लूका 1
1
लूका का मकसद
1मानै गिणियोंदा थियुफिलुस बौहितै लोगै आमु मुंजी हौए रोई घोटणांव कै बारै मुंजी ऐकी कागजात दी लिखणौ कै कौचिश कौरे राए। 2तिनुऐ सैजौ लिखु जू आमुखै तिनु लोगै बौताए राए थियु, जिनुवै यीशु कै सेवा कै शुरुआत शै दैख राए थिया औरौ जू बाद मै पौरमेशवर कै वचन कै सेवक बौणै गौवै। 3मोऐं सौबी बातौ कै आछै शै पौरखै राए औरौ मुखै ऐजौ आछौ लागौ कै हांव तुऔं कारिए इनु घोटणांव कै मैल कै हिसाब शै लिखु। 4मोऐं ऐजौ इथकारिए कौरे लो कै तुऐं तिनु सारी घोटणांव कै सौचाई पौता लागौ जू लोगै तुऔं बौताए राए।
जकर्याह औरौ एलीशिबा
5जोबै हेरोदेस राजा यहूदिया प्रदेश दा राज कौरौ थिया तिथै अबिय्याह कै नांव पांदी बोणेयोंदा यहूदी पुरोहितो कै गुट#1:5 राजा दाऊद कै सौमय शै, पुरोहितो कै चौबीश गुट थिये जू मंदिरो दै हौणौवाल़ै सौबी टोल कारिए जिथमुंजी दाण, बल़ियां दैणा, प्रार्थना, आराधना कौरणौ कारिए जुमैवार थिये। हर गुट हर छौ मीनै दै ऐक बार ऐक हफते कारिए सेवा कौरौ थिये। मुंजीदा जकर्याह नांव का ऐक पुरोहित थिया, औरौ तैसकी घोरवाल़ी को नांव एलीशिबा थियु औरौ सै बै इस्राएल देश कै आगलै पुरोहित हारून कै वंश कै थी, औरौ जकर्याह बै हारून कै वंश का थिया। 6औरौ सै दुईनै पौरमेशवर कै सामणै धरमी थिए, औरौ प्रभु की सौबी आज्ञाओं औरौ नियमौ पांदी निर्दोष चालणौ वाल़ै थिए। 7पौरौ तिनकै ऐक बै नानड़िया ना थी जिथुखै एलीशिबा शोनै थी औरौ सै दुईनै बूढ़े थिए।
स्वर्गदूत दवारा यूहन्ना कै जन्म कै बारै मुंजी बौताणौ।
8ऐक दूस जोबै जकर्याह यरूशलेम मंदिर दा आपणै गुट कै बारी पांदी पौरमेशवर कै सामणै यहूदी पुरोहित कै टोल सांडै लोए थी। 9तौ यहूदी पुरोहित कै आपणै पारची पाणौ कै भोवार कै हिसाब शै जैसकै नांव पांदी पारची निकल़ौ थी, सैजाई प्रभु कै मन्दिर दा जायौ खै धूप जोल़ांव थिया। 10धूप जौल़ाणौ कै सौमय लोगौ कै सौबै मण्डली मंदिरो कै आँगणो कै बायरै प्रार्थना कौरदै लागै रौए थै। 11तोबै तैसी सौमय प्रभु का ऐक स्वर्गदूत धूपो की बैदी कै सोऐं ढौबौ खौड़ा हौएयौंदा तैसकै दैखिया। 12औरौ जकर्याह तैसीखै दैखैयो कै घोबरोऊवा औरौ डौरे गौआ। 13पौरौ स्वर्गदूतै तैसीकै बौल़ौ, “ओए रै जकर्याह, डौरेया नै जिथुकै पौरमेशवरे तैरी प्रार्थना शौणै राए, औरौ तैरी घोरवाल़ी एलीशिबा शै ताखै ऐक बैटा पौयदा हौंदा, औरौ तू तैसकौ नांव यूहन्ना राखैया। 14ताखै आनन्द औरौ खुशी हौंदै, औरौ बौहितै लोग तैसकै जन्म की बौजैह शै खुशी हौंदै। 15जिथुखै सै प्रभु कै सामणै महान हौंदा, औरौ सै नौशीला रस औरौ सूर कौलोंई ना पिन्दा औरौ आपणी माँ कै पेटो दा ही पवित्र आत्मा लैई भौरेयौंदा हौंदा। 16औरौ इस्राएल देश कै कैई लोगौ खै तिनुकै प्रभु पौरमेशवर कै ढौबौ फैरदा। 17यूहन्ना ऐक ऐशणा आदमी हौंदा जू आत्मा दा शौकतीशाली औरौ एलिय्याह पौरमेशवर कै बातौ बौताणौवाल़ै कै जैशणा औसौ। औरौ सै प्रभु कै बाट तैयार कौरदा औरौ पितरो का मन नानड़िया की ढौबौ फैरै दैंदा; औरौ आज्ञा ना मानणोवाल़ै लोगौ कै पौरमेशवर कै ज्ञान कै मानणौ कारिए बौलदा औरौ प्रभु कारिए लोगौ खै सुधारीयों तैयार कौरदा।”
18जकर्याहए स्वर्गदूत शै पूछु, “हांव कैशैखै बिशवाश कौरु कै अमारै साथै ऐशैखै हौंदौ? जिथुकै हांव तौ बूढ़ा औसौ; औरौ मैरी घोरवाल़ी बै बूढ़े हौए गौए।” 19स्वर्गदूतै तैसीखै जोवाब दिया, “हांव जिब्राईल औसौ; जू पौरमेशवर कै सामणै खौड़ा रौंव; औरौ मुखै तांवआरी बातौ कौरदा औरौ ताखै ऐजा सुसमाचार प्रचार कौरदा भैज राए। 20दैखौ, जांव तौड़ी ऐशै ना हौं, तांव तौड़ी तू गुंगा रौंदा औरौ बौलाए ना सौकदा, इथकारिए कै तुऐं मैरी बातौ कै जू आपणै सौमय दी पूरी हौंदी, बिशवाश ना कौरी।”
21लोग जकर्याह कै ठोल़नाए कौरदै रौए औरौ हैरान हौए गौवै कै तैसीकै मन्दिर दै इशैक देर काए हौए रौए। 22तोबै सै बायरै ओऊवा तौ तिनुआरी बौल़ेई ना, तोबै तिनुऐ जाणै पोऊँ, कै तैणै मन्दिर दा किछै दर्शन दैखै राए औरौ सै तिनुकै इशारा कौरदा रौआ, पौरौ सै गुंगा हौए गौआ।
23जोबै मंदिर दै ऐक पुरोहित कै भैषो दै तैसकै सेवा कै हफते पूरै हौए गौवै, तौ सै यरूशलेम शै आपणै घोरो कै हौटै गौआ। 24कैई दूसौ कै बाद तैसकै घोरवाल़ी एलीशिबा कै होल़किणु हौं, औरौ पाँच मीनै तौड़ी आपी खै ओकी कै नज़र शै छुपायो राखी। 25तियैं बौल़ौ, “प्रभुए मुं कारिए ऐजा भला काम कौरे राए तैणै मुं पांदी बैजाए बौड़ै दया कौरे राए औरौ लोगौ कै सामणै मैरै बैज्जती कै दूर कौरे राए।”
स्वर्गदूत कौ मरियम कै सामणै प्रकट हौणौ
26एलीशिबा कै होल़किणु कै छौठे मीनै दै पौरमेशवर कै ढौबौशा जिब्राईल स्वर्गदूत गलील जिले कै नासरत गांव दा, 27ऐक कुंवारी कै धोरे हौटा। जिंयारै सोगाए यूसुफ नांव कै राजा दाऊद कै वंश कै ऐकी आदमी आरी हौए रौए थी। तियौं कुंवारी कौ नांव मरियम थियु। 28औरौ स्वर्गदूतै तियौंकै धोरे भीतरै आयौ बौल़ौ, “खुशी औरौ जय तैरी हौं, पौरमेशवरे तांव पांदी बैजाए आर्शीवाद दैय राए! प्रभु तैरै साथै औसौ।” 29सै ऐसी वचनो शै बौहितै घबराए गौए, औरौ सुंचदै लागै कै इयौं बातौ का, का मतलब औसौ। 30स्वर्गदूतै तियौं बौल़ौ, “ओए रै मरियम; डौरेया नै, जिथुकै पौरमेशवर का अनुग्रह तांव पांदी औसौ। 31दैख, तू होल़किंदी, औरौ तैरै ऐक बैटा पौयदा हौंदा; तू तैसकौ नांव यीशु राखैया। 32सै महान हौंदा औरौ सौबीदा बौड़ा पौरमेशवर का बैटा बौला जांदा औरौ प्रभु पौरमेशवर तैसकै पुराणिया राजा दाऊद जैशणा राजा बाणदा। 33औरौ सै याकूब कै वंश पांदी हमैशा राज कौरदा; औरौ तैसकै राज्य का अन्त ना हौंदा।”
34मरियमे स्वर्गदूत शै पूछु, “ऐजौ कैशै हौंदौ? हांव तौ कुंवारी औसौ।” 35स्वर्गदूतै तियौं जोवाब दिया, “पवित्र आत्मा तांव पांदी उतौरदा औरौ सौबीदै बौड़ै पौरमेशवर कै अनौखी शौकतै तांव पांदी छाया कौरदै; इथकारिए जू तांव पौरैशा पौयदा हौंदा सै पवित्र बैटा हौंदा औरौ सै पौरमेशवर का बैटा बोला जाला। 36औरौ शुण, तैरै कुड़बे दी एलीशिबा कै बै बुढ़ापे दा बैटा हौणौवाल़ा औसौ, औरौ सै जू शोनै थी, तियांरा बै छौठा मीहना चालै रौआ। 37पौरमेशवर सौबै ठुँ कौरे सौकौ।”
38मरियमे बौल़ौ, “हांव प्रभु कै दासी औसौ, जैशैकै तुऐं बौल़ै राए तैशैकैई मुंआरी हौंव।” तोबै स्वर्गदूत तियौं धोरे दा हौटै गौआ।
एलीशिबा कै धोरे मरियम कौ जाणौ
39किछै दूसौ बाद मरियम तैयार हौयौ तावल़ै यहूदिया प्रदेश कै पहाड़ी इलाके कै ऐकी गांव दै हौटै। 40औरौ जकर्याह कै घोरे जाऐबा एलीशिबा कै नमश्कार कौरा। 41जैशैकैई एलीशिबाए मरियम का नमश्कार शुणा तैशैकैई नानड़िया तियौंकै पेटो दा छिड़ा औरौ एलीशिबा पवित्र आत्मा शै भोरै गौए। 42औरौ तियैं जोर सै बौल़ौ, “तू बैटमाणिशौ मुंजी धन्य औसौ, औरौ जैसी भैईया खै तू जन्म दैलै सै धन्य औसौ! 43हांव ताखै इथै दैखैयो आपी खै खुशनसीब महसूस कौरु, कै मैरै प्रभु कै माँ मुखै भैटदै आए रौए? 44औरौ जैशैकैई मोऐं तैरै नमश्कार का शोब्द शुणा तैशैकैई मैरै पेटो दा बौचा खुशी शै हिंजल़दा लागा। 45औरौ तू धन्य औसौ जिथुकै तुऐं बिशवाश कौरे राए कै प्रभुए जू ताखै बौल़ै राए सै सैजौ पूरु कौरदा।”
मरियम दवारा पौरमेशवर कै बौड़ाए कौरणै
46तोबै मरियमे बौल़ौ,
“हांव पौरमेशवर कै बौड़ाए कौरु।
47औरौ मैरी आत्मा मैरै उध्दार कौरणौवाल़ै
पौरमेशवर शै खुशी औसौ।
48जिथु तैणै आपणै दासी कै दीनता पांदी
नज़र कौरे राए;
इथकारिए ऐलो दै ऊबै सौबै जुग-जुग
कै लोग मुखै धन्य बौलदै।
49जिथुकै तैणै शौकतीमाने मुं कारिए बौड़ै-बौड़ै
काम कौरे राए तैसकौ नांव पवित्र औसौ।
50औरौ तैसकै दया तिनु लोगौ पांदी बौणैयौंदे रौंव
जू पीढ़ी शै पीढ़ी तौड़ी तैसिदै डौरौ।
51तैणै आपणै महान शौकतै कै काम कौरे राए,
औरौ जू घमण्ड कौरौ थिए, तिनुकै हराए दिए।
52औरौ तैणै शौकतीशालियौ कै औधिकारो कै उंढे कौरे
औरौ दीन लोगौ कै ऊंचे कौरे।
53तैणै भूखो कै आछै चीज़ौ लैई छोकाए दिए
औरौ सैठ लोगौ कै खाली हाथ निकाल़ै दिए।
54तैणै अमारै पुराणियो कारिए आपणै वादै कै याद राखा,
औरौ आपणै सेवक इस्राएल देश कै लोगौ कै मौदद कारिए ओऊवा।
55तैणै अब्राहम औरौ तैसकै सारै वंशो खै हमैशा कारिए दया दिखाणौ कारिए याद कौरे राए।”
56मरियम लमसम तीन मीनै तौड़ी एलीशिबा कै साथै रौए औरौ आपणै घोरो हौटै गौए।
यूहन्ना बपतिस्मा दाता का जन्म
57तोबै एलीशिबा कै सुजणौ का सौमय पूरा हौए गौआ, औरौ तियैं ऐकी बैटै कै जन्म दिया। 58तिनकै पड़ोसी औरौ तिनकै कुढ़बेवाल़ै ऐजौ शोणेयो, कै प्रभुए तियौं पांदी दया कौरे राए, तियौंकै साथै खुश हौए।
59आठवें दूसै सैजै भेइया का खतना#1:59 खतना का मतलब औसौ भेईया कै गुप्त अंग कै खोलड़ी का ओगोड़ियो का हिस्सा काटणा। जू कै भेइया कै पोयदा हौणौ कै आठवें दुसै हौंव थिया। कौरदै ओऊवे। औरौ सैजै तैसकौ नांव तैसकै बापू कै नांव पांदी जकर्याह राखदै लागै। 60पौरौ तैसकै माँए बौल़ौ, “ना ऐसको नांव यूहन्ना राखौ।” 61तिनुऐ तियौंकै बौल़ौ कै, “तैरै कुड़बे मुंजी कोसी को ऐजौ नांव ना आथी।” 62तोबै तिनुऐ तैसकै बापू शै इशारा कौरेयौ पूछु कै तू ऐसको का नांव राखणौ चांए? 63तैणै लिखणौ कै पाटड़ी मांगेबा लैखै दियु, “ऐसको नांव यूहन्ना औसौ।” औरौ सौबै लोग हैरान हौए गौवै। 64तोबै तैसकौ मुँह औरौ जीभ तौलोंई खोले गौए, औरौ सै बौलदा लागा औरौ पौरमेशवर का धन्यवाद कौरदा लागा। 65औरौ तैसकै ऊंडोड़े-पुडोड़े सौबै रौणौवाल़ै लोगौ पांदी डौर छाए गौआ; औरौ इनु सौबी बातौ की चौर्चा यहूदिया प्रदेश कै सारै पहाड़ी देशो दै फोयली गौए। 66औरौ सौबी शुणणौवाल़ै आपणै-आपणै मनो दो सोंचैयो बौल़ौ, “ऐजा भेइया कैशणा हौंदा?” जिथुकै प्रभु कै शौकतै तैसीआरी औसौ।
जकर्याह कै दवारा पौरमेशवर कै बारै मुंजी बौताणौ
67तैसका बापू जकर्याह पवित्र आत्मा शै भोरै गौआ, औरौ पौरमेशवर कै बौलेयौंदी बातौ बौतांदा लागा।
68“प्रभु इस्राएल देश कै पौरमेशवर कै बौड़ाए कौरौ,
कै तैणै आपणै लोगौ पांदी नज़र राखैयौ
तिनका छुटकारा कौरे राए,
69औरौ आपणै सेवक राजा दाऊद कै वंशो मुंजीदा
आमु कारिए ऐक उध्दार कौरणौवाल़ा भैजै राए।
70जैशैकै सै आपणै पवित्र पौरमेशवर कै बातौ बौताणौवाल़ै
कै मुँह शै पुराणै सौमय शै ऐजौ बौलेयौ आए रौआ।
71कै सै दुशमनो औरौ सौबी
बैरियो कै हाथौ लैई आमु जू आमुआरी नफरत कौरौ छुड़ांदा।
72सै आपणी पवित्र कौरार कै याद कौरेयौ
अमारै पुराणिया पांदी दया कौरदा।
73औरौ सैजै शौं जू तैणै अमारै पुराणिया अब्राहम शै खाए राए थै।
74कै सै आमु दुशमनो कै हाथौ शै आमु बौचांदा।
75कै आमु तैसकै सामणै पवित्रता औरौ धार्मिकता
दै जांव तौड़ी आमु जियुंदी औसौ तांव तौड़ी तैसकै सेवा कौरदै रौंदै।
76औरौ तू ओए रै बालक, ऐबै शै तू सौबीदा बौड़ा पौरमेशवर कै बातौ बौताणौवाल़ा जाणा जांदा,
औरौ तू प्रभु कै आणौ कारिए आदमी कै तैयार कौरदा।
77तू पौरमेशवर कै लोगौ खै पापौ कै माफी औरौ उध्दार कै बारै मुंजी ज्ञान दैला।
78ऐजौ अमारै पौरमेशवर की तियौं बौड़ी दया शै हौंदौ;
औरौ जैशैकै सुरज आमु पेयाशो दैणौ कारिए चौमकौ तैशैकैई मसीह बै अमारै धोरे स्वर्ग शै आन्दा।
79कै जू लोग इनारै दै औरौ सौदा कै मौत कै खतरै दै औसौ तिनुकै पेयाशो भैटी सौकौ।
औरौ ऐजौ पेयाशो आमु जीवन की बाटो पांदी लोए जांदो जू आमु पौरमेशवर कै साथै शान्तै दैलौ।”
80औरौ सैजा भेइया यूहन्ना, बौढ़दा औरौ आत्मा दा मोजबूत हौंदा रौआ, औरौ इस्राएल देश कै लोगौ मुंजी उपदैश दैणौ कै दूस तौड़ी शुनशान जौगैह दा रौआ।
Currently Selected:
लूका 1: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
