मत्ती 10
10
यीशुरै बाराह चैलै
(मरकुस. 3:13-19; 6:7-13; लूका 6:12-16; 9:1-6)
1बाद मझ यीशु अपड़ै बाराह चैलै ऐपु किनि शदाय जां फिरी तेन्हांनि बुरी आत्माय कढणैरा अधिकार दिता कि, सैक्यै तैन्हांं कढिया जां हर किस्मेरी बिमारिया, जां कमजोरी, दुख-तखलीफी दूर करिया। 2ऐन्हां बाराह खास चैला केरै नाँईयें ऐ अत्तै, पेहिला शमौन जेसैरू नाँ पतरस रखु, जां तेसैरा भाई अन्द्रियास; जब्दिरा पुत्र याकूब जां तेसैरा भाई यूहन्ना; 3फिलिप्पुस जां बरतुल्मै थोमा जां चुंगी लींणै वा मत्ती, हलफईरा पुत्र याकूब जां तद्दै। 4शमौन कनानी, जां यहूदा इस्करियोती, जेनि यीशु धोखै सिंउ पकड़ाउरा बि थ्या।
बाराह खास चैला केरै कंम
5बाद मझ यीशु अपड़ै बाराह चैलानि आज्ञा दी करि भेईजै: कि, होरनियां जातियां केरै मेईं गांहथै, जां सामरी मैहणुवां केरै कोस नगरा मझ प्रवेश मेईं कातै। 6पण इस्राएलेरै घरानेरिया हराउरिया भ्रैडा किनि गहि। 7जां चलतै-चलतै बत्तै मझ ऐ प्रचार कातै गहा कि स्वर्गेरा राज्य निड़ी यौउरा आ। 8बिमार मैहणुवां ठीक करा, मौरा मैहणुवां जींतै करा, कोढ़िया ठीक करा जां बुरी आत्माईया कढा। कोस किना बि ऐसेरै तेईनी पेईंसै मेईं लींतै। केईनी कि परमेश्वरै तुवाड़ी मजतिरै बदलै किछ ना लियौरू। 9अपड़ै तेईनी ऐपु किनि ना ता सुन्ना-चांदी, ना ता तांबा रखै। 10बत्तेरै तेईनी ना ता कोई झोआ, ना दो कुरतै, ना बूट ना कोई शौठा रखै; केईनी कि मजूरानि सै मेईंणु चेहिंथु जेसैरी तैन्हांं जरूरत आ।
11तुवे जेख्णी बि जैस कोस नगरा या ग्राँ मझ गहा, ता पता ला कि तैड़ी बेशणेरै तेईनी विश्वासै लायक केणु आ? जां ज्यो-तेईनी तुवे तैस नगरा मझ बेशतै त्यो-तेईनी तेसै घरा मझ बेशा। 12जां घरा मझ गांहथै सिंउ तेन्हांनि आशीष दैई। 13अगर तैस घरेरै मैहणु काबिल भोलै ता तुवाड़ी आशीष तेन्हांनि लगी गांहणी, पण अगर सै काबिल ना भुवै ता तुवाड़ी आशीष तुहां किनि वापस चलि ऐईंणी। 14जां जै कौ तुवाड़ा स्वागत ना करिया जां तुवाड़ी गलै ना शुणियां ता तैस घरा किना या नगरा किना निकूंथै टैंमा अपड़ै पैयिड़ैरी धूड़ बि झाड़ी दैई। 15आंउ तुहां सिंउ सच बोलता कि, जेख्णी न्याय भूंणा तैस धियाड़ि तैस नगरेरी दशा सदोम जां अमोरेरै नगरा केरी दशा जादा सहन कानें लायक भूंणी।
ऐईंणै वा संकट
(मरकुस. 13:9-13; लूका 21:12-17)
16“तका, आंउ तुहां लाचार भ्रैडा समान मैहणुवां मझ भेईजता, जै भेड़ियै सैयि खतरनाक अत्तै। ऐठणीरै तेईनी कीड़ा सैयि बुद्धिमान जां कबूतरा सैयि भोलै-भालै बंणा।” 17“पण तुवे धार्मिक अगुवे किना सावधान बेशा, केईनी कि तैन्हां तुवे धोखै सिंउ पकड़ा करि यहूदी सभायरै हवालै कानें, जां तेन्हैरै सभा घरा मझ तुहां पन कोड़ै पूंणै। 18तुवे मूं पन विश्वास कानेंरी वजहि सिंउ राज्यपाला जां राजा केरै अघ्रियालीं खड़ै करियुणैं, केईनी कि तुवे मिंडै चैलै अत्तै; जां तुहांनि मौका मेईंणा कि तुवे तेन्हांनि जां होरनियां जातियनि मिंडै बारै मझ उगाहि दिया। 19जेख्णी तुवे तैन्हां पकड़वांणै ता ऐ चिंता मेईं कातै कि असु कितु बोलणु जां किहीं बोलणु, केईनी कि जै किछ तुहां बोलणु सै तैस टैंमा तुहांनि शुणा दियूंणु। 20याद रखा कि बोलणै बाऐ तुवे नत्तै पण पवित्र आत्माय तुहां मझांं बोलणु।
21तैस टैंमा मैहणुवां अपड़ै विश्वासी भा-भींण पकड़वा दींणै तिहियें मयि-बबा अपड़ै बच्चै मारांणै जां बच्चा अपड़ै मयि-बबेरै खिलाफ साजिश कांनी जां सै मारी छडाणैं। 22जां मूं पन विश्वास कांनेरी वजहि ला बड़ा सारा मैहणुवां तुहां सिंउ नफरत कांनी; पण जै लाष्टी तेईनी मिंडै विश्वासा मझ बंणौरा रैहला, सै बचाई गांहणा।” 23सै जेख्णी तुहां एकि नगरा मझ सताईया, ता तुवे होरू नगरानि चलि गहि। आंउ तुहां सिंउ सच बोलता कि तुवे हालै तेईनी इस्राएलेरै सभनियांं नगरा मझ पुजोरै बि ना भूंणै कि मैहणुरा पुत्रा मतलब मूं अईछी गांहणु। 24चैलै ना अपड़ै गुरू किना बडा, जां ना दास अपड़ै मालका किना बडा आ। 25चैलैरा गुरूरै, जां दासैरा मालकेरै बराबर भूंणु बड़ी गल आ; जेख्णी सैक्यै मूंनीऐ मतलब घरेरै मालकानि शैतान बोलतै, ता तुवे तैन्हांं किना अच्छै व्यावहारेरी आशा किहीं करि सकतै।
कोस किना डरूं
(लूका 12:2-7)
26“ऐठणीरै तेईनी तैन्हां मैहणुवां हैरी मेईं डरा केईनी कि जै गलै छपाउरी अत्ति सै गलै अक धियाड़ी परमेश्वरा सभनियांं केरै सांमणै अंणनी; जां कुछ गलै जै चोरी-छपि भूंती सै अक धियाड़ी हर मैहणु तकांणी। 27जै गलै आंउ तुहांनि गुप्त मझ शुणाता, तैन्हां सभनियनि शुणा; जां जै आंउ तुवाड़ै कंन्ना मझ बल्लै बोता तैन्हां तु मैहणुवंनी जौरै-जौरै शुणा। 28तैन्हां किना मेईं डरा जै शरीरा मारी छडतै, पण तुवाड़ी आत्माय ना मारी सकतै, सिर्फ तैस परमेश्वरा हैरी डरा जै तुवाड़ै शरीरा जां आत्माय दोईयो नरका मझ नाश करि सकता। 29चिड़िया केरै बारै मझ सौचा, ऐन्हैरी कीमत योउती घट आ कि एकि पेईंसै मझ दो खरीदी सकती, फिरी बि परमेश्वरेरी मर्जी बगैर तैन्हांं मझांं अक बि ना मरि सकती केईनी कि परमेश्वर ता सभ किछ जांणता। 30परमेश्वर तुवाड़ै जीवनेरी हर-एकि गलेरी परवाह काता, सै ऐ बि जांणता कि तुवाड़ु शिरा मझ कियोतै शिरवा अत्तै। 31ऐठणीरै तेईनी डरा मेईं, तुवे चिड़िया किना बि जादै कीमति अत्तै।”
यीशु मंनणा या ना मंनणा
(लूका 12:8-9; 12:51-53; 14:26-27)
32“जै बि बोलता कि सै मिंडा चैला आ, ता सैक्या मूं बि स्वर्गा मझ बेशणारै अपड़ै पिताऐरै सांमणै अपड़ा चैला मनि लींणा।” 33पण जै कौ मैहणुवां केरै सांमणै मिंडा चैला भौ करि मिंडा इन्कार करैला, ता मूं बि तेसैरा स्वर्गा मझ बेशणारै अपड़ै पिताऐरै सांमणै इन्कार कांना कि सै मिंडा चैला ना।
34ऐ मेईं सौचा कि आंउ धरतिरै मैहणुवंनी शान्ति दींणनी यौउरा आ; आंउ शान्ति दींणनी ना पण आंउ लड़ाई कराणनि यौउरा आ। 35आंउ ता यौउरा कि “ बबा तेसेरै पुत्रा किना, जां छोकरी तेसैरी मयि किना, जां नुहैं तेसैरी शशुरै खिलाफ करि दियुं।” 36मैहणुरै दुशमण तेसेरै घरेरै मैहणु भूंतै।
37“जै अपड़ै मयि बबनी मूं किना जादा प्यार काता सै मिंडा चैला बंणनेरै लायक ना; जां जै अपड़ै छोकरू-छोकरिनी मूं किना जादा प्रेम काता सै बि मिंडा चैला बंणनेरै लायक ना। 38अगर कौ मिंडा चैला भौ करि बि दुख सेहणेरै तेईनी जां मरनेरै तेईनी तियार ना भुईया ता सै बि मिंडा चैला बंणनेरै लायक ना। 39जै मैहणु अपड़ै प्रांण बचांणेरी कोशिश काता, तेसनी अनन्त जीवन ना मेईंणा; जां जै मिंडै तेईनी अपड़ा प्रांण दींता तैस प्रभु सेईतै अनन्त जीवन जींणा।”
ईनाम
(मरकुस. 9:41)
40“जै तुहां मनता सै मूं बि मनता; जां जै मूं मनता, सै मिंडै भेईजणै बाऐ बि मनता। 41जै भविष्यवक्तानि भविष्यवक्ता जांणि करि मनि लिया, ता जै ईनाम परमेश्वर भविष्यवक्तानि दींता तेतियाऐ ईनाम तेसनी दींणा। जै धर्मी मैहणु मनता, केईनी कि सै धर्मी मैहणु परमेश्वरैरा जन आ, ता धर्मी मैहणुनी जै ईनाम दींता तेतियाऐ ईनाम तेसनी बि दींता। 42जां अगर कौ मिंडै ऐन्हां भोलै-भालै चैला मझां कोस ऐकिनि बि ऐठणीरै तेईनी अक गिलास ठंडा पांणी पींणेरै तेईनी दिया कि सै मिंडा चैला आ, ता आंउ तुहांनि सच बोलता कि तेसनी ऐठणीरा ईनाम जरूर मेईंणा।”
Currently Selected:
मत्ती 10: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
