Lev%EDtico 7
7
Atb'al tzij chrij i sipon porom re maktajik
1I sipon chi ksujuxik re riqb'al kuyb'al mak lik o u'ij xaq lik elsam re ni Ajwal, rumali chi rajwaxik chi yix ki'an na pacha intaqom chiwe: 2I chikop chila kwor wi puqul, ipa kwor wi pkiqul i chikop chi poroxik ke. I ukik'el kkitixixej ni chrij chwach i sujb'al sipon. 3Te'uri ksujux ni uxepuyil i chikop le: Uje xaq i xepu chi o chrij ronojel i rixkol, 4chekeb' u-riñón rachi'ilam i xepu chi o chrij, xaq i xepu chi o chrij i loma xaq i xepu chi o chrij useseb'; ronojel i xepu le kelsax na. 5I ajsujul sipon kuporoj ni ronojel ile puwi i sujb'al sipon pacha jun sipon chi poroxik re chwach i Ajwal. Ile are jun sipon rumal i maktajik. 6Konojel i ajsujul sipon utz kkitij i sipon le, xwiri rajwaxik chi lik che jun k'ijib'al chi lik o u'ij, xaq lik elsam na re i Ajwal kkitij wi man ile lik o u'ij xaq lik elsam na re i Ajwal.
7I atb'al tzij re i sipon chi re i mak atzalal xaq are i atb'al tzij ile re i sipon rumal maktajik. I chikop chi kusujuj i ajsujul sipon re riqb'al kuyb'al mak o ni kutij ire che. 8Xaq i tz'um re i chikop chi poroxik re, re ni ajsujul sipon chi ksujuwik. 9Xaq keje ile k-ani che ronojel i sipon ch'irajil chi kcha'sax ni pa orno, pa b'oj xaq we pa xaltin, lik o ni uri re i ajsujul sipon che. 10Ronojel ni'pa i sipon ch'irajil, chaqij xaq we yot'om ru' aceite, xaq ke ni uk'ojol ma Aarón, lik junam ujachik kki'an chkiwach.
Atb'al tzij chrij i porom sipon re chomb'al ib'
11Iri are i atb'al tzij re i sipon re chomb'al ib' chi ksujux chwach i Ajwal. 12We re tioxb'al ksujuxik, xaq ksujux uri i wa re trigo chi nti kunb'al ru' xwiri kyot' aceite ru', chok'ok' chi nti kunb'al ru' xwiri ksusax aceite chwach, xaq lejom wa re trigo chi xaq kyot' aceite ru'. 13Junam ru' i sipon le xaq rajwaxik chi kjach ni keb' oxib' wa re trigo chi o kunb'al ru'. 14Ronojel ni'pa i sipon kk'am jub'i' che ksujux chwach i Ajwal pacha jun qasan, xwiri ni'pa i kk'is taj re ni i ajsujul sipon chi ktixaw i kik' re i sipon re chomb'al ib'.
15I ti' chi ksujux chwach i sipon rajwaxik uri re tioxb'al uxlanem k'uxij chi ktijaw che i ij chi are ksujux i sipon le chwach i Ajwal, lik nti kkanax kanoq re chukab' ij. 16We o jun kuk'am li usipon ru' ronojel uk'ux xaq we ax usujum wi, i ti' re i sipon le, xwi ti utz ktijaw che i ij are ksujux che i Ajwal, xaq i ti' chi xk'is taj, utz ktijaw chukab' ij. 17Xwiri ronojel i ti'ij chi kk'is ti che ukab' ij, kjarsax ni uri pa a' churox ij. 18I ti' re i sipon chi re chomb'al ib' we ktijaw churox ij, lik nti x-on re uri i sipon le chi xsujux chwach i Ajwal, xaq koksax ti pajil man i ti' le utz ti chik, xapachin ktijaw i ti' le lik kmakun uri xaq lik kutij ni k'ax rumal umak le. 19Xab'i chi winaqil chi kuna ire ch'am chwach i Dios, utz uri kutij i ti' chi uqax i sipon xwiri xab'iroxik chi ch'am taj we kuchap i ti' le, i ti' le xkanaj uri chi lik ch'am taj i ktijaw ti chik uri xaq lik kjarsax ni pa a'. 20Jun winaq we ch'am taj i kutij i ti' chi sujtal chwach i Ajwal re chomb'al ib', lik kelsax b'i uri putinimit. 21We jun kuchap utz'ilal jun winaq, xaq re jun chikop xaq xab'iroxik chi ch'am taj, te'uri kutij i ti' re i sipon re chomb'al ib' chi sujtal chwach i Ajwal, i winaq le lik kelsax b'i uri putinimit.
