Lev%EDtico 13
13
Atb'al tzij chrij i yob'il che i tz'umalil
1I Ajwal xub'ij che ma Moisés xaq che ma Aarón:
2Jun we o i sipoj che, puj xaq we nimaq taq salch'ip che uch'akul xaq we ch'ak chi k-on i yob'il che utz'umalil, rajwaxik uri kk'am b'i chwach i ajsujul sipon chi ma Aarón xaq we chwach jun chke i rak'al chi xaq je ajsujul sipon. 3I je ajsujul sipon rajwaxik uri kutaqej i ch'ak che i ch'akulaj, we saq chik i is chupam i ch'ak xaq we naj oknaq chub'i i ch'ak chupam ch'akulaj, are ni uri yob'il che tz'umalil. I ajsujul sipon we xril ile kusaqij uri chi ch'am ti laj winaq.
4I salch'ip che uch'akul we saq xwiri we naj taj oknaq b'i chupam uch'akul xaq we u'anom ti saq i is chupam i ch'ak, i ajsujul sipon kutz'apij uri iwab' le pa ja, wuqub' ij. 5Wuqub' ij kusolij chik i ch'ak, we to' jeqelik, we enaq tu b'i uchi' che uch'akul k'a, kutz'apij chik wuqub' ij uri. 6Are kel chik wuqub' ij xaq kusolij chik i ch'ak we ktijin rutzirik, xaq we enaq tu b'i uchi' che uch'akul; te'uri i ajsujul sipon kusaqij chi iwab' le lik ch'am chik man xa to' ch'ak o che. Are uri iwab' kuch'aj u'u' te'uri kkanajik ch'am tan chik.
7Xwiri ipa o wi te'eq i ch'ak we k'a kaq uwach xaq we ktijin tan chik u'enam uchi' chrijil chik usolixik rumal i ajsujul sipon xaq chrijil chik ub'ixkil chi ch'am chik, rajwaxik uri chi k-e chik ru' ajsujul sipon man ksolix chik. 8I iwab' we xsolix rumal i ajsujul sipon xaq we xrilo chi ipa o wi te'eq i ch'ak lik kaq tan chik xaq lik ktijin tan chik u'enam uchi' che ronojel uch'akul, are uri i ajsujul sipon le kusaqij uri chi i iwab' le lik ch'am ti laj winaq man i yob'il chi o che lik are i yob'il che tz'umalil.
9Jun winaq we o yob'il che utz'umalil, rajwaxik uri chi kk'ami b'i chwach i ajsujul sipon. 10I ajsujul sipon kusolij ni i sipoj we saq xaq we u'onom chik saq i is chi o chupam i ch'ak, xaq we lik klalat uwach i ch'ak le, 11ile lik jun itzel laj yob'il che utz'umalil. I ajsujul sipon rajwaxik uri kusaqij chi iwab' le lik ch'am ti laj winaq chik xaq rajwaxik ti uri chi ktz'apixik man lik ch'am ti laj winaq chik.
12I yob'il che tz'umalil le we lik we' k-e chunimal chi k-e che ronojel uch'akul iwab', chi lik k'a ipa xtiki wi i ajsujul sipon chrilik, 13i ajsujul sipon lik rajwaxik uri chi lik na'al kusolij, we i yob'il che utz'umalil lik saq chik xaq we lik keje u'anom ronojel uch'akul, i ajsujul sipon kusaqij ni uri chi ch'am chik iwab' le, man ronojel uch'akul lik xu'an saq. 14Xwiri we x-on klalat uwach i ch'ak le, lik kkanaj uri ch'am ti laj winaq. 15Rajwaxik uri chi i ajsujul sipon kusolij i ch'ak chi lik klalatik le xaq kusaqij uri chi ch'am ti laj winaq, man i ch'ak chi klalatik le, lik ch'am taj, lik are i yob'il che tz'umalil.
16I klalatik le we x-on chik saq rajwaxik uri chi iwab' le k-e chik ru' ajsujul sipon, 17man krilo we i klalatik le we u'anom chik saq kusaqij ni uri chi iwab' le, lik x-on chik ch'am.
