Ruuka 11

Ameehigiryo eguru ya okumusabha Waryubha

(Mataayo 6:9-13, 7:7-11)

1Orusiku rumwi, Yeesu yaaringa ahasi nyabhurebhe, aramusabha Waryubha. Hanú yaamara okusabha, oumwi wa abheehigira bhaaye akamukeerya ega, “Omukuru, otwihigirye kya ego turaabhenga turasabha Waryubha, kya ego Yoana Omubhatiiji yaabheehigirya abheehigira bhaaye.”

2Yeesu akabhakeerya ega, “Hanú muraabhenga murasabha Waryubha, mugambe ega,

‘Taata [weetu owa murwire],

eriina ryaho rigungibhwe,

obhukama bhwaho bhuuje,

[obhwendi bhwaho bhukoreke, mukyaro hanu,

kya ego murwire eyo].

3Otuhaane ebhyakurya bhya kira orusiku.

4Otwabhire obhusarya bhwetu,

kya ego na bheetu turabhaabhira bhanú bharatusarirya.

Otakaatutiga tusohe mumasakyo,

[nawe, otutuurye na omusarya urya Erisambwa].#11:2-4 Amangʼana mumabhano ganu […] gataringi mumangʼoore agandi ga akare aga Ekiyunani.’”

5Mbe, hanú yaamara okubheehigirya, akabhakeerya ekirengyo ega, “Tugambe ega, oumwi weenyu nyoore akaagiiri kumusaani waaye obhutiku gati, amukeerye ega, ‘Musaani waani! Ndasabha emikaate esatu, 6kwa okubha omusaani waani ahikiri owaani okurwa murugendo, na ntaana ebhyakurya bhya okumuhaana.’ 7Nawe, omusaani uyo amukyukye ega, ‘Otannyankya! Mmariri okusiika ekiseku, ndeeri na abhaana bhaani. Ntakutura okubhuuka okukuhaana ekintu kyokyonse.’

8“Bhoono, ndabhakeerya ega, kora onyoora weeki m-musaani waaye ataabhuuke okumuhaana omukaate, nawe, kwa okubha omusaani uyo, aragendererya okusabha bira okukwa omutima, araabhuuke amuhaane kyokyonse kinú areenda.

9“Kwa ego, oni ndabhakeerya ega, mumusabhe Waryubha, bheenyu murihaanwa. Mutune, bheenyu murinyoora. Musiikurye, bheenyu murisiikurirwa. 10Kira omuntu unú aramusabha, arahaanwa. Na kira omuntu unú aratuna, aranyoora. Na kira omuntu unú arasiikurya ekiseku, arasiikurirwa.

11“Niwi kubheenyu bhataata, unú omwana waaye araasabhe omukaate, amuhaane erigina? Kasi araamusabhe enswi, amuhaane enjoka? 12Kasi araamusabhe eriigi, amuhaane ekitoromooni? 13Mbe, onyoora bheenyu m-basarya, nawe, mumanyiri okuhaana abhaana bheenyu ebhintu ebhijomu. Kwa ego, Eseweenyu owa murwire aribhakorera amajomu bhukongʼu, na aribhahaana Omutima Omurabhu#11:13 Omutima Omurabhu. Maaha eringʼana rinu mu Moonjooro eguru ya Amangʼana Amakongʼu. bhanú bharamusabha!”

Yeesu aragambwa ega, obhuturo bhwayebhurarwa ku Bherijebhuri

(Mataayo 12:22-30; Mariko 3:22-27)

14Orusiku rumwi, Yeesu yaaringa arakenyia ekihwi ekibhiibhi kumuntu unú yaaringa abheeri erimuumu. Ekihwi kiyo hanú kyamuhaatira, akahaira kweki. Omuganda gwa abhantu bhakaruguura.

15Nawe, abhandi bhakagamba ega, “Arakenyia ebhihwi kwa obhuturo bhwa Bherijebhuri,#11:15 Bherijebhuri. Ni-riina erindi rya Erisambwa. omukuru wa ebhihwi ebhibhiibhi!” 16Abhandi bheendanga okumusakya Yeesu, bhaaringa bharamusabha akore ekika kya okoorokya ega, arwiri ku Waryubha.

17Nawe, akamanya ameetegeerero gaabho, akabhakeerya ega, “Obhukama bhobhonse bhunú bhwahukeeni kumiganda na okuhakaananʼya, bhutakutura okuguma. Na abhantu bha enda eimwi hanú bharaarwane, bhatakuguma okwahukana. 18Egoego na Erisambwa nyoore rireehakaanʼye eryenego, obhukama bhwaryo mbuguma egaki?

“Ndagamba ego, kwa okubha bheenyu muragamba ega, ndakenyia ebhihwi kwa obhuturo bhwa Bherijebhuri. 19Mbe, nyoore m-buheene ega, oni ndakenyia ebhihwi kwa obhutungi bhwa Bherijebhuri, bhoono abheehigira bheenyu#11:19 Abheehigira bheenyu. Ensonga eindi eratura okubha ega, Abhayahudi abharikyenyu. bharakenyia kwa obhutungi bhwawi? Kwa ekisigo kiyo, bheeki mbo bharibhabhuturira ekiina bheenyu. 20Nawe, nyoore oni ndakenyia ebhihwi kwa obhuturo bhwa Waryubha, mbe mumanye ega, obhukama bhwa Waryubha bhumariri okubhahikiira.

21“Mwitegeerere ekirengyo kinu! Omuntu unú yaana eginguru na araangararira ebhintu bhyaye kwa ebhigwato iika owaaye, ebhintu bhyaye bhyonsego bhitakukuunibhwa. 22Nawe, omuntu oundi unú yaana eginguru okumukira, hanú araaje amurwanʼye, amuhige, araamuruusye ebhigwato bhyaye bhyonsego bhinú yeesigiranga, kimwi agege ebhintu bhyonsego na okubhigabhanʼya kubhandi.

23“Omuntu wowonse unú ataringi hamwi na oni, aranyanga. Kweki, wowonse unú atakukumanʼya abhantu bha Waryubha hamwi na oni, arabhanyaraganʼya.”

Ameehigiryo eguru ya ebhihwi

(Mataayo 12:43-45)

24Yeesu akagendererya okugamba ega, “Hanú ekihwi ekibhiibhi kirarwa kumuntu, kiragya kukibhara na okutuna ahasi ha okumuunyira. Nawe, hanú kiraabhurwe, nho kiragamba ega, 25‘Ndahunjuka kumuntu waani unú naarwa-mo.’ 26Hanú kiraahunjuke kinyoore omuntu uyo aringi kya enyumba inú yeyereerwe erabhiri, na eseemiibhwe bhujomu, kweki, eringi bhusa. Hayo nho kiragya okureeta ebhihwi ebhindi muhungati ebhibhiibhi bhukongʼu okukikira. Bhyonsego bhirasoha na okwikara munsi ya omuntu uyo. Nho, obhuhoru bhwa omuntu uyo bhurabha obhubhiibhi okukira kya ego yaaringa obhwa mbere.”

Enonkwe ya obhuheene

27Yeesu hanú yaaringa aragamba gayo, omukari umwi akamukeerya kwa eriisi erinene ega, “Yaanonkwa omukari unú yaakwibhura na okukuneenʼya!”

28Nawe, Yeesu akagamba ega, “M-maheene! Nawe bhaanonkwa bhukongʼu bhanú bhareegwa eringʼana rya Waryubha, na okurigwata!”

Abhantu bharasabha Yeesu ekimanyiiriryo

(Mataayo 12:38-42; Mariko 8:12)

29Eribhaga rinú abhantu bhaaringa bharagendererya okwikumanʼya ku Yeesu, akabhakeerya ega, “Orwibhuro orubhiibhi, rureenda ekimanyiiriryo, kora ntaribhoorokya ekimanyiiriryo kyokyonse, nawe, kirya ekya omurooti Yoona ekyenego. 30Yoona yaaringa ekimanyiiriryo kya abhantu bha mumugi gwa Ninaawi, ego niigo Omwana wa Adamu, aribha ekimanyiiriryo kubhantu bha orwibhuro runu.

31“Kweki, kurusiku rwa okubhutura ekiina, omukama omukari wa ekyaro kya Sheebha ariimirira embere ya Waryubha na okubhabhuturira ekiina abhantu bha orwibhuro runu ega, m-basarya. Weeki yaarwa mubhyaro bhya ahare, naho yeetegeerere amangʼana ga egintungwa aga omukama Soromoni,#11:31 Maaha mubhitabho bhya 1 Abhakama 10:1-10; 2 Amangʼana ga Eribhaga 9:1-12. nawe, hanu ariho oumwi unú aringi omukuru okukira Soromoni, nawe, mutakumwigwa.

32“Orusiku rwa okubhutura ekiina, abhantu bha mumugi gwa Ninaawi, bhariimirira embere ya Waryubha, na bharibhabhuturira ekiina abhantu bha orwibhuro runu ega, m-basarya. Eribha ego, kwa okubha bheeki bheehunjura obhusarya bhwabho, okurekana na obhuraariki bhwa Yoona,#11:32 Maaha mukitabho kya Yoona 3. na hanu ariho omukuru okukira Yoona, nawe, mutakumwigwa.

Okumenya mubhurabhu kasi mukisunte

(Mataayo 5:15, 6:22-23)

33“Atariho omuntu unú aragwatya ekorobhoi, kimwi araikundikirya kwa okwibhisa.#11:33 Araikundikirya kwa okwibhisa. Amangʼoore agandi ga akare aga Ekiyunani garagamba ega, araikundikirya kwa okwibhisa kasi okuikundikirya mundoohu. Araituura eguru kukisunga, naho abhantu bhanú bharasoha munyumba bharore obhurabhu.

34“Ameeso ngo kya ekorobhoi kumubhiri. Nyoore m-mahoru, omubhiri gwaho gonse gurabha na obhurabhu. Nawe, ameeso gaaho garaabhe amasariku, omubhiri gwaho gonse gurabha na ekisunte. 35Kwa ego, wangararire obhurabhu bhunú bhuringi mumubhiri gwaho, gutariija okubha ekisunte. 36Kwa okubha, nyoore omubhiri gwaho gonsego guuna endingaasi bira ekisunte kyokyonse, guringʼara, kya ego ekorobhoi erakumirikira kwa obhurabhu bhwaye.”

Yeesu arabhakemera Abhafarisaayona abheehigirya bha amaragiriryo

(Mataayo 23:1-36; Mariko 12:38-40)

37Yeesu hanú yaamara okugamba gayo, Omufarisaayo umwi akamugenihya, agende iika owaaye okurya ebhyakurya. Akagya, akasoha munyumba, akeekara okurya ebhyakurya. 38Omufarisaayo uyo, akaruguura bhukongʼu hanú yaarora Yeesu ararya bira okwisaabha kya ego egimiira gyabho gyagambanga.#11:38 Yeesu ararya bira okwisaabha kya ego egimiira gyabho gyagambanga. Kugimiira gya Ekiyahudi omuntu akaarya ebhyakurya bira okwisaabha na okusabha, ebhyakurya bhirakona na bhiramukora abhe omukonu na abhandi bhanú bhararya bhonse bharakona.

39Nawe, Omukuru Yeesu akamukeerya ega, “Bheenyu Abhafarisaayo, muroogya ekikombe na ekitubha kwa kibhara, enu mumitima gyenyu, mwijwiri obhwibhi na obhusarya. 40Bheenyu abhatengʼo! Unú yaabhumba omubhiri ngʼo yaabhumba omutima. 41Mubheerenga abhatobhu kwa emitima gyenyu gyonsego, nho bhyonsego bhiraabhe bhyogiibhwe kurusumo rwenyu.

42“Murikirora-ko, bheenyu Abhafarisaayo! Kwa okubha muragwata amaragiriryo ga okuruusya ejaaka kora kwa ebhintu bhya obhwera obhuke bhukongʼu, kya egimbusuro gya emyungu, ebhitunguru, omuchicha, na emikubhi egindi enu muratiga okukorera abhandi amangʼana ga obhuheene na okumuhanja Waryubha. Gayo mureenderwa okugakora, hamwi na okumuruusirya egijaaka giyo.

43“Murikirora-ko, bheenyu Abhafarisaayo! Kwa okubha muhanjiri okwikara kubhitumbi ebhya embere ebhya abhasuukwa mumasinagogi, muhanjiri okukeeranibhwa kwa obhusuuku mumidiira. 44Murikirora-ko! Kwa okubha bheenyu n-kya abhaku bhanú bhaagunda mugimbihira ginú gitakumaahwa, na abhantu bharahita bharagitaja bira okumanya ega, m-mugiro.”

45Rumwigo, omwihigirya umwi wa amaragiriryo akamukeerya Yeesu ega, “Omwihigirya, hanú oragamba amangʼana gayo, oratujabhura na bheetu abheehigirya bha amaragiriryo.”

46Yeesu akamukyukya ega, “Na bheenyu abheehigirya bha amaragiriryo, murikirora-ko! Kwa okubha mureetiikya abhantu omujigo omurito gwa amaragiriryo, gunú bhatakutura okugukora. Nawe, bheenyu abheene mutakwenda okwinura kora ekyara, naho bhagugege. 47Murikirora-ko! Kwa okubha murahagaaja egimbihira eginjomu gya abharooti bha Waryubha, nawe abhantu bhanú bheeta abharooti bhayo, m-bajaaji weenyu! 48Kwa ego, muroorokya ega, mureekirirya ganú bhajaaji weenyu bhaakora, kwa okubha murahagaaja egimbihira gya abharooti bhayo, enu murajeera amangʼana gaabho.

49“Nkyo kyakora Waryubha yaagamba kwa egintungwa gyaye ega, ‘Ndabhatumira abharooti na abhatumwa. Nawe, abhandi gati yaabho bharibheeta, na abhandi bharibhanyankya.’ 50Kwa ego, Waryubha aribhabhuturira ekiina abhantu bha orwibhuro runu, kwa ekisigo kya okwita abharooti bhonsego, okurwa kubhwambiro bhwa ekyaro, 51hanú Abheri yeetwa, okuhikira Jakaria, unú yeetirwa mwisyengerero erikuru rya Waryubha, gati ya ahasi ha okumwensera na enyumba enkuru ya okusyengerera.#11:51 Maaha mubhitabho bhya Obhwambiro 4:8; 2 Amangʼana ga Eribhaga 24:20-22. Kweki maaha Erisyengerero erikuru rya Waryubha mu Moonjooro eguru ya Amangʼana Amakongʼu. Ndabhakeerya obhuheene ega, abhantu bha orwibhuro runu bharibhuturirwa ekiina kugayo gonsego.

52“Murikirora-ko, bheenyu abheehigirya bha amaragiriryo! Kwa okubha mubhisiri orufunguro rwa okusiikurira ekiseku kinú abhantu bhakaahitiiri bhamumanye Waryubha. Bheenyu abheene mutaasoha, na bhanú bhaaringa bhareenda okusoha, mukabhakaanʼya.”

53Eribhaga rinú Yeesu yaarwa hayo, Abhafarisaayo na abheehigirya bha amaragiriryo, bhakaamba okubha abharuru bhukongʼu kuweeki. Bhaaringa bharamubhuuririrya amangʼana amaaru, 54naho bhamugwatye kwa amangʼana gaaye.

Currently Selected:

Ruuka 11: Kabwa

Highlight

Copy