Luke 10
10
Jesus in Sawmsali le Niite Kuansak
1Hisia zawkciang Topa in, a dang sawmsali le nii teal a, nii veu kop in, ama mama ii pai natu khua le munte ah paikholsak hi. 2Jesus in amate tungah, “Anlaak tu tam hi, ahihang an kaikhawm tu naseam tawm hi. A anla tu naseamte hong puak natu in, anneipa tungah thungen vun” ci hi.#Mt 9:37-38 3“Pai tavun! Ngia hon sungah tuunote tha bangin kong tha hi.#Mt 10:16 4Sumbawm ahizong, thung ahizong, peangdap ahizong keng heak vun; Lampi ah ngual paupui tu in tawlnga heak vun.#Mt 10:7-14; Mk 6:8-11; Lk 9:3-5 5Inn khat pawpo sungah, na tum uh ciang, a masa phit in, “Hi inn ah thupha hong tung tahen!” na ci vun. 6Thupha a saang nuam mihing khat po a om le na thupha piak uh kip tahen a, tuabang ahibuale, na thupha piak uh dok kik tavun. 7Tua inn ah taam tavun a, hong piak pawpo ne in, dawn vun, banghang ziam cile naseam khat sia thaman a saan tu kilawm hi. Inn khat pan inn khat ah kikhiin kawkoai heak vun.#1 Cor 9:14; 1 Tim 5:18 8Khuapi khat sungah na tum uh ciang, no hong kisaang le, na mai ah hong kilui pawpo ne vun, 9tua khua ah ciinate damsak vun a, ‘Pathian ngam, no taw hong kinai zo hi!’ ci in mite tungah son vun. 10Ahihang khuapi khat sungah, na tum uh ciangin, no hong kisaang buale, lampi ah pusuak tavun a, #Sawl 13:51 11‘Na khua leivui ka peang tungah hong baangte kong thin kik uh hi, ahizong Pathian Ngam, no taw kinai zo hi, ci phawk vun!’ ci tavun. 12A tatak ka ci ciang, Thukhenna Ni ciangin, Pathian in, tua khua sangin, Sodom khua hesuak zaw tu hi.#Pian 19:24-28; Mt 11:24; 10:15
Thu Um ngawl Khuapite
(Matthew 11:20-24)
13“Nang atu in bangza in lauhuai ziam, Chorazin awng! nang atu in bangza lauhuai ziam, Bethsaida awng! no sungah hong kivawt nalamdangte Tyre le Sidon ah kivawt thong le tua khua mite in, a mawnate pan kisiik kikna uh, a kilangh natu in, khuangeipi pek lai panin, khau-ip puan silhin to in amate le amate vut kithe tu uh hi!#Is 23:1-18; Eze 26:1—28:26; 26; Jol 3:4-8; Amo 1:9-10; Zec 9:2-4 14Pathian in Thukhenna Ni ciangin, note sangin Tyre le Sidon khuate hesuak zaw tu hi. 15Capernaum awng! Nang na hile nangma le nangma vantung ah kilaamto nuam ni ziam? Hell sungah hong kisepsuk tu hi!” ci hi.#Is 14:13-15
16Jesus in a nungzuite munah, “No thuson hong ngaite in, kei thu hong ngai ahi hi. No hong nial peuma in, kei hong nial ahi hi,” ci hi.#Mt 10:40; Lk 9:37; Lk 9:48; Jn 13:20
Sawm sali le Niite Cia kikna
17Sawmsali le niite in, lungdamna lianpi taw cia kik uh a, “Topa awng, na min taw thu ka piak uh ciangin doaite ngawngawn in ka thu uh hong ni hi!” ci hi.
18Jesus in zo kik a, “Vantung panin Satan sia khualeng bangin a taaksuk ka mu hi. 19Ngai vun! Ngulte le aikamte na totcip natu le na Ngalpa ii thahatna na zaw zawk natu in, no tungah thuneina hong pia zo khi hi, bangma in no hong susia zo ngawl tu hi.#Ps 91:13 20Ahizong thaa ngilote ii na thu uh hong nit sia, lungdam heak vun, vantung a, na min uh a kiteptee hu in, lungdam zaw tavun,” ci hi.
Jesus Lungdam
(Matthew 11:25-27; 13:16-17)
21Tua hun laitakin Jesus Thaa Thiangtho in lungdamna taw kidimsak a, hi bangin ci hi. “Van le lei ii Topa ahi Pa awng! Na tungah ka lungdam hi, banghang ziam cile mihing pilte le mihing ciimte mun panin na seal thute pilna a nei ngawlte tungah na lak hi. Hi hi, Pa awng, hi bang tu ma na deina ahi hi,” ci hi.
22“Ka pa in na theampo kei hong pia zo hi. Tapa akua ziam ci sia Pa simngawl kuama in a he bua hi, tuaciang Pa akua ziam ci sia Tapa le Tapa ii heaksak tu in a tealte ngawl po in a he bua hi,” ci hi. #Jn 3:35; 10:15
23Tuaciang Jesus in, a nungzuite sang nga in, hi bangin ci tuam hi, “Na mu uh nate hu in, bangza in hampha nu ziam! 24Kei kong cina pan, kamsaang tam mamate le kumpite in, no ii mute mu nuam ahihang mu ngawl uh hi, za nuam ahihang za ngawl uh hi,” ci hi.
Samaria Miphapa taw Thusonteena
25Thukham hil sya khat hong pai in Jesus aitaa nuam a, “Sya awng, tawntung nuntakna ka nga natu in bang ka vawt tu ziam?” ci in dongh hi.#Mt 22:35-40; Mk 12:28-34
26Jesus in zo kik a, “Laithiangtho in bang ci ziam, nang tua thu bangbangin na tel ziam” ci hi.
27Tua pa in zo kik a, “Na Topa Pathian sia na thin theampo, na thaa theampo, na thahatna theampo le na ngaisutna theampo taw na it in. Tuaciangin nangma le nangma na ki it bangma in, na innpaamte na it in,” ci hi.#Thkna 6:5; Thiam 19:18
28Jesus in, “Na ci teng maan hi, tuabangin ngamta lete na nungta tu hi,” ci in zo kik hi.#Thiam 18:5
29Ahihang Thukham hil syapa in, ama le ama kitangsak nuam ahikom, hi bangin Jesus dongh thua hi, “Ka innpaam pa sia akua ziam?” ci hi.
30Jesus in zo kik a, “Khatvei lai in pasal khat, Jerusalem panin Jericho khua ah a paisuk laitakin, ngual suam phalakte in suam a, a pum tung a om teng sutin, saat zazaan a, a thi dektakin nusia uh hi. 31Thiampi khat tua lampi tawnsuk luilam ahihang, tua a liampa a mu ciangin, lampi langkhat ah pial in, paisan hi. 32Tuabang ma in, Levi mi khat hong pai a, mihing liampa a mu ciangin, lam langkhat tawnin paisan hi. 33Ahihang khualhaw Samaria pa khat hong pai a, mihing liampa a mu ciangin, a thinsung ah hesuakhuai sakna taw kidim hi.#2 Khang 28:15 34Ama kungah zuan a, a liammate sathau le sapittui noisak in, tuamsak hi. Tua zawkciangin, a liampa sia a laa tungah suanhto a, zintun inn khat ah paipui in ou hi. 35A zing ciangin, ama in ngun dangka pheak nii la in, zin innneipa pia hi. ‘Ama na ousak in. Kong pai kik ciangin, ama tungah na bona dang theampo zongh kong pia tu hi,’ ” ci hi.
36Tuaciang Jesus in thukhupna in, “Nang ii ngaisutna ah, tua mihing thumte sung pan akuabel in, mihing suamte ii sukcippa tungah innpaamte ngamtat tu bangin, ngamta na sa ziam?” ci hi.
37Thukham hil syapa in, “Ama tungah a thuthiam sia hi,” ci in zo kik hi.
Jesus in, “Tua ahile va pai ta'n a, tuabangin seam ta'n,” ci in zo kik hi.
Jesus in Martha le Mary te Inn ah Haw
38Jesus le a nungzuite a papai uh ciang, khuano khat theng a, Martha a kici numei khat in a inn ah zin do hi.#Jn 11:1 39Ama in Mary a kici suapuinumei khat nei a, tua nu in Topa peang kungah to in, ama hilnate ngai hi. 40Martha sia nasep theampo ama ki awn ahikom diksa ngawlin hong pai a, “Topa awng, ka suapuinu in na theampo kei sep tu in, hong nusiat sia samh sa ngawl ni ziam?” Kei hong hu natu in hong sawlsak ta'n!” ci hi.
41Topa in zo kik a, “Martha, Martha awng, Na tam mama tungah thinngim in buai ni hi. 42Ahihang a kisamh khat bek om hi. Mary in vawt tu a kilawm sia teal zo hi. Ama tung pan tuasia kilaaksak ngawl tu hi,” ci hi.
Currently Selected:
Luke 10: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
