Mark 16
16
Thawkikna
(Matthew 28:1-8; Luke 24:1-12; John 20:1-10)
1Sabbath ni bo zawkciangin, Mary Magdalene, James ii nu Mary le Salome in Jesus luang a zut natu in hel namtuite keng uh hi. 2Nipi ni zingtuung, nisua ciangin, amate thaan ah pai uh hi. 3-4Lampi ah khat le khat hi bangin a kikum uh hi, “Thaan kong panin akua in suangtumpui sia hong liik keaksak tu ziam?” (A suangtum sia lian mama hi.) Tuaciangin amate in a etto uh ciangin a suangtum sia a kiliik sa in om mu uh hi. 5Tuabangin amate thaan sungah tum uh hi, tua munah tangval khangmoi khat a ziatsang ah to in a na om a, puantual kaang khat silh hi, tuaciangin amate lau mama uh hi.
6“Lau heak vun. Thinglamtee tungah a kithat Nazareth mi Jesus, zong na hi uh kong he hi. Ama hi sungah om ngawl a — tho kik zo hi! En vun, ama kisialna mun hi sung ahi hi. 7Tu in Peter pan kipan a nungzuite munah hi thu puak tavun: ‘Ama note mai Galilee ah paikhol zo hi; tua munah ama ii hong son ngei bangin, na mu tu uh hi,’ ” ci hi.#Mt 26:32; Mk 14:28
8Tua ahikom amate in lungmang patau in thaan sung pan, pusuak in tai uh hi. Amate in lau ahikom, kuama munah, bangma a son bua uh hi.
THUKHUPNA LUI
16:9-20
Mary Magdalene tungah Jesus Kilak
(Matthew 28:9-10; John 20:11-18)
[ 9Nipi ni zingtuungin Jesus thina pan a thaw kik zawkciang, a masa phitbel in Mary Magdalene tungah ama kilak hi, tua numei nu sung pan doaite sali Jesus in a hawlkeaksak ngei hi. 10Ama pai in Topa kitholpuite munah son hi. Amate kapin, tau in om uh hi. 11Jesus nungta a, ama tungah kilak hi ci in numeinu ii son ciangin, amate in a um bua uh hi.
Nungzui Niite tungah Jesus Kilak
(Luke 24:13-35)
12Hisia zawkciang, nungzuite nii ngamsung a pai laitakin Jesus sia a nam tuatuamin kilak hi. 13Amate heak kikin, nungzui dangte munah a son uh hangin amate in a um bua uh hi.
Sawm le khat tungah Jesus Kilak
(Matthew 28:16-20; Luke 24:36-49; John 20:19-23; Sawltak 1:6-8)
14A khakbel in, Jesus sia nungzui sawm le khat te anneak laitakin kilak hi. Jesus in amate teih hi, banghang ziam cile amate in upna nei ngawl a, a thin uh pui ahikom, a nuntak kik a mute ii thu son a um zo bua uh hi. 15Ama in, “Leitung mun theampo ah pai tavun a, mihing theampo tungah lungdamna thu hil tavun.#Sawl 1:8 16Akua po ahizong um in, tui a kiphumte kingum tu hi, a um ngawlte ahile puavawkna thuak tu hi. 17Thu umte nalamdang vawt thei natu vaang kipia tu hi; amate in keima min taw doaite a not tu uh hi; amate kam tumdangin pau tu uh hi; 18ngulte zamhin nguu khat pawpo a ne zongin, bangma tat ngawl tu hi; amate in ciinate tungah a khut uh nga tu a, ciinate dam tu hi,” ci hi.
Van ah Jesus Kila to
(Luke 24:50-53; Sawltak 1:9-11)
19Topa in amate taw thu a son zawkciang, ama sia vantung ah kila to in Pathianziatsang ah to hi.#Sawl 1:9-11 20Nungzuite mun theampo ah pai in, thuhil uh hi, tuaciang Topa in amate taw naseam khawm a, amate thuhilnate sia maan hi ci in a kilak natu in, nalamdang laknate vawtsak thei hi.]
THUKHUPNA LUI A DANGKHAT
9[Numeite in Peter le a lawmte kungah pai a, amate tungah a kison thute a tom in sonsawn uh hi. 10Hisia zawkciang, Jesus ama mama in, nungzuite tungtawnin, nisuana pan nitumna ah, a thiangtho, a hing top, tawntung ngupna thu puak hi.]
Currently Selected:
Mark 16: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
