Luke 7
7
Jesus in Rome Ngalkap hon ukpa ii Naseampa Damsak
(Matthew 8:5-13)
1Jesus in mihingte tungah hi teng a ci zawkciang, Capernaum khua ah pai hi. 2Tua munah Rome ngalkap hon ukpa ii a it mama a naseampa khat om a; ama thi dektakin a cina hi. 3Ngalkap hon ukpa in Jesus thu a zaak ciang, a naseampa a damsak nop manin Jesus sam tu in Jew upate pawlkhat paisak hi. 4Amate in Jesus kung a thet ciangin, “Hisia pa hu lete kilawm mama ka sa uh hi. 5Ama in ih mite hong it a, synagogue khat zongh ko atu in hong saksak hi,” ci in nasia takin thuumsak uh hi.
6Tua ahikom Jesus sia ama a samte taw paikhawm hi. A inn nai hong thet uh ciangin, ngalkap hon ukpa in a lawmte paikholsak a, hi bangin Jesus tungah cisak hi, “Topa awng, ngim nga thong tu ni hi. Kei inn sungah nang nong pai tu sia ka kiphu bua hi, 7nang kungah kei kong pai tu hang zong kilawm kisa ngawl khi hi. Thupia po lete, ka naseampa dam tu hi. 8Keima zongh thunei uliante khutnuai ah naseam khat ka hi a, keima ii khutnuai zongh ah ngalkapte om hi. Khat ii munah, ‘Pai in!’ ka cile, pai a; ‘Hong pai ta'n!’ ka cile, hong pai hi. Ka sila pa munah, ‘Hisia vawt in!’ ka ci ciang zong, ama in vawt hi,” ci hi.
9Jesus in hi thu teng a zaak ciangin, lamdang sa hi; a nung pan a zui mihingte sangah kingeilee in, “Hi bang upna Israel mite sung ngawngawn zongh ah ka mu ngei bua hi!” ci hi.
10Kamtaite ngalkap hon ukpa inn ah cia kik a, a naseampa a damsa in mu uh hi.
Jesus in Meingong Khat ii Tapa Nungtasak kik
11Tua zawk tawmvei ciangin Jesus in Nain a kici khua khat ah a nungzuite le mihon khat taw kithawlin pai uh hi. 12Khuapi kongpi a thet lian laitakin mihing pawlkhat thaan kuan tu in hong pusuak hi. Mithipa sia meingong khat ii khat bek a nei sun tapa hi a, khua sung panin mihon in meingongnu zui uh hi. 13Topa in ama a mu ciangin hesuakna thin taw kidim a, “Kap heak in,” ci hi. 14Tuasia ciangin Jesus in mithi luang kung zuanin tham a, a kuang puate in din uh hi, Jesus in, “Tangval awng! Tho in kong ci hi!” ci hi. 15Mithi pa hong tho to a, pau tu in a kithoai ciang Jesus in, a nu aap kik hi.
16Amate theampo lau in, Pathian pok uh hi. “A lian mama kamsaangpa khat ei sungah piang zo hi! Pathian in a mite ngum tu in hong pai zo hi!” ci uh hi.
17Hi bang Jesus ii thusia ngamsung le a kiimkot ngamkhente ah kizel hi.
Tuiphumpa John Kamtaite
(Matthew 11:2-19)
18John ii nungzuite in hi thu teng John tungah a son uh ciangin, 19ama in mihing niite Topa tungah hi bangin thu dongh tu in paisak hi. “Nang sia John ii hong pai tu hi a cisia ma na hi ziam? tua ahibuale ngualdang ka na lam en lai tu uh ziam?”
20Amate in Jesus kung hong thet uh ciangin, “Nang sia hong pai tu pa tatak na hi na ziam? Tua ahibuale mihing dangkhat ka lam en lai tu uh ziam? ci in Tuiphumpa John in nangma kungah dongh tu in ko hong paisak hi,” ci hi.
21Tua hun laitak mama in Jesus in, mihing tam mama te ii a natnate uh pan le, thaa ngilo veina uh panin damsak a, mittawte tam ma khua musak hi. 22Ama in John ii kamtaite tungah, “John kungah heak kik tavun a, na mu uh na zaak uh teng son tavun: mittawte in khuamu a, peangbaite pha tak lampai thei a, a lauhuai vun natna veite kidamsak a, nangongte in khuaza a, mithite kitho kiksak a, a zawngte tungah Lungdamna Thupha kihil hi.#Is 35:5-6; 61:1 23Kei hong muangla ngawlte bangza in a lungdamte ahi uh ziam!” ci in zo kik hi.
24John ii kamtaite in a nusiat zawk uh ciang, Jesus in John ii thu, mihonte tungah son tu in kipan hi: “John ii thuhilna ngai tu in, sennealngam sungah na pai uh ciangin, bang mu tu in na kimuangmaw uh ziam? Vui ii khulup lopate ziam? A bangbel en tu in pai nu ziam? 25Bang en tu in pusuak nu ziam? Puan hoi nawno silh pasal khat ziam? Tuabang a kizeam a, a nuamin a nungtate sia kumpi teenna innte bek ah om hi! 26Hong son tavun, bang en tu in pusuak nu ziam? Kamsaangpa khat ahi ziam? Hi hi, ahizong no ii mu sia kamsaang khat sangin lianzaw pek hi. 27Banghang ziam cile John sia laithiangtho sungah: ‘Pathian in na lampi hong honkholsak tu in, kamtai khat na mai ah ka na puak tu hi’ a ci sia ahi hi.” #Mal 3:1 28Jesus in, “A tatakin ka ci ciang John sia mihing a, a minpiang khat pawpo sangin, lianzaw hi. Ahihang Pathian Ngam sungah a nobel pa in, John sangin lianzaw hi,” ci in belap hi.
29Mihing theampo in ama thu za uh hi; amate a tuan in shiadongte in Pathian ii dei thumaan thutangte saang thei in John in tuiphum zo hi.#Mt 21:32; Lk 3:12 30Ahihang Phariseete le thukham hil syate in amate atu, Pathian ii tupna te nial in, John ii tuiphum tu a uuk bua uh hi.
31Jesus in a kampau zomto suak a, “Tu hun a mihingte bang taw hong teengat tu khi ziam? Amate bang taw kibang ziam? 32Amate vanh zuakna phual ah, a to patangte taw kibang hi. Pawlkhat in a dang pawlkhatte ausan a, ‘Mopoai la hong sak ung, ahihang laam nuam bua uh teh! mithi vuina la hong sak ung, ahizong kap nuam bua uh teh!’ 33Tuiphumpa John hong pai in, ama in an tang a, sapittui ne ngawlin a om ciangin ‘doaivei hi!’ ci nu hi. 34Mihing Tapa hong pai a, ama in ne in dawn in, a om leleau ciangin, ‘En vun. Antuangpa, zutuangpa, shiadongte le a kipuavawkte ii lawmpa!’ ci nu hi. 35Ahitazong, Pathian ciimna a saang theite theampo atu in, thumaan hi ci in kilak hi,” ci hi.
Pharisee Mi Simon Inn ah Jesus
36Pharisee khat in Jesus an ne tu in sam a, Jesus in tua pa inn ah pai in, an ne tu in to hi. 37Tua khuapi sungah mawneinu khat teang hi. Jesus sia Pharisee pa inn ah an ne hi, ci in a zaak ciangin sathau namtui suangngo thawl khat dim hong paipui a, #Mt 26:7; Mk 14:3; Jn 12:3 38Jesus ii nungsang a peang hui ah dingin, kap in a thitui taw Jesus ii peang kawtsak hi. Tua zawkciang a sam taw Jesus peangte nawlin, a peangte namh a, tuate tungah paaknamtui buak hi. 39Pharisee pa in a mu ciangin, “Hisia pa sia kamsaang hi takpi le ama a tham numei hisia akua hi ci in he tu a, bangbang mawna taw nungta cisia he tu hi!” ama le ama kici hi.
40Jesus in, “Simon awng, kong son tu thu khat om hi,” ci hi.
“Hi hi, syapa awng, hong son ta'n” ci hi.
41Jesus in, “Sum pukthaak khat pa tungah leiba mihing nii om hi. Khat in dangkatang za nga ama tungah ba a, a khat sia in sawmnga ba hi. 42A nii ma in, lo kik zo ngawl ahikom, ama in amate ngeal ii leibatte maisak hi. Tua ahile, a koisia zaw in ama a it zaw tu ziam?” ci hi.
43“Ka upmawk in, a tamzaw a kimaisak sia in it zaw tu hi,” Simon in ci in zo hi.
“Na ci bang maan hi,” Jesus in ci hi. 44Numeinu sangah nga in Simon tungah hi bangin ci hi, “Hi numei na mu ziam? Na inn sungah kong tum a, ka peang sil natu tuidam takpi zong nong pia bua hi, ahihang hisia nu in a thitui taw ka peang hong silsak a, a sam taw hong nawlkosak hi. 45Nang in napna taw nong muak bua hi. Ahihang hisia nu in kong thet pan kipan ka peang hong namh hi. 46Ka lu ah ka thii tu olive thau nong pia bua hi, ahihang hisia nu in paaknamtui taw ka peangte hong noisak hi. 47Kei kong ci in a, ama ii, itna lianpi hong lakna sia in, ama mawna tam mamate kimaisak zo hi, ci na thu kiciansak hi. Tua hi a, tawm bek a kimaisakte in itna tawm bek lak tu hi,” ci hi.
48Tua zawkciang Jesus in numei nu munah “Na mawnate kimaisak zo hi,” ci hi.
49Sabuai ah a to dangte in, “Mawnate ngawngawn a maisak hisia akua ziam,” amate sung tengah ci uh hi.
50Ahihang Jesus in, numeinu munah, “Na upna in hong ngum zo hi; thinnuam in va pai ta'n,” ci hi.
Currently Selected:
Luke 7: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
