मत्ती 26
26
यीशुरै विरूध षड़यन्त्र
(मरकुस. 14:1-2; लूका 22:1-2; यूह. 11:45-53)
1जेख्णी यीशु ऐ सारी गलै बोलि बेठा ता, अपड़ा चैला सिंउ बोलणा लगा, 2तुवे जांणतै अत्तै, कि दुवां धियाड़िये बाद फसहैरा त्यौव्हार आ; जां मैहणुरा पुत्र मतलब आंउ क्रूसा पन चाहढ़नेरै तेईनी पकड़वायूंणा। 3तां महायाजक जां प्रजायरै वुजुर्ग कैफा नांईऐरै प्रधानयाजकेरै आंगणा मझ किठै भुवै। 4जां योकिया मझ सलाह कांना लगै कि यीशु धोखै सिंउ पकड़ी करि मारी सुटतै। 5पण सै बोलतै थ्यै, कि “त्यौव्हारेरै टैंमा ना! किहींक्यै ऐहीं ना भुईया कि मैहणुवां मझ दंगै भौ गहिया।
बैतनिय्याह मझ यीशुरा स्वागत
(मरकुस. 14:3-9; यूह. 12:1-8)
6जेख्णी यीशु बैतनिय्याह मझ शमौन कोढ़िरै घरै थ्या। 7तां अक जनांनि संगमरमरैरू भांडा मझ कीमति इत्र लै करि तैस किनि यैई, जां जेख्णी सै रोटी खांणा बेठा, ता तेसैरू शिरा पन डोलि दित्ता। 8ऐ तका करि, तेसेरै चैलै रिशाय गियै जां बोलणा लगै, ऐसेरा केईनी सत्यानाश क्या? 9ऐस ता बढ़िया कींमति मझ बैचि करि गरीबा मझ बंडि सकींथ्यै। 10ऐ बुझि करि यीशु तेन्हांनि बौलु, ऐस जनेनी केईनी सतांतै अत्तै? ऐनि ता मूं सिंउ खरू कियु। 11गरीब हमेशा तुहां सेईतै बेश्तै पण आंउ तुहां सिंउ हमेशा ना रीहंणा। 12ऐसै जै इत्र मिंडै शरीरा पन डोला, सै मिंडै दबियूंणेरै तेईनी कियु। 13आंउ तुहां सिंउ सच बोलता, कि सारै संसारा मझ जेठि-कोठि ऐस खुशखबरिरा प्रचार करियूंणा, तैठि तेसेरै ऐस कंमेरी चर्चा बि तेसैरी यादि मझ करियूंणी।”
यहूदा इस्करियोतिरा विश्वासघात
(मरकुस. 14:10-11; लूका 22:3-6)
14फिरी यहूदा इस्करियोती जै बाराह चैला मझ अक थ्या, तेनी प्रधानयाजका किनि गहि करि बौलु, 15“अगर आंउ तैस तुवाड़ै हत्था पकड़वा दियुं ता, मूंनी कितु दैलै?” तैन्हैं तेसनी तीह चाँदिरै सिक्कै तौलि करि दी दित्तै। 16जां सै तेसै टैंमा किना तैस पकड़ाणैरा मौका तौपणा लगा।
चैला सेईतै फसहैरा लाष्ट भोज
(मरकुस. 14:12-21; लूका 22:7-14,21-23; यूह. 13:21-30)
17अखमीरी रोटिरै त्यौव्हारेरी पेहिली धियाड़ि चैलै यीशु किनि अईछी करि तैस पुछणा लगै, “तु कोठि चांहथा कि असै तिंडै तेईनी फसह खांणेरी तियारी करिया?” 18तेनी बौलु, “नगरा मझ फलांणै किनि गहि करि तैस सिंउ बोला, कि गुरू बोलता कि, मिंडा टैंम नीड़ आ, मूं अपड़ै चैला सिंउ तिंडै घरै त्यौव्हार मनांणा।” 19तां चैलै यीशुरी आज्ञा मनि जां फसहैरा भोज तियार केया। 20जां जेख्णी सन्हेंरा भुआ, ता यीशु बाराह चैला सेईतै रोटी खांणा बेठा। 21जेख्णी सै खांतै थ्यै, ता तेनी बौलु, “आंउ तुहां सिंउ सच-सच बोलता, कि तुहां मझियां एकि आंउ पकड़वांणा।” 22ऐत पन सै बड़ै उदास भुवै, जां हर-अक तैस किना पुछणा लगा, “हे गुरू! क्या सै आंउ आ?” 23तेनी जुबाव दिता, कि जेनि मूं सिंउ थाई मझ हत्थ सुटोरा आ, तेसै आंउ पकड़वांणा। 24मैहणुरा पुत्र ता मरना आ, जै तेसेरै बारै पवित्र शास्त्रा मझ लिखोरू आ, पर धिक्कार आ तैस मैहणु पन जै तैस पकड़वांता। अगर तैस मैहणुरा जन्म ऐ नाँ भूंता, ता तेसेरै तेईनी अच्छु थियु। 25तां तैस पकड़वांणै बाऐ यहूदै बौलु, कि हे गुरू, “क्या सै आंउ आ?”
प्रभु भोज
(मरकुस. 14:22-26; लूका 22:15-20; 1 कुरि. 11:23-25)
26जेख्णी सै रोटी खांतै थ्यै, ता यीशु रोटी लैई जां आशीष मगि करि भंनि, जां चैला धेरै दी करि बौलु, “ल्या खा; ऐ मिंडा शरीर आ।” 27फिरी तेनी कटौरा लै करि, धन्यवाद केया, जां तेन्हांनि दी करि बौलु, “तुवे सारै ऐत मझांं पिया।” 28केईनी कि ऐ वायदेरा मिंडा सै खून आ जै बड़ै मैहणुवां केरै पाप माफ कांनेरै तेईनी बहायूंता। 29आंउ तुहां सिंउ सच बोलता, कि दाखिरा ऐ रस तेसै धियाड़ि तेईनी कदि ना पीला, ज्यो तेईनी तुहां सेईतै अपड़ै बाबेरै राज्य मझ नवाँ ना पी लियुं।
पतरसेरी नमां कांनेरी भविष्यवाणी
(मरकुस. 14:27-31; लूका 22:31-34; यूह. 13:36-38)
30फिरी सै भजन ला करि भेईर जैतूनेरै पहाड़ा पन ग्यै। 31तां फिरी यीशु तैन्हांं सिंउ बौलु, “तुहां सभनियांं आज रातिऐ अपड़ै विश्वासा किना भटकि गांहणु; केईनी कि लिखोरू आ, कि मूं पुव्हाल मारी दींणा, जां झुंडैरी भ्रैडै तित्तर-भित्तर भौ गांहणी। 32पण परमेश्वरा आंउ मुड़दा मझां जींतेना तेठां किना बाद मूं तुहां किना पेहिलै गलील प्रदेशनी चलि गांहणु।” 33पतरसै तैस सिंउ बौलु “अगर सारै ताउ छडि करि चलि बि गाहलै, पण आंउ ना छडि सकता।” 34यीशु पतरसा सिंउ बौलु, “आंउ ताउ सिंउ सच बोलता, कि आज ऐ राती कुखडै़री दो बार बांगै दींणा किना पेहिलै, तांउ त्रा बारी मूं किना मुकरी गांहणु।” 35पतरसै तैस सिंउ बौलु, “अगर मूं ताउ सिंउ मरनुं बि पुईया, तां बि आंउ ताउ किना कदि ना मुकरैला।” जां ऐहिंयो सभनियें चैलै बि बौलु।
गतसमनी मझ प्रार्थना
(मरकुस. 14:32-42; लूका 22:39-46)
36फिरी यीशु अपड़ा चैला सेईतै गतसमनी नांईएरी एकि जगाय मझ या जां अपड़ा चैला सिंउ बोलणा लगा कि “ऐठियै बेशै, ज्यो तेईनी कि आंउ ओठि गहि करि प्रार्थना करूं।” 37जां सै पतरसा, जां जब्दीरै दोईयो पुत्रा सेईतै लै ग्या, जां सै बड़ा उदास जां परेशान भूंणा लगा। 38तां फिरी तेनी तेन्हांनि बौलु, “मिंडा मंन बड़ा उदास आ, ऐठि तेईनी कि आंउ मरने वा: तुवे ऐठि रुका, जां बियुझै रिय्हा।”
39फिरी सै थोड़ा अगर गहि करि मुँह उन्धु करि प्रार्थना कांना लगा, कि “हे मिंडै पिता, कि अगर भौ सकिया ता ऐक्या कटौरा मूं किना टयि गहिया, तां बि आंउ जिहीं चांहथा तिहीं ना पण जिहीं तु चांहथा तिहियें भुईया।”
40फिरी चैला किनि अईछी करि सै झुलतै तकाई, जां पतरसनि बौलु, क्या तुवे मूं सिंउ अक घड़ि बि ना बियुझै रिय्है? 41बियुझै बेशा, जां प्रार्थना कातै रिहा कि तुवे परीक्षाईरा सांमना करि सकिया। आत्मा ता तियार आ, पण शरीर कमजौर आ। 42फिरी तेनी दुबारे गहि करि प्रार्थना केयि कि “हे मिंडै पिता, अगर ऐ मिंडै पींणै बगैर न हटता ता तिंडि ईच्छा पूरी भुईया।” 43तां तेनी त्रईयो चैलै झुलोरै तकाय, केईनी कि तेन्हैरै टीरै निदरै ला भरौरै थ्यै। 44जां तैन्हांं छडि करि फिरी चलि ग्या, जां सैहै गल बोलि करि, त्रीं बारी प्रार्थना कांना लगा।
45तां तेनी चैला किनि अईछी करि तैन्हां सिंउ बौलु, “अबै झुलि बेशा जां आराम करा, तका, टैंम चलि या जां मैहणुरा पुत्र मतलब आंउ पापिया केरै हत्था पकड़ाईयूंणा। 46उठा, चला! तका, मूं पकड़वांणै बाऐ नीड़ अईछी ग्यै।”
यीशु धोखै सेईतै पकड़ायूंणा
(मरकुस. 14:43-50; लूका 22:47-53; यूह. 18:3-12)
47यीशु ऐहीं बोलताऐ थ्या कि यहूदा जै बाराह चैला मझां अक थ्या, ऐपु सेईतै प्रधानयाजका जां यहूदी वुजुर्गा जां यहूदी शास्त्रिया सेईतै अक बड़ी बडी भीड़ लै करि तेसै टैंमा पुजि पिया, जै तलवार जां शोठै लेई करि यौउरै थ्यै। 48तेसेरै पकड़वांणै बाऐ तेन्हांनि शुणा दितोरू थियु कि, जैसनि आंउ फोकु दैला, तैस पकड़ी लेई। 49जां यहूदै इकदम यीशु किनि गहि करि बौलु, “हे गुरू, नमस्कार!” जां तेसनी बड़ै फोकु दित्तै। 50यीशु तैस सिंउ बौलु, “हे मित्र, जैस कंमेरै तेईनी तु यौउरा, तैस करि लै।” तां तैन्हैं तैस किनि अईछी करि यीशु घैरी करि पकड़ी लिया। 51तां फिरी यीशुरै साथियै मझांं एकि तलवार कढि करि महायाजकेरै दासा पन चला दित्ती, जां तेसैरा कंन बढि दिता। 52तां यीशु तैस सिंउ बौलु, “अपड़ि तलवार मियांना मझ रख, केईनी कि जै तलवार चलांतै, सै सारै तलवारी ला नाश करियूंणै। 53क्या तु ना समझता, कि आंउ अपड़ै पिता परमेश्वरा सिंउ विनती करि सकता, जां सै स्वर्गदूता केरी बाराह पलटनियां किना जादी सैनाईरा गुट ऐमिहां मूं किनि खड़ै करि सकता? 54पण पवित्र शास्त्रेरी सैकेई गलै कि ऐत्यु ऐ भूंणु जरूरी आ, किहीं पूरी भूंणी?” 55यीशु तैन्हांं सेईतै बौलु, “क्या तुवे डाकु समझि करि मूं पकड़नेरै तेईनी तलवार जां शोठै लै करि यौउरै अत्तै? आंउ ता रौज मंदरेरै आंगणा मझ तुहां सेईतै बेशि करि उपदेश दिईंथ्या, जां तुहैं तेख्णी आंउ ना पकड़ा। 56पण ऐक्यु ऐठणीरै तेईनी भूं कि पवित्र शास्त्रा मझ जै किछ लिखोरू आ सै पूरू भुईया।” ऐत पन सारै चैलै तैस छडि करि नशि ग्यै।
महासभाईरै सांमणै यीशु
(मरकुस. 14:53-65; लूका 22:54-55,63-71; यूह. 18:13-14,19-24)
57जां यीशु पकड़ने बाऐ तैस कैफा नाँईयेरै महायाजका किनि लै गियै, जेठि यहूदी शास्त्री जां यहूदी वुजुर्ग किठै भोरै थ्यै। 58जां पतरस दूर किना तैस पिचालीं-पिचालीं महायाजकेरै आंगणा तेईनी ग्या, जां अंतर गहि करि अंत तकांणेरै तेईनी प्यादा मझ गहि बेठा।
