Ruuka 10

Yeesu aratuma abheehigira mirongo muhungati na bhabhiri

1Mbe, hanú gayo gaahwa, Omukuru Yeesu akasora abheehigira abhandi mirongo muhungati na bhabhiri (72).#10:1 Mirongo muhungati na bhabhiri. Amangʼoore agandi ga akare aga Ekiyunani garagamba ega, mirongo muhungati. Akabhatuma bhabhiri bhabhiri, bhamukangatire mumigi na kira ahasi, hanú yeendanga okuhika omwene.

2Akabhakeerya ega, “Omugeso m-mwaru, nawe, abhagesi m-bake.#10:2 Omugeso m-mwaru, nawe, abhagesi m-bake. Ensonga yaaye niiga, abhantu abhaaru bhareenda okumwikirirya Yeesu, nawe m-bantu abhakego bhanú bharatura okubharaarikira amangʼana amajomu eguru yaaye. Kwa ego, mumusabhe Waryubha, omwene omugunda, atume abhagesi abhandi mumugunda gwaye, bhagese. 3Bheenyu mugende, nawe, mumanye ega, mbatumiri kya ebhimaanwa bhya amangʼondi bhinú bhiragya gati ya eginsuuji! 4Mutagega ensaho ya egimbirya, ensakwa, kora eginkeeto egindi. Mutabhurya eribhaga kunjira, kwa okukeeranʼya omuntu.

5“Hanú mwakasohe munyumba, mukeeranʼye abhantu bha muyo ega, ‘Bhaamunu, mubhe na omurembe!’ 6Na hanú araabhe-mo omuntu wa omurembe, enonkwe yeenyu ya omurembe inú mumunonkeri, eratigara kumwene. Nawe, araabhe atarimo omuntu wa omurembe muyo, enonkwe yeenyu ya omurembe iyo, etakubhanonka. 7Hanú muraagenihibhwe munyumba eimwi, mutige okungʼaanyira muginyumba egindi, nawe, mwikare muyomuyo musoheri. Murye ebhyakurya bhinú bharaabhahaane, kwa okubha omukori wa emirimu areenderwa okurihwa amariho gaaye.

8“Hanú mwakasohe mumugi gogonse, abheene omugi bhabhagenihye, murye ebhyakurya bhinú bharaabhenga bharabhahaana. 9Na abharweri bhanú bharingi mumugi guyo, mubhahwenʼye. Mubhakeerye abhantu bhonsego ega, ‘Obhukama bhwa Waryubha bhuringi haangʼi!’#10:9 Bhuringi haangʼi. Kumuchafwa gunu na gwa 11 ensonga eindi eratura okubha ega, bhumariri okubhahikiira.

10“Nawe, hanú mwakasohe mumugi gogonse, na abheene omugi bhaange okubhagenihya, murwe-mo, mugende mubhitongoji bhyabho, muragamba ega, 11‘Kora oruteeri rwa omugi gwenyu runú ruringi kumaguru geetu turarukungʼunta, rubhe ekimanyiiriryo kya obhusarya bhwenyu. Kora ego, mumanye bhujomu ega, obhukama bhwa Waryubha bhuringi haangʼi!’ 12Ndabhakeerya ega, orusiku rwa okubhuturira ekiina, Waryubha arijibhya abhantu bha omugi guyo obhururu kora okukira kya ego arijibhya abhantu bha mumugi gwa Sodoma!#10:12 Sodoma. M-mugi gunú Waryubha yaasikya kwa ekisigo kya obhusarya bhwa abhantu bhaago. Maaha mukitabho kya Obhwambiro 19:1-29.

Yeesu arakemera abhantu mumigi ginú bhamwangiri

(Mataayo 11:20-24)

13“Murikirora-ko bheenyu, abhantu bha mumugi gwa Korajini! Na bheenyu murikirora-ko, abhantu bha mumugi gwa Bhetisaida! Nyoore ebhika bhinú bhyakoreka kubheenyu hanu, bhikaakorekeri mumigi gya Tiro na Sidoni,#10:13 Tiro na Sidoni. Abhantu bha mumigi gya Tiro na Sidoni bhataaringa Abhayahudi, bhaaringa abhapagaani. Kweki, Abhayahudi bhaaringa bhabhamanyiri ega, m-bantu bha obhusarya bhukongʼu. Maaha mubhitabho bhya Amosi 1:9-10; Joeri 3:4. singa bhaamara akare okumwihunjurira Waryubha okurwa mubhusarya bhwabho, kwa okwibhoha amagunira na okwihaka eriibhu. 14Kwa ego, orusiku rwa okubhuturira ekiina, Waryubha aribhajibhya bheenyu obhururu bhukongʼu, kora okukira kya ego arijibhya abhantu bha mumigi gya Tiro na Sidoni!

15“Na bheenyu, abhantu bha mumugi gwa Kaperinaumu, bhoono mureeganirirya ega, Waryubha aribhariinʼya okuhikira murwire? Muriituumibhwa okuhikira mumururo gunú gutakusima!”#10:15 Mumururo gunú gutakusima. Ekiyunani kiragamba ega, kujimu.

16Nho, Yeesu akabhakeerya abheehigira bhaaye ega, “Omuntu unú arabheetegeerera bheenyu, aranyitegeerera oni. Na omuntu unú arabhaanga bheenyu, kora oni aranyanga. Na unú aranyanga oni, araanga kora unú yaantuma.”

Abheehigira bha Yeesu bharahinda

17Eribhaga erindi, abheehigira bhayo mirongo muhungati na bhabhiri (72)#10:17 Mirongo muhungati na bhabhiri. Amangʼoore agandi ga akare aga Ekiyunani garagamba ega, mirongo muhungati. bhakahinda, bhajomeerwe. Bhakamukeerya ega, “Omukuru weetu, kora ebhihwi ebhibhiibhi, hanú turabhikenyia kwa eriina ryaho, bhiratwigwa!”

18Yeesu akabhakeerya ega, “Nkarora Erisambwa riragwa hansi okurwa murwire kya orukubha. 19Mbe, mumanye ega, mmariri okubhahaana obhuturo bhwa okuhiga eginguru gyonsego gya omusigu uyo. Kwa obhuturo bhuyo, muraatajenga eginjoka na ebhitoromooni, na kitariho ekintu kyokyonse kinú kiribhanyahaara.

20“Kora ego, mutajomerwa kwa okubha ebhihwi ebhibhiibhi bhirabheegwa. Nawe, mujomererwe eringʼana rinu, ega, amariina geenyu gamariri okungʼoorwa murwire koko.”

Yeesu arajomerwa

(Mataayo 11:25-27, 13:16-17)

21Eribhaga riyoriyo, Yeesu akajomerwa bhukongʼu, kwa obhuturo bhwa Omutima Omurabhu. Akagamba ega, “Ee Taata, Omukuru wa orwire na ekyaro, ndakukumya kwa okubha amangʼana ganú obhabhisiri abhangʼeeni na abhasomi, obhatubhuriiri abhantu bhanú bhaana eimani kya abhaana abhake. M-bwaheene, Taata, kwa okubha ego niigo yaakujomera.” 22Nawe, akagendererya okubhakeerya abhantu ega, “Taata amariri okungʼaana amangʼana gonsego. Na atariho unú amanyiri Omwana waaye, nawe Taata omwenego. Kora atariho unú amanyiri Taata, nawe, Omwana waaye omwenego, na omuntu wowonse unú Omwana areende okumutubhurira.”

23Rumwigo, Yeesu akabhamaahirira abheehigira bhaaye, akabhakeerya abheenego ega, “Bheenyu mwanonkwa, kwa okubha murarora amangʼana gayo na ameeso geenyu! 24Ndabhakeerya ega, abharooti na abhakama abhaaru, bheegombanga okurora ganú murarora, nawe bhataagarora. Kweki, bheegombanga okwigwa ganú bheenyu mureegwa, nawe bhataageegwa.”

Ekirengyo kya omuntu wa heene

25Orusiku rumwi, omwihigirya umwi wa amaragiriryo akeemirira, akamubhuurya Yeesu eringʼana kwa okumutega ega, “Omwihigirya, nkore egaki, naho nnyoore obhuhoru bhwa koko?”

26Yeesu akamukyukya ega, “Mumaragiriryo ga Waryubha yaangʼoorwa egaki? Ogamanyiri egaki?” 27Akamukyukya ega, “Gaangʼoorwa ega, ‘Omuhanje Omukuru Waryubha waaho, kwa omutima gwaho gonsego, kwa enkoro yaaho yonsego, kwa eginguru gyaho gyonsego, na kwa obhungʼeeni bhwaho bhonsego.’#10:27a Maaha mukitabho kya Obhuhiituki bhwa Amaragiriryo 6:5. Kweki, ‘Omuhanje omurikyaho, kya ego oreehanja uuwe omwene.’#10:27b Maaha mukitabho kya Abharaawi 19:18.” 28Yeesu akamukeerya ega, “Okyukirye bhujomu! Kora ego, naho onyoore obhuhoru.”

29Nawe, omwihigirya uyo, yaaringa areenda okoorokya ega, m-muheene embere ya Waryubha. Nkyo kikakora akabhuurya Yeesu, “Omurikyani, niwi?”

30Yeesu akamukyukya kwa ekirengyo ega, “Yaaringa-ho omuntu umwi, unú yaarekanga Yerusaremu, aragya mumugi gwa Yeriko. Hanú yaaringa kunjira, akatumbarirwa na abheebhi. Abheebhi bhayo, bhakamuruusya emyenda, bhakamutema okuhikira bhakamwatya oruguma, bhakamutiga asingiri, bhakagya.

31“Mbe, obhujomu kunjira iyo, yaahitanga-ko omusyengeri umwi. Nawe omusyengeri uyo, hanú yaamurora omuntu uyo, akahita orubhaara orundi rwa enjira, akagya. 32Eribhaga erindi, Omuraawi#10:32 Omuraawi. Abharaawi bhaaringa erikabhira rimwi mukyaro kya Isiraeri, bhaabheeranga abhasyengeri bha Waryubha, mwisyengerero erikuru rya Waryubha. Maaha mukitabho kya Okubhara 3:1-13. oumwi akahita hayo, wonse akakora egoego. Hanú yaamurora omuntu uyo, akahita orubhaara orundi rwa enjira.

33“Eribhaga erindi, akaaja Omusamaria#10:33 Omusamaria. Abhayahudi bhaaringa bharabhajeera Abhasamaria, kwa okubha bhaarora ega, Abhasamaria bhaamusyengeranga Waryubha kwa enjira inú etaringi bhwaheene. Kwa ego, abhantu bha ebhyaro bhibhiri bhiyo, bhaaringa bharabhihirirana. oumwi, unú yaaringa kurugendo. Hanú yaamurora omuntu uyo, akamwabhira. 34Akamusuntarira, akamuragura ebhironda bhyaye kwa okubhihaka edivai na amaguta, akabhibhoha. Akamara, akamuriinʼya eguru ya entikiri yaaye, akamuhira munyumba ya okuraara abhageni, akamutuga.

35“Ejo wendeko, akaruusya egidinari ebhiri,#10:35 Egidinari ebhiri. Edinari eimwi yaaringa eraringʼaana na amariho ga orusiku rumwi kwa omuntu oumwi. Maaha Edinari mu Moonjooro eguru ya Amangʼana Amakongʼu. akahaana omwene enyumba ya abhageni, akamukeerya ega, ‘Tuga omuntu unu. Nyoore oryongerya egimbirya egindi kwa okumutuga, hanú ndihinda ndihitira hanu, nkurihe.’”

36Nho, Yeesu akamubhuurya omwihigirya uyo wa amaragiriryo ega, “Mbe, kubhwitegeereri bhwaho, ngʼ-uuha gati ya abhantu abhasatu bhayo, unú yaaringa omuhiiri waaye kwa okumukorera aga heene?” 37Wonse akamukyukya ega, “Ngʼo unú yaamumaahira ekyabhira.” Yeesu akamukeerya ega, “Genda, uuwe wonse obhe na enteemo iyoiyo!”

Yeesu munyumba ya Maarita na Mariamu

38Eribhaga erindi, Yeesu na abheehigira bhaaye, hanú bhaaringa kunjira, bhakasoha mukijiji kimwi. Na omukari umwi, eriina ryaye Maarita, akabhagenihya iika owaaye. 39Maarita uyo, yaaringa na omuhara waabho, eriina ryaye Mariamu. Eribhaga riyo, Mariamu akeekara haangʼi na amaguru ga Omukuru Yeesu, akabha aramwitegeerera.

40Nawe Maarita, yaaringa aranyanka na emirimu emyaru. Mbe, akagya akamukeerya Yeesu ega, “Omukuru weetu, otakurora ega, omuhara weetu yantigiiri emirimu gyonsego? Mukeerye yambeere emirimu!”

41Omukuru Yeesu akamukyukya ega, “Maarita, Maarita! Oranyanka eguru ya amangʼana amaaru. 42Nawe, ririho eringʼana rimwi ego erijomu, okukira gonsego. Eringʼana riyo n-kunyitegeerera. Mariamu ngʼo arisoreri. Tiigo-ha omuntu wowonse unú aratura okumuruusya eringʼana riyo.”

Currently Selected:

Ruuka 10: Kabwa

Highlight

Copy