मरकुस 5
5
दुष्टआत्माय वा मैहणु ठीक केया
(मत्ती 8:28-34; लूका 8:26-39)
1जेख्णी यीशु जां तेसेरै चैलै गलील झीलिरै पार गिरासेनियोंरै इलाके मझ पुज्जै, 2जां जेख्णी यीशु किश्ती पना उतरा, ता झटपट अक मैहणु जै बुरी आत्मायरै वशा मझ थ्या, कब्रि किना निकोहि करि यीशु किनि मिला। 3सै कब्रिया मझ रिहींथ्या, जां कौ बि तैस शंगयै ला बि ना बंन्ही सकींथ्या, 4केईनी कि सैक्यै तैस बार-बार लोहेरै शंगयै ला बन्हींथ्यै, पण तेनी सै बढि दित्तै जां तेसेरै टुकड़ै-टुकड़ै करि छडै, जां कौ बि तैस अपड़ै वशा मझ ना करि सकींथ्या। 5सै रात धियाड़ि कब्रिया जां शपड़ा मझ चिंडै दिईंथ्या जां अपांणा घौड़ै ला घायल करींथ्या।
6तेनी यीशु दूरां किना तका करि दाउड़ा, जां तेसनी झुकि करि प्रणाम कियु। 7-8यीशु तेसनी बोलथियु, “बुरी आत्माय, ऐस मैहणु मझां चलि गा!” पण बुरी आत्माय सै जल्दी ना छडा, तेनी जौरै चिंड दी करि बौलु, “हे यीशु, आंउ जांणता कि तु महान परमेश्वरैरा पुत्र आ! तु केईनी मूं परेशान काता? तु परमेश्वरैरा नाँ लै करि मूं सेईतै वायदा कर कि तु मूंनी दुख ना दैला।” 9यीशु तैस किना पुच्छु, “तिंडु ना कितु आ?” तेनी तैस सेईतै बौलु, “मिंडु नाँ सैना आ; केईनी कि असै बड़ै अत्तै। जै ऐस मैहणु मझ भूंतै।” 10जां बुरी आत्माय मसीह यीशु सेईतै घड़ि-घड़ि विनती की, “असु ऐस इलाके किना भेईर मेईं भेईजै।”
11अबै तैठि सूंरा केरा अक बडा झुंड थ्या। जै पहाड़ी पनि चरता थ्या। 12जां बुरी आत्माईयै यीशु सेईतै विनती करि बौलु, कि “असु ऐन्हां सूंरा मझ भेईजि दै, कि असै तैन्हांं मझ गहिया।” 13ऐठणीरै तेईनी यीशु सैक्यै गांहणा दित्तै जां बुरी आत्माय तैस मैहणु किना निकई करि झुंडा मझ चलि गेई। फिरी सै झुन्ड उंडतानि खिट दी करि झीलि मझ पेया जां डुबि करि मरि ग्या। तैन्हांं सूंरा केरी गिणती लगभग दो हजार थी।
14जां तेन्हैरै पुव्हालै दाउड़ी करि नगरा जां शहरा मझ गहि करि ऐ समाचार शुणा, जां जै भौरू थियु, लौक तैस तकांणा यै। 15यीशु जेठि थ्या, तैस जगाय अईछी करि लौक तैस मैहणुनी जैस मझ पेहिलै किना बुरी आत्माय थी, लिकड़ै लगोरै जां होशी मझ बेठोरै तका डरि ग्यै। 16जां तकांणारै मैहणुवें जैस मझ बुरी आत्माय थी, जां सूंरा मझ जै किछ भौरू थियु तेसैरा सारा हाल तेन्हांनि शुणा। 17जां सै मैहणु यीशु सेईतै विनती करि बोलणा लगै कि असेड़ै इलाके किना चलि गा।
18जां जेख्णी यीशु गांहणैरै तेईनी किश्ती मझ बेठा, ता सै मैहणु जैस मझ पेहिलै बुरी आत्माय थी, यीशु सेईतै विनती कांना लगा, “मूं ऐपु सेईतै रीहणैरी इजाजत दै।” 19पण यीशु तेसनी ऐपु सेईतै रीहणैरी इजाजत ना दित्ती जां तैस सेईतै बौलु, “अपड़ै घरै गहि करि अपड़ै परिवारा सेईतै बोल कि ताउ पन दया करि-करि प्रभु तिंडै तेईनी कियोतै बडै-बडै कम क्यौरै अत्तै।” 20तां सै मैहणु अपड़ै घरेरै इलाके मझ चलि ग्या दिकापुलिस#5:20 दिकापुलिस दशा शहरा केरै इलाकेनी दिकापुलिस बोतै। मझ ऐस गलैरा प्रचार कांना शुरू करि दिता कि यीशु मिंडै तेईनी त्यौतु किछ क्यौरू आ, तैस शुणनार सारै मैहणु हैरान भौ गांहथै थ्यै।
यीशु याईरैरी मौरी छोकरी जींति केयि जां अक बिमार जनानि
(मत्ती 9:18-26; लूका 8:40-56)
21अक बार यीशु किश्ती मझ गलील झीलिरै पार ग्या। जेख्णी सै तैठि पुज्जा जां किनारै पन खड़ा थ्या, तेख्णी बड़ै सारै मैहणु तैस किनि किठै भौ ग्यै। 22जां याईर नाँईयें वा अक मैहणु या जै यहूदी सभा घरेरै सरदारा मझियां थ्या, सै तेसेरै पैयिड़ा पन पै ग्या, 23जां तेनी ऐहीं बोलि करि यीशु सिंउ बड़ी विनती की, “मिंडी हल्की छोकरी मरने बाई आ: ऐठणीरै तेईनी तु मिंडै घरै अईछी करि तैस पन हत्थ रख कि सै ठीक भौ करि जींति रिय्हा।” 24तां सै अपड़ा चैला सेईतै तैस सिंउ चलि पिया; जां बड़ी भीड़ तैस पिचालीं चलि पैयि, ऐड़ि तेईनी कि मैहणु तैस नीड़ पुजणैरे तेईनी तैस चोउवो तरफि किना दबांतै थ्यै।
25तैठि अक जनानि थी, जैसनि बाराह साला किना खून चलणैरी बिमारी थी। 26तेनी बड़ा बेईदा किना ईलाज करा पण अपड़ा सारा पेईंसा ला करि बि सै ठीक ना भुई पण तेसैरी हालत हौर जादा खराब भौ गैई। 27-28जेख्णी तेनी जनेनी यीशुरै बारै शुणु की सै मैहणुवां ठीक काता, ता तेनी सौचु, “अगर आंउ तेसेरै लिकड़ै बि छू लियुं ता आंउ ठीक भौ गांहणी।” ऐठणीरै तेईनी सै भीड़ि मझांं तैस पिचोरै यैई जां तेसेरै लिकड़ैरा पल्ला छू ल्या। 29जां झटपट तेसैरा खून चलणा बंद भौ ग्या, जां तैस अपड़ै शरीरा मझ पता लगी ग्या कि आंउ ऐस बिमारी किना ठीक भौ गैई। 30यीशु भीड़ि मझांं पीछेनी मुड़ा जां पुच्छु, “मिंडै लिकड़ै कुनि छुत्तै?” तेनी ऐ ऐठणीरै तेईनी बौलु केईनी कि तैस इकदम पता लगी गेईथ्या कि तैस मझांं सामर्थ निकई। 31तेसेरै चैलै तैस सेईतै बौलु, “तु तकांता कि भीड़ धक्का-मुक्की आ काति, जां तु बोलता कि कुनि तु छुता?” 32पण यीशु लगातार ओरि-परि तकांता रिय्हा ऐ जांणनेरै तेईनी कि ऐ कुनि क्यौरू थियु। 33सै जनानि बुझि गैई कि यीशुरी सामर्थी ला सै ठीक भौ गैई, ऐठणीरै तेईनी सै यीशु किनि नीड़ यैई जां मुंडक उन्धु करि तेसेरै सांमणै जेणु टंकै। डरींति जां कंपति तेनी यीशुनि सभ शुणाउ कि तेनी कितु केईथ्यु, जां फिरी तैस सेईतै कितु भूं। 34यीशु तैस सेईतै बौलु, “पुत्री तिंडै विश्वासै ला तु ठीक भुई: बिना डरै गा जां तिंडि दर्दनाक बिमारी अबै ना भूंणी।”
35जिहीं यीशु तैस जनानि सिंउ गल काताऐ थ्या, कि किछ मैहणु यै, यहूदी सभा घरा किना सरदार याईरेरै घरा किना किछ मैहणुवें ऐछि करि बौलु, “अबै गुरू परेशान कांनेरी जरूरत ना। तिंडि छोकरी मरि गियोरी आ।” 36जैस गलै सै बोलतै थ्यै, यीशु सै गलै अशुणी करि-करि यहूदी सभा घरेरै सरदारा सेईतै बौलु, “मेईं डरै बस मूं पन विश्वास रख।” 37तेनी सिर्फ पतरस, याकूब जां याकूबेरा भाई यूहन्ना जां याईर नाँईयनि ऐपु सेईतै ऐईंणैरी अनुमति दित्ती। तेनी भीड़ि मझां हौरा कौ ऐईंणा ना दिता। 38जां यहूदी सभा घरेरै सरदारेरै घरै पुज्जी करि तेनी मैहणु बड़ै रूंतै जां चिंडै दींतै हैरै। 39तां यीशु अंतर गहि करि तैन्हां सेईतै बौलु, “छोकरी मौरी ना, पण झुलोरी आ। ऐठणीरै तेईनी तुहां ऐहीं रूणैरी जां हल्ला कानेंरी जरूरत ना।” 40पण मैहणु तैस पन हसणा लगै, पण तेनी तैन्हां सभनियांनि भेईर गांहणनी बौलु, छोकरिरै माँ-बब जां अपड़ा त्रियां चैला सिंउ अंतर चलि ग्या जेठि छोकरी पेउरी थी। 41जां छोकरिरा हत्थ पकड़ी करि तैस सेईतै बौलु, “तालिता कूमी!” जेसैरा मतलब ऐ आ, “ओ हल्कि छोकरिये, आंउ ताउनि बोलता, उठ!” 42जां सै छोकरी झटपट उठिकरि चलणा लगी; जैन्हैं ऐ तकाउ सै पूरी तराहि हैरान भौ ग्यै। 43फिरी यीशु सख्त भौ करि मयि-बबनी चेतावनी दित्ती कि ऐकेई गल कोस पता न लगौरी चेहिंथी कि तेनी मौरी छोकरी जींतेरोरी थी, जां बौलु, “ऐसनि किछ खांणनी देया।”
Currently Selected:
मरकुस 5: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
