JOŊ 9
9
Yeesu ayësan nalon niints nan bukandee bukuel
1Bi Yeesu kë par bi, a na win nalon niints nan bukandee bukuel. 2A bafetsul yepar aja: “Rabi, yën juban un, bi niintsi bëkanda bink bukuel, nul oo ban bukul biki-a?” 3A Yeesu yank bukul aja: “Cits undo ajuban, te cits undo ban bukul biki ajuban; maa aci-undo uleemp Nasien-batsi pëpibanaa tsi nul. 4Bi unu wama bink aci pënak, ngë ka përo uleemp na yëliini. Bërëm ka baandi, uwal wi ñaan dits wi ka yëlan pëleemp. 5#Mat 5.14; Joŋ 8.12N wama n ci ba këci tsi umundu, nji n ci-un ufac umundu.” 6Bi Yeesu ja bi ngëko ngan, a na túj tsi utsia. Ni itúj na ro bupot, a na tsu bul tsi këkës nakuel; 7a na jaul: “tsëpan kii ñawa di pëwal Silowe,” un ci wi: Na yëlee. A nakuel tsëp, nee ñawa, a na witsee a nuu win.
8Din, a bañaan pëcën, ni bañaan ban do biki ka winul a nuu ñaan, kë yepëlar koo ja: “Cits iink namëntsi ci-un nan don unk ka tsoar a nuu ñaan a?” 9A balon kë ja: “Aciul” bacints kë ja: “Citsul, aci nalon na naami ni nul.” Nul bërierul, a na ja: “Aci nji.” 10Maa, ba jaul: “A um bi këkësu waantsar bun?” 11Na yank aja: “Niints ni ka n jaka unk Yeesu, do un bëpot na kërin di këkës, a na jain: ‘tsëpan kii ñawa di Silowe.’ Din, a n tsëp ee ñawa, a nduka ka n win.” 12A ba jaul: “Aci tsum, namëntsnan?” A na yank aja: “Nji n meets.”
Bafariseu ci tsi pëtsas pëme bi nakuel yës bi ja
13A ba tsëpand niints nando unk kuelëts di Bafariseu. 14A u ro ci-unu-pënaakësa, wi Yeesu ro wun bëpot, na waantsënul këkës. 15A Bafariseu yeparul bi na ro bi a nuu win. Na ja bukul: “Nul, atsuin bëpot di këkës, a n tsëp ee n ñawa, a ndu n win.” 16Wul ka wun, a balon tsi Bafariseu kë ja: “Namënts nan, pënënatsi tsi Nasien-batsi, par mobats tsi përo ko un tsua wi tsi Unu-pënaakësa.” Maa bacints kë ja: “Um bi ñaan-najin, nul nan ci najuban, yëlan bun përo ngëpibanaani pi ngëmënts ngi?” Din, a manteelarats ci tsi bukul. 17A ba kaka yepar nakuel aja: “A wi, wee kë ja wun tsi uleka na waantsu ink këkës?” A na yank bukul aja: “Aci nayëlia.” 18Maa, Bajudeu fiaarats na ro ci nakuel a na ruka ka win; a ba tsënkëne rui bábukul. 19A ba yepar bukul, aja: “Namëntsi ci-un abuk ind, ni nda jai abukanda bukuel-a? A um bi na ro bun a nuu win inkri?” 20A bábukul yank aja: “Wund ame namëntsi ci abuk wund, a na bëkanda bukuel. 21Maa, bi na ro bi a na ruka ka win, wund meets; a na waantsuli këkës, wund meets. Nda yepariul, nul aci nawiak, ka leents bërierul ulekaul.” 22Bábukul aja ko wan, undo bë lal Bajudeu; par Bajudeu abaar ba pëloole pa uci ñaa n ja Yeesu ci-un Këristu, bu ka pënanul di kato-kajúki. 23Wul ka wun bábukul ja: “Nul, aci nawiak, nda yepariul.” 24Din, a Bafariseu tëbants përui niints nandon unk kuelëts, a ba jaul: “Dëmbani Nasien-batsi; wund ame ñaan ni ci najuban.” 25A na ja bukul: “Uci na ci najuban, nji n meets. Ko uloole wi n me wun: man do n ci nakuel, maa inkri a ndu n win.” 26Maa ba kaka jaul: “We wi na rou wun? Um bi na waantsu bun këkës?”
27A na yank bukul aja: “Man leents ind ba, a nda teets. We ka wun a nda kaka ŋal pëte? Nda ŋalats përuka ci bafetsul buts-a?” 28Din a Bafariseu karul, ba jaul: “Wi ci-un ni kan fetsi namëntsnan; maa wund, wund aci bafets Moises. 29Nja ngë me Nasien-batsi ñakanaan Moises; maa namëntsi, wund meets tsi na pënë-ni tsi.” 30A niints yank bukul aja: “Ko wan apikran, bi nda meets bank tsi na pënë-ni tsi; maa nul waantsin un këkës. 31Nja ngë me Nasien-batsi di ka cikëndën baro-ngëjuban, maa uci ñaan ci nalënk Nasien-batsi, a nuu ro uŋalul, namënts un Nasien-batsi ka cikëndënul. 32Ki umundu juund ki, yaas a u tea ñaan waants këkës nan bukandee bukuel. 33Uci namëntsi roots pënë-ni tsi Nasien-batsi, bitse ka yëlan përo ko.” 34A ba yankul aja: “Wi nan bukee bëlieng tsi ngëjuban, a kë jukan wund-a?” A ba ruakul.
Bakuel tsi uwejats
35Yeesu te ba ruakul, a nuu winul, na jaul: “M wak tsi Abuk ñaan-najin-a?” 36A na yankul aja: “Ajug! Aci yën, pa nji pëwak tsi nul?” 37Yeesu jaul: “M winul; ni ka ñakan ink ni wi, ciul un.” 38A na ja Yeesu: “Ajug, ma wak!” A na yër ajintëlaul. 39Din, a Yeesu jaul: “Man bi tsi umundu wi, pa kawat-pëleents; pa ban dits biki ka win, bu kë win; a biki ka win biki, bu ka witsa ka ci bakuel.” 40A balon tsi Bafariseu ban ci biki tsi kawok Yeesu te ko wan, ba ja Yeesu: “A wund buts, wund aci bakuel-a?” 41A Yeesu ja bukul: “Uci nda ro ci bakuel, nda bitse ka ka ujuban. Maa bi nda ja bink: ‘Wund awin;’ ujuban ind ka ruka unk.
Currently Selected:
JOŊ 9: KPKNT
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Manjaku © Alliance Biblique du Sénégal, 2020.
