Mark 9
9
1Tuaciang ama pau thua lai a, “A tatakin kong ci ciang, hi sungah a om mihing pawlkhatte in Pathian Ngam sia vaangletna taw hong pai a mu uh mateng a thi buatu hi,” ci hi.
Meal Kikhealna
(Matthew 17:1-13; Luke 9:28-36)
2Ni luk zawkciang Jesus in Peter, James le John te samin mualsaang khat tungah kaato pui hi, tua munah amate teng bek om uh hi. Amate mu tangin Jesus meal hong kikheal a, #2 Pe 1:17-18 3tuaciang a puansilhte paakin tee a — leitung a khat pawpo ii thiansak thei sangin paak zaw lai hi. 4Tuaciang nungzuite thum in Jesus sia Elijah le Moses taw thuson khawmin a om mu uh hi. 5Peter in Jesus munah, “Syapa awng, hi sungah ih om sia bangza in pha ziam! Buk thum sa tawng, khat nang atu, khat Moses atu, khat Elijah atu,” ci hi. 6Ama le a lawmte lau mama ahikom a pau tu he meal ngawl uh hi.
7Tuaciangin meeikaai khat hong piang a, a limh taw amate tuamcip hi, tuaciangin meeikaai sung panin aw khat in, “Hi sia ka it ka tapa hi — ama thu ngai vun!” ci hi.#Mt 3:17; Mk 1:11; Lk 3:22 8Amate in manlang takin a kiimkot a et uh le kuama dang a mu bua uh a, Jesus bek amate taw om a mu uh hi.
9Mualtung pan hong tuaksuk ciangin Jesus in, “Mihing Tapa sia thina pan a thaw kik mateng in na mu uh teng kuama munah son heak vun,” ci hi.
10Amate in a thupiak bangin om uh hi, ahihang amate sung teng kikum uh hi. “Thina pan tho kik ci sia bang a cinopna ziam?” ci uh hi. 11Tuaciang amate in Jesus munah, “Thukham hil syate in banghangin Elijah hong pai masa tu ci ziam?” ci in dongh uh hi.#Mal 4:5; Mt 11:14
12A zo kikna pan, “Na theampo puua khol tu in Elijah hong pai masa takpi hi. Ahitazong, Mihing Tapa in nasia takin thuak tu a, ama kinial tu hi, banghangin Laithiangtho in ci ziam? 13Ahihang a tatakin kong ci ciang, Elijah hong pai takpi zo hi. Laithiangtho ii ama thu a sonsa bangma in, mihingte in amate uuk bang po in ama vawt uh hi,” ci hi.
Jesus in Thaa Ngilo Vei Patang khat Damsak
(Matthew 17:14-21; Luke 9:37-43)
14Amate nungzui dang teng kungah a thet ciang, a kiim ah mihonpi na om a, Thukham hil syate taw kam kinial in om a mu uh hi. 15Mihonpite in Jesus a mu ciangin lamdang sa mama uh a, ama delin muak tek uh hi. 16Jesus in a nungzuite munah, “Amate taw bang teng kinial nu ziam?” ci in dongh hi.
17Mihon sung pan pasal khat in zo a, “Syapa awng, nangma kungah ka tapa kong paipui hi, banghang ziam cile ama doaivei in a pau thei bua hi. 18Thaa ngilo ii ama a vawtsiat simin, leiliik in, a kam pan cilphuan tha a, a haci in, a pum buppi tak hi. Na nungzuite munah thaa ngilo hong nawkeaksak natu ka nget hang, amate in a not zo bua uh hi,” ci hi.
19Jesus in, “Bangzata in a um ngawl mihingte hi thong nu ziam! Bang tanvei no taw hong omkhawm zo tu khi ziam? Bang tanvei hong khual zo tu khi ziam? Patang sia ka kungah hong paipui tavun!” ci hi. 20Amate in patang sia Jesus kungah paipui uh hi.
Jesus a mu po ciang thaa ngilo in patang sia kikaikinsak a, lei ah pukin kilumliik a cilphuan tha hi. 21Jesus in, “Hi bang ahithei zawk ngei zo ziam?” ci in a pa dongh hi.
“A no lai pan ma hi,” ci in zo kik hi. 22“Tamvei ma doai in ama thatlum nuamin meikuang sung le tui sungah lawn nithi hi,” ci hi. “Nong hu theina a om le, ko hong hesuak ta'n a hong hu ta'n,” ci hi.
23Jesus in, “Nangma mama in na um nale hong hu thei khi hi, upna a nei khat tungah na theampo suak thei hi,” ci hi.
24Thakhatin a pa au a, “Upna nei khi hi, ahihang kicing tham ngawl hi. A kicing zaw ka nei natu in hong hu ta'n!” ci hi.
25Mipite in ama uumci tu a kithoai sia Jesus in mu ahikom thaa ngilo tungah, thupia a, “Nangong le a pau thei ngawl thaa ngilo awng, patang sung pan hong pusuak ta'n a, ama sungah tum kik nawn heak in, ci in thu kong pia hi,” ci hi.
26Thaa ngilo cik-au a, patang sia nasia takin a kikaikinsak zawkciang pusuak hi. Patang sia mithi luang bang hi a, a kuama po in “Ama thi zo hi,” ci uh hi. 27Ahihang Jesus in patang khut pan zamh a, a phokto ciang ama hong ding hi.
28Jesus inn sungah a sungtan zawkciang a nungzuite in a tuamin dongh a, “Banghangin kote in doai not zo ngawl khu ziam?” ci uh hi.
29“Hi bangte sia thungetna simngawl nadang in notkeak thei ngawl hi,” Jesus in ci hi.
Jesus in Ama Thi natu Son kik
(Matthew 17:22-33; Luke 9:43-45)
30Jesus le a nungzuite in, tua mun nusia in Galilee kaantan in pai uh hi. Jesus in ama omna kuama heak tu a dei bua hi, 31banghang ziam cile ama in “Mihing Tapa in ama a thatlum tu mihingte tungah ki aap tu hi. Ahihang ni thum zawkciang nuntakna sungah ama tho kik tu hi,” ci in a nungzuite hil hi.
32Ahihang amate in hi hilna bang ziam ci in a tel bua uh a, dongh zongh a dongh ngam bua uh hi.
Akua Lianbel Ziam?
(Matthew 18:1-5; Luke 9:46-48)
33Amate Capernaum khua hong theng a, inn sungah a tum zawkciang, Jesus in a nungzuite munah, “Lampai kawmin na kinial uh sia bang thu ziam?” ci in dongh hi.
34Ahihang amate in a zo kik nuam bua uh hi, banghang ziam cile lampi tungah a kinial uh thu sia, akua lianbel ziam ci thu ahihang hi.#Lk 22:24 35Jesus to a, nungzui sawm le niite samin, hi bangin ci hi, “A kuama po note sungah, a lianbel tu a nuam sia in, ama le ama a nobel in kikoi in, ngual theampo ii naseam in na om uh kul tu hi.” #Mt 20:26-27; 23:11; Mk 10:43-44; Lk 22:26 36Tua zawkciang ama in patangno khat lenin, amate mai ah dingsak hi. Patangno sia koai in hi bangin ci hi, 37“A kuama po ka min taw hi patangte khat a saang sia in kei hong saang ahi hi; tuaciangin a kuama po kei hong saang sia in kei bek hong saang ngawlin kei hong sawlpa zongh a saang ahi hi”#Mt 10:40; Lk 10:16; Jn 13:20
Eite Hong langpan Ngawlte peuma ih Pawl hi
(Luke 9:49-50)
38John in, “Syapa awng, pasal khat in nangma min taw doai a nawnot ka mu uh a, a kheal natu ka sawl uh hi, banghang ziam cile ama ei pawl ahi bua hi,” ci hi.
39Jesus in, “Thoh heak vun, banghang ziam cile kei min taw lamdang lakna a vawt khat in kei hong sonsia memeang ngawl tu hi. 40Banghang ziam cile ei lang hong pang ngawl po, ei sang a hong kipawl ahi hi.#Mt 12:30; Lk 11:23 41A tatakin kong ci ciang, keima mi na hi uh hu in, tuidam hai khat hong sua sia in, a thaman saang tatak tu hi.”#Mt 10:42
Mawna Tu Ze etna
(Matthew 18:6-9; Luke 17:1-2)
42“Hi patangno khat ii kei hong upna a bosuasak mihing khat sia a ngawng ah an ngoaina suang lian khat khi hen a, tuipi sungah kivawk le phazaw hi. 43Tua ahikom na khut khat in na upna hong lalsak le saattan in! Khut nii taw hell ngam, a mit ngeingawl meisa sungah na pai uh sangin, khut langkhat nguak taw nuntakna sungah tum le uhte phazaw hi.#Mt 5:30 44Tua munah amate a ne thanhte in thi ngeingawl a, amate a hal mei in mit ngeingawl hi. 45Tuaciang na peang khat in na upna a lalsak le, saattan in! Hell sungah peang kim in na pai uh sangin, peang lang nguak taw nuntakna sungah tum zaw le uhte phazaw hi. 46Tua munah amate a ne thanhte in thi ngeingawl a, amate a hal mei in mit ngeingawl hi. 47Tuaciang na mittang khat in na upna uh a lalsak le khelkeak in! Pathian Ngam sungah mittang langkhat nguak taw tum le uhte hell sungah mittang cingin hong kivawk sangin phazaw hi.#Mt 5:29 48‘Tua munah amate a ne thanhte in thi ngeingawl a, amate a hal mei sia mit ngeingawl hi.’ #Is 66:24
49“Sangaw biakpiakna sia ci al taw a kithiansua bangma in, mihing sim zongh meikuang in thiansua tu hi.
50“Ci al sia pha hi; ahihang ama in a alna a bosua le, bangbangin alsak kik thei tu nu ziam?”
“Na sung uh a, kingualtamh theina ci al na nei tavun, khat le khat kilemna taw na om tavun,” ci hi.#Mt 5:13; Lk 14:34-35
Currently Selected:
Mark 9: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
