke i qatit qamam; xu'an pen chke chi kko'taj kan i kak'al chi kealaxik man keje ile kekamik. 20Che taq i ij le xalax a Moisés, i ak'al le lik xumaj uwach i Dios i xa oxib' ik' xkik'itsaj uqajaw uchuch chi kachoch. 21Are xko'taj b'i ak'al le chwi ya, keje uri ile umi'al ma faraón xuriq i ak'al, xuk'am b'ik i xuk'itsaj, lik pacha taq rak'al ire xu'an che. 22Are u'ankil uri ile chi a Moisés xk'itsax chupam kipixb'anik aj Egipto i are xk'iyik lik xu'on jun achi chi lik nim u'ij ru' wach kub'ij xaq ru' wach ku'ano.
23Are o chik kawinaq (40) junab' che ma Moisés, xuch'ob' kisolixik rach aj Israel. 24Xwiri are xril jun aj Egipto chi ktijin chu'anik k'ax che jun aj Israel, are uri ma Moisés xuto i rach aj Israel xaq lik xukamsaj i aj Egipto le. 25I ma Moisés xuch'ob' ire chi i rach aj Israel kkil ub'e chi rumal ire, i Dios keresaj pki'ab' aj Egipto, xwiri ike lik xkil ti ub'e. 26Chukab' ij, i ma Moisés xeuriq keb' aj Israel chi kki'an ch'oj chkiwach, ire xraj chi kkichomaj kib' chkiwach, rumali xub'ij chke: Yix lik iwachalal iwib' chwach i Cristo; ¿B'uchak uri ki'an ch'oj chiwach? Xcha. 27Are uri i achi chi ktijin chuch'ayik i rachi'il, xutakpuj b'i ma Moisés xaq xub'ij che: ¿Pachin xatyaw kan yet pa aj-atzil xaq pa atol tzij pqawi? 28¿Xatab'a kawaj inkamsaxik, pacha xa'an che i aj Egipto iwir? 29I ma Moisés are xuta ile, x-anmajik, x-e k'a che i ulew Madián. Chila xjeqi wi pacha jun aj naj xaq chila xealax wi keb' uk'ojol.
30Are o chik kawinaq (40) junab' che ujeqelem chila Madián, are kb'in pa tz'inilik jyub' chaqij chi o naqaj che i jyub' Sinaí; xaqte'et xril jun ral che' chi lik k'ix kjuluw a' che xaq xwinaqir jun ángel chupam i a' le. 31I ma Moisés le lik xok il che wach taq xril puwach, xaq are xtejeb' chupan jub'i' ru' ilb'al re wach ropis, are uri xuta uch'awb'al i Ajwal chi kub'ij: 32Yin in ki-Dios awatit amam. Yin in u-Dios mam Abraham, mam Isaac xaq mam Jacob. Are uri ma Moisés xujeq kb'arb'at uch'akul rumal uxib'rikil xaq xukowij ti rib' chutaqexik. 33Are uri i Ajwal xub'ij che: Chawesaj i axajab', man i k'ijib'al le ipa at tak'al wi lik ulum che i Ajwal. 34Yin lik wilom wach uyej kkitij inwinaq chi je o chila Egipto. Intom ko'ej, wo'or in qajnaq li chkito'ik man kewesaj pki'ab' aj Egipto. Rumali, chatpetoq man katintaq nu b'i pa Egipto.
35Tupu ma Moisés le xxutux kumal aj Israel man xkib'ij che: ¿Pachin xyaw chawe at aj-atzil xaq at atol tzij pqawi? Xwiri i Dios xutaq b'ik, aj-atzil xaq ajtol ke aj Israel, keje ile xub'ij i ángel che chi xwinaqir pa a' che ral che' chi lik k'ix. 36Lik are ma Moisés le xeresaj li qatit qamam pa Egipto. Are ire le x-anaw i nimaq taq il xaq i nimaq taq anik chila pa Egipto che i kawinaq (40) junab' xaq chupam i Mar Kaq i xaq pa taq tz'inilik jyub' chaqij. 37Xaq are mam Moisés le xb'iw chke aj Israel: Are i Dios k-uluw ni jun profeta chixol yix chi lik pacha yin. 38Xaq are mam Moisés le o ku' aj Israel pa nim laj moloj ib' chila pa tz'inilik jyub' chaqij, xaq are ire x-ijlax rumal i ángel che i jyub' Sinaí xaq are ire xk'iji ku' i qatit qamam. Xwi ta la ile, xaq che ire xya' wi ni'pa i tzij re i k'aslemal man re kuyab'ej chqe yoj.
