मत्ती 18
18
स्वर्ग कै राज्य दा बौड़ा कुण?
(मर 9:33-37; लूका 9:46-48)
1तियौंई घोड़ी दै चैलै यीशु कै धोरे आयौ पूछदै लागै, “कै स्वर्ग कै राज्य दा बौड़ा कुण औसौ?” 2इथपांदी तैणै ऐकी भैईया खै आपणै धोरे बौएदैयौ तिनकै बीच दा खौड़ा कौरा। 3औरौ बौल़ौ, “हांव तुऔं खै साचौ बुलू, जै तुऐं आपणै पापौ शै ना फिरले औरौ नानड़िया कै जैशणै ना बोणले, तौ स्वर्ग कै राज्य दै ना जाए सौकदै। 4जू कुणिए आपी खै ऐसी भैईया कै साए नानड़ा बाणल़ा, सै स्वर्ग कै राज्य दा बौड़ा हौंदा। 5औरौ जू कुणिए मैरै नांव शै ऐक ऐशणै नानड़िया खै अपनांव सै मुखै अपनांव।
ठोकर बोणणौ वाल़ौ पांदी हाय
(मर 9:42-48; लूका 17:1-2)
6पौरौ जू कुणिए इनु नानड़ै लोगौ मुंजी शै जू मुं पांदी बिशवाश कौरौ, औरौ तैसकै पाप कौरवाणौ कै बौजैह बौणौ तैसी कारिए ऐजौ आछौ हौंदौ कै ऐक बौड़ै चाकी का पाथर तैसकै टाटु दा टांगै दैंव औरौ तैसी डुंगै समुन्द्र दा पाए दैंव, जिथु तैसीखै ऐजै बुरै सौजा औसौ। पौरौ पौरमेशवर तैसीखै इंदैदी बै बुरै सौजा दैला। 7दुनिया कै लोगौ पांदी हाय जू पाप कौरणौ कै बौजैह बौणौ, लोगौ कारिए पाप कौरणौ कै परीक्षा सौदा आन्दै रौंदै, पौरौ हाय तैसी आदमी पांदी जू पाप कौरवाणौ कै बौजैह बौणौ।
8पाप कौरणौ कै सौब बौजैह खै आपणै जिन्दगी शै दूर कौरौ, जैशैकै तुऐं आपणा ऐक हाथ औरौ लात काटै लौआ, जू कै तुऔं लैई पाप कौरांव। पौरौ तुऔं खै दुईनै हाथ औरौ दुईनै लात हौयौ बै सौदा कै आग मुंजी जाणौ दो आछौ औसौ कै स्वर्ग दै टुंडै औरौ लोंगड़े हौयौ जालै। 9जै तैरी आख तांव लैई पाप कौरांव तौ तियौं निकाल़ै दै। काणा हौयौ सौदा कै जिन्दगी दो जाणौ ताखै ठीक औसौ कै ताखै दौ आखी हौन्दै बैई बै नरको कै आगै दा फेराकाए जांव।
हाँईचैयौंदी भेड़ का उदारण
(लूका 15:3-7)
10दैखौ, तुऐं इनु नानड़ै मुंजीदै कोसी खै बैकार नै जाणैया, जिथुखै हांव तुऔं खै बुलू, की स्वर्ग दै तिनुखै रोखवाल़ै स्वर्गदूत मैरै पिता कै सामणै हाजिर रौंव। 11जिथुखै हांव आदमी का बैटा हाँईचैयौंदी खै बौचांदा आए रौआ। 12तुऐं का सुंचौ की जै कोसी आदमी की शौ भेड़ो हौंव, औरौ तिनुमुंजी ऐक भेड़ हाँईची जांव, तौ का निन्नानवे खै छोडे़बा, औरौ धारो पांदी जाऐबा तियौं हाँईचैयौंदी खै ना जोंदा? 13औरौ जै ऐशैखै हौंव की सै भैटी जांव, तौ हांव तुऔं साचौ बुलू, की सै तिनु निन्नानवे भेड़ो कारिए जू हाँईची ना रैई थी, तिनकै ऐतरै खोशे ना मोनांदा, जैतरै की इयौं हाँईचैयौंदी भेड़ो कारिए मोनांदा। 14ऐशैकैई तोंवारा पिता जू स्वर्ग दा औसौ तैसकी ऐजै इछा ना आथी, कै इनु नानड़ै मुंजी शै ऐक बै नाश हौंव।”
अपराधियों कै साथै बर्ताव
(लूका 17:3)
15“जै तैरा बिशवाशी भाई तैरै खिलाफ पाप कौरौ, तौ जा औरौ इकली बातचीत कौरेयौ तैसीखै सौमझा; जै सै तैरी शुणल़ा औरौ पाप कौरणा छोड़ दैला तौ तुऐं आपणै भाई खै हासिल कौरे पाए। 16औरौ जै सै ना शुणौ, तौ ऐकी या दु आदमी खै आपणै साथै लोए जा, की मूसा कै कानून कै हिसाब शै हरेक बात दो या तीन गवाहो शै सोही साबित कौरे जाणै चैंई। 17औरौ जै सै तिनकी बै ना मानौ, तौ मसीह मंडली खै बौल़ै दै, पौरौ जै सै कलीसिया की बै ना मानौ, तौ तुऐं तैसकै साथै तैशणाई बर्ताव कौरौ जैशैकै तुऐं कोसी बैगानै यहूदी औरौ मामला लोणोवाल़ै कै साथै कौरौ।
18हांव तुंवागै साचौ बुलू, कै जू किछै तुऐं धोरती पांदी बानलै, सै स्वर्गो दो बानै जांदो, औरौ जू किछै तुऐं धोरती पांदी खोललै सैजौ स्वर्गो दो खोले जांदो। 19औरौ हौजौ हांव तुऔं खै बुलू, जै तुऔं मुंजीदै दो आदमी धोरती पांदी कोसी बातौ कारिए जू बै सै मांगो, ऐक मन सै मांगलै, तौ सै मैरै पिता की औरौ शै जू स्वर्ग दा औसौ तिनु कारिए हौए जांदो। 20जिथुकै जिथै दो या तीन मैरै चैलै हौणौ कै बौजैह शै कौठै हौंव, तिथै हांव तिनकै बीच मुंजी होऊं।”
माफ ना कौरणौवाल़ै नोकरो का उदारण
21तोबै पतरसे तैसकै धोरे आयौ, तैसीखै बौल़ौ, “ओए रै प्रभु, जै मैरा बिशवाशी भाई तैरै खिलाफ पाप कौरौ, तौ हांव तैसीखै कैतरै बैई माफ कौरु, का सात बैई तौड़ी तैसी माफ कौरु?” 22यीशुए तैसीखै बौल़ौ, “हांव ताखै ऐजौ नै बौलदा, कै सात बार पौरौ सात बार माफ कौरणौ कै बजाय सतत्तर बार तौड़ी माफ कोरदै रौव।
23इथकारिए स्वर्ग का राज्य तैसी राजा कै साए औसौ, जैणै आपणै नोकरो कैईंदा लैखा लोणा चोऊवा। 24तोबै सै लैखा लोन्दा लागा, तौ तोबै ऐक आदमी तैसकै सामणै लियोऊवा जैसी पांदी दस हजार सूनै कै सिके कै थोली का कर्जदार थिया। 25जोबै तैसीकैईं कर्जा चुकाणो कारिए किछै नै थी, तोबै तैसकै मालिकै तैसीखै बौल़ौ, कै ऐसीकै औरौ ऐसकै घोरवाल़ी औरौ नानड़िया औरौ जू किछै ऐसको औसौ सौबै बिक दैंव, औरौ सैजौ कर्जा चुकाऐ दैंव। 26इथपांदी तैसी नोकरे लातो पांदी पोड़ेयो तैसी कैईंदै बिन्ती कौरे, औरौ बौल़ौ, ‘ओए रै मालिक सब्र राख, हांव ऐजौ सौबै दैय दैंदा।’ 27तोबै तैसी दासो कै मालिकै तरस खाऐबा तैसीखै छोड़े दिया, औरौ तैसका कर्ज बै माफ कौरे दिया।”
28“पौरौ जोबै सैजा नोकर बायरै ओऊवा, तौ तैसीआरी कै जू औकै नोकर थिए तिनु मुंजीदा ऐक नोकर तैसीखै भैटा, जैसकैंई तैसकै सौ चांदी कै सिके जिथकै कीमत सौ दूसौ कै धियाड़ै कै बराबर औसौ कर्जा दैणौ कै थियु; तैणै तैसीखै पाकड़ैबा तैसका शांगा पेंचा, औरौ बौल़ौ, ‘जू किछै तांव पांदी कर्जा औसौ तिथु पाछु दैय दै।’ 29इथपांदी तैसकै साथौ कै ओकी नोकरे तैसकै लातो पांदी पोड़ेयो, तैसीकैईं बिन्ती कौरे; कै सब्र राख हांव सौबै ठुँ दैय दैंदा। 30पौरौ तैणै मानी ना; पौरौ तैसीखै नैयबा कोयदी दा पाए दिया, कै जांव तौड़ी कर्जा ना दैय दैंव, तांव तौड़ी इथी रोऐया। 31तैसकै साथौ कै जू औकै नोकर थिए, ऐजौ सौबै दैखैयो बैजाए उदास होवे, औरौ जाऐबा मालिक कैंई पूरा हाल बोताऐ दिया। 32तोबै तैसकै मालिकै तैसीखै बोएदैबा तैसीखै बौल़ौ, ‘ओए रै दुष्ट नोकर, तुऐं जू मुं कैईंदै गिड़गिड़ायो बिन्ती कौरे राए, तौ मोऐं तौ तैरा सौब कर्जा माफ कौरे दिया थिया। 33इथकारिए जैशैखै मोऐं तांव पांदी दया कौरे, तैशैखैई ताखै बै आपणै साथौ कै नोकरो का कर्जा माफ कौरे दैणा चैंई जैशै मोऐं तांव पांदी दया कौरेयौ तैरा कर्जा माफ कौरे दिया थिया?’ 34औरौ तैसकै मालिकै गुस्से दा आयौ, तैसीखै सौजा दैणौवाल़ै कै हाथौ दा दैय दिया, कै जांव तौड़ी ऐणै सौब कर्जा ना चुकैई, तांव तौड़ी इनकै हाथौ दा रौंदा।
35ऐशैखैई जै तुऔं मुंजीदा हरेक बिशवाशी भाए तैरै खिलाफ पाप कौरौ, औरौ जै तू तैसी मन शै माफ ना कौरे तौ मैरा पिता जू स्वर्ग दा औसौ, तुंआरी बै ऐशैखैई कौरदा।”
Currently Selected:
मत्ती 18: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
