मत्ती 23
23
शास्त्रिया जां फरीसिया किना सावधान
(मरकुस. 12:38-40; लूका 11:37-52; 20:45-47)
1तां यीशु भीड़ि जां अपड़ा चैला सिंउ बौलु, 2शास्त्री जां फरीसी मूसेरी व्यवस्थाय शिख्रांणारै अत्तै; 3ऐठणीरै तेईनी सै तुहां सिंउ जै किछ बोलिया तैस करा जां मंना बि; पण तेन्हैरै तियै कम मेईं कातै, केईनी कि सै उपदेश ता दींतै पण तेन्हैरा पालन ना कातै। 4सै तुहां पन बड़ै नियम लागु कातै जैन्हैरा पालन कांना कठिन आ, सै मैहणुवां तैन्हांं पन चलणनी मजबूर कातै; पण सै ऐपु तैन्हांं नियमा पन चलणनी कोशिश बि ना कातै। 5सै सारै कम मैहणुवां केरा ध्यान आकर्षित कांनेरै उद्देश्य सिंउ कातै: सै तैन्हांं #23:5 ऐक्यै अतिरिक्त प्रार्थनायरै डब्बेरी जगाय भुईंथ्यै जैन्हां मझ पवित्र शास्त्रेरै वचन भुईंथ्यैपटिया चौड़ी कातै जैन्हां पन सैक्यै पवित्र शास्त्रेरै वचन लिखि करि शरीरा पन बंन्ही लींतै जां सैक्यै अपड़ै लिकड़ा केरी झालरै बि बधींतै गांहथै। 6धामि मझ खास-खास जगाय जां यहूदी सभा घरा मझ ऐन्हां खास-खास आसन, 7जां बजारा मझ सै आदर सिंउ नमस्ते करांणु पसंद कातै जां मैहणुवां किना गुरू बोलांणु अच्छु लगतु। 8पण तुवे मैहणुवां किना ऐपुनि गुरू मेईं बौलांतै, केईनी कि तुवाड़ा अकै गुरू आ; जां तुवे सभ योकिया मझ भाई-भींणी सैयि अत्तै। 9जां धरती पन अपड़ै बबा छडि करि होरै कोस बि अपड़ै बाबै मेईं बंणातै, केईनी कि तुवाड़ा पिता सिर्फ परमेश्वर आ, जै स्वर्गा मझ आ। 10जां मैहणुवां किना ऐपुनि मालिक बि मेईं बोलांता केईनी कि तुवाड़ा अकै मालिक आ जां सै मसीह आ। 11जै तुहां मझ बडा आ सै तुवाड़ा सेवक बणियां। 12जै कौ अपड़ै आपानि बड़ा महान समझैला, परमेश्वरा सै नम्र बंणाणा, पण जै कोई अपड़ै आपानि नम्र बंणाला तेसनी परमेश्वरा आदर दींणा।
शास्त्रिया जां फरीसिया केरै पाखण्डैरी आलोचना
13हे कवटी शास्त्रियो जां फरीसियो, तुहां पन हाय! मैहणुवां केरै तेईनी ता तुवे स्वर्ग राज्यरै द्वारै बंद करि दींतै, ऐठणीरै तेईनी कि होरै परमेश्वरेरै राज्य मझ ना गहि सकिया; तुवे ऐपु ता तैस मझ गांहणा ना चाहंथै पण होरनियां बि तैस मझ गांहणा किना रौकतै। 14हे ढोंगी यहूदी शास्त्रियो जां फरीसियो तुहांनि धिक्कार आ! तुवे विधवाईया केरै घर लुटि छडतै जां दिखावेरै तेईनी लम्मी-लम्मी प्रार्थनाय कातै, ऐनि वजहि ला तुहांनि जादी सजा मेईंणी। 15हे कवटी शास्त्रियो जां फरीसियो, तुहां पनि हाय! तुवे एकि मैहणु अपड़ि मत्ती अणनेरै तेईनी लम्मी-लम्मी जल यात्राय जां थल यात्राय कातै, जां जेख्णी सै तुहां सैयि बंणी गांहथा ता तुवे तैस ऐपु किना बि जादा नरकेरै लायक बंणा दींतै।
16तुवे कांणै अगुवे अत्तै, तुहां पन हाय! केईनी कि तुवे बोलतै अगर कौ मंदरैरी कसम खईया ता किछ ना भूंणु; पण अगर कौ मंदरेरै सुन्नैरी कसम खईया ता सै तैस कसमि पूरी कांनेरै तेईनी मजबूर भौ गांहथा। 17हे मूर्खो! जां कांणियो, केणु बडा आ, सुन्ना या सै मंदर जेनि ला सुन्ना पवित्र भूंता? 18तुवे ऐ बि बोलतै अगर कौ मैहणु वेदिरी कसम खईया ता ऐनि ला किछ ना भूंतु पण तुवे बोलतै कि अगर कौ वेदी पण चाढ़ोरी भेंटिरी कसम खईया ता सै तैस कसमि पूरी कांनेरै तेईनी मजबूर भौ गांहथा। 19हे कांणियो, केणु बडा आ, भैंट या वेदी, जैत ला भैंट पवित्र भूंती। 20ऐठणीरै तेईनी जै वेदिरी कसम खांता, सै तेसैरी, जां जै किछ तेत पनि रखौरू भूंतु तेसैरी कसम खांता। 21जै मंदरैरी कसम खांता, सै तेसैरी जां तेत मझ रींहणै बाऐ पर्मेश्वरेरी बि कसम खांता। 22जां जै स्वर्गेरी कसम खांता, सै परमेश्वरेरै सिंघासनैरी जां तेत पनि बेशणै बाऐ पर्मेश्वरेरी बि कसम खांता।
23हे कवटी शास्त्रियो जां फरीसियो तुहांनि धिक्कार आ! तुवे पुदीनेरा, सौंफिरा जां जीरैरा दशुवां हिस्सा ता पर्मेश्वरनी दींतै, पण तुवे व्यवस्थाईरी खास गलै मतलब न्याय, धर्म जां दया छडि दींतै; तुवाड़ै तेईनी ऐ बड़ु बधिया थियु कि तुवे ऐन्हां दोईयो गला केरा पालन कातै रींहथै भुंईं। 24तुवे तैन्हांं कांणा अगुवे समान अत्तै जै हल्का-हल्का नियमा केरा पालन कांनेरै तेईनी बड़ा ध्यान दींतै, जिहीं पाणी मझ मछरा ता छाणी लींतै, पण परमेश्वरेरै खास हुक्मा केरा पालन ना कातै जै कि ऊंट निगअना समान आ। 25हे कवटी शास्त्रियो जां फरीसियो तुहांनि धिक्कार आ! केईनी कि तुवे लालची जां स्वार्थी अत्तै, पण तुवे अपड़ै-आपनि पवित्र भूंणैरा ढोंग कातै। ऐठणीरै तेईनी तुवे तैन्हांं कटोरिया जां थाईया समान अत्तै जै भेईर किना ता साफ अत्ति पण अंदरा किना अधोति अत्ति। 26हे कांणै फरीसियो, पेहिलै लालची जां स्वार्थी कंम बंद करा! तां तुहां धर्मिक कंमा केरा पालन कांना जां फिरी तुवे तैस कटोरी जां थाई समान भूंणै जै अंदरा जां भेईरा साफ भूंती। 27हे कवटी शास्त्रियो जां फरीसियो तुहांनि धिक्कार आ! तुवे चुना लाउरी कब्रिया सैयि अत्तै जै प्रनां किना ता छै लेहिंथी, पण अंदरा किना मुड़दा केरी हड्डियै ला जां सारा प्रकारेरी अशुद्धताई ला भरोरी अत्ति। 28ऐहियें-चारै व्यवस्थाय ला तुवे बि भेईरा किना धर्मी लेहिंथै, पण अंदरा किना कवटै जां दुष्टताय ला भरौरै अत्तै।
शास्त्रिया जां फरीसिया पनि दण्डैरी भविष्यवाणी
29हे कवटी शास्त्रियो जां फरीसियो तुहां पन धिक्कार आ! तुवाड़ै पूर्वजै जै भविष्य बोलणार मारोरै थ्यै, तेन्हैरी कब्रि सजांते जां धर्मी मैहणुवां केरी कब्रि आदर दींणैरै तेईनी बणांतै। 30जा बोलतै, कि अगर असै अपड़ै बब-दादा केरै टैंमा भूंतै भुईं ता असै भविष्यवक्ता केरै खूना मझ शामिल ना थ्यै भूंणै। 31ऐत पन तुवे मैहणु अपड़ै विरोधा मझ उगाहि दींतै कि तुवे भविष्यवक्ता केरै हत्यारा केरै वंश अत्तै। 32तुवे अपड़ै पूर्वजा केरै तैन्हांं बुरा कंमा पूरा कांनारै अत्तै जै तैन्हैं शुरू क्यौरै थ्यै। 33तुवे बड़ै चालाक मैहणु अत्तै, तुवे जेहरीला कीड़ा किना बि खतरनाक अत्तै! तुहैं किहीं सौचि लियु कि तुवे नरकेरी सजाय किना बचि गांहणै? 34ऐठणीरै तेईनी तका, आंउ ताउ किनि भविष्यवक्ता जां बुद्धिमान जां यहूदी शास्त्रिया भेईजता; जां तुहां तैन्हांं मझां केत्थरै मारी छडणै जां किछ क्रूसा पन चाढ़ी दींणै, जां किछ पनि अपड़िया यहूदी सभा घरा मंझ तुहां कोड़ै मांने, जां एकि नगरा किना होरै नगरा मझ खायिड़ने? 35जेनि ला पृथ्वी पन धर्मात्मै मारै, धर्मी हाबिलेरै खूना किना लै करि बिरिक्याहैरै पुत्रा जकरयाहैरे खूना तेईनी, जै तुहैं मैहणुवें मंदरा जां वेदिरै बिच मारी छडौरा थ्या, तेन्हैरै खूनेरै दोषी तुवे भूंणै। 36आंउ तुहां सिंउ सच बोलता, ऐन्हां सारा हत्याय केरा दण्ड इस युगेरा मैहणुवंनी मेईंणा।
यरूशलेमेरै तेईनी विलाप
(लूका 13:34-35)
37हे यरूशलेमेरै मैहणुवो! तुवे सै अत्तै जै भविष्यवक्ता मारी छडतै, जां जै परमेश्वरै तुहां किनि भेईजोरै अत्तै तैन्हांं पन घौड़त्या बजतै। मीं केत्थरी बारी चाहूं कि जिहीं कुखड़ि अपड़ै बच्चा अपड़ै पखा हैट सभांति तिहियें मीं बि तुवे संभाने चाहै, पण तुहैं मैहणुवें ना चाहूं। 38तका, तुवाड़ा मन्दिर तुवाड़ै तेईनी उजाड़ि छडणा। 39केईनी कि आंउ तुहां सिंउ सच बोलता, कि तुवे मूं ऐम्हीं किना लै करि त्यो तेईनी ना तकालै, ज्यो तेईनी तुवे ऐहीं ना बोलेलै, “धन्य आ सै जै प्रभुरा नाँ लै करि ऐईंता।”
Currently Selected:
मत्ती 23: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
