Pianciilna 25
25
Abraham ii Suan le Paal Dangte
(1 Khangtaanghthu 1:32-33)
1Abraham in zi dang khat nei a, a min Keturah ahi hi. 2Ama taw ta Zimran, Jokshan, Medan, Midian, Ishbak le Shuah nei hi. 3Jokshan sia Sheba le Dedan ii pa hi a, Dedan ii suan le paalte sia Asshurim, Letushim le Leummim te ahi hi. 4Midian tapate sia Ephah, Epher, Hanoch, Abida le Eldaah ahi uh hi. Hite theampo sia Keturah ii suan le paalte ahi hi.
5Abraham in a neisa theampo Isaac nusiat hi. 6Ahizong ama nuntak sungin zi dangte taw a nei a tapate tungah letsongte pia hi. Tua zawkciang hi a tapate sia a tapa Isaac kung panin a khuala nisuana ngam ah paisak hi.
Abraham Thina le Kivuina
7-8Abraham sia kum 175 a phak ciang thi hi. 9A ta Isaac le Ishmael te in Mamre nisuana sangah a om, Hit mi Zohar ii tapa Ephron ii lo sung, Machpelah Suanghawng sungah ama phum uh hi. 10Tua lo sia Hit te tung pan Abraham ii a lei hi a; Abraham le a zi Sarah tua munah kiphum khawm hi. #Pian 23:3-16 11Abraham thi zawkciang, “A Nungta Hong Mu Pa ii Tuikhuk” nai ah a teang a tapa Isaac sia Pathian in thupha pia hi.
Ishmael ii Suan le Paalte
(1 Khangtaanghthu 1:28-31)
12Abraham ii zi Sarah ii sila nu ahi, Egypt mi Hagar ii Abraham taw a nei Ishmael in 13amate ii suana taw kizui in a nuai a bang tapate nei hi: Nebaioth, Kedar, Adbeel, Mibsam, 14Mishma, Dumah, Massa, 15Hadad, Tema, Jetur, Naphish le Kedemah ahi hi. 16Amate sia minam sawm le nii te ii taanghpupite hi a, amate minte la in khuanote le ngiaphual munte ii min in a kipia ahi hi. 17Ishmael sia kum 137 a phak ciang thi hi. 18Ishmael ii suan le paalte sia Egypt nisuana sang Assyria paina lampi, Havilah le Shur kilaklaw ah teang uh hi. Abraham suan le paal dangte taw kikhenin a tuamin teang uh hi.
Esau le Jacob Suana
19Hi teng sia Abraham ii tapa Isaac ii taanghthu ahi hi. 20Isaac sia, Laban suapuinu, (Mesopotamia ngam Arameante) Bethuel tanu Rebecca taw a kiteen in kum sawmli pha hi. 21Rebecca in ta nei ngawl ahikom Isaac in Topa tungah thungetsak hi. Topa in ama thungetna zo a, Rebecca naupaai hi. 22Ama in naupeang nei tu a, a sua ma in a naubu sungah amate khat le khat kihau hi. Ama in, “Banghangin kei tungah hi bang thu hong piang thong ziam?” ci hi. Tua ahiciang ama in Topa kungah pai in, ahang dongh hi.
23 Topa in ama ii tungah
“Minam nii na sungah om a;
A kidem minam niite
nang sung pan piang tu hi.
Khat sia a dang khat sangin hat zaw tu a;
A u zaw in a nau zaw sia ii na
sepsak tu hi,” ci hi. #Rom 9:12
24A nau sua hun hong cing a, ama in tapa peang nei hi. 25A suak masa sia a ci san a, a vun sia mul nei puantual taw kibang hi, tua ahikom a min Esau kiphuak hi. 26A niina pa in Esau khuatul len cinten sa in hong suak ahikom ama min Jacob kiphuak hi. Amate a sua lai in Isaac kum sawmluk pha hi.
Tapaciil Esau in A Innluaza Zuak
27Tua patangte hong khang a, Esau sia ngamsung vak a uuk sakap thiam khat suak hi. Ahizong Jacob sia mihing cinghkamh khat hi a, inn ah om hi. 28Isaac in Esau ii a samatte ii sa nene ahikom Esau diksa zaw a, ahizong Rebecca in Jacob diksa zaw hi.
29Ni khat Jacob in be mee huanin a om laitak Esau a savaina pan hong theng hi. Ama a ngilkial a, 30Jacob tungah, “Ngilkial in pukhong khi hi; na meetui san tawm hong pia ta'n,” ci hi. (Tua ahikom ama Edom kici hi.)
31Jacob in, “Tapaciil hina taw na nga na innluaza hong pia lete kong pia tu hi,” ci in zo hi.
32Esau in, “Hi hen! A thi tu ka hi hi; tua ahiciang ka innluaza bang a mang tu khi ziam?” ci hi.
33Jacob in, “Ka innluaza hong pia tu khi hi ci in kiciam masa in,” ci in zo hi.
Esau kiciam in a taciil innluaza Jacob tungah pia hi. #Heb 12:16 34Tuaciang Jacob in anluum pawlkhat le antui pawlkhat Esau pia hi. Esau in a an le antuite ne in, dawnin, tua zawkciang dingto in paisan hi. Esau in taciil a hina innluaza a awlmawk ngawlna sia tu a bang ahi hi.
Currently Selected:
Pianciilna 25: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
