LUKAX 5

Jah Ti Kok Kawncau Khankix

(Mat 4:18-22; Mak 1:16-20)

1Yam cung Nawh Cao dex rawm nhawng Gennesariet cub pui hun theet nyheen Nawh, sonsang mhong gumlox Siyiex. 2Nawh Cao yaox reu ra lhang praok nhawng, viang mawh nan pui teei kax khankix hoik lih khaing reu an mai sidaux rub cie tix heue. 3Nawh Cao laig ka daux reu an tix lhang, pa mawh cie Simon, mhaing nawh greed reu khaing praok ceeix. Nawh ngawm tan mai sidiex gau ka cub pui hun khaing daux reu an heue.#Mat 13:1-2; Mak 3:9-10, 4:1 4Khaix hoik sidiex Nawh Cao, Nawh ah nin ka Simon, “Gah reu hu dee raux mai ploi rub maix khankix, sonsang pon kax heue.” 5Simon deeh pawk lox ah nin, “Simiang eue, ex hoik nyhap mao leeing sawm ang pon tidtix,#Yo 21:3 viang mawh nan kheu lox Maix aux tak ploi rub khankix heue.” 6Yam yuh kix nan, kix pon krix kax tom nie#Yo 21:6 mai rub kix jah ti griah heue. 7Kix yib taix ka paox tix, pa ot daux reu tang lhang an, yuh ka mawx son sang hoek ti teem kix heue. Kix hoek mai kieh reu naog khawm ra lhang, tom reu an kiex jah ti com heue. 8Yam yaox Simon Petrux ceu an, nawh krub dex ngawng Yesux ah nin, “Simiang eue, lih hu khaing aux liak, kheu mawh aux pui ting map heue.” 9Kheu nawh mai pui pa ot tau mai nawh khawmuik kied daox deng kah, grawng kax pa hoik pon kix. 10Yakop mai Yohan kawn Zebedie, pa mawh paox pie Simon kawx, ka awm an heue. Yesux ah nin ka Simon, “Paw vi lhat, jah dom yam in maix tak sang mawh pui teei pui heue.” 11Yam hoik viex kix reu hu ka praok, kix prah grham khawmuik mai hawt Nawh Cao heue.

Pai Pui Sipawg Moi

(Mat 8:1-4; Mak 1:40-45)

12Yam ot Nawh Cao ka daux veng khankix tix veng, jhak heue, pui pa naog sipawg tix kaux, yam yaox nawh Yesux, nawh grux gup mai khyox khaw Nawh Cao ah nin, “Simiang eue, phan Maix koe rhawm ti cox aux kieh aux singax Maix chix heue.” 13Nawh Cao nyeu taix tix teeh ka kaw an ah nin, “Aux koe rhawm heue. Kieh maix singax heue.” Jhawm saux sipawg an grai dom mawx dom an. 14Nawh Cao nhie nawh paw krai ka pui tix kaux kawx, viang mawh nan Nawh ah, “Hu jhi cao giex kaing li yaox ka tokaux tix kheu hoik singax maix mai tan awm pa hoik nhie Mose, #Krub 14:1-32sonsang mawh mhai ruk ka kix heue.” 15Viang mawh nan grawh grawng Nawh Cao baox nie tah hu kudah kudee mai pui hun khrawm paox tix hoek ka Nawh, sonsang nghiet sang mhong Nawh mai sonsang kieh Nawh cox jhawm saux tix moi heue. 16Viang mawh nan Nawh Cao lih hu daux tiagtu mai rawg bwan heue.

Pai Pui Yum Taix Caong

(Mat 9:1-8; Mak 2:1-12)

17Ka daux singaix an khankix Nawh Cao sidiex gau mai Pharishie mai cao gau grawng lox been khankix ngawm dex tan, pa hoik lih hoek khaing yaong ku yaong ka daux meung Galilie mai meung Yudax mai veng Yerusaliem. sibrawm Simiang Siyiex koe tau mai Nawh sonsang cox jhawm saux moi heue. 18Jhak heue, pui viex pui tix kaux pa koe jhawm saux pa yum taix yum caong pa it piang ku mai kix sawg ti viex nawh laig ti een sivoe Nawh Cao heue. 19Kix ang yaox dee sang pon viex nawh laig, kheu cub pui hun, kix tom haok piang nyiex mai koi ploi nawh sinax braux khawm ku it ka sigreung pui sivoe Yesux heue. 20Yam yaox krax yum rhawm kix, Nawh Cao ah nin, “Pui eue, hoik pluat phimap maix heue.” 21Pui tiiem lai mai Pharishie khankix keud ti ah nin, “Kaw pa ah lox salao in mawh mawx? Lheu khaing Siyiex nong nong pui mawx pa chix ploi phimap?” 22Viang mawh nan Yesux tawng grawh grawng pa keud pa sawn kix mai ah nin ka kix, “Pex keud pa yuh ka mawx ka daux rhawm tix? 23Lox pa yuh ka mawx lheu yie ti ah, hoik pluat phimap maix heue, yie ti ah lie? Phan ang mawh nan, kaoh mai hu heue.” yie ti ah lie? 24Viang mawh nan, yuh ka mawx pex tak sang tawng grawh grawng Kawn kawn pui, koe sibrawm ti chix pluat phimap ka piang haktiex, Nawh Cao baox ah ka kaw pa yum taix yum caong an. Aux ah ka maix, kaoh mai teei kraung it maix mai deeh ing ka nyiex maix heue.” 25Nawh kaoh dom mawx dom an, sivoe kix mai teei kraung it tix mai lih ing ka nyiex tix, yaogyaw bwanson Siyiex heue. 26Kix khawmuik kied daox deng kah mai yaogyaw bwanson Siyiex mai kix naog krax lhat graung ah nin, “Ex hoik yaox ceu pa ang sax yaox singaix heue.”

Yesux Kok Ka Lewix

(Mat 9:9-13; Mak 2:13-17)

27Khaix ceu an khankix Nawh Cao lih hu mai yaox pui koh mau tix kaux, pa kaux Lewix, ngawm dee koh mau mai ah nin ka nawh, “Hawt khaix Aux heue.” 28Nawh prah khawmuik mai kaoh hawt khaix Nawh Cao heue. 29Lewix yuh pawie ting ka daux nyiex tix, son Nawh Cao. Pui koh mau haoh hun mai pui tang kaux khankix ngawm neung ti sawm tau mai kix heue. 30Pharishie mai pui tiiem lai khankix deuh phimap ka kawncau Nawh khankix ah nin, “Pex lai sawm rheep tau mai pui koh mau mai pui ting map yuh ka mawx?”#Luk 15:1-2 31Yesux pawk lox ah nin ka kix, “Pui pa nyawm ot, ang lo pui pa chix sidah, viang mawh nan mawh pui pa koe jhawm saux khaing pa lo pui chix sidah. 32Aux hoek sonsang kok pui rahsee ang mawh, Aux hoek sonsang doh keud pui koe map koe grham ka phimap tix heue.”

Chawk Grawng Twah Pa Ih

(Mat 9:14-17; Mak 2:18-22)

33Kix ah nin ka Nawh Cao, “Kawncau Yohan khankix twah pa ih mai rawg bwan law lawx. Kawncau Pharishie khankix kawx yuh awm an, viang mawh nan kawncau Maix ih mai nyaux heue.” 34Yesux chawk kix ah nin, “Pex chix kieh paox grawm pui pa yuh ka kapaox twah pa ih yam kawn ot kaw pa yuh kapaox mai kix lie? 35Viang mawh nan, bawg yam singaix tak sang hoek, yam tak sang teei kaw pa yuh kapaox khaing kix, mai ka daux ngaix an khankix, kix tak sang twah pa ih heue.” 36Lox phektem kawx Nawh Cao teei ti sidiex ka kix, ah nin, “Pui tix kaux kawx ang sax riah kraung khraox tix bliah mai blaox ka kraung prim, phan yuh nan kienie, nawh tak kieh pa khraox griah mai bliah pa teei khaing kraung pa khraox an kawx, tak ang khaw mai pa prim. 37Pui tix kaux kawx, ang sax teei rawm plix siiet pa khraox sau ka daux hau hak pa prim khankix. Phan yuh nan kienie, rawm plix siiet pa khraox an tak kieh hau hak bih mai rawm plix siiet tak hieh mai hau hak tak laux heue. 38Viang mawh nan, rawm plix siiet pa khraox tak lai sau ka daux hau hak pa khraox mai khawm ra ceu tak ang laux ang leeing heue. 39Pui pa hoik nyaux rawm plix siiet pa prim, ang simie ti cie rawm plix siiet pa khraox. Kheu nawh ah, pa prim lheu mhawm heue.”

Currently Selected:

LUKAX 5: WCL

Highlight

Copy