39Xwiri i qatit qamam lik xekojon ti che man lik xkaj te'eq chik tzalijik pa Egipto. 40I winaq xkib'ij che ma Aarón: Lik cha'ana jun qa-dios chi knab'ej ni chqawach, man qeta'am taj wach taq xuk'ulmaj mam Moisés chi xojresaj li pa Egipto, xecha. 41Are uri xki'an jun tiox chi pacha ral me' ktzunik, te'uri xkikamsaj jalajuj taq chikop, sujb'al re chwach xaq xki'an jun nim laj nima'ij kojb'al u'ij i tiox le, chi lik are ike xe'anawik. 42Rumal ni'pa ile, i Dios xujek' rib' ku' xaq xuya chke chi kkikoj ni u'ij i ch'umil aj chwa kaj. Man keje ile tz'ib'tal kan chupam i wuj ke i profeta, chi kub'ij:
Ix, aj Israel winaq,
che i kawinaq (40) junab' chi xixb'in pa taq tz'inilik jyub' chaqij,
¿Xatab'a xeikamsaj i chikop chinwach yin xaq xisujuj isipon chwe, kojb'al in-ij?
43Are taj,
man xane, xiweqaj b'i lo'laj uk'ijib'al i tiox Moloc#7.43 Tiox ke aj Amón.
xaq xiweqaj b'i uk'exwach i ch'umil re i tiox Renfán#7.43 Tiox ke aj Egipto.,
chi yix ix anawnaq kojb'al ki'ij.
Rumal uri kixwesaj b'i pa cho'ab' chwach i ulew le
xaq kixintaq b'i chwach jun chik ulew
chi mas k'a naj chwach i tinimit Babilonia, xcha.
44I qatit qamam, are xeb'in pa tz'inilik jyub' chaqij, o te'eq i ja wu'wik k'ul ku' chi are utrat i Dios, ile xuyijb'a ma Moisés chrij pacha i jun k'exwach chi xuk'ut i Dios che. 45I ja wu'wik k'ul le, xya' chke i qatit qamam, lik pacha ub'itaq ke konojel ni'pa xepe ru' ma Josué, xkik'am li ku' are xe'ok li chwach ulew waral chi ke i jub'an chik winaq chi xeresaj b'i i Dios chkiwach i qatit qamam. K'a che taq i ij are x-ajawin mam David. 46I ajawinel, chi ma David le, xuriq utzil chomal chwach i Dios, rumali xub'ij che, chi we kuya'o, k-an uri jun ja re riqb'al ib' ru' i Dios ipa kikojix wi u'ij kumal i winaq aj Israel; 47xwiri are ma Salomón x-anaw rachoch i Dios. 48Tupu i Nim laj Dios kjeqi ti chupam jun ja chi xa winaq ke'anawik. Pacha ub'im i profeta: I Ajwal kub'ij:
49I kaj are inkub'ib'al chi o u'ij,
xaq uwach ulew are ipa kintak'b'a wi i waqan.
¿B'i chi ja kiyak ni yix chwe? Kcha i Ajwal:
¿Pachike taq ink'ijib'al re wuxlanb'al,
50chi lik are yin xin-anaw ronojel ni'pa ile?
51Ma Esteban xub'ij chik: Xwiri yix lik ix b'uy laj taq winaq, man ixikin xaq iwanima lik keje pacha ke i winaq chi nti i Dios ku', man lik kiwaj ti utayik utzij Lo'laj Utewal i Dios. Lik xaqjun iwach ku' iwatit imam, man keje ile xki'an ike ujer. 52¿Pachin taq wa jun profeta we xutij ti k'ax pki'ab' iwatit imam? Ike le xekikamsaj b'i ni'pa xkitzijoj uk'unik i Cristo chi lik suk'ul uk'ux i lik nti umak, i wo'or are xk'un i Cristo le chi lik suk'ul uk'ux, yix xa xijach pki'ab' ni'pa i tzel keilawik xaq ike xkikamsaj b'ik. 53Keje xi'an yix ile, tupu i Dios xeutaq li u-ángel chuya'ik i U'atb'al Tzij chiwe, xwiri yix xixkojon ti che.
Ukamik ma Esteban
54Are xkita ronojel ile i jutzob'aj unimaqil chi kki'at tzij pkitinimit aj Judío, lik xmi' koywal che ma Esteban. 55Xwiri ma Esteban lik o Lo'laj Utewal i Dios ru', xtaqen an chikaj, are uri xril i Lo'laj u'ij uchomal i Dios xaq xril i Jesús chi tak'al puwiqab'im i Dios. 56Are uri xub'ij:
—¡Chiwila pe'! Yin kwil i kaj jaqalik xaq kwil i pacha Winaq chi Xolalaxoq chwach Ulew o puwiqab'im i Dios —xcha.
57Xwiri ike, xkitz'apij kixikin xaq konojel kesik'inik, xe'e chrij ma Esteban. 58Xkesaj b'i pa tinimit xaq xe'ok chupuk'ik ab'aj che; i ni'pa ketijin chu'anik k'ax che le, xkesaj i ki'u' jurjaq chi kikojom, xkiya kan ru' jun ala chi a Saulo ub'i.
59Tz'aqat ketijin chupuk'ik ab'aj che, i ma Esteban xok che i lapanik ru' i Dios, keje iri xub'ij: “Ajwal Jesús, chak'ama i wanima.” Xcha. 60Te'uri xxuki'ik xaq ko xsik'in chub'ixkil i tziji: “¡Ajwal lik makoj pajil kimak i winaqi wach ketijin chu'anik!” Xcha.
Are xb'itaj ile, xkamik.
Currently Selected:
Hechos 7: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
