JOŊ 12

Maaria akër Yeesu ulicar

(Mat 26.6-13; Mar 14.3-9)

1Bi u ruka bi ngënu paaj pa Ufesta-pëbuer, a Yeesu tsëp Betaania di ucaak Lasaru, ni na natsanii unk di pëcäts. 2A na yecisa ufëri rul; Maarta kë sirbir, a Lasaru ci nalon tsi ban tsoar biki bariala ni Yeesu. 3#Lúk 7.37,38Din, a Maaria jej ulícar un gëbëlënaatsa wi, u wokan wi umetaari kalítar, u ñats wi mak, u leempëna wi #12.3 Bëko bëlon di Israelbënardu, a na kër itsiim Yeesu; a ni uweelul, na faaul itsiim, a kato jëk bëlieng pëñal ulícar. 4Din a Judas Iskarioti, nan ci nalon tsi bafets Yeesu, nul ni kee yai Yeesu ufets, ja: 5“We ka wun a ulicar umënts wi waaparaatsa ngëseent ngëwaants uncaam Dinaariu, uncaam umënts ka wëlaa baranj?” 6Aja ank, cits pëjaa awejats baranj, maa aci-undo bi na ci bi nakiej, a na tsijëna kamaañ uncaam, a nuu jej ko wi kan tsua wi tsi kul. 7Din, a Yeesu ja: “Wëtanul! Na moban tsi përo wul, pa unu pëmooy nji. 8#Ulú 15.11Baranj, nduu ka bukul tsi ind, ngënu bëlieng. Maa nji nda ri ka kain, ngënu bëlieng.”

9A kandënd Bajudeu kawiak bi me Yeesu ci di Betaania, a ba pën aya rul. Cits undo Yeesu rin ka wun ba ya rul, maa aci-undo pëwin bëts Lasaru, ni Yeesu natsanii tsi bacäts. 10Maa, a bawiak-bajakan, bukul buts bë baaraan Lasaru pëfiŋaa. 11Par, undo Lasaru ka wun bacumal kë pën tsi Bajudeu, a bu kë wak tsi Yeesu.

Yeesu aniaj Jerusalem

(Mat 21.1-11; Mar 11.1-10; Lúk 19.29-40)

12tsi unu u neki wi, a kandënd bañaan kawiak, bukul ban bi bukunk ufesta, te u jaka Yeesu apëni pëbi Jerusalem, 13#Iya 118.25,26a ba jej ikënd mjaak, ba pën pii jëk ni nul, bu kë lië koo ja: “Osana! N ajaaran-ngëwar, ni kan bii ink tsi katim Ajug, a na ciind Nasien Israel!” 14A Yeesu win ubuk-ubúuru, na rija wul, bi u picana bi tsi përim Nasien-batsi aja: 15#Sak 9.9“cäts lënk, Përaasa Sion! Teenan-e, Nasienu ka bi unk, arijee ubuk-ubúuru.” 16Tsi ujuundi, bafets Yeesu meets ko wi ngëmënts ngan pac wi; maa uwal wi Yeesu rëmbana wi, din a ba les ngëmënts ngan ro picana tsi ulekaul, a ngul ngi na rolaa ngun. 17A kandënd bañaan bando bukunk ci ni Yeesu, bi na rui bunk Lasaru di pëbuk a na natsee tsi bacäts, kë leents ko undolaa wi. 18Undo ko umënts wan, a kandënd bañaan kë pëni buts pii jëk ni nul, par bë te u jaka, Yeesu aro upibanaani umënts wi. 19A Bafariseu ja ban doon biki, bu kë ja bacints bukul: “Nda win! Nda ri ka gaañaar ko tsul. Nda teenan-e, bañaan bëlieng bë ci tsi pëfetsul.”

Bagërek bë ŋal pëwin Yeesu

20tsi bañaan bando biki kata atsëp pëjintëla Nasien-batsi tsi uwal ufesta, aka balon ban ci biki Bagërek. 21A ba tsëp di Filip, nul nan pënë-nii Betësaida Galileeya; a ba ñaanul aja: “Nawiak, wund aŋal pëwin Yeesu.” 22A Filip tsëp ee leents Andëre ko wan, a ba tsëp bëlieng ee leents Yeesu. 23Yeesu yank bukul aja: “Uler wi Abuk ñaan-najin ka wi përëmbana abaandi. 24Mán leents ind ucär: Uci pëbuk pëmaaj yër tsi utsia, a pa cätsats, pëci koor pul; maa uci pa cäts, pë tsij mbuk mak. 25#Mat 10.39; 16.25; Mar 8.35; Lúk 9.24; 17.33Ñaan na ŋali ubiiraul, ka niama wul. A nan ñaasi ubiiraul tsi umundu wi, ka gaang wul pa ubiira un dits wi ka ba. 26Uci ñaan kë leemparin, na fetsin; a tsëko tsi n ci tsi, naleemp nji ka ci buts tsul. Uci ñaan kë leemparin, Asin nji ka rëmbanul.

