लूका 19
19
जक्कई कै घोरे यीशु
1जोबै यीशु यरीहो शहर दा हौयौ जांदा लाग रौआ थिया। 2तिथै जक्कई नांव का ऐक आदमी थिया, जू मामला लोणो वाल़ै का ठोगड़ा औरौ सैठ थिया। 3सै यीशु कै देखणा चांव थिया कै सै कुणजा औसौ? पौरौ भीड़ौ की बौजैह शै दैखै नी सौकौ थिया। जिथुकै सै नाटा थिया। 4तोबै यीशु दैखणौ कारिए सै औगौड़ियौ दौड़ैयौ ऐकी गूलीरो कै डाल़ो दा निकल़ैयो बौठै गौआ, जिथुकै यीशु तैसी बाटो पुंडा जांदा लागै रौआ थिया। 5जोबै यीशु तैसी जौगैह पोऊंचा, जिथै जक्कई थिया, तौ ऊबै कै दैखैयो तैसी बौल़ौ, “ओए रै जक्कई, शट उदा आ; जिथुकै मुखै ऐलो तैरै घोरे आणौ जौरुरी औसौ।” 6सै तावल़ा डाल़ो पौरैशा उदा उतरा औरौ यीशु कै आपणै घोरे लोए गौआ, औरौ खुशी शै तैसका स्वागत कौरा। 7ऐजौ दैखैयो सौबै लोग बोड़बौड़ायो बौलदै लागै, “सै तौ ऐकी पापी आदमी कै घोरे पोऊंणा बोणेयो चालै रौआ।”
8जक्कईए खाणौ कै बाद खौड़ै हौयौ प्रभु यीशु खै बुलो, “ओए रै प्रभु यीशु, दैख, हांव आपणै आधै जायदात गरीबो कै दैय दियु, औरौ जै मामला लोणो मुंजीदै कोसी कौ किछै बै धौखै शै लोए राए तौ हांव तिथु चार गुणा पाछु दैय दैंदा।” 9तोबै यीशुए तैसी बौल़ौ, “ऐलो ऐसी घोरे कै लोगौ मुंजी उध्दार आए रौआ, इथकारिए कै ऐजा बै अब्राहम का ऐक वंश औसौ। 10जिथुकै हांव आदमी का बैटा लोगौ कै सौदा कै सौजा शै बौचाणौ औरौ तिनका उध्दार कौरदा आए रौआ।”
दस मोहरो
(मत्ती 25:14-30)
11जोबै लोगै ऐजौ शौणै लोव थियु, तोबै यीशु आपणी बातौ बौलदा रौआ औरौ तिनु ऐक उदारण दिया, जिथुकै सै यरूशलेम शहर कै नेड़िक थिया, औरौ लोगौ कै जाणियुं कै पौरमेशवर का राज्य शट आन्दा लागै रौआ। 12यीशुए बौल़ौ, “ऐक सैठ आदमी दूर देशो कै हौटा, ताकि राजा का ठाँव लोयो पाछु आंव। 13तैणै आपणै नोकरो मुंजी शै दस नोकरो बौएदैयौ तिनुकै दस मोहरो (यानी ऐकी मोहरो कै धियाड़ी शो दूसौ कै बोराबर औसौ) औरौ तिनुखै बौल़ौ, ‘मैरै पाछु आणौ तौड़ी लैण दैण कौरेया।’
14पौरौ तैसकै नगर कै रौणौवाल़ै तैसीआरी बैर राखौ थिए, औरौ तैसकै पौछौड़ियौ कोसी सौंदेश दैणैवाल़ै कैई बैवरा दिया, आमुए ना चोऊं कै ऐजै आमु पांदी राज कौरौ।”
15“जोबै सै राजा का ठाँव पायौ पाछु ओऊवा, तौ ऐशै हौं कै तैणै आपणै नोकरो कै जिनु पोएसै दैय राए थिए, आपणै धोरे बौईदै ताकि पौता कौरौ तिनुऐ लैण देण लैई का का कमौऊं। 16तोबै आगलै आयौ कै बौल़ौ, ‘ओए रै मालिक तैरै मुहरो लैई दस मोहरो हौजौ कमाए रैई।’ 17मालिकै तैसी बौल़ौ, ‘बौहुत बोड़िया, मैरै बिशवाश लायक नोकर तू नानड़ी-नानड़ी बातौ दा ईमानदार निकल़ा, ऐबै हांव ताखै दस नोगरो का औधिकार दैन्दा।’ 18दूजै नोकरे आयौ बौल़ौ, ‘ओए रै मालिक, मोऐं तैरै मोहरो लैई हौजौ पाँच मोहरो कमाए रैई।’ 19मालिकै तैसीखै बौल़ौ, ‘हांव ताखै बै पाँची नोगरो का राजा बाणदा।’ 20तिजै नोकरे आयौ बौल़ौ, ‘ओए रै मालिक दैख, तैरी मोहर ऐजी औसौ, जियौं मोऐं खोटणो दै बांनैयौ राखै राए थी। 21जिथुकै हांव तांवदा डौरु थिया, इथकारिए कै तू सख्त आदमी औसौ: जू तुऐं ना राखै रैई तिथैदौ तू ऊबु टिपै, औरौ जू तुऐं बोए ना रैई सैजौ तू काटै दैय।’ 22मालिकै तैसी बौल़ौ, ‘ओए रै दुष्ट नोकर, हांव तैरा न्याय तैरै शब्द कै हिसाब शै कौरदा, तू मुखै जाणै थिया की हांव कठोर आदमी औसौ, जू मोऐं ना राखै रैई तिथैदौ टिपै दियु, औरौ जू मोऐं ना बोए रैई तिथैदौ काटै दियु। 23तौ तुऐं मैरै पौयसै खै बैंक दै किथु ना राखी कै हांव आयौ ब्याज समैंत लोन्दा?’ 24औरौ जू लोग नेड़िक खौड़ै थिए, मालिकै तिनु बौल़ौ, ‘ऐजै मोहर तैसीयादै उंढी कौरौ, औरौ जेसियागै दस मोहरे औसौ तैसी दैय दौ।’ 25तिनुऐ तैसी बौल़ौ, ‘ओए रै मालिक तैसीयांगै तौ दस मोहरे औसौ।’
26मालिकै तिनु बौल़ौ, ‘हांव तुऔं बुलू कै जैसकैंई किछै औसौए; तैसीखै हौजौ दैंदै; औरौ जैसी कैंई किछै ना आथी, तैसी कैईंदु सैजौ बै उंडु कौरदै जू तैसीकैईं औसौए। 27पौरौ मैरै तिनु बौयरी खै जू चांव ना थिए, कै हांव तिनका राजा बौणु, तिनु इथै लाएबा मैरै सामणै मारै दैव।’ ”
यरूशलेम शहर दौ जाणौ
(मत्ती 21:1-11; मर 11:1-11; युहन्ना 12:12-19)
28ऐजी बातौ बौलेयौ यीशु यरूशलेम शहर कै ढौबौ आपणै चैलै कै साथै आगु हौटै गौआ। 29जोबै सै जैतून नांव कै धारो पांदी बैतफगे औरौ बैतनिय्याह गांव कै धोरे पोऊंचा; तोबै तैणै आपणै दो चैलै खै ऐजौ बौलेयौ छाड़ै, 30“सामणै कै गांव दै जांव; औरौ तिथै पोहचेबा तुऔं खै ऐक गाधडू बानेयोंदो भैटदौ, जिथपांदी ऐलो तौड़ी कौलोंई कुणिए बै ना बौठै रैली, तिथुखै खोलेबा मैरै धोरे लेयांव। 31जै कुणिए तुऔं खै पूछु, कै इथु काए खोले लौ तौ ऐजौ बौल़ै दैया कै प्रभु कै इथकै जौरुरत औसौ।”
32जू चैलै छाड़ै राए थिए, तिनुऐ जायौ जैशै यीशुए तिनुखै बौल राए थियु, तैशैकैई दैखौ। 33जोबै तिनुऐ गोधी कै गाधडू कै खोले लो थियु, तौ तैसकै मालिकै तिनुखै पूछु, “ऐसी गोधी कै गाधडू कै किथु खोले लो?” 34तिनुऐ बौल़ौ, “प्रभु कै इथकै जौरुरत औसौ।” 35सै तिथुकै यीशु कै धोरे लोए ओऊवे औरौ आपणै खोटणो तैसी गाधडू पांदी राखैयौ औरौ यीशु कै तिथपांदी बौठाल़े दिया।
36जोबै सै चालै रौआ थिया, तौ तिनुऐ यीशु कै आदर दैणौ कारिए आपणै खोटणो बाटो पुंडे बिछाए। 37औरौ जोबै यरूशलेम शहर कै धोरे तैसी ठाँव दा ओऊवा, जिथै शोड़क जैतून धारो तौड़ी कै ढौबौ जांव थी। तौ चैलै कै पूरै मण्डली तिनु चौमत्कार कै काम की बौजैह जू तिनुऐ दैख राए थिए। खुशी हौयौ बौड़ै जोर शै पौरमेशवर की बौड़ाए कौरदै लागै।
38“धन्य औसौ सैजा राजा जू प्रभु कै औधिकार शै आंव।
स्वर्ग दै शान्तै औरौ महिमा हौंव।”
39तोबै भीड़ौ मुंजीदै किछै फरीसी लोग यीशु शै बौलदै लागै, “ओए रै गुरु, आपणै चैलै खै डांट कै सै चुपी रौंव।” 40पौरौ यीशुए तिनु जोवाब दिया, “हांव तुऔं बुलू, कै जै ऐजै लोग चुपी रौवै तौ मैरी महिमा कारिए पाथर बै लैरौ मारणी शुरु कौरे दैंदै।”
यरूशलेम शहर कारिए शोग कौरणा
41जोबै यीशु यरूशलेम शहर खै नेड़िक ओऊवा तौ नोगरो कै दैखैबा सै रुवा। 42औरौ बौल़ौ, “का आछौ हौंदौ कै तू, हां, तू ही ऐलो कै दूसौ दा पौरमेशवर कै शान्तै कै बारै मुंजी जाणदा। पौरौ इबी ऐजी बातौ तैरै आखी लैई छिपै रोई। 43जिथुकै सैजै दूस तुऔं पांदी आन्दै, कै तैरै बौयरी तोंवारै चोऊ ढौबौ दीवार बानेयो तुऔं घेरे दैंदै, औरौ सौबी ढौबौशै तुऔं कोयद कौरे दैंदै। 44औरौ तैरै बौयरी ताखै पूरी तरह शै नाश कौरे दैंदै, औरौ तैरै शहर कै लोगौ कै मारै दैंदै। औरौ तांव पांदी पाथर पांदी पाथर बै ना छोड़दै जिथुखै तुऐं सैजा सौमय जोबै पौरमेशवर ताखै बौचाणौ कारिए ओऊवा तैसीकै ना पौछेयाणी।”
मन्दिर की सोफाए
(मत्ती 21:12-17; मर 11:15-19; युहन्ना 2:13-22)
45तोबै यीशु मन्दिरो दा जायौ बेचणौवाल़ै खै बायरै निकाल़दा लागा। 46औरौ तिनु बौल़ौ, “पवित्र शास्त्र दो लैखै राए; ‘मैरौ घोर प्रार्थना को घोर औसौ,’ पौरौ तुऐं तिथुकै डाकुओं लैई भोरेयोंदे गुफा बाणै दै।”
47यीशु ऐई दूसै मन्दिर दा उपदैश दैया कौरौ थिया, औरौ मुख्य यहूदी पुरोहित औरौ यहूदी शास्त्री औरौ लोगौ कै नेता तैसीकै मारणौ का मौका जूओं थिए। 48पौरौ तिनुकै कुणजै बाट नी भैटदै लागै रैई थी; कै का कौरु, जिथुकै सौबै लोग यीशु खै दिल शै शुणौ थिए।
Currently Selected:
लूका 19: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
