LUKAX 11

Rawg Bwan Pa Gau Yesux

(Mat 6:9-13, 7:7-11)

1Ka daux bawg yam an, yam rawg Nawh Cao bwan tix dah, khaix hoik rawg Nawh bwan, kawncau Nawh tix kaux ah nin ka Nawh Cao, “Simiang eue, gau ex ka lox rawg bwan liak, awm hoik gau Yohan ka kawncau tix.” 2Nawh Cao ah nin ka kix, “Yam rawg pex bwan ah nin, Keeing eue, kieh ceu kaux Maix koe krax yung krax yi heue. Kieh meung Maix hoek heue. 3Tawx pa ih pa lo ex, son tix ngaix hoik tix ngaix liak. 4Pluat ploi phimap ex liak, awm pluat ploi ex phimap pui pa lud ka ex heue. Paw viex ex hoek ka daux krax nyaw krax glaw liak.”

Paox Grawm Hoek Greung Sawm

5Nawh Cao baox ah nin ka kix, “Ka daux pex pui mawx pa koe paox grawm tix kaux mai phan hu ka nawh yam greung sawm mai ah nin ka nawh, paox grawm eue, tawx aux yaog blah loe lon liak. 6Mawh kheu paox grawm aux tix kaux, kaoh khaing dee hu tix mai hoek ka aux mai aux ang koe ceu pa khan ka nawh heue. 7Kaw an pawk lox khaing plak daux ah nin, paw vi lak lheut aux, kheu hoik song siviex mai kawn praix aux khankix hoik it, dee it tau mai aux. Aux ang pon kaoh ti tawx ka maix heue. 8Aux krai ka pex, phan kaw an ang kaoh ti tawx ka nawh, kheu mawh nawh paox grawm nawh, viang mawh nan, kheu ca rawg nawh pot ang jud, kaw an tak kaoh ti tawx ka nawh awm pa lo nawh heue. 9Aux krai ka pex, rawg heue, mai tak sang tawx ka pex, sawg heue, mai pex tak sang yaox, gleuh siviex heue, mai tak sang paoh son pex heue. 10Grawh grawng nawh, kaw pa rawg tak pon, mai kaw pa sawg tak yaox mai ka kaw pa gleuh siviex tak paoh son nawh heue.

Keeing Pa Mhawm

(Mat 7:7-11)

11Ka daux pex pa mawh keeing koe tix kaux kaux lie? Yam rawg yam mhaing kawn tix blah, nawh sang tawx simaox kah lie? Phan ang mawh nan phan rawg kax, nawh sang tawx siuing kah, son kax lie? 12Phan ang mawh nan, phan nawh rawg tawm, nawh sang tawx tamtim ka nawh lie? 13Phan pex pa mawh pui caox kawx, chix tawx kraung pa mhawm ka kawn praix tix, Keeing pex pa ot ka daux meung raoma tak nie lheu tawx Khuan Singax Singeh, ka pui pa rawg ka Nawh miex ding?”

Yesux mai Belazebulax

(Mat 12:22-30; Mak 3:20-27)

14Nawh Cao grheu phicaox pa aw lih tix kaux mai yam hoik lih phicaox an pui aw an chix sikah heue. Cub pui hun khankix kied daox deng kah heue. 15Viang mawh nan kix tix blah ah, “Kaw in een rhawm ka Belazebulax simiang phicaox mai grheu phicaox khankix lih heue.” 16Tang kaux tix blah sawg ti yaox mhai khaing raoma, sonsang cheuk ti yaox Nawh Cao. 17Viang mawh nan Nawh Cao tawng ceu pa keud kix mai ah nin ka kix, “Meung ku meung pa ang khaw paox tix, gwieh paox tix, tak laux leeing heue. Nyiex ku nyiex pa ang khaw paox tix, gwieh paox tix, tak goh tak laux heue.” 18Satan kawx, phan ang khaw, gwieh tokaux tix, meung nawh chix kaux chix cong yuh ka mawx? Mawh kheu pex ah, Aux een rhawm ka Belazebulax mai grheu phicaox khankix lih heue. 19Phan Aux een rhawm ka Belazebulax mai grheu phicaox khankix lih, kawn praix pex, een rhawm ka pui mawx mai grheu phicaox lih? Mawh kheu nan, kix tak mawh cao prawng cao ca pex heue. 20Viang mawh nan phan Aux een rhawm ka giien taix Siyiex mai grheu phicaox khankix lih, meung Siyiex hoik hoek ka piang pex tete heue. 21Yam pui ting riang tix kaux, yam hoik grum kraung naing mai pau nyiex nawh mhawm mhawm, kraung khrai nawh ot nhim mhawm mhawm. 22Viang mawh nan, yam hoek kaw pa nie ting riang khaing nawh mai pex nawh mai teei kraung naing pa deuh nawh rhawm tix kah, tak teei ti gwieh kraung cie nawh heue. 23Kaw pa ang ot plak Aux, mawh pui pa koeng ka Aux heue. Kaw pa ang khrawm tau mai Aux, mawh pa kieh prung prang heue.

Phi Pa Seeing Brai Deeh Ing

(Mat 12:43-45)

24Khaix hoik lih phi pa seeing brai khaing daux pui, nawh hu preeng dee ang rawm koe, sawg dee laux kawx, ang yaox heue. Nawh tom ah nin, aux sang deeh ing ka nyiex aux khaing dee hoik kaoh aux heue. 25Yam hoik hoek nawh tan, nawh yaox nyiex pa hoik pih, pa hoik cox mhawm heue. 26Khaix an nawh hu mai viex phicaox aliah kaux, pa lheu caox khaing tokaux nawh mai laig ka daux pui an mai ot tan heue. Pa mawh ka pui an, lheu caox khaing phao ka heue.”

Pui Pa Mhong Priex Ti Hawt

27Yam kawn krai Nawh Cao ceu in khankix, bun tix kaux ka daux cub pui hun an, yo lox sinum ah nin ka Nawh, “Vaig pa nghe Maix mai teeih pa peuex Maix, ting bwanson heue.” 28Viang mawh nan, Nawh Cao ah nin, “Mawh heue, viang mawh nan pui pa mhong gumlox Siyiex mai priex ti hawt khankix, kied ting bwanson heue.”

Sawg Mhai Daox Am Ka Yesux

(Mat 12:38-42)

29Yam kawn tak khrawm cub pui hun kah, Nawh Cao jah ti ah nin, “Ju pui in, mawh ju pa caox heue. Kix sawg ti yaox mhai pa daox am mai lheu khaing mhai pa daox am Yonax, tak ang tawx mhai pa daox am ka kix heue. 30Mawh kheu awm Yonax hoik mawh mhai ka pui veng Nineve, Kawn kawn pui kawx, tak sang mawh mhai ka pui ju in heue. 31Yax simiang caong ma seh, tak kaoh tau mai pui ju in, ka daux singaix prawng singaix ciyang sax mai deuh phimap ka piang kix, kheu hoik hoek nawh khaing dee sidah haktiex mai nghiet gumlox pingnya cuyi simiang Sawlamon heue. Jhak heue, Kaw pa lheu ting khaing simiang Sawlamon ot tin heue. 32Pui veng Nineve tak cung tau mai pui ju in ka daux ngaix prawng ngaix ciyang sax mai deuh phimap ka piang kix, kheu hoik doh keud kix ka phimap tix, yam sidiex gau Yonax mai jhak heue, Kaw pa lheu ting khaing Yonax ot tin heue.

Pa Riang Tokaux

(Mat 5:15-16, 6:22-23)

33“Pui tix kaux kawx, ang sax tok kawk ngu deuh dee glip mai greem phliex, viang mawh nan deuh piang dee deuh kawk ngu, yuh ka mawx sonsang jhan riang ka pui pa laig tan khawmuik heue. 34Pa riang tokaux mawh ngai heue. Yam riang ngai maix, tokaux maix khawmuik kawx, naog ka pa riang heue. Viang mawh nan phan ngai maix ang mhawm, tokaux maix kawx naog ka pa faik heue. 35Mawh kheu nan rien rhawm tix, yuh ka mawx pa riang pa koe ka daux maix, tak ang mawh pa faik. 36Phan tokaux maix naog ka pa riang, ang koe dee faik ceeix kawx, tokaux maix tak sang grum naog ka pa riang, awm yam jhan kawk ngu pa riang nawh, son maix heue.”

Caox Ka Pharishie Mai Cao Prawng

(Mat 23:1-36; Mak 12:38-40; Luk 20:45-47)

37Yam kawn sikah Nawh Cao, Pharishie tix kaux kok Nawh, sonsang sawm tau mai nawh, Nawh Cao laig mai ngawm neung dee sawm heue. 38Yam yaox Pharishie an ka ang Nawh Cao heem tix, ka sang sawm, nawh daox deng kah heue. 39Simiang ah nin ka nawh, “Pex pa mawh Pharishie, phak kawk mai tawg plak praix khaing, viang mawh nan plak daux pex, naog pa rhim ti teei mai ceu pa caox heue. 40Pui daox khankix eue, kaw pa yuh plak praix, yuh khawm plak daux ang mawh lie? 41Viang mawh nan son ceu pa tan tawx ceu pa koe plak daux khankix mai jhak heue, kuceu khawmuik tak singax ka pex heue. 42“Viang mawh nan, Pharishie khankix eue, pex tak kha rhawm, kheu pex tan taux lhax sioe mai sidah sidim kuceu, kao son tix son mai ang pex keud grawng pa prawng ca mai krax moh krax rhawm Siyiex. Viang mawh ceu in khankix kawx pex khaw ti yuh mai ang khaw ti grham ti ang yuh tang ceu an khankix heue. 43Pharishie khankix eue, pex tak kha rhawm, kheu pex moh dee ngawm pa mhawm khaing paox tix, ka daux nyiex dee sidiex khankix mai ceu pa yungyi pui ka daux lah daux cau khankix heue. 44Pex tak kha rhawm, kheu pex awm simeeig pa ang sidawng mai pui pa hu ka piang kix ang tawng grawng simeeig koe tan heue.” 45Pui pa tawng pa prawng lai been tix kaux, pawk ah nin ka Nawh Cao, “Sara Cao Gau eue, pa ah Maix nin, viang mawh ka ex kawx, Maix map heue.” 46Nawh Cao ah nin, “Pui tawng pui prawng lai been khankix eue, pex tak kha rhawm, kheu pex kieh pui klawm kraung pa cien mai pa nu ti klawm mai tokaux pex, pie gien taix pex kawx, ang teeh ka kraung an heue. 47Pex tak kha rhawm, kheu pex cox pex yuh simeeig cao jhai khankix mai tax du pex khankix mawh pa teei kix yum heue. 48Mawh kheu nan pex mawh pa kham mhai ruk mai jhi pui yaox grawng pa caw rhawm pex, ka kaing ceu pa yuh tax du pex heue. Mawh kheu kix hoik teei cao jhai khankix yum mai pex cox yuh simeeig kix heue. 49Mawh kheu nan pingnya cuyi Siyiex kawx hoik ah nin, Aux ploi cao jhai mai kawncau khankix ka kix heue. Kix tak tuktieak tukte tix blah mai tak pah yum tix blah heue. 50Kheu nham cao jhai khawmuik, pa hoik lih tom yam jah ti kaw haktiex, tak sang hoek ka piang pui ju in heue. 51Jah ka nham Abelax tom sidah hoek ka nham Zakharix, pa hoik laux hoik yum, sinax nyiex bwan mai khu dee tan heue. Mawh heue, Aux krai ka pex, tak sang hoek ka piang pui ju in heue. 52Pui tawng pui prawng lai been khankix eue, pex tak kha rhawm heue. Kheu hoik teei pex jiak saw pingnya cuyi, tokaux pex ang laig mai kix pa sang laig kawx, pex kieh kang heue.” 53Yam hoik lih Nawh cao khaing tan, pui tiiem lai mai Pharishie khankix, jah ti kied susie Nawh sonsang kieh Nawh Cao krai grawh grawng tom nie ceu heue. 54Sonsang pon ti giex lox lud, pa lih khaing jheeh Nawh Cao heue.

Currently Selected:

LUKAX 11: WCL

Highlight

Copy