YAM JAH 22
22
Krax Yum Rhawm Abraham
1Khaix hoik luan ceu inkix, Siyiex cheuk cheu ti yaox Abraham ah nin ka nawh, “Abraham eue, ” mai nawh pawk lox, “Aux ot tin heue.” 2Nawh Cao ah nin, “Teei kawn simex maix Icak, pa kied moh maix, pa koe tix kaux khaing mai hu ka haktiex Mawrix, yuh krax tan pa gleeing ka ngu son Aux piang gawng pa sang jhi Aux maix yaox heue.” 3Mawh kheu nan Abraham kaoh caocao plak ponngawb mai sau an la khankix mai kok kawncau nawh ra kaux tau mai kawn simex nawh Icak, mai nawh lug khix son pa sang gleeing nawh mai kaoh hu ka dee hoik ah Siyiex ka nawh heue. 4Khaix hoek loe ngaix Abraham yaog ngai tix mai yaox ka dee an, dee singai heue. 5Abraham ah nin ka kawncau nawh khankix, “Ot tin tau mai la awx, kawn nyawm mai aux tak sang hu toi plak an mai krub ka Siyiex mai tak deeh hoek ka pax heue.” 6Mawh kheu nan, Abraham teei khix pa sang gleeing ti tan mai kieh kawn simex tix Icak klawm hu, nawh teei ngu mai vaid tix kre mai kiex lih hu tau heue. 7Icak ah nin ka keeing tix Abraham, “Keeing eue, ” mai nawh deeh pawk lox Icak, “Kawn simex eue, aux ot tin heue.” Nawh tom deeh ah nin, “Jhak heue, ngu mai khix hoik koe, viang mawh nan, kawn yung pa sang gleeing ex tix tan, koe dee mawx?” 8Abraham deeh ah nin, “Kawn eue, Siyiex tak tawx kawn yung an, son pa sang gleeing ex ti tan son Nawh Cao heue.” Kiex ra kaux lih hu tau heue. 9Yam hoek kiex ka dee ah Siyiex ka nawh tan, Abraham sum khu dee tan tix mu tan mai deuh khix piang heue, nawh phyawk kawn tix Icak mai deuh nawh piang khix ka khu dee tan#Yak 2:21 heue. 10Khaix an Abraham nyeu taix tix mai teei vaid sonsang pah ka kawn tix heue. 11Yam an, kawncau Simiang Siyiex kok nawh khaing daux raoma ah nin, “Abraham, Abraham” mai nawh deeh pawk lox, “Aux ot tin heue.” 12Nawh cao ah nin, “Maix paw teeh ka kawn maix mai paw yuh tix ceu kawx ka nawh, grawh grawng nawh, yam in Aux hoik tawng lhat maix ka Siyiex mai Aux hoik yaox ang maix thiang pa mhaing Aux kawn simex maix tix kaux son Aux heue.” 13Abraham yaog ngai tix mai jhak, nawh yaox ka kawn yung mhaing tix mu plak khaix nawh, pa vung viien rung tix ka yeem heue. Mawh kheu nan, Abraham hu teei kawn yung iak an mai gleeing piang khu, tang kawn tix heue.#He 11:17-19 14Abraham kok ceu kaux dee an mawh, “Simiang Siyiex tak sang tawx, ” tom in singaix pui ah mawh “gawng pa hoik cox khre Simiang Siyiex” ka heue. 15Kawncau Simiang Siyiex deeh kok ka Abraham ra bawg tix bawg. 16Nawh ah nin, “Aux hoik tiextu ka Tokaux Cao tix, mawh kheu maix hoik yuh ceu inkix mai ang thiang ka kawn tix kaux maix an ka Aux heue.” 17“Aux nawb bwan ka maix mai Aux tak kieh doeh ru maix nie baox haoh hun#He 6:13-14 awm simuing daux raoma mai awm mhaik pa koe praok rawm sigrit sigra heue.#He 11:12 Doeh ru maix khankix kawx, Aux tak kieh kix kwang ka diang siviex pui koeng maix khawmuik heue. 18Can ceu pui khawmuik piang haktiex in, tak pon bwanson#Cau 3:25 kheu hoik cu nghiet maix ka gumlox Aux heue.” 19Mawh kheu nan, Abraham deeh ing ka kawncau nawh khankiex. Kix yaog tix hu tau ka Berashebax mai Abraham ot tan heue.
Nyiex Ma Nakhaw
20Khaix hoik luan ceu inkix khawmuik, Abraham mhong grawng krai pui ah nin, “Moeng pux nawh Nakhaw pa kaux Milakha hoik keh kawn simex khankix ka son nawh heue.” 21Kawn Ai mawh Uzax kawn Nyi mawh Buzax, kawn Sam mawh Kemoelax pa mawh keeing Aram, 22Kawn Sai mawh Khetiet, kawn Ngox mawh Hazaw, kawn Log mawh Piladaha, kawn Ciet mawh Yidalax mai kawn Piet mawh Betoelax khankix, 23Betoelax mawh keeing Rebekha heue. Inkix mawh kawn simex daix kaux pa keh khaing Milakha son Nakhaw pux Abraham khawmuik heue. 24Moeng iak Nakhaw, pa mawh Ruma kawx, deeh baox keh Tebax, Gahan, Tahashax mai Makha khankix heue.
Currently Selected:
YAM JAH 22: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
