N%FAmeros 13
13
Ma Moisés keutaq b'i ajtaqanel chrilik i ulew Canaán
1I Ajwal xlapan ru' ma Moisés, xub'ij che:
2“Chataqa b'i jub'an achiyab' chrilik i ulew Canaán chi kinya chke aj Israel. Chataqa b'i jun chke i jutaq tzob'aj xwiri are o kipatan chkixol.”
3Keje pacha xub'ij i Ajwal che ma Moisés xeutaq b'i jub'an winaq chrilik ulew Parán, kelik chila pa tz'inilik jyub' chaqij chi Parán ub'i. Ike le konojel is o kipatan chkixol aj Israel. 4Are kib'i i winaq iri chi xeupon chrilik ulew Canaán: Ma Samúa, chi rak'al ma Zacur, chi are jun chke utzob'ajil ma Rubén. 5Ma Safat, chi rak'al ma Hori, chi are jun chke utzob'ajil ma Simeón. 6Ma Caleb, chi rak'al ma Jefone, chi are jun chke utzob'ajil ma Judá. 7Ma Igal, chi rak'al ma José, chi are jun chke utzob'ajil ma Isacar. 8Ma Oseas, chi rak'al ma Nun, chi are jun chke utzob'ajil ma Efraín. 9Ma Palti, chi rak'al ma Rafú, chi are jun chke utzob'ajil ma Benjamín. 10Ma Gadiel, chi rak'al ma Sodi chi are jun chke utzob'ajil ma Zabulón. 11Ma Gadi, chi rak'al ma Susi, chi are jun chke utzob'ajil ma José, chi ke'eloq are utzob'ajil ma Manasés. 12Ma Amiel, chi rak'al ma Gemali, chi are jun chke utzob'ajil ma Dan. 13Ma Setur, chi rak'al ma Micael, chi are jun chke utzob'ajil ma Aser. 14Ma Nahbi, chi rak'al ma Vapsi, chi are jun chke utzob'ajil ma Neftalí. 15Ma Geuel, chi rak'al ma Maqui, chi are jun chke utzob'ajil ma Gad.
16Are kib'i konojel i winaq ile chi xeutaq b'i ma Moisés chrilik ulew Canaán. Ma Moisés xujalwachij ub'i ma Oseas, chi uk'ojol ma Nun, xuya pub'i ma Josué.
17Ma Moisés are xeutaq b'i achiyab' chrilik ulew Canaán, xub'ij chke:
—Nab'e kixik'aw pa Neguev, te'uri kixel b'i chwi jyub'. 18Chikojo retalil wach mer u'anom i tinimit xaq chikojo retalil we o kicho'ab' xaq we nti kicho'ab' i winaq chi je o chila, we je k'i xaq we je k'i taj. 19Chiwila we lik chom kulew o we chom taj, xaq we sutim rij ru' tapial nim uwach o we ntaj. 20We lik k-on i tikon o k-on taj xaq we o che' chwach xaq we ntaj. Lik mixij iwib', chik'ama li jujun uwach i tikon chi o chila —xcha ma Moisés chke.
Ile xuk'ulmaj che taq i ij are kmol nab'e taq uwach i uva. 21Are uri xe'e achiyab' chrilik i ulew le, lik xkitaqej na'al upam i tinimit, xkijeq li pa tz'inilik jyub' chaqij Zin chila pa wiqab', xkitanb'a rilik k'a Rehob, chila pa moxab' chutzal i okb'al re i Hamat. 22Xe'ok b'i pa Neguev, xeupon k'a pa Hebrón. Chila je jeqel wi ma Ahimán, ma Sesai xaq ma Talmai, chi je umuq uxikin ma Anac. I tinimit Hebrón wuqub' junab' uyakik chuxe'el i tinimit Zoán chi o chila pa Egipto. 23Xeupon k'a pa raqana re ma Escol, are uri xkik'atzij jun u'ab' uva chi lik ch'uych'ik uwach, xkiya b'i chrij jun teltik che', te'uri xkitelej b'i keb' achiyab', xaq xkich'up b'i granada xaq i higo. 24I raqana le xya' pub'i Escol rumal u'ab' uva chi lik ch'uych'ik uwach chi xkik'atzij aj Israel chila.
25Chrijil chik rilik ronojel ulew le chi xkich'ij kawinaq (40) ij chusolixik, i kab'lajuj achiyab' le xetzalij chal 26chila pa Cades pa tz'inilik jyub' chaqij Parán. Chila je o wi ma Moisés, ma Aarón xaq konojel aj Israel, are uri xkilap chke wach taq xekila loq xaq xkik'ut uwach i echa' chke chi kik'amom li pa tinimit chi xeupon chrilik. 27Xkib'ij che ma Moisés:
—Xojupon chwach ulew ipa xojataq wi b'ik, lik saq laj tzij chila chwach ulew le lik o i leche xaq lik o uwa'al kab' chi lik kramtaj taj, xaq lik are uwach i echa' iri chi kuya ulew chila. 28Xwiri i winaq chi je jeqel chila lik o kicho'ab', i kitinimit lik nimaq xaq lik sutim rij ru' tapial chi nim uwach. Xwi ta la ile, xaq xqil kiwach i je umuq uxikin ma Anac. 29Chila pa Neguev je jeqel wi aj Amalec, aj Het, aj Jebús xaq aj Hamor chila chijyub' je jeqel wi. I aj Canaán chila je jeqel wi chuxol i mar ru' i raqana Jordán.
30Are uri ma Caleb xeu'atij aj Israel che i ch'awik chi je o chwach ma Moisés, xub'ij chke:
—¡Yoj lik kqamaj ni kan ulew le man yoj lik kojtiki ni chke! —Xcha.
31Xwiri ni'pa je enaq ru' ire xkila' uwach che:
—¡Kojtiki taj, kojtiki ti chumajik ulew le chke i winaq man ike lik o kicho'ab' chqawach yoj! —Xecha.
32Are uri ike le xe'ok chkit'orik aj Israel junwi ub'ixkil xkib'ij chrij i tinimit chi xeupon chrilik, keje iri xkib'ij:
—Ulew chi xojupon chrilik nti k'aslemal chwach xa kekam i winaq chi kek'iji chwach; xaq konojel i winaq chi xqil kiwach chila lik naj kij. 33Xaq xqil kiwach umuq uxikin ma Anac chi lik naj kij. Yoj are xojk'iji pkitzal lik oj pacha ral taq sak' man xa ch'utiq qij chkiwach ike xaq keje xkil ike chqe yoj.
Currently Selected:
N%FAmeros 13: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala