Yoana 19

Pirato arabhuturira ekiina Yeesu yeetwe

(Mataayo 27:15-31; Mariko 15:6-20; Ruuka 23:13-25)

1Mbe, Pirato akaamura abhasirikare bhaaye ega, bhamugege Yeesu, bhamuteme na emijariti. 2Abhasirikare bhakakora eritaaji rya amahwa, bhakamwibhohya kumutwe. Kweki bhakamwibhohya enkanju ya jambaraawe. 3Bhakabha bharagya ku Yeesu, bharamukeeranʼya ega, “Turakukeeranʼya, Omukama wa Abhayahudi!” Bhakamutema amakoofi.

4Pirato akahuruka kweki kibhara, akakeerya omuganda gwa abhantu bharya ega, “Mwitegeerere, ndamureeta kibhara kubheenyu omuntu unu, naho mumanye ega, ntararora obhusarya bhobhonse kumwene.” 5Mbe, Yeesu akahuruka kibhara, enu yeebhoheri eritaaji rya amahwa na enkanju ya jambaraawe. Mbe, Pirato akabhakeerya abhantu bharya ega, “Maaha, omuntu omwene ngʼ-uyo.”

6Hanú abhasyengeri abhakuru na abharindi bha mwisyengerero erikuru bhaamurora Yeesu, bhakatema ekituri ega, “Mubhambe kumusarabha, mubhambe kumusarabha!” Mbe, Pirato akabhakeerya ega, “Mumugege bheenyu abheene mumubhambe kumusarabha, kwa okubha oni ntararora obhusarya bhobhonse bhwa okujongera omuntu unu.” 7Abhayahudi bhakamukyukya ega, “Bheetu tuuna eriragiriryo. Okurekana na eriragiriryo riyo, areenderwa okwitwa, kwa okubha areegamba ega, m-Mwana wa Waryubha.”#19:7 Maaha mukitabho kya Abharaawi 24:16.

8Hanú Pirato yeegwa amangʼana gayo, akoobhoha bhukongʼu. 9Mbe, akasoha kweki munyumba, akamubhuurya Yeesu ega, “Uuwe orwiri-ha?” Nawe, Yeesu ataamukyukya ryoryonse. 10Mbe, Pirato akamukeerya ega, “Kwaki otakunkyukya? Bhoono, otamanyiri ega, niina obhutungi bhwa okukuhaatira, na obhwa okukubhamba kumusarabha?” 11Yeesu akamukyukya Pirato ega, “Otakaabheeri na obhutungi bhobhonse nyoore otakaaheerwe na Waryubha. Kwa ego, omuntu unú yantuuriri mumabhoko gaaho, yaana obhusarya obhunene bhukongʼu.”

12Mbe, hanú Pirato yeegwa gayo, akasakya okutuna enjira ya okumuhaatira Yeesu, nawe, Abhayahudi bhakatema kweki ekituri ega, “Nyoore oraamuhaatire omuntu uyo, mbe, uuwe otaringi omusaani wa Kaisari.#19:12 Kaisari. Kiyo n-kyeo kya omutungi omukuru wa ekyaro kyonsego kya Abharuumi. Yaaringa omukama wa Abharuumi, kweki ngʼo yaatunga ekyaro kya Isiraeri kwibhaga rirya. Maaha Kaisari mu Moonjooro eguru ya Amangʼana Amakongʼu. Omuntu wowonse unú areekorya ega, m-mukama, aramwanga Kaisari.” 13Hanú Pirato yeegwa amangʼana gayo, akamuhurukya Yeesu kibhara, akagya okwikara kukitumbi kya okubhuturira ekiina, ahasi hanú bhaahabhirikiranga ega, Ekibhuga kya Amagina. Mu Kiebhurania bharagamba ega, Gabhata. 14Gyaringa muna ensa esansabha kurusiku rwa okwiseemya kurusumo rwa enyangi ya Epasaka.

Pirato akakeerya Abhayahudi ega, “Maaha, omukama weenyu ngʼ-unu!” 15Bheeki bhakatema ekituri bharagamba ega, “Mwite, mwite! Mubhambe kumusarabha!” Pirato akabhabhuurya ega, “Bhoono, mureenda mmubhambe kumusarabha omukama weenyu?” Abhasyengeri abhakuru bhakamukyukya ega, “Bheetu tutaana omukama oundi, nawe Kaisari omwenego!” 16Mbe, nho Pirato akamutuura Yeesu mumabhoko gaabho, naho abhambwe kumusarabha.

Yeesu arabhambwa kumusarabha

(Mataayo 27:32-44; Mariko 15:21-32; Ruuka 23:26-43)

Mbe, abhasirikare bhakamugega Yeesu bhakagya nawe. 17Akagega omusarabha gwaye, akeemuka mumugi, akagya ahasi hanú mu Kiebhurania, bhaahabhirikiranga ega, Gorigota, ensonga yaaye niiga, Ekihuuri kya Omuntu. 18Hanú bhaahika hayo, bhakamubhamba Yeesu kumusarabha. Ahasi hayo bhaaringa-ho abhantu abhandi bhabhiri bhanú bhabhambirwe kumusarabha hamwi nawe, oumwi orubhaara rwa obhuryo, na oundi orubhaara rwa obhumosi.

19Pirato akaamura ega, gangʼoorwe amangʼana na gatuurwe kumusarabha gwa Yeesu, ganú garagamba ega, “unu n-yeesu wa najareeti, omukama wa abhayahudi.” 20Amangʼoore gayo, gaangʼoorwa mukigambo kya Ekiebhurania, Ekiruumi, na Ekiyunani. Abhayahudi abhaaru bhaaringa bharasoma amangʼoore gayo, kwa okubha ahasi hanú bhaamubhamba kumusarabha, haaringa haangʼi na Yerusaremu.

21Mbe, abhasyengeri abhakuru bhakamukeerya Pirato ega, “Otangʼoora ega, ‘Unu m-Mukama wa Abhayahudi,’ nawe, ongʼoore ega, ‘Omuntu unu yaagamba ega, weeki m-Mukama wa Abhayahudi.’ ” 22Pirato akabhakyukya ega, “Tiigo-ha kora ahake, amangʼoore gatame egoego kya ego naamura.”

23Hanú abhasirikare bhaamubhamba Yeesu kumusarabha, bhakagega emyenda gyaye, bhakagabha amasemunta gane. Kira omusirikare akagega ogusemunta gwaye. Kweki, bhakagega enkanju yaaye. Enkanju iyo etaaringa etumirwe, yaaringa erukirwe yonsego. 24Mbe, bhakabhuuranʼya ega, “Tutataamura enkanju inu, nawe tuteme ekuura,#19:24a Tuteme ekuura. Bhaatuuranga mukintu, ebhiti bhinú bhiina ebhimanyiiriryo kasi amagina ga amariina, naho kira oumwi agege omwenda gunú guraagwire kukimanyiiriryo kyaye. turore ega, eraabhe yawi.” Gayo gaakoreka ego, naho gakunaane ganú gaangʼoorwa mu Mangʼoore Amarabhu ega, “Bhaagabhana emyenda gyani, na okuitemera ekuura enkanju yaani.”#19:24b Maaha mukitabho kya Egijabhuri 22:18. Mbe, niigo abhasirikare bhayo bhaakora.

25Mbe, bhaaringa-ho abhakari bhane bhanú bhaaringa bheemiriiri haangʼi na omusarabha gwa Yeesu. Gati ya abhakari bhayo, yaaringa-ho ngʼina waabho Yeesu, ngʼina muke waabho Yeesu, Mariamu omukari wa Kiriopa, na Mariamu Magidarena. 26Hanú Yeesu yaamurora ngʼina waabho na omwihigira unú yaaringa amuhanjiri bhukongʼu yeemiriiri haangʼi na ngʼina waabho, akagamba ega, “Ee maayi, maaha! Uyo ngʼo omwana waaho.” 27Kweki akamukeerya omwihigira urya ega, “Maaha, unu ngʼo ngʼina weenyu.” Mbe, okurwa eribhaga riyo omwihigira uyo akamugega ngʼina waabho Yeesu, akagya okwikara nawe, mumugi gwaye.

Yeesu arakwa

(Mataayo 27:45-56; Mariko 15:33-41; Ruuka 23:44-49)

28Kimwi, Yeesu akamanya ega, yaaringa amariri okukora emirimu gyaye gyonsego. Mbe, akagamba ega, “Ndeegwa enyonta.” Kwa ego, gakakunaana ganú gaangʼoorwa mu Mangʼoore Amarabhu.#19:28 Maaha mukitabho kya Egijabhuri 69:21. 29Ahasi hayo haaringa na ekintu kinú bheejurya-mo omusuka gwa edivai. Kimwi, bhakagega amakaafu, bhakatobheka mumusuka muyo, bhakatuura kumwanji, bhakamutuurira Yeesu mumunwa. 30Yeesu hanú yaarabha omusuka guyo, akagamba ega, “Emirimu gyani gihweri!” Mbe, akahiinya omutwe gwaye, gukahwa-mo.

Abhasirikare bharamubhita Yeesu na eritimu

31Rwaringa orusiku rwa okwiseemya kwa Esabhato, kweki Esabhato iyo yaaringa orusiku orukuru okukira egindi.#19:31a Esabhato iyo yaaringa orusiku orukuru okukira egindi. Yaabha ego, kwa okubha yaaringa kurusiku rwa enyangi ya Epasaka. Abhatungi bha Abhayahudi bhateenda omubhiri gutame eguru ya omusarabha kurusiku rwa Esabhato.#19:31b Esabhato. Orusiku rwa Esabhato rwaambanga eribhaga eryubha rirasikira orusiku rwa kasansabha, okwimukira orusiku rwa muhungati. Amaragiriryo ga Abhayahudi gateekiriryanga okubhiika omuntu orusiku rwa Esabhato. Maaha Esabhato mu Moonjooro eguru ya Amangʼana Amakongʼu. Kwa ego, bhakagya ku Pirato, bhakamusabha ega, abhasirikare bhagye bhabhabhune amaguru#19:31c Bhabhabhune amaguru. Bhaakora ego, naho bhakwe rumwigo. abhantu bhanú bhaabhambwa kumisarabha, na okuruusya-ko emibhiri gyabho. 32Mbe, bhakagya, bhakabhuna amaguru owa okwamba na owa kabhiri kubhanú bhatemereerwa hamwi na Yeesu. 33Nawe, hanú bhaahika ku Yeesu, bhakanyoora amariri okukwa, kwa ego bhataamubhuna amaguru. 34Nawe, omusirikare oumwi, akamubhita Yeesu na eritimu murubharu. Kimwi, amanyinga na amanji gakarwa. 35Amangʼana ganu, gangʼoorerwe na omuntu unú yaaringa aragarora ganú gaaringa garakoreka. Ganú aragamba n-ga heene, wonse amanyiri ega, ganú aragamba n-ga heene. Mbe, kwa ego na bheenyu mwikirirye. 36Gayo gaakoreka naho gakunaane ganú gaangʼoorwa mu Mangʼoore Amarabhu ega, “Ritariho eriguha ryaye kora erimwi rinú riribhunwa.”#19:36 Maaha mukitabho kya Egijabhuri 34:20. 37Kweki Amangʼoore Amarabhu garagamba ega, “Bhariija okumumaaha unú bhaabhita na eritimu.”#19:37 Maaha mukitabho kya Jakaria 12:10.

Yeesu arabhiikwa

(Mataayo 27:57-61; Mariko 15:42-47; Ruuka 23:50-56)

38Hanú gayo gaahwa, akaaja omuntu oumwi eriina ryaye Yusufu, unú yaarwa mumugi gwa Arimataya. Omuntu uyo, yaaringa omwihigira wa Yeesu, nawe, kwa obhwibhise, kwa okubha yaaringa arabhoobhoha abhatungi bha Abhayahudi. Mbe, omuntu uyo akagya ku Pirato, akamusabha ega, agege omubhiri gwa Yeesu, agubhiike. Pirato akamwikiririrya. Kimwi, Yusufu akagya, akaruusya-ho omubhiri gwa Yeesu.

39Nho, Nikodemasi unú yaagenda ku Yeesu obhutiku,#19:39 Maaha mukitabho kya Yoana 3:1-2. akaaja na amaguta ga obhurange obhujomu gasangeenʼye na manemane, gaaringa egikiro mirongo esatu. 40Mbe, abhabhiri bhayo, bhakagega omubhiri gwa Yeesu, bhakaguhaka amaguta ga obhurange obhujomu, bhakagukundikirya ensanda endabhu, okurekana na kya ego gyaringa egimiira gya Abhayahudi gya okubhiika abhantu. 41Ahasi hanú bhaamubhamba Yeesu kumusarabha, gwaringa-ho omugunda. Mumugunda muyo, yaaringa-mo embihira ehya inú bhataakabhiikiri-mo omuntu wowonse.#19:41 Mumugunda muyo, yaaringa-mo embihira ehya inú bhataakabhiikiri-mo omuntu wowonse. Egimiira gya Abhayahudi gya okubhiika abhantu niiga, bhaaringa bharatuura abhaku mumasana na okutuura erigina kumunwa. Embihira ya Yeesu yaaringa mwisana. 42Orusiku ruyo, rwaringa orusiku rwa Abhayahudi okwiseemya kwa Esabhato. Kwa ekisigo kiyo, bhakamubhiika Yeesu mumbihira irya, kwa okubha yaaringa haangʼi.

Currently Selected:

Yoana 19: Kabwa

Highlight

Copy