यूहन्ना 2
2
गलील कै काना नगर दा जाजड़ा
1तिजै दूसै गलील जिले कै काना नगर दा कोसी का जाजड़ा थिया औरौ यीशु कै माँ बै तिथै थी। 2यीशु औरौ तैसकै चैलै बै तैसी जाजड़ै मुंजी बौएदै राए थिए।
3जोबै पोऊंणै सौबै अंगूर का रस पी पाया तौ यीशु कै माँए तैसीखै बौल़ौ, “कै इनुकैंई अंगूर का रस खत्म हौए गौआ।” 4यीशुए तियौंखै बौल़ौ, “ओए रै माँ तुऐं मुखै काए बौताए लो? मसीह कै रुप दा पोछैयाणै जाणौ का मैरा सौमय इबी ना आए रैई।” 5पौरौ तैसकी माँए सेवको खै बौल़ौ, “जू किछै सै तुऔं खै बौल़ौ सैजौई कौरेया।”
6यहूदी लोगौ का आपणै नियम कै हिसाब शै हाथ धोणो का भोवार थिया। ऐशै कौरणौ कारिए तिनुऐ तिथै पाथरो कै छौ माट धोरे राए थिए, जिनुदा दो-दो औरौ तीन-तीन मण#2:6 ऐक मण चाल़ीश लीटर कै बराबर औसौ। समांव थियु। 7यीशुए तिनुखै बौल़ौ, “माटो दो पाणी भोरै दैव।” तोबै तिनुऐ माटो कै मुंआमुं भोरै दिए। 8तोबै यीशुए सेवको कै बौल़ौ, “ऐबै पाणी गाड़ेयो टोलुआ कै मुखिया कै धोरे लोए जाव।” औरौ सेवके तैशैकैई कौरौ जैशैखै तैणै बौल़ै राए थियु। 9जोबै टोलुआ कै मुख्याए पाणी चाखो जू अंगूर का रस बौणै गौ थियु औरौ सै जाणौ नै थिया कै ऐजौ कुकै दो ओऊं। पौरौ जिनु सेवके पाणी गाड़ै राए थियु सै जाणौ थिए, तोबै टोलुआ कै मुख्याए दूल्हा कै बोयदयो तैसीखै बौल़ौ, 10“ओए रै बरखुरदार! हरेक आदमी औगौड़ियौ बड़िया अंगूर का रस दैंव, औरौ जोबै लोग पियौं कै छौकै जांव, तोबै सै बैकार अंगूर का रस दैंव, पौरौ तुऐं बड़िया अंगूर का रस इबी तौड़ी राखै राए।”
11यीशुए गलील जिले कै काना नगर दा आपणा ऐजा आगला चौमत्कार का काम देखाएबा आपणै महिमा प्रगट कौरे औरौ तैसकै चैलै तैसी पांदी बिशवाश कौरा कै सै मसीह औसौ।
12इथकै बाद सै औरौ तैसकै माँ औरौ तैसकै भाए औरौ तैसकै चैलै कफरनहूम नगर खै हौटै औरौ तिथै किछैक दूस रौवै।
मन्दिर पौरैशै व्यापारियों कै आगु घाड़णै
(मत्ती 21:12-13; मर 11:15-17; लूका 19:45-46)
13यहूदी नेताओं का फसह का तैयार नेड़िक थिया औरौ यीशु यरूशलेम शहर खै हौटा। 14औरौ तैणै मन्दिरो दै बौल़ोद औरौ भेड़ औरौ कबूतर बिकणौवाल़ै औरौ पौयसै बौदल़णौ वाल़ै लोगौ कै बौठैयौंदे दैखै। 15तोबै तैणै पागोई का कोड़ा बाणैयो, सौबी भेड़ो औरौ बौल़ोद खै मन्दिरो पौरैशै निकाल़ै दियै, औरौ तैणै पौयसै बौदल़णौ वाल़ै लोगौ कै पौयसै, बिखराए दिए औरौ मैज़ पोल़टी दी, 16औरौ कबूतर बिकणौवाल़ै खै बौल़ौ, “इनु इथदै लोए जाव मैरै पिता पौरमेशवर कै घोरो खै व्यापार का घोर नी बाणौ।”
17तोबै तैसकै चैलै खै याद ओऊ की पवित्र शास्त्र दो लैखै राए कै, “तैरै घोरो कै भोक्ती मैरै भीतरै आगी साए जौल़ौ।”
18इथपांदी यहूदी नेताए तैसीखै बौल़ौ, “जै तुंवागै पौरमेशवर कैईंदा ऐजा औधिकार औसौ, तौ आमुखै इथु साबित कौरणौ कारिए ऐक निशान दिखा?” 19यीशुए तिनुकै जोवाब दिया, “ऐसी मन्दिरो खै ढाल़ै दैंव, औरौ हांव ऐसीखै ती दूसौ दा दुजाल़ियो बाणै दोऊंबा।” 20औरौ यहूदी नेताए बौल़ौ, “ऐसी मन्दिरो कै बौणाणौ खै छियालीस सालो लागै रौई, औरौ का तू ऐजौ ती दूसौ दा दुजाल़ियो बाणै दैंदा?” 21पौरौ यीशु जैसी मन्दिरो कै बारै मुंजी बौल़ै लौ थियु सै तैसकै शोरीर कै बारै मुंजी थियु। 22हौजौ जोबै सै मौरणौ कै बाद जियुंदा हौआ, तौ तैसकै चैलै खै याद ओऊं कै तैणै ऐजौ बौल़ै राए थियु, औरौ तिनुऐ पवित्र शास्त्र पांदी जू मसीह कै मौरेयौंदे मुंजीदै जियुंदी हौणौ कै बारै मुंजी बौतांव, औरौ जू यीशुए बौल़ै राए थियु, तिथ पांदी बिशवाश कौरा।
यीशु आदमी कै मनो खै जाणौए
23फसह कै तैयारो कै सौमय मुंजी जोबै यीशु यरूशलेम शहर दा थिया, तौ बौहितै लोगै तिनु निशान कै जू यीशु दिखांव थिया तिनुकै दैखैयो तैसी पांदी बिशवाश कौरा। 24पौरौ यीशुए बिशवाश ना कौरी कै तिनुऐ तैसी पांदी भोरोशा कौरे राए, जिथुकै सै आदमी कै स्वभाव कै जाणौ थिया। 25औरौ तैसीखै कोसी कै जौरुरत ना थी, जू तैसीकै लोगौ कै बारै मुंजी बौतांव जिथुकै सै जाणौ थिया तिनकै दिलो औरौ इरादै दो का थियु।
Currently Selected:
यूहन्ना 2: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