Yeesu añakanaan uleka pëcätsul

27Inkri, uwaas nji ajuatsan, a wee n du n ja wun? Paapa, bueranin Uler wi-a? Maa, undo ko umënts wi ka wun n bi pa Uler umënts wi. 28Paapa, dëmbani katimu.” Din, a përim pëni di batsi, a pa ja: “Man dëmban ba kul, a ndu n dëmban kul kak.” 29A kandënd bañaan ban do biki ci tsul, ute bukul përim, a ba ja: “Aci kampalambamb.” A balo n ja: “Aci ulon uwaanju ñakanaanul wun.” 30A Yeesu yank bukul aja: “Cits undo nji ka wun përim pan tea, maa aci-undo ind. 31Inkri, kawat umundu wi pëleents abaandi; a tsi inkri, kantsijëna umundu wi ka gutsa di utsand. 32A nji, uwal wi n dianga wi tsi utsia, ka toti bañaan bëlieng ba bi tsi nji.” 33Yeesu ja ank, par aci këci tsi pëleents bi nii cats bi. 34#Iya 110.4; Isa 9.6; Ese 37.25; Dan 7.14A kandënd bañaan yankul aja: “Wund ajukana tsi ulua, ajaka, Këristu ka ci pa sandëndën; a um di kë ja run: ‘Abuk ñaan-najin aka përianga.’ Yën ci-un Abuk ñaan-najin namëntsan?” 35Yeesu kaka yank bukul aja: “Ufac awama ci tsi pëncuaf ind tsi ko un jonats wi. Nda yandaari tsi uwal wi nda wama wi aka ufac, pa bërëm dits mob ind; par ni ka yandaari tsi bërëm, di ka me tsi nuu ya tsi. 36Uwal wi nda wama wi ka ufac, nda wakan tsi ufac, pa ndë witsa ka ci babuk ufac.” Bi Yeesu ba bi pëja irim yan, a na pën tsul, a na cëra bukul.

Kakaats-uwak tsi Yeesu

37Ŋal bi Yeesu ro bi ngëpibanaani ngëcumal tsi bërun bukul, bë wakats tsi nul. 38#Isa 53.1Unk a përim pi Isaaya, nayëlia, ja pi rolaa; iink di pa ja run: “Ajug, yën wak un tsi ko wi wund leents wi? A yën ni Ajug piban un kañanul?” 39Wul ka wun, bu yëlanats bi bu kë wak bi, par Isaaya akaka ja:

40 # Isa 6.10 “Akuelëtsan këkës bukul, a na tamban ngëwaas bukul,

pa ba rits win ni këkës,

ba rits me tsi ngëwaas,

pa ba rits witsësee, ka yësan bukul.”

41Isaaya aja ank, par awin përëmb Yeesu, a na ñakan tsi ulekaul.

42Ŋal bi u ci bank, bacumal tsi ba tsijëna-ucaak wak tsi Yeesu; maa tsi undo Bafariseu, bë leentsats, pa ba rits ruaka di kato-kajúki. 43Par bë ŋal përëmb bañaan-bajin, apean përëmb Nasien-batsi.

Yeesu ci-un ufac umundu

44A Yeesu lië, aja: “Na waki tsi nji, cits tsi nji tsi na wak tsun, maa awak tsi na yëliini. 45A na winini, awin na yëliini. 46Nji nan ci ufac, man bi tsi umundu pa ñaan na waki ba këwak tsi nji, di ka ci di krëm. 47A uci ñaan te irim nji, a mobats tsi yul, in di ka n watul pëleents, par nji n biits këbi pëwat umundu pëleents, maa tsi ucär, pëbueran umundu. 48Ñaan nan bërini, a niiranats irim nji, nul, aka ni ka watuli pëleents; përim pi n leents pi, pul ka watul pun pëleents, tsi unu utuami. 49Par, ko wi n ja wi, biinatsi tsi nji bërierin; maa na yëliini, nul Asin nji, tsuin un ko wi n du n ja wi, ni wi n du n leents wi. 50A n me utsuaul aci ubiira un dits wi ka ba. Unk, ngi n du n ja ngi, má n ja bi Asin nji jain bi.”

Currently Selected:

JOŊ 12: KPKNT

Highlight

Copy