N%FAmeros 4
4
Kichak aj Leví
1I Ajwal xlapan ru' ma Moisés xaq ru' ma Aarón, xub'ij chke:
2Chi'ana jun ajlanik chke i kalk'uwalil kiqajaw aj Leví, chi je umuq uxikin kan ma Coat, 3chakojo pajil ni'pa o chik lajuj juwinaq (30) junab' chke k'a che i lajuj kawinaq (50) junab' chi lik ketiki chu'anik i chak pa ja re riqb'al ib' ru' i Dios.
4I chak chi kki'an umuq uxikin ma Coat chila pa ja re riqb'al ib' ru' i Dios, pa lo'laj k'ijib'al re i Dios, are iri: 5I winaq are kkimaj b'i kib'e i ma Aarón xaq i rak'al kkesaj ni k'ul chi o pa okb'al che i lik Lo'laj K'ijib'al re i Dios xaq ru' i k'ul le kuch'uqb'ej rij i kaxa re utrat i Dios, 6i kaxa le kich'uq uwi ru' i tz'um chi lik wajim, xaq puwi i tz'um le kilik' b'i k'ul kaqxar chi xa jun raqan, xaq kikoj b'i che' che i kaxa re k'amb'al b'i re. 7Xaq kilik' ni jun k'ul kaqxar puwi i mexa chi yab'al wa re trigo chwach i Ajwal, xaq puwi i mexa le kya' wi laq, lochb'al, tu'b'al ya, xar jamb'al re i uwa'al uva muqb'am, xaq i wa chi arewi ksujuxik. 8Te'uri krip jun k'ul kaq puwi ronojel ile, chrijil chik ile te'uri krip chub'i jun tz'um wajim, pa k'isb'al re kiya puwi keb' che' k'amb'al b'i re. 9We x-antaj ile te'uri kikoj jun k'ul kaqxar chrij i tzuk'b'al ch'uqb'al re, xaq keje ki'an che i wuqub' u'ab' i tzuk'b'al, chapb'al a'al, ral taq laq, xaq ronojel ni'pa i tu'b'al chi yab'al aceite. 10Ronojel ile kpasix ni chupam jun tz'um wajim, kiya b'i chwach keb' che' re k'amb'al b'i re.
11Xaq kilik' ni jun k'ul kaqxar puwi i sujb'al sipon an-o'oj, ronojel ile kpasix ni chupam i tz'um wajim, xaq kiya b'i chwach keb' che' re k'amb'al b'i re. 12Te'uri kimol ni ronojel ni'pa i chapb'al kchapb'ex chila pa lo'laj k'ijib'al re i Dios, kipasij b'i chupam jun k'ul kaqxar, te'uri kib'alk'atij chupam i tz'um wajim k'amb'al b'i re chwach che'. 13Rajwaxik chi kiwesaj i chaj che i porb'al sipon, te'uri kilik' b'i jun k'ul chi kaqxar puwi, 14xaq ronojel ni'pa chapb'al chi kkojik are kporox i sipon kiya puwi: Chapb'al a'al, chapb'al ti'ij, pala xaq i nimaq taq laq, lik ronojel ni'pa i chapb'al chi kkojik are kporox i sipon kya' b'i puwi. Ile klik' ni jalajuj taq tz'um wajim puwi xaq kya' b'i chwach keb' che' k'amb'al b'i re. 15Are keutzin ma Aarón xaq i je rak'al chupasixik xaq chub'alk'atixik ronojel i b'iroxik chi je chatalik kojb'al re u'ij i Dios, xaq are yij chik ronojel ni'pa ile, xaq ya kkimaj b'i kib'e are uri kepe umuq uxikin ma Coat chuk'amik b'ik. Xwiri mkiyinya i jalajuj taq b'iroxik ru' ki'ab' chi je chatalik kojb'al re u'ij, man keje ile kekam taj. Ronojel ni'pa i b'iroxik re i ja re riqb'al ib' ru' i Dios, are ile kkik'am b'i umuq uxikin ma Coat. 16I ma Eleazar chi uk'ojol i ajsujul sipon chi ma Aarón, chuqul ire o wi uk'amik b'i aceite re i tzuk'b'al, pom chi lik muy, sipon ch'irajil chi arewi ksujux chwe, xaq i lo'laj aceite chi koksax che i jolomaj. Xaq chuqul ire o wi uchajixik i ja re riqb'al ib' ru' i Dios, xaq ronojel ni'pa o chupam xaq ronojel i jalajuj taq b'iroxik chi je chatalik kojb'al re u'ij i Dios.
17I Ajwal xlapan ru' ma Moisés xaq ru' ma Aarón, xub'ij chke:
18Miya chke i ralk'uwal ma Coat chi ksach kiwach chkixol aj Leví. 19Man keje ile kya' ti utojb'alil chke ru' i kamik rumal kkichap i b'iroxik chi je chatalik kojb'al re u'ij, are kki'ano are iri: I ma Aarón xaq i je rak'al are ike keb'in ni chke wach rajwaxik kki'an chkijujunal xaq wach taq kkik'am b'ik. 20Man keje ile ike to' ti ke'ok taq b'i pa ja chrilik i jalajuj taq b'iroxik chi je chatalik xaq o u'ij, xaq kekam ti uri.
21I Ajwal xlapan ru' ma Moisés, xub'ij che:
22Xaq cha'ana jun ajlanik chke konojel umuq uxikin ma Gersón pa taq alk'uwalil xaq pa taq tzob'ajil, 23chi kjeqan b'i kijunab' che lajuj juwinaq (30) k'a che i lajuj kawinaq (50) junab' chi lik ketiki chu'anik kipatan pa ja re riqb'al ib' ru' i Dios.
24I chak chi kki'an umuq uxikin ma Gersón are iri: 25Kkik'am nu b'i kortin re i ja re riqb'al ib' ru' i Dios, kkik'am nu b'i kortin re uwi i ja re riqb'al ib' ru' i Dios, tz'um chi ch'uqb'al uwi i ja re riqb'al ib' ru' i Dios, xaq i kortin re uchija i ja re riqb'al ib' ru' i Dios, 26kortin re uwaja, kortin chi sutinnaq chrij chwach ronojel i ja re riqb'al ib' ru' i Dios xaq ipa o wi i sujb'al sipon, i laso xaq ronojel ni'pa chapb'al chi kajwax chila ipa o wi ja re riqb'al ib' ru' i Dios. 27Je are ni ma Aarón xaq i je rak'al keok'aw utzam chke umuq uxikin ma Gersón che i jalajuj taq chak chi kki'ano, xaq i b'iroxik chi kkik'am b'ik. Yix ki'an ni chke chi lik kki'ano wach o chkiqul u'anik. 28Are ni chak ile chi kki'an umuq uxikin ma Gersón pa ja re riqb'al ib' ru' i Dios, i kok'aw utzam chke ike le are ma Itamar chi uk'ojol ma Aarón chi ajsujul sipon.
29Xaq cha'ana jun ajlanik chke konojel umuq uxikin ma Merari pa taq alk'uwalil xaq pa taq tzob'ajil. 30Chatz'ib'aj kib'i konojel ni'pa kjeqan b'i kijunab' che lajuj juwinaq (30) k'a che i lajuj kawinaq (50) junab' chi lik ketiki chu'anik kipatan pa ja re riqb'al ib' ru' i Dios. 31I chak chi kki'ano are uk'amik b'i tz'alam re i ja re riqb'al ib' ru' i Dios, b'alul, aqan xaq ukub'ib'al, 32i aqan chi kkisutij rij i lo'laj k'ijib'al re i Dios, ukub'ib'al, estaka xaq i laso, ronojel ni'pa i rajwaxik chke chi re i kichak. Yet kab'ij ni usuk' chke chrij pacha kib'i ni'pa i b'iroxik chi kkik'am nu b'ik. 33Are ni chak ile chi kki'an umuq uxikin ma Merari pa ja re riqb'al ib' ru' i Dios, i kok'aw utzam chke ike le are ma Itamar chi uk'ojol ma Aarón chi ajsujul sipon.
34Ma Moisés, ma Aarón xaq i kaj-atzil i tinimit, xki'an i ajlanik chke i ralk'uwalil ma Coat chrij pacha i kalk'uwalil kiqajaw, 35konojel ni'pa kjeqan b'i kijunab' che lajuj juwinaq (30) k'a che i lajuj kawinaq (50) junab', chi lik ketiki chu'anik kipatan pa ja re riqb'al ib' ru' i Dios. 36Konojel achiyab' chi xtz'ib'ax kib'i, je lajuj wuqlajujwinaq waqmo' (2,750) 37Are kik'iyal konojel umuq uxikin ma Coat ile chi xkajlaj ma Moisés xaq ma Aarón chrij pacha i taqanik chi xuya i Ajwal che ma Moisés, chi ketiki chu'anik kipatan pa ja re riqb'al ib' ru' i Dios.
38Xaq i ralk'uwal ma Gersón chrij pacha i kalk'uwalil kiqajaw, 39konojel ni'pa kjeqan b'i kijunab' che lajuj juwinaq (30) k'a che i lajuj kawinaq (50) junab', chi lik ketiki chu'anik kipatan pa ja re riqb'al ib' ru' i Dios, 40je lajuj julajujwinaq waqmo' (2,630) 41Are kik'iyal konojel umuq uxikin ma Gersón ile chi xkajlaj ma Moisés xaq ma Aarón chrij pacha i taqanik chi xuya i Ajwal che ma Moisés, chi ketiki chu'anik kipatan pa ja re riqb'al ib' ru' i Dios.
42I je ralk'uwal ma Merari chrij pacha i kalk'uwalil kiqajaw, 43konojel ni'pa kjeqan b'i kijunab' che lajuj juwinaq (30) k'a che i lajuj kawinaq (50) junab', chi lik ketiki chu'anik kipatan pa ja re riqb'al ib' ru' i Dios, 44je wajxaqmo' (3,200) achiyab'. 45Are kik'iyal konojel umuq uxikin ma Merari ile chi xkajlaj ma Moisés xaq ma Aarón chrij pacha i taqanik chi xuya i Ajwal che ma Moisés.
46Konojel i je aj Leví chi xkajlaj ma Moisés, ma Aarón xaq i kaj-atzil i tinimit Israel chrij pacha i kalk'uwalil kiqajaw, 47chi kjeqan b'i kijunab' che lajuj juwinaq (30) k'a che i lajuj kawinaq (50) junab', chi lik ketiki chu'anik kipatan pa ja re riqb'al ib' ru' i Dios, 48je b'elejwinaq jumo' juchiy (8,580) achiyab'. 49I ajlanik le x-anik chrij pacha i taqanik chi xuya i Ajwal che ma Moisés; xb'ix chke chkijujunal wach kki'ano xaq wach taq kkik'am b'ik; lik pacha i taqanik chi xuya i Ajwal che ma Moisés.
Currently Selected:
N%FAmeros 4: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala