YAM JAH 26
26
Icak Ot Garax
1Khaix hoik koe krax sibhawm praix baux ju Abraham tix bawg, khaix an krax sibhawm praix baox koe daux meung an, Icak hu veng Gerax ka Abimaliet pa mawh Simiang Philitix heue. 2Yam an Simiang Siyiex deeh lih bleeh ka nawh ah nin, “Paw lih hu plak meung Ejiptux, ot ka haktiex pa sang krai Aux ka maix heue. 3Ot ka daux haktiex in, Aux tak ot tau mai maix mai nawb bwan ka maix, Aux tak tawx haktiex in ka maix mai ka doeh ru maix, Aux tak sang kieh gumlox sijax mukheu pa hoik tiextu Aux ka keeing maix Abraham grum naog heue. 4Aux tak kieh doeh ru maix haoh hun awm simuing ka daux raoma. Aux tak sang tawx doeh ru maix cie haktiex in khawmuik, kheu jao doeh ru maix, can ceu pui piang haktiex in, tak sang pon bwanson ka heue.#Jah 22:16-18 5Mawh kheu Abraham hoik cu nghiet ka lox Aux mai priex lox tawm jhawm krai Aux, lox lai beenli Aux mai lox tat jhawm prawng Aux heue. 6Mawh kheu nan, Icak ot ka daux veng Gerax heue. 7Pui pa ot baoh haktiex an chawk ka grawng moeng nawh, nawh ah nin, “Nawh mawh nan#Jah 12:13, 20:2 aux heue.” Mawh kheu lhat nawh mai ang pon krai mawh moeng tix, kheu mhawm grang Rebekkax, nawh lhat pui baoh an pah tix heue. 8Khaix hoik rheung ot kix tan, simiang Abimaliet meung Philitix, jhak plak praix khaing daux siviex iak mai nawh yaox Icak klieh tau mai moeng tix Rebekkax heue. 9Simiang Abimaliet kok ka Icak ah nin, “Bun an hoik sidawng mawh moeng maix, yuh ka mawh maix lai ah mawh nan tix?” Icak deeh ah nin ka nawh, “Phan aux ang ah yuh nin aux lhat tix yum kheu jao nawh heue.” 10Simiang Abimaliet deeh ah nin, “Maix lai yuh ceu in ka yix yuh ka mawx? Phan pui tix kaux kaux, ot tau mai moeng maix, maix tak sang plee krax lud piang yix lie? 11Mawh kheu nan, simiang Abimaliet tawx lox hu ka pui ceu tix khawmuik ah nin, “Pui mawx ang ah phan tieh ka pui in mai moeng nawh tak yaox ti yum heue.” 12Icak ruat simie ka haktiex an mai nawh yaox ti vawg plix nghox daux num an tix yieh son, Simiang Siyiex nawb bwan ka nawh heue. 13Nawh jah tix haok hwan ting lhaong mai nied ti magmi ka kraung khrai kuceu heue. 14Nawh koe yung, tobrie mai kawncau mau soi tom nie, mawh kheu nan ceu pui Philitix khankix boh rhawm ka nawh heue. 15Pui Philitix deeh ceu rawm daux khankix pa hoik kaong kawncau keeing nawh daux singaix ju Abraham mai deeh ceu deeh kheem tiex naog ka heue. 16Simiang Abimaliet ah nin ka Icak, “Lih hu dee singai khaing yix liak, mawh kheu hoik nie ting sibrawm maix khaing yix heue.” 17Mawh kheu nan Icak lih hu khaing tan mai nawh sum nyiex gox man ka daux lung baoh veng Gerax mai ot tan heue. 18Yam an Icak baox kaong rawm daux pa hoik kaong siliex keeing nawh Abraham, pa hoik ceu pui Philitix khaix yum keeing nawh mai nawh deeh kok ceu kaux rawm daux an khankix awm pa hoik kok keeing nawh heue. 19Viang mawh nan, yam kaong kawncau Icak khankix rawm daux daux lung mai kix yaox ka dee lih rawm keut tan heue. 20Cao liang tobrie veng Gerax mai cao liang tobrie Icak khankix, simah ka paox tix ah nin, “Rawm daux inkix mawh cie yix.” Mawh kheu simah kix mai cub nawh tan, nawh tom kok ceu kaux rawm daux an mawh Etiet heue. 21Khaix an kix baox kaong rawm daux pa khraox, kix baox simah ka grawng rawm daux an, mawh kheu nan nawh kok ceu kaux mawh Sitanax heue. 22Nawh deeh gah ti khaing tan mai baox kaong rawm daux tang dah, kix ang lai yaox ti simah ka grawng an, mawh kheu nan nawh tom kok ceu kaux mawh Yehobok, ah nin, “Yam in Simiang Siyiex hoik tawx dee ot son ex mai ex tak haok hwan ka daux haktiex in heue.” 23Khaix an nawh lih hu khaing tan mai hu ot ka Berashebax heue. 24Simiang Siyiex lih bleeh ka nawh daux bo an ah nin, “Aux mawh Siyiex keeing maix Abraham, paw koe krax lhat graung, grawh grawng nawh, Aux ot tau mai maix mai nawb bwan ka maix mai kieh ru maix pre haoh hun, kheu jao kawncau Aux Abraham heue.” 25Mawh kheu nan, nawh sum khu dee tan tix mu ka dee an mai kok ka ceu kaux Simiang Siyiex mai nawh sum nyiex gox man tan, kawncau Icak khankix deeh kaong rawm daux heue. 26Khaix an simiang Abimaliet#Jah 21:22 kaoh khaing veng Gerax mai nawh viex paox grawm tix Ahuziet mai cao kaing naing tix Phikolax hoek ka Icak heue. 27Icak ah nin ka kix, “Mawh kheu patix maix deeh hoek ka aux, maix hoik koeng ka aux mai grheu aux hu dee singai khaing tix ang mawh lie?” 28Kix deeh ah nin, “Yix hoik tawng ot Simiang Siyiex tau mai maix, mawh kheu nan kieh ex yuh krax pa kaux sijax sinax paox tix mai kieh ex yuh sijax mukheu tau mai maix heue.” 29“Sonsang ang maix lai tuktiak ka yix, awm ang yix teeh ka maix mai ang yuh tidtix ka maix mai ploi maix hu ka daux pa nhim. Mawh kheu mawh maix pa pon bwanson khaing Siyiex heue.” 30Mawh kheu nan, Icak yuh krax khan kheu kix ka priex mai kix ih tau, nyaux tau tan heue. 31Kix kaoh plak ponngawb caocao mai ah lox pa kaux sijax ka paox tix, Icak deeh ploi kix ing mai kix ing khaing nawh ka daux krax pa nhim heue. 32Ka daux singaix an, kawncau Icak hoek mai krai nawh mhong grawng hoik kaong kix rawm daux ah nin ka nawh, “Ex hoik yaox rawm heue.” 33#Jah 21:31Nawh kok ceu kaux rawm daux an mawh Shibax, mawh kheu nan, ceu kaux veng an tom mawh Berashebax tom in singaix heue. 34Yam koe ju Esaw tixpon num nawh teei ti moeng Berix, pa kaux Yudi, pui ceu Hittix mai kawn bun Elon pa mawh Bashemiet ceu pui Hittix heue. 35Kiex hoik kieh Icak mai Rebekkax laux rhawm ka heue.
Currently Selected:
YAM JAH 26: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
