G%E9nesis 46
46
U'enam mam Jacob pa Egipto
1I mam Israel xumaj b'i ub'e xuk'am b'i ronojel ub'itaq re. Are xupon chila pa Beerseba, xusujuj sipon chwach u-Dios uqajaw chi etz mam Isaac. 2Che a'ab' le i Dios xu'ijla mam Israel puwaram, xub'ij che:
—Mam Jacob, mam Jacob.
Ire xub'ij:
—In o chi, Ta.
3Are uri i Dios xub'ij che:
—Yin in Dios, chi in u-Dios aqajaw; maxij awib' che i enam pa Egipto man chila kin-an ni jun nim laj tinimit chke amuq axikin. 4Yin kin-e ni awu' pa Egipto, xaq kin-an ni chke amuq axikin chi ketzalij chaloq, xaq are katkam yet are ni a José kmutz'uw b'i ab'a'wach chawe —xcha.
5Chrijil chik ile i ma Jacob xel chila pa tinimit Beerseba, are uri i rak'al xki'ansaj b'i kiqajaw, kak'al xaq i kixoqil chupam i ch'ich' chi utaqom b'i ma faraón chke, k'amb'al li ke. 6Xaq xkik'am b'i kichikop, xaq ronojel ni'pa i ub'itaq ke chi kich'akom chila Canaán. Keje ruponik ma Jacob ile xaq i je umuq uxikin chila pa Egipto. 7Xeuk'am b'i konojel i rak'al ru', alab'om, altom xaq konojel i je ri umam, ke'eloq chi konojel i ralk'uwal.
8Iri are kib'i aj Israel chi xe'upon pa Egipto, chi je are ma Jacob ku' i rak'al:
I nab'e rak'al ma Israel le are ma Rubén. 9I rak'al ma Rubén je are: A Hanoc, a Falú, a Hezrón xaq i a Carmi.
10I rak'al ma Simeón je are: A Jemuel, a Jamín, a Ohad, a Jaquín, a Zohar xaq i a Saúl, chi rak'al jun ixoq aj Canaán.
11I rak'al ma Leví je are: A Gersón, a Coat xaq i a Merari.
12I rak'al ma Judá je are: A Er, a Onán, a Sela, a Fares xaq i a Zara; xwiri i a Er xaq i a Onán xekam chila che ulew Canaán. Xaq i rak'al ma Fares je are: A Hezrón xaq i Hamul.
13I rak'al ma Isacar je are: A Tola, a Fúa, a Job xaq i a Simrón.
14I rak'al ma Zabulón je are: A Sered, a Elón xaq i a Jahleel.
15Ike le je are rak'al tit Lea chi xuk'uwalij mam Jacob ru', chi xealax chila Padan-aram, xaq i umi'al chi al Dina. Je oxlajuj juwinaq (33) konojel che achiyab' che ixoqib'.
16I rak'al ma Gad je are: A Zifión, a Hagui, a Ezbón, a Suni, a Eri, a Arodi xaq i Areli. 17I rak'al ma Aser je are: A Imna, a Isúa, a Isúi, a Bería xaq i kanab' chi al Sera. Xaq i rak'al ma Bería je are: A Heber xaq i a Malquiel. 18Ike le je are rak'al tit Zilpa chi xuk'uwalij mam Jacob ru', je waqlajuj konojel, i ati Zilpa le are jun ajke'el chi xya' che ati Lea rumal uqajaw chi mam Labán.
19I rak'al tit Raquel chi rixoqil mam Jacob, je are: A José xaq i a Benjamín. 20I rak'al ma José chi xealax ru' rixoqil chi ati Asenat je are iri: A Manasés xaq i a Efraín, ike le xealax chila pa Egipto. I ati Asenat le are umi'al mam Potifera chi ajsujul sipon chwach jun chik dios chila pa tinimit On. 21I rak'al ma Benjamín je are: A Bela, a Bequer, a Asbel, a Gera, a Naamán, a Ehi, a Ros, a Mupim, a Hupim xaq i a Ard. 22Ike le je are kimuq kixikin mam Jacob ru' ati Raquel, je kajlajuj konojel.
23I rak'al ma Dan xwi a Husim. 24I rak'al ma Neftalí je are: A Jahzeel, a Guni, a Jezer xaq i a Silem. 25Ike le je are rak'al tit Bilha chi xuk'uwalij mam Jacob ru'; je wuqub' konojel. I tit Bilha le are jun ajke'el chi xya' che ati Raquel rumal uqajaw chi mam Labán.
26Konojel i alk'uwal chi xeupon junam ru' mam Jacob chila pa Egipto lik je rak'al, je waqib' oxwinaq (66) xwiri xe'ajlax ti ralib'. 27I rak'al ma José chi xealax pa Egipto je keb'. Konojel i ralk'uwal mam Jacob chila pa Egipto je lajuj oxwinaq (70).
28I mam Jacob xunab'saj b'i ma Judá, man kub'ij pan che ma José chi kpe chuk'ulaxik chila pa Gosén; are xeupon chila pa Gosén, 29i ma José xutaq uyijb'axik uch'ich' man k-e chuk'ulaxik uqajaw chi mam Israel chila pa Gosén. Are xkik'ulaj kib' ru' uqajaw ko xkitz'ulej kib' xaq lik naj xe'o'ik. 30Are uri mam Israel xub'ij che ma José:
—Wo'or utz we kinkamik, man xwil awach xaq weta'am chi k'a at k'aslik —xcha.
31I ma José xub'ij chke i ratz xaq chke konojel i aj prachoch uqajaw:
—Kin-e chub'ixkil che ma faraón, chi konojel i watz xaq i aj prachoch inqajaw chi je o te'eq jela che ulew Canaán, ya xek'un wu' xaq kejeqi waral. 32Kinb'ij ni che chi yix ix ajyu'ul jalajuj taq chikop, xaq ik'amom li ichij, ichikop xaq ronojel ni'pa o iwu'. 33Rumali are kixusik'ij ma faraón, xaq are kutz'onoj chiwe: “¿Wach chak kiriq u'anik?” 34Yix chib'ij ni che chi ax keiyu'uj wi jalajuj taq chikop pacha xki'an iwatit imam ujer. Keje ile kixk'iji ni kan uri chwach ulew Gosén man i aj Egipto kkaj ti kek'iji junam ku' ajyu'ul jalajuj taq chikop man kkich'ob' ike nti ki'ij —xcha ma José.
Currently Selected:
G%E9nesis 46: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
