Lev%EDtico 11
11
Chikop chi je ch'am xaq i je ch'am taj
1I Ajwal xub'ij che ma Aarón xaq che ma Moisés:
2Chi kkib'ij iri chke aj Israel: Chkixol konojel ni'pa i chikop chi je o chwach i jyub' ta'aj, xwi utz keitij iri chke: 3Chikop chi xolat kisapak xaq kkikamulij ukach'uxik kiwa. 4Xwiri i chikop chi keitij taj je are iri:
Tupu kkikamulij ukach'uxik kiwa xaq we xolat ti kisapak ile keitij taj, pacha i kamey man ile lik ch'am ti laj chikop chiwe yix.
5Mitij ti'ij imul, man tupu kukamulij neri ukach'uxik uwa xwiri xolat ti usapak, ile lik ch'am ti laj chikop chiwe yix.
6Mitij ti'ij liebre man tupu kukamulij neri ukach'uxik uwa xwiri xolat ti usapak, ile lik ch'am ti laj chikop chiwe yix.
7Mitij ti'ij aq man tupu xolat usapak, xwiri kukamulij ti ukach'uxik uwa; ile lik ch'am ti laj chikop chiwe yix.
8Mitij kiti'lal i jalajuj taq chikop le xaq mitene kichap taq kich'akul are je kamnaq chik; ile lik je ch'am ti laj taq chikop chiwe yix.
9Ni'pa i chikop je aj pa taq ya tupu je aj pa taq mar xaq we je aj pa taq raqana, xwi kitij ile chi o pacha ral taq kixik' xaq o kisolot. 10Konojel ni'pa i chikop chi je o pa taq mar xaq pa taq raqana chi nti ral taq kixik' xaq kisolot, ile lik je ch'am ti laj taq chikop chiwe yix, tupu ch'utiq o nimaq. 11Konojel ni'pa i chikop le lik je ch'am taj chiwe yix re kitijo xaq tupu je kamnaq chik lik je ch'am ti laj taq chikop chiwe yix. 12Konojel i chikop chi je o pa taq ya chi nti ral taq kixik' xaq nti kisolot, ile lik je ch'am ti laj taq i chikop chiwe yix.
13I tz'ikin chi keitij taj je are iri: Kotxik, k'uch, xik aj chwi taq mar, ile lik ch'am taj chiwe yix. 14Konojel i jalajuj taq tz'ikin chi milano kib'i xaq jalajuj taq xik, 15konojel i jalajuj taq joj, 16chak'nos, xoch', gaviota, konojel i jalajuj taq xik, 17tukur, cormorán chi pacha ganso eq, jowox, 18cisne, pelícano, k'uch, 19i chak'jowox, xaq konojel i jalajuj taq jowox, abubilla chi keje pacha i b'uq xaq i sotz'.
20Konojel i ral taq chikop chi o kixik' chi xaq kajib' kaqan lik je ch'am ti laj taq chikop ile chiwe yix. 21Xwiri utz keitij i ral taq chikop chi o kixik', o kajib' kaqan xaq o keb' chik kaqan chi ku'an chke chi kesak'lin chikaj, 22xaq konojel i je jalajuj taq sak', xil xaq i lol. 23Konojel i ral taq chikop chi o kixik' xaq keb'inik lik je ch'am ti laj taq chikop chiwe yix.
24Yix kix-on ch'am taj rumal iri:
Jun we kuchap jun kamnaq chikop kkanaj uri ch'am taj k'a kok a'ab'.
25Jun we kuyak jun kamnaq chikop rajwaxik uri kuch'aj u'u' xaq kkanaj ni uri ch'am taj k'a kok a'ab'.
26Konojel i chikop chi xolat ti kisapak xaq kkikamulij ti ukach'uxik kiwa, xapachin kuchap i chikop le, kkanaj uri chi lik ch'am taj.
27Konojel i jalajuj taq chikop chi o kajib' kaqan chi xaq keb'in ru' uwi ki'ab' xaq ru' uwi kaqan; i chikop le je ch'am taj xaq xapachin kuchap uch'akul jun kamnaq chikop le kkanaj uri ch'am taj k'a kok a'ab'. 28Jun we kuyak jun kamnaq chikop le rajwaxik uri kuch'aj u'u' xaq kkanaj ni uri ch'am taj k'a kok a'ab'. Ile lik je ch'am ti laj taq chikop chiwe yix.
