N%FAmeros 23
23
1Are uri ma Balaam xub'ij che ma Balac:
—Cha'ana wuqub' sujb'al sipon chwe warali, xaq chayijb'a wuqub' ral taq me' xaq wuqub' chij mama'ib'.
2Ma Balac xu'ano pacha xb'ix che rumal ma Balaam. Are uri junam xkikamsaj jun ral me', xaq jun chij xkisujuj puwi i jujun sujb'al sipon.
3Te'uri ma Balaam xub'ij chik che ma Balac:
—Chatkanaj kan yet chi ru' i siponi tz'aqat kin-e yin chrilik moqxa kraj i Ajwal kinlapan ru', te'uri kinb'ij ni chawe wach taq kub'ij Ire chwe.
Are uri ma Balaam x-e che jun tz'inilik jyub'.
Ma Balaam kuya utzil chomal pkiwi aj Israel
4Chila pa tz'inilik jyub' chaqij le xuk'ut wi rib' i Dios che ma Balaam. Are uri ma Balaam le xub'ij che i Dios:
—Inyijb'am wuqub' sujb'al sipon xaq pkiwi i jujun sujb'al sipon le insujum jun ral me' xaq jun chij ma.
5Are uri i Ajwal xuya i tzij puchi' ma Balaam chi rajwaxik kub'ij, xaq xub'ij che:
—Chattzalij chik chila ipa o wi ma Balac, chab'ij ronojel i tzij che pacha xinb'ij Yin chawe yet. 6Te'uri ma Balaam xtzalij chub'ik, xuriqa ma Balac k'a tak'al ru' i sipon, achnimam kumal konojel je unimaqil ke aj Moab. 7Are uri ma Balaam xutzijoj wach k-antaj na:
K'a tzam taq jyub' prelb'al ij, xaq k'a pa Aram, xink'un rumal
ma Balac chi ajawinel ke aj Moab:
“Sa'aj wu' xub'ij, cheak'oqoj aj Israel chwe
xaq chatz'onoj k'oqb'al puwi utinimit ma Jacob”; xub'ij chwe.
8¿Wach taq wa uk'oqoxik jun tinimit we kk'oqox ti ne rumal i Dios?
¿Wach taq wa utz'onoxik i utz taj puwi i tinimit le chi i Ajwal utz uya'om puwi?
9Lik k'a puwi i nimaq taq ab'aji kewil wi konojel i winaq le,
xaq lik k'a puwi i nimaq taq jyub'i keintaqej konojel.
Ile lik are jun tinimit chi u'anom rib',
lik junwi chkiwach i jub'an chik tinimit.
10Je keje pacha uk'aj ulew ¿Pachin wa ktiki taq chkajlaxik i ma Jacob?
¿Xaq pachin taq wa ktiki chrajlaxik jun chke ukaj tzob'aj ke aj Israel?
Wetene keje i kamik ile kin-an yin pacha kikamik i utz laj taq winaq le,
xaq wetene keje usachik inwach yin ile pacha usachik kiwach ike le!
11Are uri ma Balac xuch'ojij che ma Balaam:
—¿Wach kattijin chu'anik? Yin xintaq ak'amik man keak'oqoj i ajch'oj chwij, xwiri yet xa utzil chomal xatz'onoj pkiwi.
12Are uri ma Balaam xub'ij che ma Balac:
—Xqayijb'a twa awu' chi yin xwi kinb'ij i tzij chi kuya i Ajwal pinchi'.
13Xwiri ma Balac lik x-on pen che ma Balaam, xub'ij che:
—Jo chik wu' jela che jun k'ijib'al ipa xwi k-aljin chrij chwach i k'ijib'al ipa je o wi aj Israel, lik kawil ti ronojel i kik'ijib'al, chila cheak'oqoj wi chwe.
14Are uri ma Balac xuk'am b'i ma Balaam puwi jyub' chi Zofim ub'i, puwi i jyub' Pisga, chila x-on wi wuqub' sujb'al sipon xaq xukamsaj jun ral me' xaq jun chij ma puwi i jujun sujb'al sipon le. 15Are je o chik chila, ma Balaam xub'ij che ma Balac:
—Chatkanaj kan yet chi ru' i siponi tz'aqat yin kin-e pa lapanik ru' i Ajwal.
16I Ajwal xel li chuk'ulaxik ma Balaam re klapan ru', xaq xuya i tzij puchi' chi rajwaxik kub'ij ma Balaam le; xaq xub'ij che:
—Chattzalij chila ipa o wi ma Balac xaq chab'ij i tziji che chi xinb'ij Yin chawe —xcha.
17Te'uri ma Balaam xtzalij chub'ik, xuriqa ma Balac k'a tak'al ru' i sipon, achnimam kumal konojel je unimaqil ke aj Moab, i ma Balac xutz'onoj che:
—¿Wach xub'ij i Ajwal chawe?
18Are uri ma Balaam xub'ij i tzijonik re i Ajwal:
Ma Balac, chi rak'al ma Zipor,
lik chata ub'e wach i kinb'ij chawe.
19I Dios keje taj pacha i winaq,
man ire kt'oron taj xaq kujalwachij ti utzij.
Xaq are kub'ij chi ku'an jun b'iroxik, lik ku'an na,
xaq are kusujuj jun b'iroxik lik kuya na.
20Yin yatal pin-ab' chi kinya ni utzil chomal,
we are i Dios kyaw utzil chomal, yin kintiki ti chujalwachixik.
21I Dios ukojom ti pajil kimak xaq ukojom ti pajil ni'pa i utz taj
chi kki'an aj Israel, chi utinimit ma Jacob.
I Kajwal Dios o chkixol ike
xaq ike kkikoj u'ij man are Ire kajawinel.
22I Dios le are xe'elsaw li pa Egipto ru'
pacha ucho'ab' jun nim laj toro aj pa taq es chi búfalo ub'i.
23I itz kok ti ru' ma Jacob,
xaq i je aj-itz ketiki ti che i tinimit Israel.
Wo'or lik rajwaxik chi kb'ix che i tinimit Israel:
“¡Lik nimaq taq il u'anom i Dios chawe!”
24I tinimit le kwalij na
xaq lik kxib'in na pacha jun koj,
k'a ktiki ni chuchapik uti'
xaq k'a ktiki ni chutz'ub'ik kikik'el ni'pa ktiki chkikamsaxik.
25Are uri ma Balac xub'ij che ma Balaam:
—¡We kak'oqoj ti i tinimit le chwe, xaq maya uri utzil chomal puwi!
26Are uri ma Balaam xub'ij che:
—¿Xinb'ij ti b'ari chawe chi xwi kin-ano pacha kub'ij i Ajwal chwe?
27Are uri ma Balac xub'ij che:
—Jo wu', che jun chik k'ijib'al, moqxa kraj ti Dios chi kak'oqoj i tinimit Israel che i k'ijib'ali.
28Are uri ma Balac xuk'am b'i ma Balaam puwi i jyub' chi Peor ub'i, ipa k-aljin wi ronojel i tz'inilik jyub' chaqij. 29Puwi i jyub' le ma Balaam xub'ij che ma Balac:
—Cha'ana wuqub' sujb'al sipon chwe warali xaq chayijb'a wuqub' me' xaq wuqub' mama'ib' chij.
30Ma Balac xu'ano pacha xb'ix che rumal ma Balaam. Are uri ma Balac le xukamsaj jun me' xaq jun chij ma puwi i jujun sujb'al sipon.
Currently Selected:
N%FAmeros 23: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala