मरकुस 3
3
शुकोरै हत्थै वा मैहणु ठीक केया
(मत्ती 12:9-14; लूका 6:6-11)
1फिरी यीशु जेख्णी यहूदी सभा घरा मझ ग्या, ता तेनी तैठि अक मैहणु लधा जेसेरै एकि हत्था अधरंग थ्या। 2तैन्हांं मझ कुछ फरीसी यीशु पनि दोष लांणेरै तेईनी कोई अक वजह तोपतै थ्यै, ऐठणीरै तेईनी सै तैस ध्यान सिंउ तकांणा लगै ताकि सै आरामेरी धियाड़ी तैस ठीक काता कि ना। 3यीशु अधरंगी हत्थै बाऐ मैहणुनी बौलु, “सभनियांं मैहणुवां केरै मझाटै खड़ा भौ गा।” 4फिरी यीशु फरीसिया किना पुच्छु, “क्या परमेश्वर असुनि आरामेरी धियाड़ि मैहणुवां केरा भला कांनेरी आज्ञा दींता, या बुरा कांनेरी? क्या सै असुनि कोसेरी जान लींणैरी आज्ञा दींता या बचांणेरी?” पण सारै चुप बेठै। 5यीशु तेन्हैरै अड़ियल स्वभावा किना दुखी भौ करि बड़ै गुसै मझ तैन्हांं धेरै तकाउ, जां तैस मैहणुनी बौलु, “अपड़ा हत्थ मूं धेरै कर।” जिहीं तेनी हत्थ अघ्रियालीं केया, तेसैरा हत्थ ठीक भौ ग्या। 6फिरी फरीसी यहूदी सभा घरा किना भेईर गहि करि हेरोदेस राजैरै समर्थका सेईतै सलाह मशुवरा कांना लगै, कि यीशु किहीं मांना।
भीड़ यीशु पीछै चलि
7तेठां किना बाद यीशु अपड़ा चैला सेईतै गलील झीलि धेरै चलि पेया गलील जां यहूदिया जिलै किना अक बडी भीड़ तैस पिचालीं चलि। 8ऐ शुणि करि कि यीशु किहीं महान कम काता, यहूदिया जां ईदुमिया जिलै किना, यरूशलेम शहरा किना, यरदन नदी पार किना, जां सूर सैदारै नगरा किना आसै-पासेरै इलाके किना बड़ै सारै मैहणु तैस किनि यै। 9तेनी अपड़ा चैला सेईतै बौलु, मिंडै बेशणेरै तेईनी अक हल्की किश्ती तियार रखै, ता कि मैहणु मूं शिंडै ना पुईया। 10तेनी बड़ै मैहणु ठीक कियै। ऐठणीरा नतीजा ऐ भुआ कि बड़ै सारै मैहणु तेसेरै आस-पास भीड़ लांतै थ्यै जां तैस छूंणैरी कोशिश कातै थ्यै। 11जेख्णी बि बुरी आत्माय ला सताउरै मैहणु यीशु तकाईंथ्यै, सै तैस आघै आदर दींणैरै तेईनी भुणा पैयि गहींथ्यै, जां चिंडै दी करि बोलींथ्यै कि, “यीशु परमेश्वरैरा पुत्र आ।” 12पण यीशु बार-बार तेन्हांनि चेतावनी दित्ती की सै मिंडै बारै मझ मैहणुवां सेईतै किछ मेईं बोला।
बाराह खास चैला केरा चुनाव
(मत्ती 10:1-4; लूका 6:12-16)
13तेठां किना बाद यीशु तैठि नीड़ एकि पहाड़ा पनि ग्या जां सै मैहणु शदाय जै तेनी अपड़ै चैलै बंणाणेरै तेईनी चुणोरै थ्यै जां सै मैहणुवां केरै बिच मझांं तैस किनि यै। 14फिरी तेनी बाराह मैहणु चुणै जां तेनी सै अपड़ै खास चैलै बंणाय। यीशु चांहथा थ्या कि सै सेईतै रैही करि खुशखबरिरा प्रचार करिया, 15जां तेन्हांनि मैहणुवां मझां बुरी आत्माय कढणैरा अधिकार दित्ता। 16ऐ सै बाराह खास चैलै अत्तै जै यीशुरै चुणोरै अत्तै; शमौन जेसैरू नाँ तेनी पतरस रखु, 17जां जब्दिरा पुत्र याकूब, याकूबेरा हल्का भाई यूहन्ना, जेसैरू नाँ यीशु बुअनरगिस रखु ऐसेरा मतलब आ बदआ जेतिया गरजणार मैहणु, 18जां अन्द्रियास, फिलिप्पुस, बरतुल्मै, मत्ती, थोमा, हलफईरा पुत्र याकूब, तद्दै, शमौन जै यहूदी दलैरा अक सदस्या थ्या जै दल रोमी सरकारिरै खिलाफ मैहणुवां विद्रोह कांनेरै तेईनी चुक्कै लईंथ्या। 19जां यहूदा इस्करियोती जेनि यीशु धोखा दी करि पकड़वाईथ्या।
यीशु जां बालजबूल
(मत्ती 12:22-32; लूका 11:14-23; 12:10)
20तां यीशु एकि घरा मझ ग्या जां ऐतेई भीड़ किट्ठी भुई कि तेन्हैरै बोलै रोटी बि ना खई। 21जेख्णी यीशुरै घरेईते ऐ शुणु, ता सै तैस घरेनी अणनेरै तेईनी ग्यै, केईनी कि तैन्हांं लगु कि यीशु पागल भौ गियौरा। 22यहूदी शास्त्री बि जै यरूशलेम शहरा किना यौउरै थ्यै, ऐहीं बोलणा लगै, “ऐ ता बुरी आत्माय केरै सरदार, शैतानेरी मजति ला बुरिया आत्माईया भेईर कढता।”
23फिरी यीशु सैक्यै नीड़ शदा करि उदाहरणा मझ बोलणा लगा, “शैतान अपड़ियै बुरिया आत्माईया ना कढि सकता, 24अगर एकि देशेरै मैहणु योकिया मझ झगड़ीयुंतै रैहलै, ता सै जादा टैंम ना टिकि सकतै। 25अगर एकि परिवारेरै मैहणु योकिया मझ झगड़ीयुंतै रैहलै, ता सै परिवार छिन-भिन्न भौ गांहथा। 26जां अगर शैतान अपड़ा दुशमण भौ करि योकिया मझ झगड़ीयोला, ता तेसैरा राज खत्म भौ गांहथा; तां शैतान बि खत्म भौ गांहथा। 27पण कौ बि शैताना जेतिया ताकतवर कोस मैहणुरै घरै गहि करि तेसैरा माल नाँ लुटि सकता, जेख्णी तेईनी सै तैस ताकतवर मैहणु हरांणा जां बंन्हणैरे तेईनी ताकतवर ना भुईया। तां सै तेसैरू घर लुटि सकता।
28आंउ तुहां सेईतै सच-सच बोलता, कि मैहणुवां केरी सभ आउलादिरै सारै पाप जां निंदा जै सै कातै भूंतै, परमेश्वर तेन्हांनि माफ करि दैला अगर सै पश्चाताप करेलै, 29पण जै कौ पवित्र आत्मायरै कंमा केरी निंदा करि-करि तेसैरा विरोध करैला, परमेश्वरा तेन्हांनि कदि माफ ना कांनु पण सै अनंतकालैरै तेईनी पापी ठहरियुंता।” 30केईनी कि सै ऐ बोलींथ्यै, कि “तैस मझ बुरी आत्मायरी बिमारी आ।”
यीशुरी माँ जां भा
(मत्ती 12:46-50; लूका 8:19-21)
31तां यीशुरी माँ जां तेसैरा हल्का भा यै, जां भेईर खड़ै भौ करि यीशु शदाणनि केणु क्या भेईजा। 32मैहणुवां केरी भीड़ यीशुरै आस-पास बेठौरी थी, तैन्हांं मझां एकि मैहणु तैस सेईतै बौलु, “तका तिंडि माँ जां भा तांउ सेईतै भेईर मिलणा चांहथै अत्तै।” 33यीशु तेन्हांनि उत्तर दिता, मिंडी मयि जां भाई जेतियै केणु अत्तै? 34जां तैन्हांं मैहणुवां धेरै जै यीशुरै आस-पास बेठोरै थ्यै, तका करि तेनी बौलु, “तका, मिंडै माँ जां मिंडै भाई ऐक्यै अत्तै। 35केईनी कि जै कौ परमेश्वरेरी ईच्छाय पनि चलतै, सैहै मिंडै भा, भींण, जां माँ आ।”
Currently Selected:
मरकुस 3: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