59प्रधानयाजक जां सारी महांसभा यीशु मांनेरै तेईनी तेसेरै विरोधा मझ उगाहि तोपतै थ्यै, 60पण बड़ै झूठै उगाह दींणार आघै यै जां तैन्हैं बड़ु झूठ बौलु। लाष्टी दो जांणै यै, 61जां बौलु, कि “ऐनि मैहणु बोलोरू थियु, कि आंउ परमेश्वरेरै मंदरा छिढ़ाहि सकता जां त्रियां धियाड़िया मझ बणा सकता।” 62तां महायाजकै खड़ै उठिकरि यीशु किना पुच्छु, “क्या तु कौ जुबाव ना दींता?” ऐक्यै मैहणु तिंडै विरोधा मझ कितु उगाहि दींतै अत्तै? 63पण यीशु चुप रिहा।
तां महायाजकै तैस सिंउ बौलु, आंउ ताउनि जींतै परमेश्वरेरी कसम दींता, अगर तु परमेश्वरैरा पुत्र मसीह आ ता, असु सिंउ बोलि दै। 64यीशु तेसनी बौलु, “तीं ऐपुवै बोलि दित्तु, वरन आंउ तुहां सिंउ अबै ऐ बि बोलता, अबै किना तुवे मैहणुरा पुत्र सर्व शक्तिमानेरै देहिणै पासै बेठोरै जां सुरगेरै बदआ पन ऐईंतै तकालै।”
65तां महायाजकै गुस्सै मझ अपड़ै लिकड़ै छैकि करि बौलु, “ऐनि परमेश्वरेरी निंदा क्यौरी आ, अबै असु उगाहिरी कितु जरूरत आ? तका, तुहैं बि ऐ निंदा शुणि। 66तुवे कितु समझतै अत्तै?” तैन्हैं जुबाव दिता, ऐ मारी छडणैरै काबिल आ।
67तां तैन्हैं तेसैरू मुहां पन थुक्कु, जां तेसनी मुक्क मारै, होरनियें थप्पड़ मारी करि बौलु, 68“हे मसीह, असुनि भविष्यवाणी करि-करि बोल, कि तु कुनि मारा?”
पतरसैरा नमां
(मरकुस. 14:66-72; लूका 22:56-62; यूह. 18:15-18,25-27)
69पतरस भेईर आंगणा मझ बेठौरा थ्या, कि एकि दासी तैस किन अईछी करि बौलु, “तु बि यीशु गलीली सेईतै थ्या।” 70तेनी सभनियांं केरै सांमणै ऐ बोलि करि नमां केया, जां बौलु “आंउ ना जांणता तु कितु बोलती आ।” 71जां सै भेईरियुं द्वारा पन चलि ग्या, तां दुईं दासी तैस तका करि तैन्हांं सिंउ जै तैठि बेठोरै थ्यै बोलणा लगी, “ऐ बि ता यीशु नासरी सिंउ थ्या।” 72तेनी कसम खा करि फिरी नमां केया, कि “आंउ ऐस मैहणु ना जांणता।” 73थोड़े टैंमा बाद, जै तैठि खड़ै थ्यै, तैन्हैं पतरसा किनि अईछी करि तैस सिंउ बौलु, “सचमुच तु बि तैन्हांं मझां अक आ, केईनी कि तिंडि बोलि तिंडा भेद खोलि दींति आ।” 74ता सै धिक्कार दींणा जां कसम खांणा लगा, कि “आंउ तैस मैहणु ना जांणता।” तां झट कुखड़ै बांग दित्ती। 75पतरसा यीशुरी बोलोरी सै गल याद यैई, कि “कुखड़ेरी दो बारी बांग दींण किना पेहिलै तांउ त्रा बारी मिंडा नमां कांना।” सैक्या ऐस गलै सौचि करि दुखा मझ रूंणा लगा।
Currently Selected:
मत्ती 26: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
