Ruuka 17

Ameehigiryo eguru ya amasakyo na okwabhirana

(Mataayo 18:6-7, 18:21-22; Mariko 9:42)

1Mbe, Yeesu akabhakeerya abheehigira bhaaye ega, “Amasakyo ganú garakora abhantu bhajeeme na okukora obhusarya, garaabhe-ho koko. Nawe, omuntu unú araakore amasakyo gayo gabhe-ho, arikirora-ko. 2Nyakara omuntu uyo, akaabhoheerwe ensyo mwigoti na okweswa gatigati wa enyanja, okukira okukora oumwi wa abhake bhanú bharanyikirirya, ajeeme na okukora obhusarya! 3Kwa ego, mwiyangararirenga mutariija okukora obhusarya!#17:3 Mwiyangararirenga mutariija okukora obhusarya. Ensonga eindi eratura okubha ega, mwiyangararirenga mutariija okukora omuntu akore obhusarya.

“Nyoore omuhiiri waaho araakusarirye, omukaanʼye. Hanú araakusabhe okumwabhira, mwabhire. 4Nyoore kira eribhaga araabhe arahunjuka kuuwe, arakukeerya ega, ‘Unyabhire,’ mwabhire! Kora nyoore araakusarirye mara muhungati kurusiku rumwi, mwabhire!”

Eginguru gya eimani

5Nho, abhatumwa#17:5 Abhatumwa. Maaha eringʼana rinu mu Moonjooro eguru ya Amangʼana Amakongʼu. bha Yeesu bhakamukeerya ega, “Omukuru, otukongʼye eimani!” 6Wonse akabhakyukya ega, “Kora mukaabheeri na eimani enke, kya akabhusuro ka eharadari, mukaagukeererye omuti omunene gwa omukuyu ega, ‘Ihika hanu, ogende, wihambe munyanja!’ gukaabheegwiri.

Ameehigiryo eguru ya obhukori bhwa emirimu

7“Tugambe oumwi gati yeenyu yaana omukori wa emirimu, unú aragoomya kasi arariisya amangʼondi. Omukori wa emirimu uyo, hanú araahinde iika okurwa eyo, omukuru waaye aratura okumukeerya rumwigo, ‘Ikara, orye ebhyakurya’? 8Tiigo-ha. Oraamukeerye ega, ‘Nseemerya ebhyakurya, wiseemye okunkorera emirimu, hanú nakabhe ndarya na okunywa. Hanú nakamare, nho uuwe wonse wakarye na okunywa.’ 9Kora otakumugungya omukori wa emirimu uyo, kwa okubha akoreri ganú akeeriibhwe okukora.

10“Egoego na bheenyu, hanú murimara okukora gonsego ganú mwakeeribhwa na Waryubha, mugambe ega, ‘Bheetu m-bakori bha emirimu ego. Tukoreri ganú tureenderwa okukora.’”

Yeesu arahwenʼya abhagenge ekumi

11Yeesu, hanú yaaringa aragya mumugi gwa Yerusaremu, akahitira kurutunga rwa ekyaro kya Samaria na Gariraaya. 12Hanú yaasoha mukijiji kimwi, akasikana na abhagenge ekumi. Abhagenge bhayo, bhakeemirira hare nawe, 13bhakagamba kwa eriisi erinene ega, “Omusuukwa Yeesu, otwabhire!”

14Yeesu hanú yaabharora, akabhakeerya ega, “Mugende mwiyorokye kubhasyengeri ega, muhweneri.”#17:14 Maaha mukitabho kya Abharaawi 14:1-32. Hanú bhaaringa bharagya, bhakeeraama.

15Oumwi waabho, hanú yaarora ega, amariri okuhwenibhwa, akahunjuka ku Yeesu, aramutogoonʼya Waryubha kwa eriisi erinene. 16Hanú yaahika, akatema hansi ebhiru embere yaaye, akahiinya obhusu bhukahika hansi, enu aramugungya. Omuntu uyo, yaaringa Omusamaria.

17Yeesu akagamba ega, “M-bantu ekumi bhanú bharaamirwe. Bhoono, abhandi kenda bharingi-ha? 18Atahunjukiri kora omuntu oundi okumutogoonʼya Waryubha, m-mugeni unu omwenego?” 19Nawe, Yeesu akamukeerya ega, “Imirira, ogende gyaho! Eimani yaaho ekuhwenerye.”

Ganú garituuka hanú Omwana wa Adamu ariija

(Mataayo 24:23-28, 24:37-41)

20Mbe, Abhafarisaayo bhakamubhuurya Yeesu ega, “Obhukama bhwa Waryubha, bhuriija ruuha?” Yeesu akabhakyukya ega, “Okuuja kwa obhukama bhwa Waryubha, kutaringi kya ekimanyiiriryo kinú kiratura okumaahikana. 21Abhantu bhataritura okugamba ega, ‘M-bunu hanu!’ kasi ‘M-burya harya!’ Mwitegeerere mwigwe! Obhukama bhwa Waryubha muunabho.”

22Kimwi, Yeesu akabhakeerya abheehigira bhaaye ega, “Kuginsiku ginú giriija, muribha na enamba ya okurora kora orusiku rumwi runú Omwana wa Adamu#17:22 Omwana wa Adamu. Maaha eringʼana rinu mu Moonjooro eguru ya Amangʼana Amakongʼu. aritunga ekyaro, nawe mutarirurora. 23Abhantu bharibhakeerya ega, ‘Mumaahe! Ngʼ-urya harya!’ kasi ‘Mumaahe! Ngʼ-unu hanu!’ Nawe, abhantu bhayo, mutabhakenyerera. 24Mumanye ega, Omwana wa Adamu hanú arihunjuka, ariija kya ego orukubha ruramesya, rumwigo na okungʼarabha egimbaara gyonsego gya orwire. 25Nawe okwamba, Omwana wa Adamu, ereenderwa anyoore enyanko enene, yaangwe na abhantu bha orwibhuro runu.

26“Kya ego yaaringa kwibhaga rya Nuhu,#17:26 Maaha mukitabho kya Obhwambiro 6–7. niigo eribha eginsiku gya okuhunjuka kwa Omwana wa Adamu. 27Eribhaga rya Nuhu, abhantu bhaaringa bhararya na okunywa, bhaaringa bharateta na okutetwa, okuhikira orusiku runú Nuhu na abhantu bhaaye, bhaasoha muryato erinene. Hanú bhaamara okusoha ego, embura enjaru ya obhusiki ekatwa, amanji gakeejura mukyaro kyonsego, gakabhasikya abhandi bhonsego.

28“Kora kwibhaga rya Ruutu,#17:28 Maaha mukitabho kya Obhwambiro 18–19. amangʼana gaaringa egoego. Abhantu bhaaringa bhararya na okunywa, bhaaringa bharagura na okugurya, bhaaringa bharagoomya na okuhamba egimbusuro, na bhaaringa bharahagaaja. 29Nawe, runú Ruutu na abhaana bhaaye bhaarwa mumugi gwa Sodoma, omururo omuhaari gukeeka okurwa murwire kya embura, gukabhasikya abhandi bhonsego.

30“Ego niigo eribha, orusiku runú Omwana wa Adamu arihunjuka mukyaro hanu, Waryubha arimukundukura. 31Orusiku ruyo, omuntu unú orinyoora atiriiri kurusara, ateetuuma okugega ebhintu bhyaye munyumba, weeki angʼose.#17:31 Omuntu unú orinyoora atiriiri kurusara, ateetuuma okugega ebhintu bhyaye munyumba, weeki angʼose. Kwibhaga rya Yeesu abhantu bhaahagaajanga eginyumba gyabho, bhararaarya egimbaau kwikindaasi kurusumo rwa okumuunyira-ko, bhaakoranga na egingaji gya okuriina-ko. Egoego, na omuntu unú orinyoora aringi mumugunda, atahunjuka iika okugega kyokyonse, weeki angʼose. 32Muhiituke kinú kyamunyoora omukari wa Ruutu!#17:32 Omukari wa Ruutu. Waryubha yaamujibhya omukari wa Ruutu obhururu, kwa okubha omukari uyo, yaagwatwa na orunamba rwa okuhunjuka Sodoma, mumugi gunú Waryubha yaaringa ajibhirye na okusikya. Maaha mukitabho kya Obhwambiro 19:26. 33Omuntu wowonse unú areenda okuhonʼya obhuhoru bhwaye bhwa mukyaro munu, aribhubhurya obhuhoru bhwaye koko. Nawe, omuntu unú ariruusya obhuhoru bhwaye kurusumo rwani, arinyoora obhuhoru bhwa koko.

34“Ndabhakeerya ega, obhutiku bhwa ruyo, abhantu abhabhiri bhanú orinyoora bhareeri kubhuriri bhumwi, oumwi arigegwa, oundi aritigwa. 35Nyoore abhakari abhabhiri bharibha bharasya hamwi, oumwi arigegwa, oundi aritigwa. 36[Abhasaaja abhabhiri, bharaabhe bharakora emirimu mumugunda, oumwi arigegwa, oundi aritigwa.]#17:36 Amangʼana mumabhano ganu […] gataringi mumangʼoore agandi ga akare aga Ekiyunani.”

37Abheehigira bhakamubhuurya ega, “Omukuru, amangʼana gayo garikoreka-ha?” Akabhakyukya ega, “Hanú haana ekigundo, nho amatoonyi gareekumanʼya. Kwa ego, amangʼana gayo garyorokya ega, obhuteero bhwa ekyaro bhuringi haangʼi.”

Currently Selected:

Ruuka 17: Kabwa

Highlight

Copy