Atb'al tzij chrij i kik' xaq i xepu
22I Ajwal xub'ij che ma Moisés, 23chi kub'ij chke i aj Israel: Yix kitij ti xepu chi o chke i chikop, i xepu chi o chke i chij xaq i xepu chi o chke i chab'at. 24I xepu re jun kamnaq chikop xaq we ch'aqa taq kumal itzel taq chikop, utz we kiya chik jun ropis, xwiri re ti kitijo. 25Xapachin jun we kutij i uxepuyil jun chikop chi sujtal chwach i Ajwal re i sipon chi poroxik re, i winaq le lik kelsax b'i uri putinimit.
26Xaipa kixjeqi wi yix lik mitij uri i kik' re jun tz'ikin xaq we re jun chik chikop. 27Xapachin jun winaq we kutij i kik' lik kelsax b'i uri putinimit.
I ti' chi kya' che i ajsujul sipon
28I Ajwal xub'ij che ma Moisés, 29chi kub'ij chke aj Israel:
Jun we kusujuj usipon re chomb'al ib' chwach i Ajwal, rajwaxik uri chi lik are ire kuk'am b'i chwach i Ajwal, 30Lik ru' ni u'ab' kuk'am b'i chwach i Ajwal kusujuj ni jub'i' sipon chi poroxik re kuk'am b'i upechil, uxepuyil re jun nim laj nima'ij chwach i Ajwal. 31I ajsujul sipon kuporoj ni xepu chwach i Ajwal xwiri i upechil re ni ma Aarón xaq ke ni umuq uxikin. 32I ra' i chikop wiqab'im chi re i sipon chi re chomb'al ib' kya' ni che i ajsujul sipon pacha jun qasan. 33I ra' i chikop wiqab'im le re ni i ajsujul sipon chi ksujuw i kik' xaq i xepu re i sipon re chomb'al ib'. 34Man i sipon re chomb'al ib' chi kkisujuj aj Israel chinwach, xwesaj kan ra' xaq upechil i chikop, pacha jun qasan chi kinya ni che ma Aarón xaq chke umuq uxikin chi je ajsujul sipon. Ile are jun atb'al tzij ronojel ij saq chkixol i aj Israel.
35Che i sipon chi kporox chwach i Ajwal, xya' che ma Aarón xaq chke i je umuq uxikin, che i ij are i Ajwal xuya kipatan chi ajsujul sipon re Ire. 36I Ajwal lik ub'im chke aj Israel chi che i ij are kya' kipatan i je ajpatan, o ni jub'i' ke che i ti'. Ile lik are jun atb'al tzij ronojel ij saq uwach chke kimuq kixikin.
37Are ronojel atb'al tzij ile chrij i sipon chi poroxik re, sipon chi ch'irajil, sipon re riqb'al kuyb'al mak, sipon rumal i maktajik, i sipon le are kya' kipatan i je ajsujul sipon xaq i sipon re chomb'al ib'. 38Chi xuya i Ajwal che ma Moisés chila tzam jyub' Sinaí chi xaq che i ij le ma Moisés xeutaq b'i i aj Israel chusujuxik kisipon chila pa tz'inilik jyub' chaqij Sinaí.
Currently Selected:
Lev%EDtico 7: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala