Lev%EDtico 19
19
Atb'al tzij chrij u'anik i ch'am xaq i suk'ul laj atb'al tzij
1I Ajwal xlapan ru' ma Moisés, xub'ij che:
2Chab'ij iri chke aj Israel:
Lik chi'ana ch'am che iwib' man Yin chi in Iwajwal Dios lik in ch'am.
3Rajwaxik chi chijujunal chixkojon chke iqajaw ichuch.
Xaq chiya u'ij i ij sábado; Yin in Iwajwal Dios xinb'ij iri chiwe.
4Mi'an taq itiox ch'ich' xaq mitene kikoj chik ki'ij; Yin in Iwajwal Dios xinb'ij iri chiwe.
5Are kisujuj i sipon re chomb'al ib' chwach i Ajwal, lik utz u'anik chi'ana che man keje ile kuk'am chiwe.
6I chikop chi kisujuj chwach i Ajwal re isipon, rajwaxik kitij che i ij le xaq utz kitij chukab' ij, xwiri ni'pa kk'is ti che ukab' ij le, kjarsax ni uri pa a' churox ij. 7We kitij i sipon le churox ij, lik kqaj uri u'ij i sipon le xaq i Dios kuk'am ti chik uri chiwe. 8Jun we kutijo lik kreqaj uri umak xaq kelsax b'i uri putinimit, man xuqajsaj u'ij ni'pa i jachtal pu'ab' i Ajwal.
9Are kuriq u'ijlal i molonik rajwaxik chi na'al taj katmolonik, xaq mamol chik i pich'ol. 10Mamol i pich'ol re a-uva pa tikonb'al xaq mamol i uva chi je tzaqnaq xe taq raqan. Chaya kan chila re i nib'a' xaq re i winaq aj naj. Yin in Iwajwal Dios xinb'ij iri chiwe.
11Mi'an ela', minuk' i tzij xaq mixt'oron chiwach.
12Lik mi'an jun sujunik pinb'i Yin chi xa t'oronik, man lik kiqajsaj u'ij Iwajwal Dios; Yin in Iwajwal Dios chi xinb'ij iri chiwe.
13Ma'an taq jun utz taj che alok'anij, xaq mamaj jun b'iroxik che chi re ire.
Ma'an ile chi pen katoj amokom chi k'a chukab' ij kaya i rajil.
14Mik'oqoj jun tak.
Mikoj taq tzaqsab'al re jun mawach pub'e; are chi'ana lik chikojo u'ij Iwajwal Dios. Yin in Iwajwal xinb'ij iri chiwe.
15We ka'an jun atb'al tzij, lik utz u'anik cha'ana che, maya awib' puwi umak jun nib'a' xaq maya awib' puwi umak jun b'eyom. Lik cha'ana chrij pacha kub'ij i suk'ul laj atb'al tzij.
16Manuk' taq tzij chkij awinaq.
Xaq maya awach chukamsaxik jun awach lok'anij. Yin in Ajwal Dios xinb'ij iri.
17Ma'an ile chi to' ktitat apam che alok'anij.
Chajek'a alok'anij che ni'pa i utz taj chi ku'ano we rajwaxik u'anik, maya awach ru' jun alok'anij chu'anik i mak atzalal.
18Matzalij uwach che jun winaq we xu'an jun utz taj chawe, mak'ol titat pamaj chke alok'anij pak'ux. K'ax chana alok'anij pacha k'ax una'ik awib' yet ka'ano. Yin in Ajwal xinb'ij iri.
19Cha'ana pacha kub'ij in-atb'al tzij.
Mak'ulb'a jun chikop ru' jun chik chikop chi uchikopil taj.
Matik b'i jalajuj taq ija junam chwach atikonb'al.
Makoj jun a'u' chi jalajuj taq chij kojtal che.
20Jun achi we xumin rib' ru' jun ixoq chi o pa k'ax rumal i rajaw, chi ya kk'uli'ik xwiri we k'a o pu'ab' i rajaw, i achi chi xumin rib' ru' lik kya' ni utojb'alil che; xwiri kkamsax taj man ixoq le k'a o pu'ab' i rajaw. 21I achi chi xumin rib' ru' ixoq chi o pa k'ax rumal i rajaw le, rajwaxik uri kusujuj jun chij ma chwach i Ajwal re riqb'al kuyb'al umak. I chij le rajwaxik chi kuk'am b'i pa okb'al che i ja re i riqb'al ib' ru' i Dios. 22Ru' i chij ma le, i ajsujul sipon kutz'onoj ni kuyb'al mak chwach i Ajwal puwi i achi chi xumin rib' ru' ixoq chi o pa k'ax rumal i rajaw; te'uri kkuytaj umak i achi chi xu'ano.
23Are kixupon chwach ulew chi insujum chiwe, kitik ni jalajuj taq uche'lal echa', xwiri kipu ti tan xaq kitij ti tan uwach che i nab'e oxib' junab'. 24Che ukaj junab', ronojel uwach i jalajuj taq che' le kjach ni pu'ab' i Ajwal ru' jun nima'ij. 25Che ujo' junab' te'uri utz kitij uwach i jalajuj taq che' le, man keje ile lik k'i ni uwach kuya chiwe. Yin in Iwajwal Dios xinb'ij iri chiwe.
26Mitij jun b'iroxik chi o kik' che; mi'an taq ix ajnanel che iwib' xaq mimin taq iwib' chub'ixkil wach kk'unik k-on panoq.
27Are kiwesaj iwi, mi'an setsik che xaq mik'atzij utzam iwismachi'.
28Mi'at taq ich'akul rumal ib'is che jun kamik; mi'an taq jun k'exwachij che ich'akul. Yin in Iwajwal Dios xinb'ij iri chiwe.
29Maqajsaj u'ij ami'al rumal kataq chuch'akik umer chwach uch'akul, man keje ile i winaq re i tinimit le kech'aktaj ti rumal i utz taj.
30Chikojo retalil i ij sábado xaq chikojo u'ij i lo'laj k'ijib'al re i Dios ipa kikoj wi in-ij. Yin in Ajwal xinb'ij iri.
31Mik'am taq i no'oj chke i je ajnanel xaq mik'am taq i no'oj chke ike chi kkib'ij chi kelapan ku' i kamnaq; we ki'an ile, kixu'an ch'am taj. Yin in Ajwal xinb'ij iri.
32We jun lik nim laj winaq chik xaq lik saq chik uwi, rajwaxik uri chi kixtak'i anoq yab'al u'ij; lik chixkojon che i-Dios. Yin in Ajwal xinb'ij iri.
33Mi'an che jun winaq aj naj chi kutij taq uyej chixol. 34Chi'ana che pacha jun iwachalal, k'ax china'a, pacha ki'an chiwach yix, man chk'un chik'ux chi yix xaq xixjeqi chkixol aj Egipto. Yin in Ajwal xinb'ij iri.
35Mi'an taq ela' ru' jalajuj taq pajb'al pacha i pexu, almul xaq i mojon re ulew. 36Rajwaxik chi tz'aqat ki'an che i pexu, tz'aqat ki'an che i almul xaq suk'ulik ki'an che i mojon re ulew. Yin in Ajwal chi xixwesaj b'i pa tinimit Egipto, xinb'ij iri.
37Rumali, lik chi'ana pacha kub'ij in-atb'al tzij xaq intaqanik, to' miqelo, man Yin in Ajwal xinb'ij iri.
Currently Selected:
Lev%EDtico 19: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala