लूका 17
17
चोकशाणा
(मत्ती 18:6-7,21-22; मर 9:42)
1यीशुए आपणै चैलै कै बौल़ौ, “ऐजै बात पाकै औसौ कै परीक्षाएँ आदमी कै सामणै जौरुर आन्दी, जू तिनकै पाप कौरणौ कै बौजैह बोणदी पौरौ हाय तैसी पांदी जैसकी बौजैह शै परीक्षा आंव! 2जू इनु नानड़ै मुंजी कोसी ऐकी कै बै पाप कौरवाणौ कै बौजैह बौणौ, तैसी कारिए आछौ हौल़ौ कै ऐक बौड़ै चाकी का पाथर तैसकै टाटु दा टांगै दैंव, औरौ तैसी समुन्द्र दा पाए दैंव जिथुकै तैसीकै ऐजै बुरै सौजा हौंदै। पौरौ पौरमेशवर तैसीखै इदै बै बुरै सौजा दैन्दा।
3चौकश रौया; कै तुऐं का कौरौ, जै तैरा बिशवाशी भाए पाप कौरौ तौ तैसी डांट, औरौ जै सै आपणै पाप कौरणौ शै पोछतांव तौ तैसी माफ कौर। 4जै दूस भोरै सै सात बैई तैरै खिलाफ पाप कौरौ, औरौ सात बैई तैरै धोरे होटेयो आयौ बौल़ौ, कै हांव आपणै पाप शै पोछतौऊं, तौ तैसी माफ कौरेया।”
तोंवारा बिशवाश कैतरा बौड़ा औसौ?
5तोबै चोणेयौंदे चैलै प्रभु यीशु कै बौल़ौ, “अमारै बिशवाश कै हौजौ मजबूत कौर।” 6प्रभुए बौल़ौ, “जै तुऔं खै राई कै दाणै कै बोराबर बै बिशवाश हौंदा, तौ तुऐं ऐसी तुन्तौ कै डाल़ो खै बौलदै कै जोड़ो शा ओकशैयो समुन्द्रो दा लागै जा, तौ सै तुंआरी मान पांदा।”
आछा नोकर
7“पौरौ तुऔं मुंजी ऐशणा कुण औसौ, जै तोंवारा नोकर हौल़ौ लैई बौयौ या भेड़ो कै दैख-रैख कौरेयौ घोरे आंव, तौ तुऐं का बौलल़ै, तावल़ा आयौ खाणौ खांदा बौठ? 8ना पौरौ सै बौलदा, मैरौ खाणौ तैयार कौर, औरौ जौल़ौ तौड़ी हांव खोऊं-पियुं तौलौ तौड़ी मैरै सेवा कौरणौ कारिए तैयार रौंव; इथकै बाद तू बै खाए पैया कौरेया। 9तुऐं आपणै नोकरो खै तैसी टोल सांडणौ कारिए धन्यवाद ना कौरदै, जू तुऐं तैसी कौरणौ कारिए बौल़ै राए थियु? 10ऐशैखैई तुऐं बै, जोबै तुऐं बै ऐजौ सौबै ठुँ कौरे पांव जू तुऔं कौरणौ बौल़ै राए थियु, तौ तुऔं ऐजौ बौलणौ चैंई कै, ‘आमुए निकम्मे नोकर औसौ; जू आमु कौरणौ चैंई थियु आमु सिरफ सैजौई कौरे राए।’”
ऐकी कोढ़ी का सान मानणा
11जोबै यीशु औरौ तैसकै चैलै यरूशलेम शहर जांदै बैई सामरिया प्रदेश औरौ गलील जिले कै सैयानै बाटी जांदै लागै रौवै थिए। 12औरौ जोबै सै कोसी गांव दै पोहुचणौ वाल़ै थिए तौ तैसीकै दस कोढ़ी भैटी। 13तिनुऐ दूरकै खौड़ै हौयौ जोर सै लैरौ मारेयों बौल़ौ, “ओए रै यीशु, ओए रै मालिक, आमु पांदी दया कौर!” 14यीशुए तिनु दैखैयो बौल़ौ, यरूशलेम शहर कै मन्दिरो दै, “जाव; औरौ आपी खै यहूदी पुरोहितो खै दिखाव।” ताकि सै दैख सौकौ कै तुऐं ठीक हौए गौवै। औरौ जोबै सै जांदै लाग रौवै थिए तोबै सै बाटो पुंडे ठीक हौए गौवै थिए। 15तोबै तिनुमुंजी ऐकीए ऐजौ दैखैयो, कै हांव ठीक हौए गौआ, जोर शै पौरमेशवर कै बौड़ाए कौरदै बैई यीशु कै धोरे पाछु ओऊवा। 16औरौ सै यीशु कै लातो पांदी मुँह नियुड़ाएयो तैसका धन्यवाद कौरदा लागा, औरौ सैजा आदमी सामरिया इलाके का रौणौवाल़ा थिया। 17इथपांदी यीशुए बौल़ौ, “का सैजै दस आदमी ठीक ना होई, तौ तोबै सैजै नौ आदमी कुकै औसौ? 18का ऐसी बैगानै यहूदी खै छोडे़बा कुणजाई पाछु ना ऐई, जू पौरमेशवर कै बौड़ाए कौरदा?” 19तोबै यीशुए तैसी बौल़ौ, “बीजयो आगु जा; जिथुकै तुऐं बिशवाश कौरा इथकारिए तू ठीक हौए गौआ।”
पौरमेशवर कै राज्य का प्रगट हौणा
(मत्ती 24:23-28,37-41)
20ऐक दूस फरीसी लोगै यीशु कैईंदु पूछु, कै पौरमेशवर का राज्य कोलो आन्दा, तौ यीशुए तिनु जोवाब दिया, “पौरमेशवर का राज्य ऐशणा ना आथी, जैसी तुऐं दैखै ना सौकौ। 21औरौ लोग ऐजौ ना बौलदै, कै दैखौ, इथै औसौ, या तिथै औसौ। जिथुकै पौरमेशवर का राज्य तोंवारै बीचो दा औसौ।”
22औरौ यीशुए चैलै खै बौल़ौ, “सैजै दूस आन्दै, जौल़ौ तुऐं तिनु दूसौ खै देखणा चांव जैसी दूसै हांव आदमी का बैटा पाछु आन्दा, पौरौ तुऐं ऐजौ ना दैख सौकदै। 23लोग तुऔं कै बौलदै, ‘दैखौ, मसीह तिथै औसौ!’ या ‘दैखौ मसीह इथै औसौ!’ ऐजौ शोणेयो तुऐं आगु नी जाया औरौ ना ही तिनकै पौछौड़ियौ दौड़ैया। 24जिथुकै जैशै बिजली गौयणै कै ऐकी कुणै पौरैशी निकल़ैयो गौयणै कै ओकी कुणै तौड़ी चौमकौ, ऐशैखैई हांव आदमी का बैटा बै पाछु ओऊंबा, औरौ सौबै लोग मुखै आन्दै बैई दैखदै। 25पौरौ औगौड़ियौ जौरुरी औसौ, कै हांव बौहुत जादा दुख झैलदा औरौ ऐसी जमाने कै लोग मुखै बैकार सौमझौ।
26जैशै अमारै पुराणिया नूह कै दूसौ दो हौं थियु, तैशैखैई मुं आदमी कै बैटै कै दूसौ दो बै हौल़ौ। 27जैसी दूसौ तौड़ी नूह जहाजो पांदी ना बुठी, तैसी दूसौ तौड़ी लोग खांव पियौं थिए, औरौ तिनुमुंजी बैयाव हौंव थिए। तोबै जल-प्रलय आयौ तिनु सौबी कै नाश कौरे दिए। 28ऐशैखैई जैशैकै अमारै पुराणिया लूत, जू सदोम शहर दा रौंव थिया, तिनु दूसौ दो ऐशै हौं कै लोग खांव पीयों थिए, लैण-दैण कौरौ थिए, डाल़ लांव औरौ घोर बाणौ थिए; 29पौरौ जैसी दूसै लूत सदोम शहर शै निकल़ा, तैसी दूसै आग औरौ गन्धक स्वर्ग पौरैशौ बोरशो औरौ शहर कै सौबी लोगौ कै नाश कौर दिए। 30औरौ तैसी दूस बै ऐशैखैई हौंदौ, जौल़ौ हांव आदमी का बैटा एकदम शै होटेयो पाछु आन्दा।”
31“तैसी दूसै जू छोतौ पांदी हौलै औरौ तैसकौ समान घोरे हौंव, तौ सै तिथु लाणौ कारिए घोरे पाछु नी आया, औरौ तैशैखैई जू बागड़ी दै हौलै सै बै पाछु घोरे नी आया। 32अमारै पुराणिया लूत कै घोरवाल़ी खै याद राखौ कै तियौंकै साथै का हौं। 33जू कुणिए इयौं धोरती पांदी आपणै जिन्दगी बौचाणौ कै कौचिश कौरला, सै सौदा कै जिन्दगी गवांए दैला, औरौ जू कुणिए तियौं गौआल़ा सै तियौं बौचांदा।
34हांव तुऔं बुलू, तैसी रातै दो आदमी ऐकी बिछाणै पांदी हौलै; ऐक आगु निंदै औरौ ओका छोड़े दैंदै। 35दो बैटमाणिशौ ऐकी साथै चाकी पिशदी लागै रौंदी, ऐक आगु निंदै औरौ औकै छोड़े दैंदै। 36दो आदमी बागड़ी दै काम कौरदै हौंदै; ऐक आगु निंदै औरौ ओका छोड़ दैंदै।” 37ऐजौ शोणेयो चैलै तैसीयांदो पूछु, “ओए रै प्रभु ऐजी सौबै चीज़ौ कुकै हौंदी?” तैणै तिनु बौल़ौ, “सौबी खै ऐजा पौता चालै जांदा कै ऐजौ कुकै हौंदौ लागै रौं, जिथुकै सौबै जाणौ कै जिथै लाश औसौ, तिथै घिईजौ कौठै हौं।”
Currently Selected:
लूका 17: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