29Chkixol konojel i chikop chi kejukmayik lik je ch'am ti laj taq chikop, kux, ch'o, xaq i jalajuj taq chikop chi kejukmayik: 30Ile are i salamanquesa, cocodrilo, ayin, sik, camaleón chi pacha patix k-anawik.
31Je are i ch'am ti laj taq chikop ile chiwe yix chkixol i uk'iyal chikop chi je olik. Xapachin kyinaw kich'akul i chikop le are je kamnaq chik, kkanaj uri lik ch'am taj k'a kok a'ab'.
32I kich'akul i ch'am ti laj taq chikop le are je kamnaq chik, we xtzaq puwi jun b'iroxik pacha iri: Jun b'iroxik, che', k'ul, tz'um, koxtal xaq we puwi i jalajuj taq chapb'al re chak, kkanaj uri chi lik ch'am taj. Rajwaxik uri chi kmub'ax chupam i ya xwiri kkanajik lik ch'am taj k'a kok a'ab', te'uri k-on chik ch'am.
33We xtzaq jub'i' kich'akul i je ch'am ti laj taq chikop chupam jun ulew b'oj, ronojel uri ni'pa o chupam lik ch'am ti chik, i b'oj le lik rajwaxik uri chi kpaxixik. 34Tupu we ya xaq we ti'b'alil o chupam, xkanaj uri ch'am taj, 35Ronojel taq b'iroxik we xtzaq jub'i' kich'akul i kamnaq chikop puwi, lik xkanaj uri chi lik ch'am ti chik. Tupu we jun orno xaq we jun nuk'b'al a' lik rajwaxik uri chi kwulijsaxik. Man i kamnaq laj taq chikop le, lik je ch'am taj chiwe yix.
36Xwi i ralaxb'al ya xaq i k'otom kkanaj na chi lik ch'am; xapachin kuyin i kamnaq taq chikop le, lik kkanaj uri chi lik ch'am taj.
37I kich'akul i kamnaq taq chikop le, we xtzaq puwi ija chi tikik re, xwiri ija le lik arewi ch'am. 38Xwiri ija le we ch'enen are ktzaq kich'akul i kamnaq taq chikop puwi, i ija le kkanaj uri chi ch'am ti chik.
39We xkam jun chke i chikop chi tijawik te'eq re iwumal yix, xwiri we o jun kuchap i kamnaq chikop le kkanaj uri chi ch'am taj k'a kok a'ab'. 40Jun we kutij ti'ij kamnaq chikop le rajwaxik uri chi kuch'aj u'u' xaq kkanaj ni uri chi ch'am taj k'a kok a'ab'; xaq pachin kresaj b'i uch'akul i kamnaq chikop le, xaq rajwaxik uri chi kuch'aj u'u' xaq kkanaj uri chi ch'am taj k'a kok a'ab'.
41Lik mitij i chikop chi kejukmay chwach ulew man i chikop le lik je ch'am ti laj taq chikop.
42Konojel i chikop chi kejukmay chwach ulew lik mitijo, tupu ru' uwach kik'ux keb'inik, xaq we ru' kajib' kaqan keb'inik, xaq we k'i kaqan, man i chikop le lik je ch'am ti laj taq chikop chiwe yix. 43Mi'an che iwib' yix chi ix ch'am taj rumal kichap i chikop chi kejukmay chwach ulew. 44Man Yin in Iwajwal Dios; rumali yix lik rajwaxik chi kijos-ij iwib' man kix-on ch'am man Yin lik in ch'am. Mi'an che iwib' yix chi ix ch'am taj, xa rumal kichap taq i chikop chi kejukmayik. 45Yin in Ajwal chi xixwesaj li che i ulew Egipto man ki'an i-Dios chwe, rumali yix lik rajwaxik chi lik ki'an ch'am che iwib' man Yin lik in ch'am.
46Are i atb'al tzij ile chkij i jalajuj taq chikop chi je o chwach i jyub' ta'aj, tz'ikin chi kerupup pa tew xaq konojel ni'pa je k'aslik chi kkiyin kib' pa taq ya, xaq konojel i chikop chi kejukmay chwach ulew. 47Man keje ile k-aljinik pachike taq i chikop chi je ch'am xaq pachike taq je ch'am taj, xaq pachike taq utz ketijawik, xaq pachike taq i utz taj chi ketijawik.
Currently Selected:
Lev%EDtico 11: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala