G%E9nesis 49
49
K'isb'al taq utzij mam Jacob
1I mam Jacob xeusik'ij i rak'al, xub'ij chke: Chixtejeb' loq man kinb'ij chiwe wach kik'ulmaj k-on panoq:
2Chixtejeb' loq man kita, yix chi ix rak'al mam Jacob,
xaq chikojo retalil wach kub'ij iqajaw chiwe chi mam Israel.
3Yet, ma Rubén, at nab'e wak'al,
at nab'e incho'ab' xaq at nab'e uwachinik inch'akul;
nab'e knimarsax a'ij xaq nab'e o wi awajawinik.
4Nim te'eq acho'ab' pacha jun raqana,
xwiri wo'or at nab'e k'uwalxel ti chik
man xamin awib' ru' qas ti mer wixoqil
xaq xaqajsaj u'ij inch'at.
5Yet, ma Simeón xaq ma Leví chi iwatz icha' iwib';
ich'ich' yix lik re ni kamsanik.
6¡Rumali kwaj taj kink'iji iwu' pa k'ijib'al re i molb'al ib'!
Man are mi'naq iwoywal xeikamsaj winaq,
xaq xi'an ch'aqa taq chke i kaqan i torib'
pacha xiwaj u'anik chke.
7Lik kink'oqoj ni kamik
chi xi'an rumal iwoywal
xaq kixinkichersaj nu b'i
chwach ronojel i tinimit Israel.
8Yet ma Judá, koksax ni a'ij kumal awatz acha',
lik kachap ni pkiqul i ajch'oj chawij,
xaq awatz acha' kexuki ni chawach.
9Ink'ojol ma Judá,
yet at keje pacha jun ral k'ojol koj,
are krelej utijawik uti',
kpuy-ik k-on pacha taq jun nim laj koj
xaq mijun kukowij rib' chuk'astaxik.
10Mijun kelsaw ucho'ab' ma Judá xaq i ch'amiy
chi o pu'ab'
k'a kk'un ni rajaw i ch'amiy,
chi konojel i tinimit kekojon ni che.
11I ma Judá kuyuqb'a ral u'axna che uraxk'amil uva,
chi xaq chupam uwa'al uva le
kuch'aj wi u'u'
12I ub'a'wach lik eq chwach uwa'al uva muqb'am,
I uware lik mas saq chwach i leche.
13I ma Zabulón kjeqi ni chuchi' i mar
ipa o ni tinimit re elb'al b'ik re i barco.
I uchi' utinimit kupon ni k'a Sidón.
14I ma Isacar keje pacha jun nim laj chikop aj-eqan
chi kuxlan puwarb'al.
15Are xrilo chi lik utz i warb'al le
xaq are xrilo chi lik chom i nim laj tinimit,
are uri kuya uchel rij chuxe' i eqan,
are u'ankil uri ile chi kkanajik mokom na.
16I ma Dan ku'at ni tzij pkiwi uwinaq,
man ire are jun chke kilemajil aj Israel.
17Ma Dan le keje na pacha jun kumatz chi
o pa b'e,
kuraxij b'i raqan i kaway
xaq kutzaqsaj li winaq chi annaq chrij.
18Ajwal, kwoy-ej chi kinato.
19O jutzob'aj chi je yij che i ch'oj, kki'an ni ch'oj chrij ma Gad,
xwiri chrijil chik ile, ire keuterb'ej na.
20I ma Aser kuqusij ni jel laj taq ti'b'alil,
xaq kuya ni ti'b'alil chi lik pacha uti'b'alil jun ajawinel.
21Ma Neftalí keje pacha jun ati kej chi nti rajaw,
chi je o chomiq taq rak'al.
22I ma José keje pacha jun tikon o chuchi' i ya
chi lik kwachinik
xaq i u'ab' k-e rab'ab' chwi taq tapial.
23I je ajk'aqol ch'ab' lik ktitat kipam che,
kkik'aq chi ch'ab' xaq lik arewi kki'an i utz taj che,
24xwiri ma José xuqajsaj ti uch'ab'
man i uteleb' lik o ucho'ab'.
Mantiox che u-Dios mam Jacob chi lik o ucho'ab',
mantiox che ajyu'unel chi tol ke aj Israel.
25Mantiox che u-Dios aqajaw chi katuto,
mantiox che i Dios chi lik ronojel ktiki che chi kuya ni utzil chomal pawi
ru' k'iyal taq utzil chomal chi kpe chikaj,
xaq ru' k'iyal taq utzil chomal chi kpe chupam uchoyil i mar,
ru' k'iyal taq utzil chomal re i tz'umanik xaq i alanik.
26Lik utz ni utzil chomal re aqajaw
chwach i utzil chomal ke i qatit qamam ujer.
I utzil chomal le
arewi kk'iji ni puwi ma José,
i ma José le chi x-ul chkixol ratz ucha', k'a pa k'isb'al taq jyub' re ronojel ij saq.
27I ma Benjamín keje pacha jun itzel laj utiw
chi kutij uti' ksaqirik,
xwiri are kqaj ij kuk'aq b'i ch'aqa taq chi utz ti chik.
Xcha mam Jacob.
28Je are kab'lajuj tzob'aj aj Israel ile, xaq are tzij ile xub'ij kiqajaw chke are xutz'onoj utzil chomal pkiwi chkijujunal chrij pacha kmajaw chke.
Ukamik mam Jacob
29Xwi ta la ile, i mam Jacob xaq xuya jun taqanik chke i rak'al, xub'ij: “Yin ya kinkamik xwiri chinimuqu ku' watit inmam, chila chupam i jul chi o chupam rulew ma Efrón chi aj Het, 30are i jul chi o pa Macpela naqaj che i Mamre chi o chupam ulew Canaán, chila chupam ulew chi xulo' mam Abraham che ma Efrón chi aj Het, i ulew le re muqb'al ralk'uwal mam Abraham. 31Chila xmuq wi etz mam Abraham xaq i etz rixoqil chi tit Sara; chila xmuq wi etz mam Isaac xaq i etz rixoqil chi tit Rebeca, xaq chila xinmuq wi etz tit Lea chi wixoqil. 32I ulew le xaq i jul chi o chupam, lo'tal chke i rak'al ma Het.” Xcha mam Jacob chke i rak'al.
33Are xutzin mam Jacob chkipixb'axik i rak'al, are uri xkotz'i chik, te'uri xel uk'ux i xkamik.
Currently Selected:
G%E9nesis 49: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
