Mark 7
7
Taanghpupite ii Kihilna
(Matthew 15:1-9)
1Jerusalem pan hong pai Phariseete pawlkhat le Thukham hil syate pawlkhat, Jesus kiim ah kikhawm uh hi. 2Amate in nungzui pawlkhatte an a neak tu ciang ngeina bangin, khut thiang ngawl taw an ne mu uh hi — koibang ziam cile amate in Phariseete hil bangin, a khut uh sil ngawl hi.
3(Phariseete le Jew te peuma in, amate ii taanghpupite hil, ngeina tuatuamte nasia takin zui uh hi: a khut uh ahi tu bangin a sil bua uh le an ne ngawl uh hi; 4vanhzuakna phual pan a kinga peuma, tui taw sil phot ngawlin ne ngawl hi. Hai, kuang le beal, taausankuang le lupnate ahi tu bang a, silthiang natu ngeina dang tam mamate zui uh hi.)
5Tua ahikom Phariseete le Thukham hil syate in Jesus munah, “Banghangin na nungzuite in, taanghpupite hil ngeinate zui ngawlin, an a neak tu uh ciang a khut thiang ngawl taw an ne ziam?” ci in dongh uh hi.
6Jesus in a zo kikna ah, “Isaiah in note thu a sonkholna bangza in maan ziam! A kihitheamsak minamte awng, ama in hi bangin at hi:
‘Pathian in, hi mite in
a kammal bek uh taw,
kei zatakna hong pia uh hi,
ahihang a thinsung uh kei taw kikhuala uh hi.#Is 29:13
7Amate ii hong biakna sia
kimanna om ngawl hi,
banghang ziam cile amate in
mihingte vawttawm ngeinate
Pathian ii Thukham bangin
hil uh hi!’ ci hi.
8“No in Pathian thupiakte vawkin mihingte ii hilnate na ni uh hi.”
9“Noma ii kihilna te na kholet thei natu in Pathian thukhamte na nial zia uh na thiam uh hi. 10Bang ci nuam khi ziam cile Moses in ‘Na nu le na pa thasia vun,’ tuaciang, ‘A kuama po a nu a pa a haamsiat sia thina thuak tahen,’ ci hi.#Pu 20:12; Thiam 20:9; Thkna 5:16; Pu 21:17 11Ahihang no ii hilna ah nu le pa hu natu in a kizangh thei na khat pawpo sia, ‘Hi sia Corban,’ hi, (Pathian atu a kipiasa hi) ci po le, 12nu le pa a hu ngawl hangin, phamaw ngawl hi, ci nu hi. 13Hi bang kihilnate khat tung pan khat na kipiak sawn uh ciang Pathian kammal a mel suak nu hi. Hi thu taw a kibang na ngamtatna dang uh zongh tam mama om lai hi,” Jesus in ci thua hi.
Mihing khat A Ninsak Nate
(Matthew 15:10-20)
14Jesus in mihonpite khatvei ma sam kikin, “Na vekpi in hong ngai tavun a, tel vun. 15A pua sang pan hong tum nate bangma in, mihing khat sia zeksa taw kisai in ninsak ngawl hi. A sung pan hong pusuak to sia in mihing khat ninsak hi zaw hi, 16Bil a neite in za tavun” ci hi. #7:16 TEV sung om ngawl hikale version dang pawlkhat sung om ahikom kibelap hi. (see 4:23).
17Ama mihonpite nusia in, inn sungah a tum ciang, a nungzuite in, hi hilna hong sontel ta'n ci uh hi. 18“No sia ngualdangte sangin ciimzaw tuan ngawl nu hi. Tel ngawl nu ziam? A pua sang pan hong tum suk na khat pawpo in mihing khat sia ninsak ngawl hi, 19banghang ziam cile a thinsung ah tum ngawlin, a ngilpi um sungah a tum zawkciang a pua sangah pusuak hi,” Jesus in ci hi. (Hi bang a ci ciang Jesus in, an a minpiang neak tuak hi, ci ahi hi.)
20Tuaciang ama in zomto a, “A sung sang pan hong pusuakte in mihing khat ninsak hi. 21Banghang ziam cile mihing khat ii a sung, a thinsung panin ngaisutna pha ngawl piang a, tuate in paktatna, kisutolna, kithalupna, 22nupa kipalngulna, duhopna, ngamtat siatna tuatuam; kitheamna, maizummawkna, ki enna, kingensiatna, kiphatsakna, le mawmawtna — 23hi siatnate theampo sia mihing khat ii sung pan hong pai nate hi a, tuabangte in amate ninsak hi,” ci hi.
Nupi Khat ii Upna
(Matthew 15:21-28)
24Tua zawkciangin Jesus Tyre khuapi hui ngamkhen ah pai tu in ding hi. Inn khat sungah tum a, tua munah ama a om hunlam kuama heak tu oai ngawl ahihang a bucip zo bua hi. 25A tanu thaa ngilo vei nupi khat in, Jesus thu za ahikom thakhatin hong pai a, a peang ah bok hi. 26Nupinu sia Gentile mi hi a, Syria ngam Phoenicia ngamkhen sung pan a piang ahi hi. Ama in a tanu sungah a om doai a nawkeaksak natu in Jesus munah ngen hi. 27Ahihang Jesus in, “Tanote vaak masa phot tawng, tate ii anneak laaksakin, ui piaksak tu kilawm ngawl hi,” ci hi.
28“Topa awng, tano teng an neakmongte sabuai nuai pan, ui ngawngawn in ne lai buang hi ngawl ziam!,” ci in nupinu in zo hi.
29Tua ahikom Jesus in, “Tuabangin nong zona hangin, va cia ta'n, doai sia na tanu sung pan pusuak zo hi cisia na mu tu hi!” ci hi.
30Nupinu a inn ah cia a, a sung pan doai pusuak sa a tanu lupna tungah a lum mu hi.
Jesus in Nangong, A pau thei ngawl khat Damsak
31Jesus in Tyre kiim le paam teng nusia in Sidon kaantan in Galilee ah pai a, Khuapi Sawm ii ngamkhente tawn hi. 32Mihing pawlkhat in pasal nangong a pau thei ngawl khat hong paipui a, ama tungah Jesus ii a khut a ngak natu in ngen uh hi. 33Tua ahikom Jesus in ama nguakin mihonpite kung pan a khuala thithimna ah samtuam a, pasalpa ii bil sungah a khutme thunin, cilphii in pasalpa ii leei thamsak hi. 34Tua zawkciang Jesus in, van ento a, phiing vahumin, “Ephphatha,” “Kihong in!” ci hi.
35Thakhatin pasalpa in khuaza thei a, a pau thei ngawlna pan olno takin pau kik thei hi. 36Tuaciangin mipite munah hi thu kuama tungah a son ngawl natu in, ama in khaam vaial kale mipite in son vaial uh hi. 37A za theampo in lamdang sa mama uh hi. “Na theampo bangza in vawt thiam ziam! Ama in nangongte ngawngawn khua zasak thei a, a pau thei ngawlte dongin pausak thei hi,” ci uh hi.
Currently Selected:
Mark 7: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
