लूका 5
5
यीशु का आगला चैला
(मत्ती 4:18-22; मर 1:16-20)
1ऐक दूस यीशु गन्नेसरत झील (गलील झील) कै किनारे खौड़ा थिया, तौ बौहितै भीड़ पौरमेशवर का वचन शुणणौ कारिए तैसी पांदी रिड़ो थै। 2यीशुए झील कै किनारे दो किश्ती लागैयौंदे दैखी औरौ मछुवारे तिनु पांदी ओतरेयो जाल धोऐं लौए थिए। 3तिनु किश्ती मुंजीदै ऐकी पांदी जू शमौन कै थै, निकल़ैयो तैणै तैसी कैईंदै बिन्ती कौरे कै, “किनारे पौरैशै दैणिक हौटाए दै।” तोबै सै बोठेयो लोगौ कै किश्ती पौरौशा उपदैश दैन्दा लागा।
4जोबै तैणै भीड़ कै लोगौ शै बातौ कौर पैई तौ तैणै शमौन खै बौल़ौ, “किश्ती कै डुंगै पाणी मुंजी नी, औरौ माछी पाकड़णो कारिए आपणौ जाल फेरकाव।” 5शमौने तैसी जोवाब दिया, “ओए रै मालिक, आमुए सारी रात मैहनत कौरे पौरौ किछै ना भैटी; तोबै बै आमुए तैरै बौलणौ शै जाल फेरकोऊं।” 6जोबै पतरस औरौ तैसकै साथीए ऐशै कौरौ, तौ बौहितै माछी घेरे दी औरौ तिनकै जाल फाटणो का खतरा हौए रौआ थिया। 7इथपांदी तिनुऐ आपणै साथियो कै जू ओकी किश्ती पांदी थिए, इशारा कौरेयौ बौल़ौ, कै आयौ अमारै मौदद कौरौ: औरौ तिनुऐ आयौ दुईनै किश्ती खै माछी लैई इथै तौड़ी भोरै दी कै सै डुबदी लागी। 8ऐजौ दैखैयो शमौन पतरस यीशु कै लातो पांदी पौड़ेयौ बौल़ौ, “ओए रै प्रभु मैरै धोरे दा आगु जा, जिथुकै हांव पापी आदमी औसौ!” 9जिथुकै इशैक माछी पाकड़णो शै तैसी औरौ तैसकै साथी कै बौहिती हैरानी हौए। 10औरौ तैसकै साथी याकूब औरौ यूहन्ना जू जब्दी कै बैटै थिए, सै बै हैरान हौए गौवै। तोबै यीशुए शमौन खै बौल़ौ, “डौरेया नी, ऐबै शै तू लोगौ कै मैरा चैला बाणणौ कारिए कौठै कौरदा।” 11औरौ तिनुऐ किश्तीयों कै किनारे पांदी लैई औरौ सौबै ठुँ छोड़ेयौ तैसकै चैलै बौणणौ कारिए तैसकै साथै हौटै गौवै।
कोढ़ी आदमी कै ठीक कौरणा
(मत्ती 8:1-4; मर 1:40-45)
12जोबै सै कोसी नगर दा थिया तौ तिथै कोढ़ शा बीमार ऐक आदमी ओऊवा, औरौ तैणै यीशु कै दैखैयो उशणै पौड़ेयौ औरौ बिन्ती कौरे, “ओए रै प्रभु जै तैरै मौरजी औसौ तौ तू मुखै ठीक कौरे दै।” 13यीशुए हाथ बौढ़ायौ खै तैसी छुआ औरौ बौल़ौ, “हांव चोऊं, कै तू ठीक हौए जाए।” औरौ तैसका कोढ़ तावल़ा ठीक हौए गौआ। 14तोबै तैणै तैसी डौरायो बौल़ौ, “दैख कोसी कैई नै बौलेया, पौरौ जाएयो आपी खै यहूदी पुरोहित खै दिखा, औरौ जू किछै मूसाए आपणै आपी खै कोढ़ शै शुध्द हौणौ कै बारै मुंजी बौताए राए तिथकै हिसाब शै पौरमेशवर कारिए बलिदान चौढ़ा ताकि सै तिनुकै बौताए सौकौ कै तू ठीक हौए गौआ।”
15पौरौ यीशु कै खोबर हौजौ बै जादा फोल़दै लागै औरौ भीड़ कै भीड़ तैसी शुणणौ कारिए औरौ आपणी बीमारियों शै ठीक हौणौ कारिए कौठै हौए। 16पौरौ सै शुनशान जौगैह दा इकली जाऐबा प्रार्थना कौरौ थिया।
यीशु दवारा ओधरंग कै मौरेयौंदे कै ठीक कौरणा
(मत्ती 9:1-8; मर 2:1-12)
17ऐक दूस ऐशै हौं कै तैणै उपदैश दैय लौआ थिया, औरौ फरीसी लोग औरौ यहूदी शास्त्र कै ज्ञानी तिथै बौठै रौवै थिए, जू गलील जिले औरौ यहूदिया प्रदेश कै हरेक गांव पौरैशै औरौ यरूशलेम शहर शै आए रौए थिए; औरौ बीमारों कै ठीक कौरणौ कारिए प्रभु कै अनौखी शौकतै तैसकै साथै थी।
18तैसी सौमय दै कैई लोग ऐकी आदमी कै जू ओधरंग का रोगी थिया, ल़ौहथ पांदी लियोऊवा, तिनुऐ तैसी भीतरै निणो औरौ यीशु कै सामणै राखणौ कै तरकीब झोए लोए थी। 19पौरौ जोबै तिनकै भीड़ौ की बौजैह शै तैसी भीतरै नी लैई तौ तिनुऐ छोतौ पांदी निकल़ैयो औरौ छाप्पोर हौटायो तैसी सियुं ल़ौहथे बीचो दा यीशु कै सामणै राखै दिया। 20यीशुए तिनका बिशवाश दैखैयो तैसी ओधरंग कै रोगी खै बौल़ौ, “दैख बैटा, हांव तैरै पापौ कै माफ कौरु।”
21तोबै यहूदी शास्त्री औरौ फरीसी लोग बै बैहस कौरदै लागै, “ऐजा कुण औसौ जू पौरमेशवर कै नेंदैया कौरौ? पौरमेशवर खै छोड़ेयौ औकै कुणिए पाप माफ ना कौरे सौकौ?” 22यीशुए तिनकै मनो की बातौ जाणैयौ तिनु बौल़ौ, “तुऐं आपणै-आपणै मनो दै बुरै विचार किथुखै कौरे लोऐ? 23आसान का औसौ? का ऐजौ बौलणौ, की ‘तैरै पाप माफ हुवे,’ या ऐजौ बौलणौ, की ‘ऊबा बीज़ औरौ आगु हांड?’ 24पौरौ इथकारिए की तुऐं जाणै पाव कै मुं आदमी कै बैटै खै धोरती पांदी पाप माफ कौरणौ का औधिकार औसौ।” तोबै तैणै ओधरंग कै रोगी खै बुलू, “ऊबा भीज औरौ आपणै ल़ौहथ टिपयौ आपणै घोरो खै आगु जा।” 25सै तावल़ा तिनकै सामणै भीजा औरौ जिथपांदी सै सोतै रौआ थिया, तिथु टिपयौ पौरमेशवर कै बौड़ाए कौरेयौ आपणै घोरे हौटै गौआ। 26तोबै सोबै हैरान हौए गौवै, औरौ पौरमेशवर कै बौड़ाए कौरदै लागै औरौ बौहितै डौरेयौ बौलदै लागै, “ऐलो आमुए अनौखी बातौ दैख लोई।”
लेवी खै बोईदणा
(मत्ती 9:9-13; मर 2:13-17)
27इथकै बाद सै बायरै हौटा, औरौ लेवी नांव का ऐक मामला लोणो वाल़ै खै चौकी पांदी बोठेयोंदा दैखा, औरौ तैसीखै बौल़ौ, “मैरा चैला बौण।” 28तोबै सै सौबै छोड़ेयौ ऊबा बीजा औरौ तैसकै पौछौड़ियौ हौए गौआ।
पापियों कै साथै खाणौ
29तोबै लेवीए आपणै घोरे तैसी कारिए ऐक बौड़ा भोज दिया, औरौ मामला लोणो वाल़ै औरौ कुणजैई औकै लोग बै जू तैसकै साथै खाणौ खांदै बौठै रौवै थिए, सोबै ऐक बौड़ै भीड़ थी। 30इथपांदी फरीसी लोग औरौ तिनकै यहूदी शास्त्री लोग तैसकै चैलै कै कुड़कुड़ायो बौल़ौ, “तू मामला लोणो वाल़ै औरौ पापियों कै साथै किथुखै खाएं पियैं?”
उपवास पांदी यीशु का जोवाब
31यीशुए तैसी जोवाब दिया, “राजी ताकडै़ कै डाक्टर कै जौरुरत नी आथी, पौरौ बीमारों खै औसौ। 32हांव पापी लोगौ खै बोईददा आए रौआ कै सै पाप कौरणा छोड़े दैंव, ना कै तिनु बोईददा आए रौआ जू आपी कै धरमी बौणौ।”
33तिनुऐ तैसी बौल़ौ, “यूहन्ना कै चैलै तौ बराबर उपवास राखौ औरौ प्रार्थना कौरौ, औरौ तैशैखैई फरीसी लोगौ कै बै, पौरौ तैरै चैलै तौ खाया पीया कौरौ।” 34यीशुए तिनुखै बौल़ौ, “जांव तौड़ी दूल्हा बरातुआ कै साथै रौंव, तौ सै उपवास ना कौरदै। 35पौरौ सैजै दूस आन्दै जोबै दूल्हा तिनुदा जौई हौंदा; तोबै सै तिनु दूसौ दै उपवास कौरदै।”
36तैणै तिनुखै ऐक ओका उदारण दैयौ बौल़ौ, “कुणिए बै आपणै नौवें खोटणो की टाली पुराणै खोटणो दै ना लांव; नही तौ धौयौ नोऐं टाली शोकड़े जांदै औरौ पुराणै खोटणो आरी ना मिलदै। 37औरौ ऐशैखैई नौवें अंगूर कै रस खै पुराणै खोलड़ै दा कुणिए बै ना राखौ, नही तौ नौवें अंगूरो कौ रस खोलड़ै कै फोटोयो खिंडै जांदो औरौ खोलड़ै बैकार हौए जांदै। 38पौरौ नौवाँ रस नौवें खोलड़ै दा भोरणा चैंई।
39कुणिए आदमी पुराणै अंगूर कै रस पियौं नौवाँ ना चांव, पौरौ सै बौल़ौ कै पुराणी ही आछी औसौ।”
Currently Selected:
लूका 5: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
