Mark 13
13
Jesus in Biakinn Lalthap natu Son
(Matthew 24:1-2, Luke 21:5-6)
1Jesus in Biakinn pan, a pusua laitak, a nungzuite khat in, “Sya awng, En in! Inn sakna suangte le a innte bangza in pha ziam!” ci hi.
2Jesus in, “Hi innpuite mu hi ngawl ni ziam? Suangtum khat zongh ama omna ngei munah a om buatu hi; a kilawnthal ngawl khat zongh a om buatu hi,” ci in zo hi.
Ngimna le Vawtsiatnate
(Matthew 24:3-14; Luke 21:7-19)
3Jesus Biakinn ngal Olive Mual tungah to in a om laitak Peter, James, John, le Andrew hong pai uh a, a tuamin thu sonpui hi. 4“Hi thu bang hun ciang hong tung tu ziam hong son ta'n, tuaciangin hite a pian natu bang limte in lak tu ziam?” ci hi.
5Jesus in, “Kidawm vun a, kuama in theamsak heak vun. 6Kei min taw mihing tam mama hong pai tu a, ‘Keima in tuasia pa khi hi!’ ci in mihing tam mama theam tu hi. 7Tuaciangin ngal kisimna awnging a naina ah ahizong, a khualana ah ngal kidona thu ahizong, na zaak uh ciangin patau heak vun. Tuate sia a pian tu ma hi a, ahihang a tawp natu hi ngawl lai hi. 8Ngam khat le ngam khat hong kisim tu a; kumpi khat le kumpi khat hong kido tu hi. Mun theampo ah zinliing tu hi, tuaciangin kialpi tung tu hi. Hite sia nausuak tu a tut kipat bang ahi hi.
9“Noma le noma na kikeam vun. No sia hong kiman tu a, zum mai ah hong kithen tu hi. Synagogue te ah hong kivel tu hi, Lungdamna Thupha son tu le, keima hu in ngamukte le kumpite mai ah note na ding tu uh hi.#Mt 10:17-20; Lk 12:11-12 10Ahihang a tawpna hong thet ma in, lungdamna thu sia mihing theampo tungah kihil siat tu hi. 11Tuaciang no hong kiman a, zum mai ah hong kipaipui ciangin, na pau natu uhte thinngim khol heak vun; a hun hong thet ciangin, hong kihil babangin, na pau tu uh hi. Banghang ziam cile na kammal zak tu te sia no ii pau ahi buatu hi; Thaa Thiangtho kung panin hong pai hi tu hi. 12Mihingte in a suapuite thalup tu in aap tu uh hi, tuaciang, pate in a tate tuabang ma in vawt tu hi. Tate in nute pate langpan in, thatsak tu uh hi. 13Mihing theampo in note kei hu in, hong ensan tu hi. Ahihang a tawp dong a thuak zote in ngupna a nga tu uh hi.#Mt 10:22
A Kiitakhuai mama Thu
(Matthew 24:15-28; Luke 21:20-24)
14“ ‘A kiitakhuai mama thu’ sia a kilawm ngawlna munah hong piang, na mu tu uh hi.” (Hi lai a simte ii teptee tu thu hisia ii khiakna sia bang ziam ci in tel tavun!) “Tua hun ciangin Judea ngam a omte in mual tungah tai tahen.#Dan 9:27; 11:31; 12:11 15Innkhum tung a pasal khat in, a ken tu na khat pawpo la in, tuaksuk in a hun bosak heak hen.#Lk 17:31 16Lo sung a om pasal khat in a laktong puasilh la tu in, a inn ah heak kik nawn heak hen. 17Numei naupaaite le nau noailuaite atu in, tua hun sia bangza in haksa tu ziam! 18Hi thute a pian hun sia phalbi laitak ahi ngawl natu in, thu na ngen tavun! 19Banghang ziam cile tua hun a ngimnate sia Pathian ii leitung a bitphua pan tu hun dong leitung mihingte ii heak ngei sangin nasia zaw pek tu hi. Tuabang ngimna sia maisang zongh ah a om nawn buatu hi.#Dan 12:1; Tpl 7:14 20Ahihang Topa in tua nite khiamsuk zo hi; tua hi buale kuama nungta zo ngawl tu hi. Ama tealsa mihingte a khualna in tua nite khiam zo hi.
21“Tuaciang khat po in, ‘En vun, hi sungah Messiah om hi!’ ci in ahizong, ‘En vun, zia sungah om hi!’ — ci in ahizong hong ci a om le na um heak vun. 22Banghang ziam cile Messiah theam le kamsaang theamte hong piang tu hi. Hi thei hile, Pathian ii tealsa mihingte ngawngawn a theam tu in, amate in nalamdang lakna a tumdang nate hong vawt tu hi. 23Na kidawm vun! A hun hong thet ma in, na theampo hong son zo khi hi.
Mihing Tapa hong Pai natu
(Matthew 24:29-31; Luke 21:25-28)
24“Ngimna hun zawkciang hong pai tu nite ah ni hong taang nawn ngawl tu a, tha zongh taang nawn ngawl tu hi, #Is 13:10; Eze 32:7; Jol 2:10,31; 3:15; Tpl 6:12 25aksite van panin taaksuk tu hi, van a om nate a paina lampi ngei panin lampial tu hi.#Is 34:4; Jol 2:10; Tpl 6:13 26Tua zawkciangin Mihing Tapa sia hong kilangh tu a, meeikaai sungah vaangletna le minthanna lianpi taw hong pai tu hi.#Dan 7:13; Tpl 1:7 27Ama in vantunglalangte leimong king li ah paisak tu a, Pathian ii tealsa mihingte leimong khat pan mong khat kilaklaw ah khawmtua tu hi.
Theikung taw Thuheak Theina
(Matthew 24:32-35; Luke 21:29-33)
28“Theikung in hilsak tavun. A baakte hong hing a hong moisuak in a tee note suak tu in a kithoai ciangin, khuakhaal hun hong nai zo hi, ci in na he uh hi. 29Tuasia bangma, hi thute hong pianna mu uh ciangin, a hun hong nai zo hi, kipapan tu in kithoai zo hi, ci in na he tu uh hi. 30Tu laitak hunin a nungta mihingte a thi siat ma in hi thute hong tung tu hi — ci in na ciamtee tavun. 31Vantung le simlei hong bo tu hi, ahihang ka kammalte bo ngeingawl tu hi.
Kuama in A Ni le A Nai He ngawl
(Matthew 24:36-44)
32“Ahihang kuama in a ni le a nai hong tun hun tu a he bua hi, van a vantunglalangte hikale Tapa hikale in a he bua a, Pa bek in he hi.#Mt 24:36 33Na kinging vun a, na kipilvangsak vun, banghang ziam cile a hun hong tun tu na he bua uh hi. 34Mihing khat khualhaw tu in dingin, a naseamte in inn ngaksak a, khat simin a sep tu tek a vaithak zawkciang, kong cingpa munah a cin thiam natu in, a vaitha sia taw kibang hi.#Lk 12:36-38 35Tua ahikom, na kikeam tavun, banghang ziam cile, innteakpa bang hun ciang hong cia kik tu, ci in na he bua uh hi — nitak zongh hi thei, zankim zongh hi thei, tua ahibuale zingtuung zongh hi thei, nisua laitak zongh hi thei hi. 36Thakhat thu in hong theng le, a mu sa in na om uh hong si bua het le pha hi. 37No tungah kong son teng mihing theampo tungah ka son ahi hi. A kingingta sa in om vun!” ci hi.
Currently Selected:
Mark 13: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
