Lev%EDtico 5
5
Sipon porom re riqb'al kuyb'al mak rumal jalajuj taq mak atzalal
1We jun winaq ksik'ix rumal i atb'al tzij re ajsaqinel tzij rumal jun b'iroxik chi xrilo xaq wach xuta xwiri ire we xruwaj uwach, lik xmakun uri xaq lik kmajaw uri chi kya' utojb'alil che.
2We jun winaq xuchap pan jun b'iroxik chi ch'am taj, pacha taq wa jun kamnaq chikop, tupu je aj ru' taq ja xaq we je aj pa taq es, xaq we je are i chikop chi kejukuk chwach ulew, i lok'anij le lik ch'am ti chik uri xaq lik ajmak uri, tupu xuna taj are xu'ano.
3We jun kuchap utz'ilal jun winaq, tupu xunab'ej taj are xuchapo, lik ch'am ti chik uri xwiri are kunab'ej ke'el uri chi lik o umak.
4We jun winaq to' pa k'achirik kuya la taq rib' chuxe' jun b'iroxik tupu utz xaq we utz taj, xmakun uri, xwiri are xunab'ej wach taq xub'ij lik ke'el uri chi lik o umak.
5We jun winaq xtzaq chupam jun che ni'pa taq i makunik le, rajwaxik uri chi chusaqij. 6Xaq kuk'am b'i uri jun usipon re kuyb'al umak chwach i Ajwal, jun ati chij, o jun ati chab'at re usipon, re riqb'al kuyb'al umak chi xu'ano. Keje uri ile chi ajsujul sipon kutz'onoj ni kuyb'al umak i winaq le man kkuytaj ni umak che.
7We jun winaq ktiki ti chulo'ik jun ral chij kuk'am b'i uri keb' ixkuku we ntaj, keb' ral taq palomax chwach i Ajwal, jun sipon palomax re riqb'al kuyb'al umak, i jun chik sipon palomax, kporox na. 8Kuk'am b'i che i rajsujul sipon man ire kusujuj i nab'e tz'ikin chi re riqb'al kuyb'al umak, te'uri kujey uqul xwiri su' ti kresaj. 9Te'uri kukitzka jub'i' ukik'el i ral tz'ikin le chi re riqb'al kuyb'al mak che juperaj che i sujb'al sipon i kik' chi kk'is taj kuyitz'itz'ej ni chuxe' i sujb'al sipon le. Ile are jun sipon re riqb'al kuyb'al mak. 10Ru' i jun chik tz'ikin k-ani che pacha intaqom chi kporox na, keje uri ile chi i ajsujul sipon kutz'onoj ni kuyb'al mak puwi i winaq le man kkuytaj ni umak che.
11We jun winaq ktiki ti chulo'ik keb' ixkuku xaq we keb' ral taq palomax, kuk'am b'i uri kajib' ral taq k'ox arin re riqb'al kuyb'al umak. I sipon le re riqb'al kuyb'al mak, rumali chi koksax ti aceite xaq i pom ru'. 12I sipon le kuk'am b'i che i ajsujul sipon man ire kuk'am jumo'aj che, re kuporoj puwi i sujb'al sipon junam ru' i jub'an chik sipon chi kporox chwach i Ajwal. Ile are k'unsab'al chik'ux chwe Yin. I sipon le re ni riqb'al kuyb'al mak. 13Keje uri ile chi i ajsujul sipon kutz'onoj ni kuyb'al mak puwi i winaq le chi xtzaq chupam jun che ni'pa taq i makunik le, are uri i umak le kkuytaj ni che. Ni'pa i arin chi kk'is taj re ni ajsujul sipon.
Sipon porom rumal i maktajik
14I Ajwal xub'ij che ma Moisés:
15We jun winaq xmaktaj che jun b'iroxik re i Ajwal tupu chu'anik taj xu'ano, lik xmakun uri. Rajwaxik uri chi kuk'am b'i jun chij ma chi lik klis taj re riqb'al kuyb'al umak xaq rajwaxik chi kch'ob'ik ni'pa rajil che saq-o'oj i chij le chrij pacha rajil chi kb'ix chila pa lo'laj k'ijib'al re Dios, ile are jun sipon re riqb'al kuyb'al umak. 16Xwi ta la ile i ajmak le kutoj ni ronojel ni'pa xramtaj che ub'itaq re i Ajwal xaq kutoj chik juwinaq puwi i jutaq jo'winaq kujach che i ajsujul sipon. I chij ma chi kporox na, ru' ile i ajsujul sipon kutz'onoj ni kuyb'al mak puwi i winaq le, man kkuytaj ni umak che.
17Jun winaq tupu chu'anik taj xuqel utzij upixab' i Ajwal lik ajmak uri xaq lik kutij ni uri uyej rumal umak. 18Kuk'am b'i uri jun chij ma chi lik klis taj chwach ajsujul sipon, xaq rajwaxik uri chi kch'ob'ik ni'pa rajil i chij le chi re i riqb'al kuyb'al umak. Keje uri ile chi i ajsujul sipon kutz'onoj ni kuyb'al mak puwi i winaq le chi chu'anik taj xmakunik, man keje ile kkuytaj ni umak che. 19Ile are jun sipon re riqb'al kuyb'al mak man i winaq le xmakun chwach i Ajwal.
Currently Selected:
Lev%EDtico 5: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala