Ruuka 8
8
Abhakari bhanú bhaagendanʼyanga na Yeesu
1Hanú gayo gaahwa, Yeesu akeemuka, akabha arahita mumigi na mubhijiji. Yaaringa araraarikira abhantu Amangʼana Amajomu eguru ya obhukama bhwa Waryubha mbaara gyonsego. Yaaringa arasoorana na abhatumwa bhaaye ekumi na bhabhiri. 2Kweki, yaagyanga na abhakari abhandi. Gati yaabho, Yeesu yaaringa abharuusirye ebhihwi ebhibhiibhi, abhandi yaaringa abhahwenerye amarweri. Gati ya abhakari bhayo, yaaringa-mo Mariamu Magidarena, unú Yeesu yaaringa aruusirye ebhihwi ebhibhiibhi muhungati. 3Kweki yaaringa-mo Yoana, muka Kuja. Kuja uyo, ngʼo yaaringa omwimiririri omukuru wa emirimu gya omukama Herode Antipa. Kweki, yaaringa-mo Susana, na abhakari abhandi abhaaru, bhanú bhaaringa bharabhabheera Yeesu na abheehigira bhaaye, kwa okuruusya ebhintu bhyabho abheene.
Ekirengyo kya omubhusuri wa egimbusuro
(Mataayo 13:1-9; Mariko 4:1-9)
4Orusiku rumwi, abhantu abhaaru okurwa mumigi emyaru bhakamuujira Yeesu, bhakeekumanʼya omuganda omunene. Kimwi, Yeesu akabhakeerya ekirengyo ega, 5“Yaaringa-ho omubhusuri umwi. Omubhusuri uyo, yaagya okubhusura egimbusuro mumugunda gwaye. Hanú yaabhusuranga, egimbusuro egindi gikagwa kunjira. Abhahiti bhakagitaja, na ebhinyonyi bhikaaja bhikagirya. 6Egindi gikagwa mumagina. Hanú gyamera, gikabhurwa amanji, gikooma. 7Egindi gikagwa gati ya emiti gya amahwa. Hanú amahwa gayo gaakiina, gakagihiga egimbusuro giyo, gikakwa. 8Egindi gikagwa kwirobha erijomu, gikamera na gikaama emisumo egana rimwi.”
Yeesu hanú yaamara okugamba gayo, akagamba kwa eriisi erinene ega, “Unú yaana amatwi, yeegwe!”
Yeesu aroonjoora ekirengyo kya omubhusuri wa egimbusuro
(Mataayo 13:10-23; Mariko 4:10-20)
9Abheehigira bha Yeesu, bhakamubhuurya ega, “Ekirengyo kiyo ensonga yaakyo niki?” 10Wonse akabhakyukya ega, “Waryubha abhatubhuriiri bheenyu okumanya ekinyerera kya obhukama bhwaye. Nawe, abhandi oranyoora ndabhakeerya kwa ebhirengyo, kya ego omurooti Isaaya yaangʼoora ega,
‘Bharaamaahe bhatarora,
na bhareegwe bhatamanya.’#8:10 Maaha mukitabho kya Isaaya 6:9.
11“Mbe, ensonga ya ekirengyo kiyo niiga, egimbusuro ni-ringʼana rya Waryubha. 12Na egimbusuro ginú gyagwira kunjira, girahunkana kya abhantu bhanú bhareegwa eringʼana rya Waryubha. Hayohayo, Erisambwa riraaja rirariruusya mumitima gyabho, bhataaja okuriikirirya, naho bhatuuribhwe.
13“Na egimbusuro ginú gyagwira mumagina, girahunkana kya abhantu bhanú bhareegwa eringʼana rya Waryubha, bharariikirirya kwa obhujomerwa. Nawe, kwa okubha bharahunkana na ekiimerya kinú kitaana emiri, bhareekara na eringʼana riyo, kwa eribhaga ekego. Hanú bharasakibhwa eguru ya eringʼana riyo, rumwigo bhararitiga.
14“Na egimbusuro ginú gyagwira mumahwa, girahunkana kya abhantu bhanú bhareegwa eringʼana rya Waryubha, nawe, bharanyankira obhuhoru bhwabho, na orunamba rwa obhuniibhi, na okwijomya kubhuhoru bhwabho. Gayo ngo garahiga eringʼana rya Waryubha, ryonse ritakwibhura emisumo gyogyonse emijomu.
15“Na egimbusuro ginú gyagwira mwirobha erijomu, girahunkana kya abhantu bhanú bhareegwa eringʼana rya Waryubha, bhararigwata kwa omutima gwa heene, na kwa egintungwa eribhaga ryonsego na bhararuusya emisumo kwa obhwikongʼererya.
Ekirengyo kya ekorobhoi
(Mariko 4:21-25)
16“Atariho omuntu unú aragwatya ekorobhoi, kimwi aikundikirye na eridebhe, kasi aituure mwirungu rya obhuriri. Araituura kukisunga, naho abhantu bhanú bharasoha munyumba, bharore obhurabhu.
17“Egoego, ryoryonse rinú ribhisirwe, ribhisirwe naho ritubhurwe, kweki ryoryonse rinú rikundikiriibhwe, rikundikiriibhwe naho ritubhurwe. 18Ego, ganú mureegwa, mugeetegeerere bhujomu! Omuntu wowonse unú areetegeerera eringʼana rya Waryubha na okurimanya, Waryubha aramubheera na okumoongerya okurimanya bhukongʼu. Nawe, nyoore omuntu atakwitegeerera eringʼana rya Waryubha, kora amake ganú areeganirirya ega, amanyiri, Waryubha arimuruusya.”
Ngʼina waabho na abhaana bhaabho Yeesu
(Mataayo 12:46-50; Mariko 3:31-35)
19Eribhaga erindi, ngʼina waabho Yeesu na abhaana bhaabho, bhakaaja okumurora. Nawe bhataamuhikiira, kwa okubha abhantu abhaaru bhaaringa bhamwihundiriri. 20Abhantu abhandi bhakamukeerya Yeesu ega, “Ngʼina weenyu na abhaana bheenyu, bharingi kibhara, bhareenda okukurora.”
21Yeesu akabhakyukya ega, “Maayi na abhaana bheetu m-bonsego bhanú bhareegwa eringʼana rya Waryubha na okurigwata.”
Yeesu aratendya omuyaga omuhaari munyanja
(Mataayo 8:23-27; Mariko 4:35-41)
22Orusiku rumwi, Yeesu akariina mubhwato, hamwi na abheehigira bhaaye. Akabhakeerya ega, “Twambuke enyanja tugye ngʼambu.” Mbe, bhakeemuka.
23Hanú bhaambukanga, Yeesu akaraara akeehiribhwa. Omuyaga omuhaari gukahuuta kunyanja, obhwato bhwabho bhukaamba okwijura amanji, bhakabha mungʼanga ya okusika.
24Abheehigira bhayo, bhakagya bhwangu okumubhuukya enu bharakora ekituri ega, “Omusuukwa weetu! Omusuukwa weetu! Turasika!” Kimwi, akabhuuka, akagukemera omuyaga na amabhooka, rumwigo, bhikatenda.
25Mbe, akabhabhuurya ega, “Eimani yeenyu eringi-ha?” Bhakaruguura na okoobhoha bhukongʼu. Bhakabhuuranʼya ega, “Omuntu unu ngʼ-wa egaki? Arakemera kora omuyaga omuhaari na amabhooka, bhiramwigwa!”
Yeesu arahwenʼya omuntu owa ebhihwi
(Mataayo 8:28-34; Mariko 5:1-20)
26Yeesu na abheehigira bhaaye, hanú bhaambuka enyanja ya Gariraaya, bhakahikirira mukyaro kya Abhagerasi, ngʼambu ya kabhiri ya ekyaro kya Gariraaya. 27Yeesu hanú yeetuuma okurwa mubhwato, akasikana na omuntu umwi wa mumugi gurya, unú yaaringa na ebhihwi ebhibhiibhi. Kwa eribhaga eritambi, omuntu uyo, ateebhohanga emyenda, kweki ateekaranga iika, nawe yeekaranga mugimbihira.#8:27 Mugimbihira. Yaaringa emiira ya Abhayahudi okubhiika abhantu mumasana ganú gaaringa munkuku, agandi bhaaringa bharabhaaja abheene.
28-29Ebhihwi ebhibhiibhi bhiyo, bhyamusoheereranga kaaru. Abhantu bhaasakyanga okumwangararira, kwa okumubhoha na eminyororo na ebhirangʼani. Nawe, yaaringa arabhutura eminyororo arakenya okugya kukibhara.
Mbe, Yeesu akabhikemera ebhihwi bhiyo ega, “Mumuhaatire omuntu uyo!” Hanú yaatangirirenʼya na Yeesu, akakuura kwa eriisi. Akeeyesa bhwibhumbike embere ya Yeesu, akamukeerya kwa eriisi ega, “Uuwe Yeesu, Omwana wa Waryubha wa eguru ya bhyonsego, uuna enyanko-ki na oni? Ndakusabha ega, otannyankya!” 30Yeesu akamubhuurya ega, “Eriina ryaho nuuwe-wi?” Akagamba ega, “Eriina ryani, nooni Jeshi.” Yaagamba ego, kwa okubha yaaringa asoheererwe na ebhihwi ebhyaru bhukongʼu. 31Ebhihwi bhiyo, bhikaamba okumwisasaama Yeesu ega, atabhikenyia bhigye okusoha mukibhohe kya amasambwa.
32Haangʼi na embarika ya enkuku hayo, ryaringa-ho erihijo rya egimbiiji girariisya. Mbe, ebhihwi bhiyo bhikamwisasaama Yeesu ega, “Twikiririrye tugende okusoheerera egimbiiji giyo.” Yeesu akeekirirya. 33Mbe, ebhihwi ebhibhiibhi bhiyo bhikamurwa-ko omuntu urya, bhikasoha mugimbiiji. Kimwi erihijo ryonsego rikaharamuka kumuhiringito omuhaari okurwa kunkuku, rikasoha munyanja, rikakwa chwe.
34Mbe, abhariisya bha egimbiiji giyo, hanú bhaarora ganú gatuukiri, bhakakenya, bhakagya mumugi na mubhijiji, okuraarika ganú bharuuji. 35Abhantu bhakagya okwimaahira abheene, amangʼana ganú gatuukiri, bhakamuhikiira Yeesu.
Hanú bhaamuhikiira, bhakarora omuntu unú ebhihwi ebhibhiibhi bhyaringa bhimurwiri-ko, yeekeeri haangʼi na Yeesu, yeebhoheri emyenda, yaana obhungʼeeni bhonsego. Kimwi abhantu bhayo, bhakoobhoha. 36Abhantu bhanú bhaarora amangʼana ganú geebhuka, bhakatondera abhandi kya ego omuntu owa ebhihwi ebhibhiibhi uyo ahweniibhwe.
37Abhantu bhonsego mukyaro kya Abhagerasi bhanú bhaaringa bheekumeenʼye hayo, bhakamusabha Yeesu arwe mukyaro kyabho, kwa okubha bhaaringa bhoobhoheri bhukongʼu. Kwa ego, akariina mubhwato, naho yeemuke okurwa hayo.
38Omuntu unú yaaringa aruusiibhwe ebhihwi, akakomererya Yeesu ega, agye hamwi nawe. Nawe, Yeesu akaanga, akamukeerya ega, 39“Genda iika owaaho, obhakeerye abhantu amangʼana amarito ganú Waryubha akukoreeri.” Nho, omuntu uyo akarwa hayo, akagenda araraarika mbaara gyonsego gya mumugi, ganú Yeesu amukoreeri.
Yeesu arahwenʼya omukari na okuhyukya omuhara
(Mataayo 9:18-26; Mariko 5:21-43)
40Yeesu hanú yaahinda, akagenihibhwa na omuganda gwa abhantu bhanú bhaaringa bharamuganyirira.
41Hayo, akaaja-ho omuntu umwi, yaabhirikirwanga Yairo. Yairo uyo, ngʼo yaaringa omukuru wa erisinagogi. Akatema ebhiru embere ya Yeesu, akamwisasaama ega, yaaje iika owaaye, 42kwa okubha omuhara waaye omumwemwe wa emyaka ekumi na ebhiri, yaaringa asingiri.
Yeesu hanú yaaringa aragya iika owaaye, omuganda gwa abhantu gukagya hamwi nawe, bhakabha bharamwihundirira bhukongʼu. 43Mumuganda guyo, yaaringa-mo omukari unú yaaringa na obhurweri bhwa obhureegu, kwa eribhaga rya emyaka ekumi na ebhiri. [Yaaringa amariri ebhintu bhyaye bhyonsego kubhakumu,]#8:43 Amangʼana mumabhano ganu […] gataringi mumangʼoore agandi ga akare aga Ekiyunani. nawe ataaringa-ho kora oumwi unú yaatura okumuhwenʼya.
44Mbe, omukari uyo, akaaja enyuma ya Yeesu, akakuunʼya eripindo rya omwenda gwaye. Rumwigo, akahwena.
45Yeesu akabhuurya omuganda guyo ega, “Niwi yankuunirye?” Abhantu bhonsego hanú bhaahakaana, Petero akamukeerya ega, “Omusuukwa weetu, m-bantu abhaaru bhanú bhakwisinguuriri na okukwihundirira.” 46Nawe, Yeesu akagamba ega, “Mmanyiri ariho omuntu unú yankuunirye, kwa okubha ndeeyigwa nhwenerye omuntu kwa eginguru gyani.”
47Omukari uyo, hanú yaarora ega, atakutura okwibhisa akamuujira Yeesu, ararigita.#8:47 Omukari uyo, hanú yaarora ega, atakutura okwibhisa akamuujira Yeesu, ararigita. Abhayahudi bhaahura omukari unú yaarwanga amanyinga ega, m-mukonu. Ateekiriribhwa na amaragiriryo okusanga hamwi na abhandi. Omuntu akaamukuunirye, wonse akaabheeri m-mukonu. Maaha mukitabho kya Abharaawi 15:25-33. Akatema ebhiru, akamukeerya embere ya abhantu bhayo bhonsego, ekisigo kya okumukuunʼya na kya ego yaahwenibhwa. 48Yeesu akamukeerya ega, “Omuhara, eimani yaaho ekuhwenerye. Genda na omurembe!”
49Hanú Yeesu yaaringa akyahaira, akaaja omuntu umwi okurwa iika owa Yairo omukuru uyo wa erisinagogi. Akamukeerya ega, “Omuhara waaho, guhweri-mo. Otamunyankya kweki omwihigirya.” 50Yeesu hanú yeegwa amangʼana gayo, akakeerya Yairo ega, “Otoobhoha! Obhe na eimani, na omuhara waaho arahwena.”
51Yeesu hanú yaahika iika owa Yairo, akakaanʼya abhantu abhandi okusoha hamwi nawe munyumba, akabheekiririrya Petero, Yoana, Yakobho, esewaabho na ngʼina waabho omuhara uyo.
52Abhantu bhonsego iika hayo, bhaaringa bharakuura na okufumba oruku rwa omuhara uyo. Nawe, Yeesu akabhakeerya ega, “Mutige okukuura! Unu atakwiri, yeehiriibhwe!” 53Nawe abhantu bhayo, bhakaamba okumuseka, kwa okubha bhaaringa bhamanyiri ega, yaaringa amariri okukwa.
54Yeesu akamugwata okubhoko, akamubhirikira, “Muhara, hyuka!” 55Rumwigo, omooyo gukaaja-mo, akeemirira. Yeesu akabhakeerya ega, “Mumuhaane ebhyakurya!”
56Abheebhuri bhaaye hanú bhaarora gayo, bhakaruguura bhukongʼu. Yeesu akabhakaanʼya ega, bhatakaakeerya omuntu wowonse ganú gatuukiri.
Currently Selected:
Ruuka 8: Kabwa
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
Ruuka 8
8
Abhakari bhanú bhaagendanʼyanga na Yeesu
1Hanú gayo gaahwa, Yeesu akeemuka, akabha arahita mumigi na mubhijiji. Yaaringa araraarikira abhantu Amangʼana Amajomu eguru ya obhukama bhwa Waryubha mbaara gyonsego. Yaaringa arasoorana na abhatumwa bhaaye ekumi na bhabhiri. 2Kweki, yaagyanga na abhakari abhandi. Gati yaabho, Yeesu yaaringa abharuusirye ebhihwi ebhibhiibhi, abhandi yaaringa abhahwenerye amarweri. Gati ya abhakari bhayo, yaaringa-mo Mariamu Magidarena, unú Yeesu yaaringa aruusirye ebhihwi ebhibhiibhi muhungati. 3Kweki yaaringa-mo Yoana, muka Kuja. Kuja uyo, ngʼo yaaringa omwimiririri omukuru wa emirimu gya omukama Herode Antipa. Kweki, yaaringa-mo Susana, na abhakari abhandi abhaaru, bhanú bhaaringa bharabhabheera Yeesu na abheehigira bhaaye, kwa okuruusya ebhintu bhyabho abheene.
Ekirengyo kya omubhusuri wa egimbusuro
(Mataayo 13:1-9; Mariko 4:1-9)
4Orusiku rumwi, abhantu abhaaru okurwa mumigi emyaru bhakamuujira Yeesu, bhakeekumanʼya omuganda omunene. Kimwi, Yeesu akabhakeerya ekirengyo ega, 5“Yaaringa-ho omubhusuri umwi. Omubhusuri uyo, yaagya okubhusura egimbusuro mumugunda gwaye. Hanú yaabhusuranga, egimbusuro egindi gikagwa kunjira. Abhahiti bhakagitaja, na ebhinyonyi bhikaaja bhikagirya. 6Egindi gikagwa mumagina. Hanú gyamera, gikabhurwa amanji, gikooma. 7Egindi gikagwa gati ya emiti gya amahwa. Hanú amahwa gayo gaakiina, gakagihiga egimbusuro giyo, gikakwa. 8Egindi gikagwa kwirobha erijomu, gikamera na gikaama emisumo egana rimwi.”
Yeesu hanú yaamara okugamba gayo, akagamba kwa eriisi erinene ega, “Unú yaana amatwi, yeegwe!”
Yeesu aroonjoora ekirengyo kya omubhusuri wa egimbusuro
(Mataayo 13:10-23; Mariko 4:10-20)
9Abheehigira bha Yeesu, bhakamubhuurya ega, “Ekirengyo kiyo ensonga yaakyo niki?” 10Wonse akabhakyukya ega, “Waryubha abhatubhuriiri bheenyu okumanya ekinyerera kya obhukama bhwaye. Nawe, abhandi oranyoora ndabhakeerya kwa ebhirengyo, kya ego omurooti Isaaya yaangʼoora ega,
‘Bharaamaahe bhatarora,
na bhareegwe bhatamanya.’#8:10 Maaha mukitabho kya Isaaya 6:9.
11“Mbe, ensonga ya ekirengyo kiyo niiga, egimbusuro ni-ringʼana rya Waryubha. 12Na egimbusuro ginú gyagwira kunjira, girahunkana kya abhantu bhanú bhareegwa eringʼana rya Waryubha. Hayohayo, Erisambwa riraaja rirariruusya mumitima gyabho, bhataaja okuriikirirya, naho bhatuuribhwe.
13“Na egimbusuro ginú gyagwira mumagina, girahunkana kya abhantu bhanú bhareegwa eringʼana rya Waryubha, bharariikirirya kwa obhujomerwa. Nawe, kwa okubha bharahunkana na ekiimerya kinú kitaana emiri, bhareekara na eringʼana riyo, kwa eribhaga ekego. Hanú bharasakibhwa eguru ya eringʼana riyo, rumwigo bhararitiga.
14“Na egimbusuro ginú gyagwira mumahwa, girahunkana kya abhantu bhanú bhareegwa eringʼana rya Waryubha, nawe, bharanyankira obhuhoru bhwabho, na orunamba rwa obhuniibhi, na okwijomya kubhuhoru bhwabho. Gayo ngo garahiga eringʼana rya Waryubha, ryonse ritakwibhura emisumo gyogyonse emijomu.
15“Na egimbusuro ginú gyagwira mwirobha erijomu, girahunkana kya abhantu bhanú bhareegwa eringʼana rya Waryubha, bhararigwata kwa omutima gwa heene, na kwa egintungwa eribhaga ryonsego na bhararuusya emisumo kwa obhwikongʼererya.
Ekirengyo kya ekorobhoi
(Mariko 4:21-25)
16“Atariho omuntu unú aragwatya ekorobhoi, kimwi aikundikirye na eridebhe, kasi aituure mwirungu rya obhuriri. Araituura kukisunga, naho abhantu bhanú bharasoha munyumba, bharore obhurabhu.
17“Egoego, ryoryonse rinú ribhisirwe, ribhisirwe naho ritubhurwe, kweki ryoryonse rinú rikundikiriibhwe, rikundikiriibhwe naho ritubhurwe. 18Ego, ganú mureegwa, mugeetegeerere bhujomu! Omuntu wowonse unú areetegeerera eringʼana rya Waryubha na okurimanya, Waryubha aramubheera na okumoongerya okurimanya bhukongʼu. Nawe, nyoore omuntu atakwitegeerera eringʼana rya Waryubha, kora amake ganú areeganirirya ega, amanyiri, Waryubha arimuruusya.”
Ngʼina waabho na abhaana bhaabho Yeesu
(Mataayo 12:46-50; Mariko 3:31-35)
19Eribhaga erindi, ngʼina waabho Yeesu na abhaana bhaabho, bhakaaja okumurora. Nawe bhataamuhikiira, kwa okubha abhantu abhaaru bhaaringa bhamwihundiriri. 20Abhantu abhandi bhakamukeerya Yeesu ega, “Ngʼina weenyu na abhaana bheenyu, bharingi kibhara, bhareenda okukurora.”
21Yeesu akabhakyukya ega, “Maayi na abhaana bheetu m-bonsego bhanú bhareegwa eringʼana rya Waryubha na okurigwata.”
Yeesu aratendya omuyaga omuhaari munyanja
(Mataayo 8:23-27; Mariko 4:35-41)
22Orusiku rumwi, Yeesu akariina mubhwato, hamwi na abheehigira bhaaye. Akabhakeerya ega, “Twambuke enyanja tugye ngʼambu.” Mbe, bhakeemuka.
23Hanú bhaambukanga, Yeesu akaraara akeehiribhwa. Omuyaga omuhaari gukahuuta kunyanja, obhwato bhwabho bhukaamba okwijura amanji, bhakabha mungʼanga ya okusika.
24Abheehigira bhayo, bhakagya bhwangu okumubhuukya enu bharakora ekituri ega, “Omusuukwa weetu! Omusuukwa weetu! Turasika!” Kimwi, akabhuuka, akagukemera omuyaga na amabhooka, rumwigo, bhikatenda.
25Mbe, akabhabhuurya ega, “Eimani yeenyu eringi-ha?” Bhakaruguura na okoobhoha bhukongʼu. Bhakabhuuranʼya ega, “Omuntu unu ngʼ-wa egaki? Arakemera kora omuyaga omuhaari na amabhooka, bhiramwigwa!”
Yeesu arahwenʼya omuntu owa ebhihwi
(Mataayo 8:28-34; Mariko 5:1-20)
26Yeesu na abheehigira bhaaye, hanú bhaambuka enyanja ya Gariraaya, bhakahikirira mukyaro kya Abhagerasi, ngʼambu ya kabhiri ya ekyaro kya Gariraaya. 27Yeesu hanú yeetuuma okurwa mubhwato, akasikana na omuntu umwi wa mumugi gurya, unú yaaringa na ebhihwi ebhibhiibhi. Kwa eribhaga eritambi, omuntu uyo, ateebhohanga emyenda, kweki ateekaranga iika, nawe yeekaranga mugimbihira.#8:27 Mugimbihira. Yaaringa emiira ya Abhayahudi okubhiika abhantu mumasana ganú gaaringa munkuku, agandi bhaaringa bharabhaaja abheene.
28-29Ebhihwi ebhibhiibhi bhiyo, bhyamusoheereranga kaaru. Abhantu bhaasakyanga okumwangararira, kwa okumubhoha na eminyororo na ebhirangʼani. Nawe, yaaringa arabhutura eminyororo arakenya okugya kukibhara.
Mbe, Yeesu akabhikemera ebhihwi bhiyo ega, “Mumuhaatire omuntu uyo!” Hanú yaatangirirenʼya na Yeesu, akakuura kwa eriisi. Akeeyesa bhwibhumbike embere ya Yeesu, akamukeerya kwa eriisi ega, “Uuwe Yeesu, Omwana wa Waryubha wa eguru ya bhyonsego, uuna enyanko-ki na oni? Ndakusabha ega, otannyankya!” 30Yeesu akamubhuurya ega, “Eriina ryaho nuuwe-wi?” Akagamba ega, “Eriina ryani, nooni Jeshi.” Yaagamba ego, kwa okubha yaaringa asoheererwe na ebhihwi ebhyaru bhukongʼu. 31Ebhihwi bhiyo, bhikaamba okumwisasaama Yeesu ega, atabhikenyia bhigye okusoha mukibhohe kya amasambwa.
32Haangʼi na embarika ya enkuku hayo, ryaringa-ho erihijo rya egimbiiji girariisya. Mbe, ebhihwi bhiyo bhikamwisasaama Yeesu ega, “Twikiririrye tugende okusoheerera egimbiiji giyo.” Yeesu akeekirirya. 33Mbe, ebhihwi ebhibhiibhi bhiyo bhikamurwa-ko omuntu urya, bhikasoha mugimbiiji. Kimwi erihijo ryonsego rikaharamuka kumuhiringito omuhaari okurwa kunkuku, rikasoha munyanja, rikakwa chwe.
34Mbe, abhariisya bha egimbiiji giyo, hanú bhaarora ganú gatuukiri, bhakakenya, bhakagya mumugi na mubhijiji, okuraarika ganú bharuuji. 35Abhantu bhakagya okwimaahira abheene, amangʼana ganú gatuukiri, bhakamuhikiira Yeesu.
Hanú bhaamuhikiira, bhakarora omuntu unú ebhihwi ebhibhiibhi bhyaringa bhimurwiri-ko, yeekeeri haangʼi na Yeesu, yeebhoheri emyenda, yaana obhungʼeeni bhonsego. Kimwi abhantu bhayo, bhakoobhoha. 36Abhantu bhanú bhaarora amangʼana ganú geebhuka, bhakatondera abhandi kya ego omuntu owa ebhihwi ebhibhiibhi uyo ahweniibhwe.
37Abhantu bhonsego mukyaro kya Abhagerasi bhanú bhaaringa bheekumeenʼye hayo, bhakamusabha Yeesu arwe mukyaro kyabho, kwa okubha bhaaringa bhoobhoheri bhukongʼu. Kwa ego, akariina mubhwato, naho yeemuke okurwa hayo.
38Omuntu unú yaaringa aruusiibhwe ebhihwi, akakomererya Yeesu ega, agye hamwi nawe. Nawe, Yeesu akaanga, akamukeerya ega, 39“Genda iika owaaho, obhakeerye abhantu amangʼana amarito ganú Waryubha akukoreeri.” Nho, omuntu uyo akarwa hayo, akagenda araraarika mbaara gyonsego gya mumugi, ganú Yeesu amukoreeri.
Yeesu arahwenʼya omukari na okuhyukya omuhara
(Mataayo 9:18-26; Mariko 5:21-43)
40Yeesu hanú yaahinda, akagenihibhwa na omuganda gwa abhantu bhanú bhaaringa bharamuganyirira.
41Hayo, akaaja-ho omuntu umwi, yaabhirikirwanga Yairo. Yairo uyo, ngʼo yaaringa omukuru wa erisinagogi. Akatema ebhiru embere ya Yeesu, akamwisasaama ega, yaaje iika owaaye, 42kwa okubha omuhara waaye omumwemwe wa emyaka ekumi na ebhiri, yaaringa asingiri.
Yeesu hanú yaaringa aragya iika owaaye, omuganda gwa abhantu gukagya hamwi nawe, bhakabha bharamwihundirira bhukongʼu. 43Mumuganda guyo, yaaringa-mo omukari unú yaaringa na obhurweri bhwa obhureegu, kwa eribhaga rya emyaka ekumi na ebhiri. [Yaaringa amariri ebhintu bhyaye bhyonsego kubhakumu,]#8:43 Amangʼana mumabhano ganu […] gataringi mumangʼoore agandi ga akare aga Ekiyunani. nawe ataaringa-ho kora oumwi unú yaatura okumuhwenʼya.
44Mbe, omukari uyo, akaaja enyuma ya Yeesu, akakuunʼya eripindo rya omwenda gwaye. Rumwigo, akahwena.
45Yeesu akabhuurya omuganda guyo ega, “Niwi yankuunirye?” Abhantu bhonsego hanú bhaahakaana, Petero akamukeerya ega, “Omusuukwa weetu, m-bantu abhaaru bhanú bhakwisinguuriri na okukwihundirira.” 46Nawe, Yeesu akagamba ega, “Mmanyiri ariho omuntu unú yankuunirye, kwa okubha ndeeyigwa nhwenerye omuntu kwa eginguru gyani.”
47Omukari uyo, hanú yaarora ega, atakutura okwibhisa akamuujira Yeesu, ararigita.#8:47 Omukari uyo, hanú yaarora ega, atakutura okwibhisa akamuujira Yeesu, ararigita. Abhayahudi bhaahura omukari unú yaarwanga amanyinga ega, m-mukonu. Ateekiriribhwa na amaragiriryo okusanga hamwi na abhandi. Omuntu akaamukuunirye, wonse akaabheeri m-mukonu. Maaha mukitabho kya Abharaawi 15:25-33. Akatema ebhiru, akamukeerya embere ya abhantu bhayo bhonsego, ekisigo kya okumukuunʼya na kya ego yaahwenibhwa. 48Yeesu akamukeerya ega, “Omuhara, eimani yaaho ekuhwenerye. Genda na omurembe!”
49Hanú Yeesu yaaringa akyahaira, akaaja omuntu umwi okurwa iika owa Yairo omukuru uyo wa erisinagogi. Akamukeerya ega, “Omuhara waaho, guhweri-mo. Otamunyankya kweki omwihigirya.” 50Yeesu hanú yeegwa amangʼana gayo, akakeerya Yairo ega, “Otoobhoha! Obhe na eimani, na omuhara waaho arahwena.”
51Yeesu hanú yaahika iika owa Yairo, akakaanʼya abhantu abhandi okusoha hamwi nawe munyumba, akabheekiririrya Petero, Yoana, Yakobho, esewaabho na ngʼina waabho omuhara uyo.
52Abhantu bhonsego iika hayo, bhaaringa bharakuura na okufumba oruku rwa omuhara uyo. Nawe, Yeesu akabhakeerya ega, “Mutige okukuura! Unu atakwiri, yeehiriibhwe!” 53Nawe abhantu bhayo, bhakaamba okumuseka, kwa okubha bhaaringa bhamanyiri ega, yaaringa amariri okukwa.
54Yeesu akamugwata okubhoko, akamubhirikira, “Muhara, hyuka!” 55Rumwigo, omooyo gukaaja-mo, akeemirira. Yeesu akabhakeerya ega, “Mumuhaane ebhyakurya!”
56Abheebhuri bhaaye hanú bhaarora gayo, bhakaruguura bhukongʼu. Yeesu akabhakaanʼya ega, bhatakaakeerya omuntu wowonse ganú gatuukiri.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.