YAM JAH 31
31
Yakop To Khaing Laban
1Yakop mhong sikah kawn simex Laban khankix, pa ah kix nin, “Yakop hoik teei kraung khrai cie keeing ex hu khawmuik, nawh hoik yaox ti magmi kheu sin keeing ex” 2Yakop yaox ka pakngai Laban ang lai awm sivoe an, hoik tang ti yaox heue. 3Khaix an Simiang Siyiex ah nin ka Yakop, “Deeh ing ka haktiex keeing maix khankix mai ka doeh ru maix, Aux tak ot tau mai maix heue.” 4Mawh kheu nan, Yakop ploi pui kok Rakhelax mai Leax ka daux tiag dee koe cub phung yung nawh heue. 5Nawh ah nin ka kix, “Aux hoik yaox ka ngai baoh keeing pex, nawh ang lai koe rhawm ka aux, awm glang ka an. Viang mawh nan, Siyiex keeing aux, hoik ot tau mai aux heue.” 6“Pex tawng ka hoik yuh aux kaing son keeing pex, khawm riang rao tix khawmuik heue.” 7“Keeing pex hoik pie lhen ka aux mai hoik loh ngawh riang rao pa keung aux ti pon kao bawg, viang mawh nan, Siyiex ang tawx akhwang sonsang yuh nawh aux laux heue.” 8“Yam ah keeing maix kieh tobrie pa preeh mawh ngawh riang maix, khaix an, cub yung khankix lih keh yung pa preeh, yam ah keeing maix, kieh tobrie pa preeh cun mawh ngawh riang maix, khaix an yung khankix lih keh kawn yung pa preeh cun heue. 9Mawh kheu nan, Siyiex hoik teei tobrie keeing pex mai tawx ka aux heue. 10Yam sikeeing tobrie khankix, aux maong ti jhak mai yaox ka mawh mhaing preeh, pa preeh cun mai pa lung khankix pa hawt khaix tobrie shiang khankix ka daux camaox aux heue.” 11Khaix an kawncau Siyiex ah nin ka aux daux camaox, Yakop eue mai aux deeh pawk ah nin, aux ot tin heue. 12Nawh ah nin, “Maix maong ti jhak awx, tobrie mhaing pa hawt tobrie shiang khankix mawh tobrie mhaing preeh, pa preeh cun mai pa lung khawmuik, mawh kheu aux hoik yaox ka ceu pa yuh Laban ka maix heue. 13Aux mawh Siyiex Betelax, dee hoik groi maix bee ka rong simaox an mai dee hoik yuh maix sijax mukheu ka Aux#Jah 28:18-22 heue. Yam in, kaoh hu khaing haktiex in mai deeh ing ka haktiex doeh ru maix heue.” 14Khaix an Rakhelax mai Leax pawk lox Yakop ah nin, “Kawn koe nyum pa sang pon ex tix ceuceu, phan ang mawh nan, sinngao tix ceuceu khaing daux nyiex keeing ex lie?” 15Nawh hoik keud ex mawh pui tang ceu tang meung ang mawh lie? mawh kheu nawh hoik coh ex mai hoik shiao mau ex khawmuik heue. 16“Sinngao pa hoik teei Siyiex khaing keeing ex, hoik mawh cie ex mai son kawn praix ex, yam in, kieh Siyiex maix yuh ka mawx maix yuh awm an heue.” 17Khaix an Yakop kaoh mai yaog ti sau kawn moeng tix khankix brug kala-uk heue. 18Nawh viex tobrie mai kraung khrai pa pon khaing haktiex Padan-aram khawmuik mai hu ka keeing tix daux haktiex Khanan heue. 19Yam hu rhip Laban hauk yung tix dah, Rakhelax briex ti teei riang krub cie keeing khaing daux nyiex heue. 20Yakop briex tix lih hu, yam ang Laban tawng, mawh kheu ang nawh rhawm krai grawng sang to ti ka nawh heue. 21Nawh to tau mai kraung pa koe tix khawmuik, nawh kaoh mai tiang ka rawm klawng mai hu see ka plak gawng Gilat heue.
Laban Hoek Ka Yakop
22Khaix hoik to Yakop loe singaix, kix taug krai Laban mhong heue. 23Nawh kok ka puxaik tix mai hawt khaix nawh, aliah singaix krax mai krup kix ka gawng Gilat heue. 24Viang mawh nan, Siyiex hoek ka Laban pui Asurix ka daux camaox ponsawm ah nin, “Rien rhawm tix, paw lai krai Yakop mhawm ang mhawm tix ceu kawx awx” 25Laban krup ka Yakop, yam in Yakop sum ka nyiex gox man piang gawng tan, Laban mai puxaik nawh khankix kawx, sum nyiex gox tix piang gawng Gilat heue. 26Laban ah nin ka Yakop, “Mawh yuh maix ka mawx? maix lai pie aux mai viex kawn bun aux khankix hu awm pui pa rhim ti teei ka vaig yuh ka mawx?” 27Kheu maix lai pie aux mai mox tix hu khaing aux ngiiep ngiiep mai ang krai aux mhong yuh ka mawx? mawh kheu aux tak ploi maix hu ka daux pa gaux rhawm mai ah lai rhax tau mai tauh chiang khawm ting khankix heue. 28“Kheu maix lai ang tawx akhwang ngheet aux ka kawn saux mai kawn bun tix lie? maix lai yuh awm pa daox pa aw.” 29Aux koe sibrawm ti yuh maix laux, viang mawh nan, Simiang Siyiex keeing maix krai ka aux daux camaox ponsawm kawx, ah nin, “Rien rhawm tix, paw lai krai Yakop mhawm ang mhawm tix ceu kawx awx. 30Yam in, mawh kheu kied byaong maix ka nyiex ma miex keeing tix maix tom to tix ing, yuh ka mawx maix lai briex riang siyiex aux hu?” 31Yakop deeh pawk lox Laban ah nin ka, “Mawh kheu lhat aux maix tud rhim mai deeh teei kawn bun khaing aux, aux tom to heue.” 32Yaox maix riang siyiex tix ka pui mawx ang ah, paw lai deuh im ju heue. Hu ci kraung cie maix ka sivoe ngai puxaik ex khankix mai teei hu heue. Mawh kheu Yakop ang tawng ka briex Rakhelax an heue. 33Laban laig ka daux nyiex gox man Yakop, nyiex gox man Leax mai nyiex gox man kawncau bun kiex ra kaux, viang mawh nan, nawh ang yaox heue. Khaix an nawh lih khaing nyiex gox man Leax mai laig daux nyiex gox man Rakhelax heue. 34Rakhelax teei riang krub an mai sau ka daux an brug kala-uk mai ngawm piang heue. Laban hoik tah sawg ka daux nyiex gox man mai ang yaox heue. 35Rakhelax ah nin ka keeing tix, “Mawh kheu jao hoek mee bun ka aux, paw nyang song rhawm ka ang aux pon kaoh sivoe ngai maix liak” nawh sawg khrieh, viang mawh nan, nawh ang yaox ka riang krub daux nyiex heue. 36Yakop song rhawm ah nin ka Laban, “Mawh lud aux ka ceu tix? mawh koe phimap aux yuh ka mawh maix phex tix hawt aux yuh nin lie?” 37“Maix hoik khrieh kraung aux khawmuik kawx, mawh hoik yaox maix kraung nyiex ma tix, tix ceuceu lie? deuh sivoe ngai puxaik aux mai puxaik maix mai kieh kix prawng ca sinax ax heue. 38“Aux hoik ot tau mai maix tixnga num, kawn yung shiang mai kawn pex shiang maix khankix ang sax laux kawn tix bawg kawx, aux ang sax ih ka nex kawn yung mhaing khaing cub yung maix heue. 39Can pa kiied totiag vao khankix, aux ang sax viex hoek ka maix, aux kawn kham ti som ka, pa briex pui daux tawm taix aux, ponngaix, ponsawm ang ah maix nhie aux plud jheung jheung heue.” 40Yam ponngaix, aux hoik grok ti ka koek mai yam ponsawm, aux hoik caux ka rawm ciex mai ang laig it laig tum ka heue. 41“Aux hoik ot daux nyiex maix tixnga num mai hoik yuh kaing son maix kao pon num, sonsang pon aux kawn bun maix khankix, aux hoik baox yuh kaing son maix liah num, sonsang pon aux tobrie maix, maix hoik loh ka ngawh riang aux kao bawg heue. 42Phan Siyiex keeing aux, Siyiex Abraham mai Siyiex pa lhat graung Icak kah, ang ot tau mai aux maix tee ploi aux ing mai taix yi tix tete. Siyiex hoik yaox ka krax kham geu aux mai kaing pa hoik yuh aux ka taix tix, Nawh tom kieh thiang ka maix daux ponsawm kawx heue.”
Sijax Mukheu Laban Mai Yakop
43Laban deeh pawk lox ka Yakop ah nin, “Kawn bun ankix kawx mawh kawn bun aux mai kawn praix ankix kawx mawh kawn praix aux, cub kawn yung khankix kawx, mawh kawn yung aux, can pa yaox maix khawmuik kawx mawh cie aux heue. Mawh kheu nan, daux in singaix aux sang chix yuh ka mawx ka kawn bun aux khankix, phan ang mawh nan, ka kawn praix pa hoik keh khaing kix lie?” 44“Hoek yam in, kieh ex yuh sijax mukheu ka maix mai aux kieh mawh mhai rug sinax maix mai aux heue.” 45Yakop teei simaox tix lon mai sum mawh rong heue. 46Yakop ah nin ka puxaik tix khankix, “Kieh ex sut simaox” mai kix sut simaox mai pum ti deuh. Kix ih priex ka praok pum simaox an heue. 47Laban kok ceu kaux simaox an mawh, “Yegadax Sahadutax, viang mawh nan, Yakop kok mawh Gilat heue.” 48Laban ah nin, “Pum simaox in mawh mhai rug sinax maix mai aux daux in singaix” Mawh kheu nan, tom kok ceu kaux mawh Gilat heue. 49Baox kok mawh Mizapa, mawh kheu nawh ah nin, “Kieh Siyiex kia ngien sinax maix mai aux, yam tang ot ex singai khaing paox tix heue.” 50“Phan maix yuh krax kha rhawm ka kawn bun aux khankix, phan ang mawh nan, phan maix teei ti moeng bun tang kaux, piang kawn bun aux khankix, viang kawn pui ang koe mhai rug sinax ex kawx, doh keud ka Siyiex mawh mhai rug sinax maix mai aux heue.” 51Laban ah nin ka Yakop, “Jhak ka pum simaox mai rong simaox in, pa hoik deuh aux sinax maix mai aux heue.” 52“Kieh pum simaox mai rong simaox in mawh sakse, aux tak ang pon luan khaing mee pum simaox in sonsang tuktiak tix ka maix, maix kawx tak ang pon tix luan khaing mee pum simaox in mai rong simaox in sonsang tuktiak tix ka aux heue.” 53“Kieh Siyiex Abraham, Siyiex Nakhaw mai Siyiex keeing kix, prawng ca sinax ex” Yakop tiextu ka Siyiex pa lhat graung keeing nawh Icak heue. 54Yakop yuh krax tan piang gawng mai kok puxaik tix khankix ih priex preem, mai ot piang gawng leeing sawm heue. 55Laban kaoh ponngawb caocao mai ngheet ka kawn saux mai kawn bun tix khankix mai nawb bwan piang kix, Khaix an Laban lih hu khaing tan mai ing ka nyiex tix heue.
Currently Selected:
YAM JAH 31: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
