Yoana 18

Abhatungi bha Abhayahudi bharamugwata Yeesu

(Mataayo 26:47-56; Mariko 14:43-50; Ruuka 22:47-53)

1Hanú Yeesu yaamara okusabha, akeemuka na abheehigira bhaaye, akaambuka eriteka rya Keduroni, akahika hanú gwaringa omugunda gwa emijeituni, bhakasoha muyo.

2Mbe, Yuda unú yaaringa areenda okumuriira eniku Yeesu, yaaringa agumanyiri omugunda guyo, kwa okubha Yeesu yaaringa anariri okugya muyo mara kaaru hamwi na abheehigira bhaaye. 3Kwa ego, akoorokererya omuganda gwa abhasirikare bha Ekiruumi, hamwi na abhakori bha emirimu okurwa kubhasyengeri abhakuru na ku Bhafarisaayo. Bhakagya mumugunda guyo, bhagwatiriri egikorobhoi, emyenge na ebhigwato.

4Yeesu yaaringa amanyiri gonsego ganú gaaringa gareendwa okukoreka kumwene. Mbe, akeemuka akabhabhuurya abhantu bhanú bhaaringa bhaajiri ega, “Bhoono, niwi muratuna?” 5Bheeki bhakamukyukya ega, “Turamutuna Yeesu wa Najareeti.” Yeesu akabhakyukya ega, “Oni Nooni.”#18:5 Oni Nooni. Hanu Yeesu aratumira eriina rya Waryubha kya ego ringʼoorerwe mubhitabho bhya Okuhuruka 3:14 na Isaaya 43:10-11.

Yuda unú yaamuriira Yeesu eniku yaaringa yeemiriiri na abhasirikare bhayo. 6Mbe, hanú Yeesu yaabhakeerya ega, “Oni nooni,” abhasirikare bharya bhakahunjuka enyuma na okugwa hansi. 7Yeesu akabhabhuurya kweki ega, “Niwi muratuna?” Bheeki bhakamukyukya ega, “Turatuna Yeesu wa Najareeti.” 8Yeesu akabhakeerya ega, “Mbakeererye ega, nooni. Nyoore nooni muratuna, mbe mubhatige abhantu bhanú bharingi hamwi na oni bhagende.” 9Yeesu yaagamba ego, naho gakunaane ganú yaagamba kubhwambiro ega, “Naaringa ndabhaangararira bhujomu, naho ntabhurya kora oumwi kubhanú waangʼaana.”#18:9 Maaha mukitabho kya Yoana 6:39, 17:12.

10Simoni Petero, yaaringa na omuhyu, mbe akagusomora, akamukebha okutwi kwa obhuryo omukori wa emirimu wa omusyengeri omukuru. Omukori wa emirimu uyo, eriina yaaye yaabhirikirwanga Mariko. 11Nawe, Yeesu akaamura Petero ega, “Petero, hunjukya omuhyu gwaho mukyubhu. Bhoono, otamanyiri ega, ndeenderwa okunyankibhwa kya ego Taata yaaseemya, naho nnyankibhwe?”#18:11 Bhoono, otamanyiri ega, ndeenderwa okunyankibhwa kya ego Taata yaaseemya, naho nnyankibhwe? Ekiyunani kiragamba ega, Ntariija okunywera ekikombe kinú Taata yangʼeeri, naho nnywe?

Abhatungi bha Abhayahudi bharamuhira Yeesu embere ya Anasi

(Mataayo 26:57-58; Mariko 14:53-54; Ruuka 22:54)

12Mbe, omukuru wa abhasirikare, hamwi na omuganda gwaye, na abhakori bha emirimu bha abhatungi bha Abhayahudi, bhakamugwata Yeesu, bhakamubhoha. 13Mbe, bhakamuhira mbere ku Anasi, unú yaaringa esebhyara waabho Kayafa. Kayafa uyo, ngʼo yaaringa omusyengeri omukuru kwibhaga riyo. 14Kuginsiku gya enyuma, Kayafa ngʼo yaabhatongera abhatungi bha Abhayahudi ega, nyakara omuntu oumwi akwe kurusumo rwa abhantu bhonsego.#18:14 Maaha mukitabho kya Yoana 11:50.

Petero aramwanga Yeesu

(Mataayo 26:58, 26:69-70; Mariko 14:54, 14:66-68; Ruuka 22:55-57)

15Simoni Petero na omwihigira oundi, bhaaringa bharamusoorana Yeesu. Omwihigira oundi uyo, omusyengeri omukuru yaaringa amumanyiri. Kwa ego, akasoha na Yeesu murubhanja rwa enyumba ya omusyengeri omukuru. 16Nawe, Petero akeemirira kibhara kukiseku. Nho, omwihigira oundi unú omusyengeri omukuru yaaringa amumanyiri, akahuruka kibhara. Akahaira na omuhara oumwi unú yaaringa ararinda mukiita, akamwikiririrya Petero asohe murubhanja.

17Mbe, omwangarariri urya, akamubhuurya Petero ega, “Bhoono, na uuwe wonse otari oumwi wa abheehigira bha omuntu uyo?” Petero akamukyukya ega, “Tiigo-ha kora ahake, ntari oni.”

18Kwa okubha haaringa na embeho, abhagaya na abhakori bha emirimu bharya bhaaringa bhagwatirye omururo gwa amakara, bhakabha bharoota omururo. Petero wonse yaaringa yeemiriiri hamwi nabho, aroota omururo.

Omusyengeri omukuru arabhuurya Yeesu amabhuuryo

(Mataayo 26:59-66; Mariko 14:55-64; Ruuka 22:66-71)

19Mbe, omusyengeri omukuru uyo, eriina ryaye yaabhirikirwanga Anasi, akamubhuurya Yeesu eguru ya abheehigira bhaaye na ameehigiryo gaaye. 20Yeesu akamukyukya ega, “Eribhaga ryonsego naaringa ndagamba kubhantu bhonsego aharabhu, naaringa ndeehigirya abhantu mumasinagogi#18:20 Mumasinagogi. Maaha Erisinagogi mu Moonjooro eguru ya Amangʼana Amakongʼu. geenyu na murubhanja rwa erisyengerero munú Abhayahudi abhaaru bharasanga hamwi. Neehigirya ameehigiryo gaani gonsego aharabhu. 21Bhoono kwaki murambuurya oni? Mbe, kwaki mutakubhuurya abhantu bhanú bhaaringa bharanyitegeerera hanú naaringa ndeehigirya? Bheeki bhagamanyiri ganú naaringa ndagamba na okwihigirya.” 22Hanú Yeesu yaagamba gayo, omusirikare oumwi unú yaaringa yeemiriiri haangʼi nawe, akamutema erikoofi, akamubhuurya ega, “Kwaki oramukyukya ego omusyengeri omukuru?” 23Yeesu akamukyukya ega, “Nyoore ngambiri bhubhiibhi, yoorokya obhubhiibhi bhwani. Nawe, nyoore ngambiri obhuheene, bhoono, kwaki orantema?” 24Mbe, hanú Yeesu yaaringa akyabhoherwe, Anasi akaamura ega, bhamuhire kumusyengeri omukuru, Kayafa.

Petero aramwanga Yeesu kweki

(Mataayo 26:71-75; Mariko 14:69-72; Ruuka 22:58-62)

25Mbe, hanú Simoni Petero yaaringa yeemiriiri akyoota omururo, abhantu nyabhurebhe bhakamubhuurya ega, “Bhoono, na uuwe tu-umwi wa abheehigira bha omuntu urya?” Petero akaanga ega, “Tiigo-ha kora ahake, ntari oni.” 26Nawe, oumwi wa abhakori bha emirimu bha omusyengeri omukuru unú yaaringa omuhiiri wa omuntu urya Petero yaakebha okutwi, akamubhuurya ega, “Bhoono, oni ntaakurora hanú waaringa hamwi na Yeesu mumugunda?” 27Petero akaanga kweki ega, “Ntari oni.” Rumwigo, ensarigoko ekaragura.

Abhatungi bha Abhayahudi bharamuhira Yeesu ku Pirato

(Mataayo 27:1-2, 27:11-14; Mariko 15:1-5; Ruuka 23:1-5)

28Mbe, hanú bhwakya, abhatungi bha Abhayahudi bhakamugega Yeesu okurwa ku Kayafa. Bhakagya nawe, mumenyo enkuru ya omwanangwa wa Ekiruumi. Nawe, bheeki bhataasoha munyumba, naho bhateekonʼya na okutiga okurya ebhyakurya bhya enyangi ya Epasaka.#18:28 Okurekana na egimiira gya Abhayahudi, nyoore Omuyahudi asoheri munyumba ya omuntu unú ataringi Omuyahudi arabha omukonu, atakaaturiri okurya ebhyakurya bhya enyangi ya Epasaka. 29Mbe, omwanangwa wa Ekiruumi, eriina ryaye Pirato, akahuruka kibhara na okugya hanú bhaaringa, akabhabhuurya ega, “Bhoono, omuntu unu akoreri obhusarya-ki bhunú muramujongera?” 30Bheeki bhakamukyukya ega, “Nyoore omuntu unu atakaabheeri na obhusarya, tutakaamureeteri kuuwe.” 31Pirato akabhakeerya ega, “Mbe, bheenyu mumugege mumubhuturire ekiina okurekana na amaragiriryo geenyu.” Nawe, Abhayahudi bhakamukyukya ega, “Tutaana obhutungi bhwa okumubhuturira ekiina omuntu wowonse ega, akwe.” 32Gayo gaakoreka ego, naho amangʼana ganú Yeesu yaagamba gakunaane okoorokya kya ego arikwa.

Pirato arabhuurya Yeesu amabhuuryo

33Mbe, Pirato akasoha kweki munyumba, akaamura ega, bhamuhire Yeesu kumwene, akamubhuurya ega, “Bhoono, uuwe m-Mukama wa Abhayahudi?” 34Yeesu akamukyukya ega, “Bhoono, ganú orambuurya gararwa mumeetegeerero gaaho kasi abhantu abhandi bhakukeererye amangʼana eguru yaani?” 35Pirato akamukyukya ega, “Mbe, oni m-Muyahudi? Abhantu bha mukyaro kyaho hamwi na abhasyengeri abhakuru mbo bhakureeteri kuoni, naho nkubhuturire ekiina. Bhoono, m-busarya-ki okoreri?” 36Yeesu akamukyukya ega, “Obhukama bhwani#18:36 Obhukama bhwani. Maaha Obhukama bhwa Waryubha mu Moonjooro eguru ya Amangʼana Amakongʼu. bhutaringi bhwa mukyaro munu. Nyoore bhukaabheeri bhwa mukyaro munu, mbe abheehigira bhaani bhakaandwaniiri, naho ntagwatwa na Abhayahudi. Nawe, obhukama bhwani bhutaringi bhwa mukyaro munu.”

37Mbe, Pirato akamubhuurya ega, “Bhoono mbe, m-maheene ega, uuwe m-mukama?” Yeesu akamukyukya ega, “Nuuwe ogambiri ega, oni m-mukama. Oni neebhurwa na okuuja mukyaro munu, naho mbeehigirye abhantu obhuheene. Omuntu wowonse unú arakora obhuheene, arageegwa amangʼana gaani.” 38Pirato akamubhuurya ega, “Obhuheene niki?”

Hanú Pirato yaagamba gayo, akahuruka kweki kibhara, akabhakeerya abhatungi bha Abhayahudi ega, “Oni ntararora obhusarya bhobhonse bhwa okujongera omuntu unu. 39Nawe, muuna emiira ya okunsabha okubhahaatirira omubhohwa oumwi, eribhaga rya enyangi ya Epasaka. Bhoono, mureenda mbahaatirire Omukama wa Abhayahudi?” 40Nho, abhantu bhonsego bhakatema ekituri bharagamba ega, “Tiigo-ha kora ahake! Otatuhaatirira omuntu uyo, nawe, otuhaatirire Bharaabha.” Bharaabha yaaringa abhoherwe mwigereja kwa ekisigo kya okwanga eserikari ya Abharuumi.

Currently Selected:

Yoana 18: Kabwa

Highlight

Copy