Ruuka 7
7
Eimani ya omukuru wa abhasirikare
(Mataayo 8:5-13)
1Yeesu, hanú yaamara okukeerya omuganda gwa abhantu amangʼana gayo gonsego, akasoha mumugi gwa Kaperinaumu. 2Mumugi guyo, yaaringa-mo omukuru wa abhasirikare bha Ekiruumi. Omukuru uyo, yaaringa na omukori wa emirimu waaye, na yaaringa amuhanjiri bhukongʼu. Nawe, omukori wa emirimu uyo, yaaringa omurweri omusingu.
3Mbe, omukuru uyo, hanú yeegwa amangʼana eguru ya Yeesu, akatuma abhakaruka bha Ekiyahudi ku Yeesu ega, “Mugende mumusabhe yaaje okuhwenʼya omukori wa emirimu waani.” 4Abhakaruka bhayo, hanú bhaahika ku Yeesu, bhakamukomererya bhukongʼu ega, “Omukuru uyo, areenderwa omutuurirye, 5kwa okubha ahanjiri ekyaro kyetu, na ngʼo yaatuhagaajira erisinagogi.”
6Mbe Yeesu, akeemuka hamwi na abhakaruka bhayo, okugya iika owa omukuru uyo. Hanú bhaahika haangʼi na enyumba yaaye, omukuru uyo akatuma abhasaani bhaaye ku Yeesu, bhamukeerye ega, “Uuwe Omukuru Yeesu, tiga okwinyankya. Ntakwenderwa uuwe osohe iika owaani. 7Na nkyo nduuji ega, ntaana obhwera kora niije kuuwe. Nawe, ogambe eringʼana rimwi ego, omukori wa emirimu waani ahwene. 8Kora oni ndingi insi ya abhakuru bhaani, na niina abhasirikare bhanú bharingi insi waani. Hanú ndaakeerye oumwi ega, ‘Genda,’ rumwigo aragya. Na hanú ndaakeerye oundi, ‘Njo,’ rumwigo araaja. Na omukori wa emirimu waani, ndaamukeerye ega, ‘Kora ekintu nyabhurebhe,’ niigo arakora.” 9Yeesu hanú yeegwa gayo, akaruguura bhukongʼu. Akeekyukirya omuganda gwa abhantu bhanú bhaaringa bharamuseeta, akagamba ega, “Ndabhakeerya ega, kora gati ya Abhaisiraeri bhonsego, nkyari okurora omuntu wowonse owa eimani enene kya unu!” 10Mbe, abhasaani bhayo, hanú bhaahinda iika owa omukuru uyo, bhakanyoora omukori wa emirimu ahweneri.
Yeesu arahyukya omumura unú akwiri
11Eribhaga erindi ekego, Yeesu akagya mumugi gwa Naini, aringi hamwi na abheehigira bhaaye, na abhantu abhandi abhaaru. 12Na hanú yaahika haangʼi mukiita kya omugi, akasikana na abhantu bhagegeri omuku wa ekisaaja. Omusaaja uyo, yaaringa omumwemwe, na ngʼina waabho, yaaringa omusino. Omukari uyo, hamwi na abhantu abhaaru bha mumugi guyo, bhaagyanga okumubhiika.
13Omukuru Yeesu, hanú yaamurora omusino uyo, akagwatwa ekyabhira, akamukeerya ega, “Tiga okukuura.” 14Akasuntarira erisayenge rinú omuku yaaringa-ko, akarikuunʼya. Na abhantu bhanú bhaaringa bharigegeri, bhakeemirira. Yeesu akagamba ega, “Mura, ndakukeerya ega, hyuka!” 15Rumwigo, omusaaja uyo, akahyuka akeekara, akaamba okuhaira kweki. Nho, Yeesu akamugwatya kungʼina waabho.
16Abhantu bhayo bhonsego, bhakaruguura bhukongʼu, bhakaamba okumugungya Waryubha, bharagamba, “Omurooti omukuru arwiriri gati yeetu!” Bhakagamba kweki ega, “Waryubha yaajiri okutuurya abhantu bhaaye!” 17Amangʼana gayo, gakamanyikana bhukongʼu kukyaro kya Yudea kyonsego, na kubhyaro ebhindi bhya haangʼi.
Yoana Omubhatiiji aratuma abheehigira bhaaye ku Yeesu
(Mataayo 11:2-19)
18Eribhaga Yeesu yaaringa arakora gonsego gayo, abheehigira bha Yoana Omubhatiiji, bhakareetera Yoana amangʼana gayo gonsego. 19Yoana wonse akabhabhirikira abhabhiri gati yaabho, akabhatuma bhagye okumubhuurya Omukuru Yeesu, ega, “Uuwe nuuwe unú ariija,#7:19 Uuwe nuuwe unú ariija. Amangʼana ganu garamuhairira Masiha. Ni-ringʼana rya Ekiebhurania ensonga yaaye niiga, Kiristu. Maaha Kiristu mu Moonjooro eguru ya Amangʼana Amakongʼu. kasi tuganyirire oundi?”
20Ego, hanú abhabhiri bhayo bhaamuhikiira, bhakamukeerya ega, “Yoana Omubhatiiji atutumiri kuuwe, tukubhuurye ega, ‘Uuwe nuuwe unú ariija, kasi tuganyirire oundi?’”
21Eribhaga riyoriyo, Yeesu yaaringa arahwenʼya abhantu abhaaru amarweri gaabho. Yaahwenʼyanga abhantu bhanú bhajuuriibhwe na ebhihwi ebhibhiibhi. Na akabha arabhabheera abhahoku abhaaru bharore.
22Nho, Yeesu akabhakyukya abheehigira bhayo ega, “Mugende mukeerye Yoana, gonsego ganú muruuji, na ganú mwigwiri. Abhahoku bhararora, abhabheeru bharagenda, abhagenge bharahwenibhwa, abharibhu bhareegwa, abhaku bharahyukibhwa, na abhatobhu bhararaarikirwa Amangʼana Amajomu ga Waryubha.#7:22 Omurooti Isaaya yaaroota ega, Kiristu Omutuurya arakora emirimu giyo gyonsego. Maaha mukitabho kya Isaaya 35:5-6, 61:1. 23Nyakara omuntu unú atakubhurya eimani yaaye kuoni.”
24Abhabhiri bhayo hanú bhaagya, Yeesu akaamba okubhuurya omuganda gwa abhantu eguru ya Yoana, ega, “Mwaringa muragya okumaaha-ki kukibhara? Obhunyanki bhunú bhurahuutwa na omuyaga? Tiigo-ha! 25Mbe, mwaringa muragya okumaaha-ki? Omuntu unú yeebhoheri emyenda emijomu gya obhuguri? Abhantu bhanú bhareebhoha emyenda emijomu gya obhuguri, na okwijomya kwa obhwaru bhwa ebhintu bhinú bhaanabhyo, oranyoora bhareekara muginyumba eginene gya ekikama.
26“Bhoono, mwagya okumaaha-ki? Mwagya okumumaaha omurooti? Obhuheene! Nawe, ndabhakeerya ega, Yoana m-mukuru okukira omurooti wowonse. 27Weeki ngʼo amangʼana eguru yaaye gaangʼoorwa mu Mangʼoore Amarabhu ega, ‘Maaha, ndamutuma omuchaama waani akukangatire, naho akuseemerye enjira.’#7:27 Maaha mukitabho kya Maraki 3:1.”
28Yeesu akagamba kweki ega, “Oni ndabhakeerya ega, gati ya abhantu bhonsego, atariho omukuru okukira Yoana. Nawe, omuke okukira bhonsego mubhukama bhwa Waryubha, ngʼo omukuru okumukira Yoana Omubhatiiji.”
29Mbe, abhantu bhayo bhonsego, hamwi na abhatobhya bha erigooti, hanú bheegwa amangʼana gayo, bhakeekirirya ega, ekiina kya Waryubha kubheene kyaringa ekijomu. Abhantu bhayo mbo bhanú Yoana abhatiijiri. 30Nawe, Abhafarisaayo na abheehigirya bha amaragiriryo, bheeki, bhakaanga ganú Waryubha yeendanga, kwa okubha bhaangiri okubhatiijwa na Yoana.
31Yeesu akagamba kweki ega, “Bhoono, abhantu bha orwibhuro runu, mbahunkanʼye naki? M-bantu bha egaki? 32Bharahunkana na abhaana bhanú bhareekara mumudiira, bharabhirikira abharikyabho na okubhakeerya ega, ‘Twabhatemera ekironge, nawe, mutaabhina! Twabheembira ameembo ga okufumba, nawe, mutafumbiri!’
33“Ndagamba ego, kwa okubha, hanú Yoana Omubhatiiji yaaja, ataaringa ararya emikaate, kora okunywa edivai.#7:33 Ataaringa ararya emikaate, kora okunywa edivai. Omukaate na edivai mbyo bhyaringa ebhyakurya bhya kira orusiku. Bheenyu muragamba ega, ‘Unu yaana ekihwi ekibhiibhi!’ 34Na hanú Omwana wa Adamu yaajiri, weeki ararya emikaate na okunywa edivai. Bhoono bheenyu muragamba ega, ‘Mumaahe! M-muhubhaaru, kweki m-mureebhi! Na m-musaani wa abhatobhya bha erigooti na abha obhusarya!’
35“Nawe, egintungwa gya Waryubha giroorokereribhwa ega, n-gya maheene kwa enjira ya amakorwa ga abhantu bhanú bharagigwata.”
Yeesu aramwabhira owa obhusarya
36Yaaringa-ho Omufarisaayo umwi, unú yaabhirikirwanga Simoni. Akaraarika Yeesu yaaje okurya iika owaaye. Nho, Yeesu akasoha munyumba ya omuntu uyo, akeekara okurya ebhyakurya kumeja. 37Mumugi guyo, yaaringa-mo omukari umwi, unú yaaringa amanyikeeni ega, m-muntu omusarya.
Mbe, omukari uyo hanú yeegwa ega, Yeesu ararya owa Omufarisaayo, akasoha muyo na enchupa inú yaaringa na amaguta ga obhurange, aga obhuguri obhunene bhukongʼu. 38Akeemirira haangʼi na amaguru ga Yeesu. Akaamba okukuura, ameesori gaaye gaatoonyanga kumaguru ga Yeesu. Akabha arageehya na egintuukya gyaye, arabhusu amaguru ga Yeesu, na okugahaka obhurange.#7:38 Omukari uyo, kinú yaaringa arakora kiroorokya kya ego yaaringa aramutogoonʼya Yeesu na okumusuuka. Ekimanyiiriryo kiyo, kweki kyaringa kiroorokya obhuhanje bhunú omukari uyo, yaaringa nabho ku Yeesu. Kubhutamaduni bhwa Abhayahudi, eringʼana rinú omukari uyo yaakoranga, ryaringa rya okuruguurya.
39Omufarisaayo uyo, hanú yaarora gayo, akeetegeerera munkoro yaaye ega, “Omuntu unu, akaabheeri omurooti, akaamanyiri ega, omukari unú aramukuunʼya m-muntu wa egaki. Akaamanyiri ega, weeki m-muntu omusarya!”
40Yeesu akamukeerya, “Simoni, niina eringʼana ndeenda okukukeerya.” Wonse akamukyukya ega, “Omwihigirya, nkeerya.” Yeesu akagamba ega, 41“Bhaaringa-ho abhantu abhabhiri, bhonsego bhaaringa bharatongwa egimbirya na unú yaaringa abhaheeri esiiri. Oumwi waabho, yaaringa aheerwe esiiri ya edinari magana gataanu.#7:41 Edinari magana gataanu. Egimbirya giyo gyaringa m-mariho ga omuntu oumwi kwa omwaka omugima na emyeri munaane. Maaha Edinari mu Moonjooro eguru ya Amangʼana Amakongʼu. Omurikyaye wonse, akahaanwa esiiri ya edinari mirongo etaanu. 42Abhabhiri bhayo, hanú bhaabhurwa egimbirya gya okuriha egisiiri gyabho, unú yaabhahaana esiiri akabhaabhira, bhatige okumuriha. Mbe, gati ya abhabhiri bhayo, ngʼ-uuha yaamuhanja bhukongʼu okukira omurikyaye?” 43Simoni akamukyukya ega, “Ndamanya, ngʼo unú yaabhirwa esiiri enene.” Yeesu akagamba ega, “Okyukirye bhwaheene.”
44Yeesu akamwikyukirya omukari uyo, akamukeerya Simoni ega, “Orarora omukari unu? Hanú nsoheri munyumba yaaho, otaangenihirye kwa okungʼaana amanji ga okoogya amaguru gaani.#7:44 Okungʼaana amanji ga okoogya amaguru gaani. Ku Bhayahudi, yaaringa egimiira okumuhaana omugeni amanji, yoogye amaguru gaaye. Nawe weeki, yoogerye amaguru gaani na ameesori gaaye, na okugeehya na egintuukya gyaye. 45Uuwe otankeereenʼye kwa okumbusu,#7:45 Otankeereenʼye kwa okumbusu. Kugimiira gya Ekiyahudi okubhusu yaaringa ekintu kinú bhaaringa bhanariri kubhasaaja hanú bhakeeranʼyanga. nawe okwambira hanú nsoheri munu, weeki akyari okurosa okumbusu amaguru gaani. 46Otansuukiri kwa okuhaka omutwe gwani amaguta. Nawe weeki, ahakiri amaguru gaani amaguta ga obhurange! 47Kwa ego, ndakukeerya ega, obhuhanje bhwa omukari unu m-bwaru, kwa okubha obhusarya bhwaye obhwaru bhwabhiirwe. Nawe, wowonse unú yaabhiirwe obhusarya obhuke, uyo oranyoora yaana obhuhanje obhukego.” 48Yeesu akamukeerya omukari uyo ega, “Obhusarya bhwaho bhwabhiirwe.”
49Abhageni bhanú bhaaringa kumeja hamwi nawe, bhakaamba okwibhuurya ega, “Unu niwi araabhira kora obhusarya?”
50Hayo, Yeesu akamukeerya omukari uyo ega, “Eimani yaaho ekuhwenerye! Genda na omurembe.”
Currently Selected:
Ruuka 7: Kabwa
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
Ruuka 7
7
Eimani ya omukuru wa abhasirikare
(Mataayo 8:5-13)
1Yeesu, hanú yaamara okukeerya omuganda gwa abhantu amangʼana gayo gonsego, akasoha mumugi gwa Kaperinaumu. 2Mumugi guyo, yaaringa-mo omukuru wa abhasirikare bha Ekiruumi. Omukuru uyo, yaaringa na omukori wa emirimu waaye, na yaaringa amuhanjiri bhukongʼu. Nawe, omukori wa emirimu uyo, yaaringa omurweri omusingu.
3Mbe, omukuru uyo, hanú yeegwa amangʼana eguru ya Yeesu, akatuma abhakaruka bha Ekiyahudi ku Yeesu ega, “Mugende mumusabhe yaaje okuhwenʼya omukori wa emirimu waani.” 4Abhakaruka bhayo, hanú bhaahika ku Yeesu, bhakamukomererya bhukongʼu ega, “Omukuru uyo, areenderwa omutuurirye, 5kwa okubha ahanjiri ekyaro kyetu, na ngʼo yaatuhagaajira erisinagogi.”
6Mbe Yeesu, akeemuka hamwi na abhakaruka bhayo, okugya iika owa omukuru uyo. Hanú bhaahika haangʼi na enyumba yaaye, omukuru uyo akatuma abhasaani bhaaye ku Yeesu, bhamukeerye ega, “Uuwe Omukuru Yeesu, tiga okwinyankya. Ntakwenderwa uuwe osohe iika owaani. 7Na nkyo nduuji ega, ntaana obhwera kora niije kuuwe. Nawe, ogambe eringʼana rimwi ego, omukori wa emirimu waani ahwene. 8Kora oni ndingi insi ya abhakuru bhaani, na niina abhasirikare bhanú bharingi insi waani. Hanú ndaakeerye oumwi ega, ‘Genda,’ rumwigo aragya. Na hanú ndaakeerye oundi, ‘Njo,’ rumwigo araaja. Na omukori wa emirimu waani, ndaamukeerye ega, ‘Kora ekintu nyabhurebhe,’ niigo arakora.” 9Yeesu hanú yeegwa gayo, akaruguura bhukongʼu. Akeekyukirya omuganda gwa abhantu bhanú bhaaringa bharamuseeta, akagamba ega, “Ndabhakeerya ega, kora gati ya Abhaisiraeri bhonsego, nkyari okurora omuntu wowonse owa eimani enene kya unu!” 10Mbe, abhasaani bhayo, hanú bhaahinda iika owa omukuru uyo, bhakanyoora omukori wa emirimu ahweneri.
Yeesu arahyukya omumura unú akwiri
11Eribhaga erindi ekego, Yeesu akagya mumugi gwa Naini, aringi hamwi na abheehigira bhaaye, na abhantu abhandi abhaaru. 12Na hanú yaahika haangʼi mukiita kya omugi, akasikana na abhantu bhagegeri omuku wa ekisaaja. Omusaaja uyo, yaaringa omumwemwe, na ngʼina waabho, yaaringa omusino. Omukari uyo, hamwi na abhantu abhaaru bha mumugi guyo, bhaagyanga okumubhiika.
13Omukuru Yeesu, hanú yaamurora omusino uyo, akagwatwa ekyabhira, akamukeerya ega, “Tiga okukuura.” 14Akasuntarira erisayenge rinú omuku yaaringa-ko, akarikuunʼya. Na abhantu bhanú bhaaringa bharigegeri, bhakeemirira. Yeesu akagamba ega, “Mura, ndakukeerya ega, hyuka!” 15Rumwigo, omusaaja uyo, akahyuka akeekara, akaamba okuhaira kweki. Nho, Yeesu akamugwatya kungʼina waabho.
16Abhantu bhayo bhonsego, bhakaruguura bhukongʼu, bhakaamba okumugungya Waryubha, bharagamba, “Omurooti omukuru arwiriri gati yeetu!” Bhakagamba kweki ega, “Waryubha yaajiri okutuurya abhantu bhaaye!” 17Amangʼana gayo, gakamanyikana bhukongʼu kukyaro kya Yudea kyonsego, na kubhyaro ebhindi bhya haangʼi.
Yoana Omubhatiiji aratuma abheehigira bhaaye ku Yeesu
(Mataayo 11:2-19)
18Eribhaga Yeesu yaaringa arakora gonsego gayo, abheehigira bha Yoana Omubhatiiji, bhakareetera Yoana amangʼana gayo gonsego. 19Yoana wonse akabhabhirikira abhabhiri gati yaabho, akabhatuma bhagye okumubhuurya Omukuru Yeesu, ega, “Uuwe nuuwe unú ariija,#7:19 Uuwe nuuwe unú ariija. Amangʼana ganu garamuhairira Masiha. Ni-ringʼana rya Ekiebhurania ensonga yaaye niiga, Kiristu. Maaha Kiristu mu Moonjooro eguru ya Amangʼana Amakongʼu. kasi tuganyirire oundi?”
20Ego, hanú abhabhiri bhayo bhaamuhikiira, bhakamukeerya ega, “Yoana Omubhatiiji atutumiri kuuwe, tukubhuurye ega, ‘Uuwe nuuwe unú ariija, kasi tuganyirire oundi?’”
21Eribhaga riyoriyo, Yeesu yaaringa arahwenʼya abhantu abhaaru amarweri gaabho. Yaahwenʼyanga abhantu bhanú bhajuuriibhwe na ebhihwi ebhibhiibhi. Na akabha arabhabheera abhahoku abhaaru bharore.
22Nho, Yeesu akabhakyukya abheehigira bhayo ega, “Mugende mukeerye Yoana, gonsego ganú muruuji, na ganú mwigwiri. Abhahoku bhararora, abhabheeru bharagenda, abhagenge bharahwenibhwa, abharibhu bhareegwa, abhaku bharahyukibhwa, na abhatobhu bhararaarikirwa Amangʼana Amajomu ga Waryubha.#7:22 Omurooti Isaaya yaaroota ega, Kiristu Omutuurya arakora emirimu giyo gyonsego. Maaha mukitabho kya Isaaya 35:5-6, 61:1. 23Nyakara omuntu unú atakubhurya eimani yaaye kuoni.”
24Abhabhiri bhayo hanú bhaagya, Yeesu akaamba okubhuurya omuganda gwa abhantu eguru ya Yoana, ega, “Mwaringa muragya okumaaha-ki kukibhara? Obhunyanki bhunú bhurahuutwa na omuyaga? Tiigo-ha! 25Mbe, mwaringa muragya okumaaha-ki? Omuntu unú yeebhoheri emyenda emijomu gya obhuguri? Abhantu bhanú bhareebhoha emyenda emijomu gya obhuguri, na okwijomya kwa obhwaru bhwa ebhintu bhinú bhaanabhyo, oranyoora bhareekara muginyumba eginene gya ekikama.
26“Bhoono, mwagya okumaaha-ki? Mwagya okumumaaha omurooti? Obhuheene! Nawe, ndabhakeerya ega, Yoana m-mukuru okukira omurooti wowonse. 27Weeki ngʼo amangʼana eguru yaaye gaangʼoorwa mu Mangʼoore Amarabhu ega, ‘Maaha, ndamutuma omuchaama waani akukangatire, naho akuseemerye enjira.’#7:27 Maaha mukitabho kya Maraki 3:1.”
28Yeesu akagamba kweki ega, “Oni ndabhakeerya ega, gati ya abhantu bhonsego, atariho omukuru okukira Yoana. Nawe, omuke okukira bhonsego mubhukama bhwa Waryubha, ngʼo omukuru okumukira Yoana Omubhatiiji.”
29Mbe, abhantu bhayo bhonsego, hamwi na abhatobhya bha erigooti, hanú bheegwa amangʼana gayo, bhakeekirirya ega, ekiina kya Waryubha kubheene kyaringa ekijomu. Abhantu bhayo mbo bhanú Yoana abhatiijiri. 30Nawe, Abhafarisaayo na abheehigirya bha amaragiriryo, bheeki, bhakaanga ganú Waryubha yeendanga, kwa okubha bhaangiri okubhatiijwa na Yoana.
31Yeesu akagamba kweki ega, “Bhoono, abhantu bha orwibhuro runu, mbahunkanʼye naki? M-bantu bha egaki? 32Bharahunkana na abhaana bhanú bhareekara mumudiira, bharabhirikira abharikyabho na okubhakeerya ega, ‘Twabhatemera ekironge, nawe, mutaabhina! Twabheembira ameembo ga okufumba, nawe, mutafumbiri!’
33“Ndagamba ego, kwa okubha, hanú Yoana Omubhatiiji yaaja, ataaringa ararya emikaate, kora okunywa edivai.#7:33 Ataaringa ararya emikaate, kora okunywa edivai. Omukaate na edivai mbyo bhyaringa ebhyakurya bhya kira orusiku. Bheenyu muragamba ega, ‘Unu yaana ekihwi ekibhiibhi!’ 34Na hanú Omwana wa Adamu yaajiri, weeki ararya emikaate na okunywa edivai. Bhoono bheenyu muragamba ega, ‘Mumaahe! M-muhubhaaru, kweki m-mureebhi! Na m-musaani wa abhatobhya bha erigooti na abha obhusarya!’
35“Nawe, egintungwa gya Waryubha giroorokereribhwa ega, n-gya maheene kwa enjira ya amakorwa ga abhantu bhanú bharagigwata.”
Yeesu aramwabhira owa obhusarya
36Yaaringa-ho Omufarisaayo umwi, unú yaabhirikirwanga Simoni. Akaraarika Yeesu yaaje okurya iika owaaye. Nho, Yeesu akasoha munyumba ya omuntu uyo, akeekara okurya ebhyakurya kumeja. 37Mumugi guyo, yaaringa-mo omukari umwi, unú yaaringa amanyikeeni ega, m-muntu omusarya.
Mbe, omukari uyo hanú yeegwa ega, Yeesu ararya owa Omufarisaayo, akasoha muyo na enchupa inú yaaringa na amaguta ga obhurange, aga obhuguri obhunene bhukongʼu. 38Akeemirira haangʼi na amaguru ga Yeesu. Akaamba okukuura, ameesori gaaye gaatoonyanga kumaguru ga Yeesu. Akabha arageehya na egintuukya gyaye, arabhusu amaguru ga Yeesu, na okugahaka obhurange.#7:38 Omukari uyo, kinú yaaringa arakora kiroorokya kya ego yaaringa aramutogoonʼya Yeesu na okumusuuka. Ekimanyiiriryo kiyo, kweki kyaringa kiroorokya obhuhanje bhunú omukari uyo, yaaringa nabho ku Yeesu. Kubhutamaduni bhwa Abhayahudi, eringʼana rinú omukari uyo yaakoranga, ryaringa rya okuruguurya.
39Omufarisaayo uyo, hanú yaarora gayo, akeetegeerera munkoro yaaye ega, “Omuntu unu, akaabheeri omurooti, akaamanyiri ega, omukari unú aramukuunʼya m-muntu wa egaki. Akaamanyiri ega, weeki m-muntu omusarya!”
40Yeesu akamukeerya, “Simoni, niina eringʼana ndeenda okukukeerya.” Wonse akamukyukya ega, “Omwihigirya, nkeerya.” Yeesu akagamba ega, 41“Bhaaringa-ho abhantu abhabhiri, bhonsego bhaaringa bharatongwa egimbirya na unú yaaringa abhaheeri esiiri. Oumwi waabho, yaaringa aheerwe esiiri ya edinari magana gataanu.#7:41 Edinari magana gataanu. Egimbirya giyo gyaringa m-mariho ga omuntu oumwi kwa omwaka omugima na emyeri munaane. Maaha Edinari mu Moonjooro eguru ya Amangʼana Amakongʼu. Omurikyaye wonse, akahaanwa esiiri ya edinari mirongo etaanu. 42Abhabhiri bhayo, hanú bhaabhurwa egimbirya gya okuriha egisiiri gyabho, unú yaabhahaana esiiri akabhaabhira, bhatige okumuriha. Mbe, gati ya abhabhiri bhayo, ngʼ-uuha yaamuhanja bhukongʼu okukira omurikyaye?” 43Simoni akamukyukya ega, “Ndamanya, ngʼo unú yaabhirwa esiiri enene.” Yeesu akagamba ega, “Okyukirye bhwaheene.”
44Yeesu akamwikyukirya omukari uyo, akamukeerya Simoni ega, “Orarora omukari unu? Hanú nsoheri munyumba yaaho, otaangenihirye kwa okungʼaana amanji ga okoogya amaguru gaani.#7:44 Okungʼaana amanji ga okoogya amaguru gaani. Ku Bhayahudi, yaaringa egimiira okumuhaana omugeni amanji, yoogye amaguru gaaye. Nawe weeki, yoogerye amaguru gaani na ameesori gaaye, na okugeehya na egintuukya gyaye. 45Uuwe otankeereenʼye kwa okumbusu,#7:45 Otankeereenʼye kwa okumbusu. Kugimiira gya Ekiyahudi okubhusu yaaringa ekintu kinú bhaaringa bhanariri kubhasaaja hanú bhakeeranʼyanga. nawe okwambira hanú nsoheri munu, weeki akyari okurosa okumbusu amaguru gaani. 46Otansuukiri kwa okuhaka omutwe gwani amaguta. Nawe weeki, ahakiri amaguru gaani amaguta ga obhurange! 47Kwa ego, ndakukeerya ega, obhuhanje bhwa omukari unu m-bwaru, kwa okubha obhusarya bhwaye obhwaru bhwabhiirwe. Nawe, wowonse unú yaabhiirwe obhusarya obhuke, uyo oranyoora yaana obhuhanje obhukego.” 48Yeesu akamukeerya omukari uyo ega, “Obhusarya bhwaho bhwabhiirwe.”
49Abhageni bhanú bhaaringa kumeja hamwi nawe, bhakaamba okwibhuurya ega, “Unu niwi araabhira kora obhusarya?”
50Hayo, Yeesu akamukeerya omukari uyo ega, “Eimani yaaho ekuhwenerye! Genda na omurembe.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.