Ruuka 23

Yeesu arajongerwa embere ya Pirato

(Mataayo 27:1-2, 27:11-14; Mariko 15:1-5; Yoana 18:28-38)

1Nho, abhakuru bhayo bhonsego bhakeemirira, bhakamuhira Yeesu ku Pirato, omwanangwa wa ekyaro kya Yudea. 2Bhakaamba okumujongera kwa obhuhaari, bharagamba ega, “Omuntu unu tumunyooreri arahabhya abhantu bha ekyaro kyetu, kwa okubha arabhakaanʼya bhatatobha erigooti ku Kaisari,#23:2 Kaisari. Maaha eringʼana rinu mu Moonjooro eguru ya Amangʼana Amakongʼu. na aragamba ega, weeki ngʼo Kiristu Omutuurya, Omukama weetu.”

3Nho, Pirato akamubhuurya ega, “Uuwe nuuwe Omukama wa Abhayahudi?” Yeesu akamukyukya ega, “Nuuwe ogambiri.”

4Pirato akabhakeerya abhasyengeri abhakuru, hamwi na omuganda gwa abhantu ega, “Omuntu unu ataana obhusarya bhobhonse.”

5Nawe abhantu bhayo, bhakakomererya ega, “Arasiigirirya abhantu, kwa obhwihigirya bhwaye kukyaro kyonsego kya Abhayahudi, yaambira Gariraaya, na bhoono yaahikiri Yudea.”

6Pirato hanú yeegwa gayo, akabhabhuurya nyoore Yeesu m-Mugariraaya. 7Hanú yaamanya ega, m-Mugariraaya wa obhutungi bhwa Herode Antipa,#23:7 Maaha mukitabho kya Ruuka 3:1. Kweki, maaha Herode Antipa mu Moonjooro eguru ya Amangʼana Amakongʼu. akamuhira kuweeki, kwa okubha eginsiku giyo, Herode yaaringa Yerusaremu hayo.

Yeesu arahirwa ku Herode Antipa

8Herode Antipa hanú yaamurora Yeesu, akajomerwa bhukongʼu, kwa okubha yaaringa yeegwiri amangʼana gaaye. Yeegombanga okumurora kwa eribhaga eritambi, naho omwene arore ebhika bhinú arakora. 9Herode akamubhuuririrya amangʼana amaaru, nawe, Yeesu ataakyukya eringʼana. 10Abhasyengeri abhakuru na abheehigirya bha amaragiriryo bhaaringa-ho, bharamujongera kwa obhuhaari bhukongʼu. 11Herode wonse, na abhasirikare bhaaye, bhakaamba okumujeera, bhakamusekerera, bhakamwibhohya omwenda gwa ekikama. Nho, Herode akamuhindya ku Pirato. 12Herode na Pirato bhaaringa abhasigu, okwambira hayo, bhakabha abhasaani.

Pirato arabhuturira ekiina Yeesu yeetwe

(Mataayo 27:15-26; Mariko 15:6-15; Yoana 18:38–19:16)

13Eribhaga erindi, Pirato akakumanʼya abhasyengeri abhakuru, na abhatungi bha Abhayahudi, hamwi na abhantu bha mumugi. 14Akagamba ega, “Mundeeteeri omuntu unu, muragamba ega, yaaringa arahabhya abhantu. Bhoono mwitegeerere mwigwe. Neekomerye bhwaheene okujongera kwenyu kwonsego, bhutariho obhusarya bhobhonse bhunú naaruuji. 15Kora Herode wonse, ataruuji obhusarya bhobhonse bhurya, nkyo kikoreri amuhunjukirye kuoni. Mumanye ega, omuntu unu ataakora eringʼana eribhiibhi rinú riraakore yeetwe! 16Kwa ego, ndamutema ebhibhoko, ndamara ndamuhaatira.” 17[Kira hanú enyangi ya Epasaka yaahikanga, yeenderwanga Pirato okumuhaatira omubhohwa oumwi.]#23:17 Amangʼana mumabhano ganu […] gataringi mumangʼoore agandi ga akare aga Ekiyunani.

18Nawe, abhantu bhayo bhonsego bhakajiirira kwa hamwi ega, “Muruusye-ho omuntu uyo! Otusiikurire Bharaabha!” 19Bharaabha uyo, yaaringa abhoherwe mwigereja, kwa okubha yaaringa akoreri ekisiiyomba mumugi, na yaaringa yeetiri omuntu. 20Pirato akeenda okuhaatira Yeesu. Ego, akagamba nabho kweki. 21Nawe, bheeki bhakagendererya okutema ekituri, “Mubhambe kumusarabha! Mubhambe kumusarabha!”

22Akabhakeerya kweki orwa kasatu ega, “Akoreri obhusarya-ki? Ndeegwa, ntakurora obhusarya bhobhonse bhunú bhuraakore yeetwe. Kwa ego, ndamutema ebhibhoko, ndamara ndamuhaatira.” 23Nawe, abhantu bhayo bhakagendererya okutema ekituri bhukongʼu ega, Yeesu abhambwe kumusarabha. Kubhuteero, ekituri kyabho kikamuhiga.

24Mbe, Pirato akabhahaatirirya Abhayahudi bhayo, okukora kya ego bhareenda. 25Akabhasiikurira Bharaabha okurwa mwigereja, yaaringa abhoherwe kwa okukora ekisiiyomba na obhwiti. Akabhahaana Yeesu, naho bhamukore kya ego bhareenda.

Yeesu arabhambwa kumusarabha

(Mataayo 27:32-44; Mariko 15:21-32; Yoana 19:17-27)

26Hanú abhasirikare bhaaringa bharamuhira Yeesu okumubhamba kumusarabha, bhakasikana na omuntu umwi, eriina ryaye Simoni wa mumugi gwa Kirene. Eribhaga riyo, yaasohanga mumugi gwa Yerusaremu. Bhakamugwata, bhakamwitiikya omusarabha gunú Yeesu yaaringa yeetiikiri, akabha aragenda enyuma ya Yeesu.

27Abhantu emiganda na emiganda, bhakamuseeta Yeesu. Gati yaabho bhaaringa-mo abhakari bhanú bhaamukuuriranga na okuruguura. 28Yeesu akabheekyukirya, akabhakeerya ega, “Bheenyu, abhakari bha Yerusaremu! Mutige okunkuurira oni! Mwikuurire bheenyu abheene, na mukuurire abhaana bheenyu! 29Mumanye bhujomu ega, eginsiku giriija, ginú abhantu bharigamba ega, nyakara abhagumba bhanú bhataakeebhwiri na egimbeere gyabho gitaakaneenerye abhaana. 30Eribhaga riyo, abhantu bharikeerya eginkuku ega, ‘Mutugwire!’ na ebhiswa ega, ‘Mutukundikirirye!’#23:30 Maaha mukitabho kya Hosia 10:8. 31Ndagamba ego, kwa okubha nyoore bharankora ego oni, omuti omubhisi, eribha enyanko bhukongʼu kubheenyu, omuti omomu.”#23:31 Ensonga ya omuchafwa gunu niiga, nyoore bharamunyankya Yeesu unú ataana obhusarya, abhasarya bharinyankibhwa okukira Yeesu.

32Abhasirikare bhakamuhira Yeesu hamwi na abhasarya bhabhiri, naho bheetwe hamwi. 33Hanú bhaahika ahasi hanú harabhirikirwa Ekihuuri kya Omuntu, nho bhakamubhamba kumusarabha. Bhakamubhamba hamwi na abhasarya bhabhiri bhayo, oumwi orubhaara rwaye rwa obhuryo, na oundi orubhaara rwaye rwa obhumosi.

34Yeesu akagamba ega, “Taata! Obhaabhire, kwa okubha bhatamanyiri kinú bharakora.”

Abhasirikare bhayo hanú bhaamara, bhakagabhana emyenda gyaye kwa okugitemera ekuura.#23:34 Kwa okugitemera ekuura. Bhaatuuranga mukintu, ebhiti bhinú bhiina ebhimanyiiriryo kasi amagina ga amariina, naho kira oumwi agege omwenda gunú guraagwire kukimanyiiriryo kyaye. Maaha mukitabho kya Egijabhuri 22:18. 35Abhantu bhaaringa bheemiriiri hayo, bharamaahirira ganú garakoreka. Abhakuru bha Abhayahudi, bhakamujeera bharagamba ega, “Ndeegwa yaatuuryanga abhandi! Mbe, bhoono yeetuurye omwene, nyoore ngʼo Kiristu Omutuurya, omusorwa wa Waryubha.” 36Abhasirikare bhonse bhakamujeera, bhakamusuntarira, bhakamuhaana omusuka gwa edivai. 37Bhakamukeerya ega, “Nyoore heene uuwe m-Mukama wa Abhayahudi, ituurya uuwe omwene!”

38Eguru kumusarabha gunú yaaringa abhambirwe-ko, bhaatuura-ko amangʼoore ganu, “unu ngʼo omukama wa abhayahudi.”

39Oumwi gati ya bha obhusarya abhabhiri bhanú bhaaringa bhabhambirwe kumusarabha hamwi, akamutuka Yeesu ega, “M-buheene ega, uuwe nuuwe Kiristu Omutuurya? Mbe, ituurya uuwe omwene! Otutuurye na bheetu bhonse!”

40Nawe, owa obhusarya oundi akamukemera omurikyaye ega, “Uuwe otakoobhoha Waryubha? Uuwe wonse onyooreri obhubhuturi bhwa ekiina bhuyobhuyo. 41Bheetu tubhuturiirwe ekiina kwa obhuheene, ganu ngo endihi ya ganú twakora. Nawe omuntu unu, ataakora obhusarya bhobhonse.”

42Hanú yaamara okukemera omurikyaye, akagamba ega, “Yeesu, unhiituke oni, hanú wakasohe mubhukama bhwaho.” 43Yeesu akakyukya ega, “Ndakukeerya obhuheene ega, reero wakabhe hamwi na oni murwire.”

Yeesu arakwa

(Mataayo 27:45-56; Mariko 15:33-41; Yoana 19:28-30)

44-45Hanú gyahika ensa esansabha gya omubhasu, eryubha rikasima, ekisunte kikakurya mukyaro kyonsego, okuhikira ensa kenda. Eshuuka enene inú yaaringa eturungajiibhwe munyumba enkuru ya mwisyengerero erikuru rya Waryubha,#23:44-45 Eshuuka enene inú yaaringa eturungajiibhwe munyumba enkuru ya mwisyengerero erikuru rya Waryubha. Yaaringa eraahukanʼya abhantu bhatasoha Aharabhu ha Aharabhu, hanú obhukuru bhwa Waryubha bhwaringa. Eshuuka iyo yaaringa kya eshuuka ya eribhuru erijomu rinú riroorokya okubha-ho kwa Waryubha mukitabho kya Okuhuruka 26:31-33. Kweki, maaha mukitabho kya Abhaebhurania 6:19, 9:3, 10:19-22. ekabhaaruka amabhaara gabhiri.

46Yeesu akakuura kwa eriisi erinene ega, “Taata! Omutima gwani ndagutuura mumabhoko gaaho!” 47Hanú yaamara okugamba gayo, gukahwa-mo.

Omukuru wa abhasirikare hanú yaarora ganú gakorekeri, akamugungya Waryubha aragamba ega, “M-buheene ega, omuntu unu yaaringa wa heene!”

48Abhantu bhonsego bhanú bhaaringa bheekumeenʼye okumaaha amangʼana gayo, hanú bhaarora ganú gakorekeri, bhakahunjuka iika owaabho, bhareetematema kubhikubha bhyabho kwa okusurumbara. 49Nawe, bhanú bhaaringa bhamumanyiri bhakeemirira hare, bharamaahirira ganú garakoreka. Gati yaabho, bhaaringa-ho abhakari bhanú bhaamusoorananga okurwa mukyaro kya Gariraaya.

Yeesu arabhiikwa

(Mataayo 27:57-61; Mariko 15:42-47; Yoana 19:38-42)

50-51Yaaringa-ho omuntu umwi, eriina ryaye Yusufu, wa mumugi gwa Arimataya, gunú gwaringa mukyaro kya Yudea. Yaaringa omuntu wa heene embere ya Waryubha, na yaaganyiriranga obhukama bhwa Waryubha#23:50-51 Obhukama bhwa Waryubha. Maaha eringʼana rinu mu Moonjooro eguru ya Amangʼana Amakongʼu. bhuuje. Onyoora yaaringa umwi wa eribharaja erikuru rya Abhayahudi, ateekiriranʼya na abharikyaye kuringʼana riyo rya okwita Yeesu. 52Mbe, akagya ku Pirato, akasabha omubhiri gwa Yeesu. 53Pirato hanú yeekirirya, Yusufu akagwikya okurwa kumusarabha, akagukundikirya ensanda. Akagutuura mumbihira inú yaaringa ebhaajirwe kwitare, inú yaaringa ekyari okubhiikwa-mo omuku oundi. 54Orusiku ruyo rwaringa orwa kataanu, na ndo rwaringa orusiku rwa okwiseemya kwa Esabhato. Orusiku rwa Esabhato rwaringa rwambiri.#23:54 Orusiku rwa Esabhato rwaringa rwambiri. Orusiku rwa Esabhato rwaambanga eribhaga eryubha rirasikira orusiku rwa kasansabha, okwimukira orusiku rwa muhungati. Amaragiriryo ga Abhayahudi gateekiriryanga okubhiika omuntu orusiku rwa Esabhato. Maaha Esabhato mu Moonjooro eguru ya Amangʼana Amakongʼu.

55Mbe, abhakari bhanú bhaaja hamwi na Yeesu okurwa Gariraaya, bhakamuseeta Yusufu mumbihira, bhakamaaha kya ego omubhiri gwa Yeesu guteerwe-mo. 56Nho, bhakahunjuka iika, bhakaseemya amaguta na obhurange bhwa okuhaka omubhiri gwa Yeesu. Bhakamuunya orusiku rwa Esabhato, kya ego yaaringa eragiririibhwe na amaragiriryo ga Waryubha.#23:56 Maaha mubhitabho bhya Okuhuruka 20:8-11; Obhuhiituki bhwa Amaragiriryo 5:12-15.

Currently Selected:

Ruuka 23: Kabwa

Highlight

Copy