18Jun winaq we o ch'ak che uch'akul xaq we xutzirik, 19xwiri we xkanaj kan jun sipoj saq xaq we kaqkoj puk'exel rajwaxik uri chi k-e chwach i ajsujul sipon. 20I ajsujul sipon we xrilo chi ipa o wi i sipoj le lik xot'xik u'anom xaq i is chi o chupam i sipoj le xaq u'anom chik saq kusaqij uri chi iwab' le lik ch'am ti laj winaq man i ch'ak chi o che lik are i yob'il che tz'umalil. 21We krilo chi ipa o wi i sipoj le saq ti is chi o chupam xaq we u'anom ti xot'xik xaq ktijin rutzirik, xa kutz'apij ni uri wuqub' ij. 22I sipoj le we ktijin u'enam uchi', i ajsujul sipon kusaqij ni uri chi ch'am ti laj winaq man i ch'ak le chi o che lik are i lepra. 23Xwiri ipa o wi i ch'ak le we ktijin ti u'enam uchi', xa yuk uri re i ch'ak, i ajsujul sipon kusaqij uri chi i winaq le ch'am.
24Jun winaq we uk'atom rib' xaq chwach i k'atnaq le o chik jub'i' puj o we saqsoj rumal uk'axk'ol, 25i ajsujul sipon kusolij ni uri we u'anom chik saq i is chi o chupam i puj le; xaq i puj we lik xot'xik u'anom chub'i chupam uch'akul, lik yob'il che tz'umalil uri xpe chupam i k'atnaq le; rumali i ajsujul sipon kusaqij ni uri chi ch'am ti laj winaq rumal i yob'il che tz'umalil chi o che. 26I ajsujul sipon are kusolij i puj le we krilo chi u'anom ti saq i is chi o chupam xaq we xot'xik taj u'anom b'i che uch'akul, xaq we ktijin rutzirik, xa kutz'apij uri wuqub' ij. 27Are kel wuqub' ij, i ajsujul sipon kusolij chik i puj le, we enaq chub'i uchi', kusaqij uri chi ch'am ti laj winaq man i puj chi o che lik are i yob'il che tz'umalil. 28Xwiri we i puj enaq tu b'i uchi' xaq ktijin rutzirik xa usipojil uri i k'atnaq le, i ajsujul sipon kusaqij ni uri chi i winaq le ch'am man xa yuk re i k'atnaq o che uch'akul.
29Jun achi xaq we jun ixoq, we o jun ch'ak che ujolom xaq we pa rismachi', 30i ajsujul sipon kusolij ni uri i ch'ak le, we lik xot'xik chub'ik chwach uch'akul xaq we an ktzun i ral taq is chi o chupam xaq lik k'i taj, i ajsujul sipon kusaqij uri chi iwab' le lik ch'am ti laj winaq, man o ch'ak che chi tiña ub'i ile are yob'il che tz'umalil chi o che ujolom xaq we che i rismachi'. 31I ajsujul sipon are kusolij i ch'ak tiña le we krilo chi xot'xik tu b'ik chupam uch'akul xaq we eq ti is chi o chupam xa kutz'apij uri wuqub' ij. 32Are kel wuqub' ij i ajsujul sipon kusolij chik i ch'ak tiña le we enaq tu b'i uchi' xaq we xot'xik tu b'ik chupam uch'akul, xaq we an ti is chi o chupam, 33are uri i ajsujul sipon kutaq i winaq le chrelsaxik rismachi' xwiri kukanaj kan i is ipa o wi i ch'ak tiña, xaq k'a kutz'apij chik uri wuqub' ij. 34Are kel chik wuqub' ij, i ajsujul sipon kusolij chik i ch'ak tiña le we enaq tu b'i uchi' xaq we xot'xik tu b'ik chupam uch'akul, are uri i ajsujul sipon kusaqij ni uri chi i winaq le ch'am, xa kuch'aj uri u'u' man keje ile kkanajik ch'am. 35Xwiri i ch'ak tiña le we ktijin u'enam uchi' chrijil chik ub'ixkil rumal i ajsujul sipon chi lik ch'am chik, 36ksolix chik uri iwab' le ukamul, we i ch'ak tiña ktijin u'enam uchi' lik nti chik rajwaxik ktzukux i an is chupam, i iwab' le lik ch'am ti laj winaq uri. 37Xwiri we k-iltajik chi i ch'ak tiña ktijin utzalijik chrij, xaq we eq i is chi o chupam i ch'ak le utzirik chik re uri, i ajsujul sipon kusaqij uri chi winaq le lik ch'am.
38Jun achi xaq we jun ixoq are kpe tziptzip saq che uch'akul, 39rajwaxik uri chi ksolix che rumal i ajsujul sipon, i we krilo chi to' saqsoj i tziptzip le, kusaqij uri chi i winaq ch'am man ile yob'il ti che uch'akul.
40Jun achi we kpuq uwi xaq we k-on kan tz'um puja' ile to' jik xaq lik ch'am. 41Xaq we xwi chwach kpuqik xaq k-on tz'um, ile to' jik, i winaq ch'am uri. 42Xwiri we kwinaqir jun ch'ak kaqkoj che ujolom chi tz'um chik, tupu we rij uwi xaq we chwach, ile lik yob'il che tz'umalil uri. 43Are uri i ajsujul sipon kusolij i usipojil i ch'ak chi o che ujolom tz'um, we kaqkoj chrij pacha ktzun i yob'il che tz'umalil che jun ch'akulaj, 44i achi le iwab' uri rumal i yob'il che tz'umalil man ujolom o ch'ak che, rumali i ajsujul sipon kusaqij na chi i achi le lik ch'am ti laj winaq.
45Jun we o yob'il che utz'umalil, rajwaxik uri kukoj u'u' xilxil xaq kuch'uq ti ujolom ru' k'ul xwiri kuch'uq utzam xaq i uchi' ru' jun k'ul xaq ksik'in chub'ixkil i tziji: ¡Yin lik in ch'am ti laj winaq! ¡Yin lik in ch'am ti laj winaq! 46We utzirnaq ti i yob'il che utz'umalil, lik k'a ch'am laj ti winaq uri, lik utukel ni uri kk'iji'ik xaq lik naj che i k'ijib'al re molb'al ib'.
47We tz'itajnaq jun jurjik k'ul lan xaq we lino, 48o we jun k'ul lino xaq we lan, xaq che jalajuj taq b'iroxik tz'um, 49i tz'inik le we raxroj xaq we kaqkoj, lik yob'il che tz'umalil uri xaq lik rajwaxik uri chi kk'ut che i ajsujul sipon. 50I ajsujul sipon kusolij i k'ul chi tz'itajnaq xaq kutz'apij wuqub' ij i k'ul chi tz'itajnaq le. 51Are kel wuqub' ij i ajsujul sipon kusolij chik i tz'inik le, we enaq chub'i uchi' che i k'ul xaq we che jun b'iroxik chi tz'um, i tz'inik le lik are k'ax laj yob'il che i k'ul xaq che i tz'um rumali i b'iroxik le lik je ch'am ti chik. 52Rumali kjarsax ni pa a' ronojel ni'pa taq i b'iroxik chi o i tz'inik le che, man ile lik are k'ax laj yob'il; 53xwiri i ajsujul sipon are kusolij, we xrilo chi enaq tu b'i uchi', 54xa kutaq uri uch'ajik i b'iroxik le man kel b'i tz'inik chi o che xaq kutz'apij chik wuqub' ij.
55Are kch'ajtaj i tz'inik che i b'iroxik le, i ajsujul sipon kusolij chik; we xrilo chi i tz'inik le sachnaq taj, lik ch'am ti laj tz'inik uri xaq rajwaxik uri chi kjarsax ni b'iroxik le pa a' tupu enaq tu b'i uchi' i tz'inik chi o che, man i tz'inik le lik yob'il che tz'umalil, tupu we chupam o wi xaq we chrij. 56I ajsujul sipon are kusolij i tz'inik le we xrilo chi xel uwach, xa kuraqij b'i uri ipa o wi i tz'inik le, nti k-ono we k'ul xaq we tz'um. 57Xwiri we xwinaqir chik i tz'inik le xaq we x-e b'i uchi' che i k'ul, xaq we che jun b'iroxik chi tz'um, lik kjarsax uri i b'iroxik le pa a' chi o i tz'inik che. 58I k'ul xaq we jun b'iroxik chi xel i tz'inik che are xch'ajik, kch'aj chik juyak chik te'uri k-on chik ch'am.
59Ile are i atb'al tzij chrij i tz'inik re i k'ax laj yob'il che i k'ul lan o xaq che i lino xaq che jun b'iroxik re tz'um, man keje ile ksaqixik we je ch'am o we je ch'am taj.
Currently Selected:
Lev%EDtico 13: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala