प्रकटीकरण 1
1
प्रस्तावना
1ज्या गोष्टी लवकरच जरूर घडून येणार आहेत, त्या आपल्या सेवकांना दाखविण्यासाठी परमेश्वराने हे प्रकटीकरण येशू ख्रिस्ताला दिले. त्यांनी आपल्या दूताला पाठवून आपला सेवक योहानाला ते कळविले. 2योहानाने जे सर्व पाहिले, त्याविषयी साक्ष दिली—ती म्हणजे, परमेश्वराचे वचन आणि येशू ख्रिस्ताची साक्ष. 3जो कोणी या भविष्यकथनाचे मोठ्याने वाचन करतो तो धन्य, जे लोक ते ऐकतात ते धन्य, आणि जे कोणी यात लिहिल्याप्रमाणे पालन करतात ते धन्य, कारण वेळ जवळ आली आहे.
शुभेच्छा आणि ईशगान
4योहानाकडून,
आशिया प्रांतातील सात मंडळयास:
जे आहे, आणि जे होते, आणि जे येणार, आणि त्यांच्या सिंहासनासमोर असणारे सात आत्मे यांच्यापासून तुम्हास कृपा आणि शांती असो 5आणि जे विश्वसनीय साक्षीदार, मृतातील प्रथमफळ, आणि पृथ्वीवरील राजांचा शासक आहे त्या येशू ख्रिस्तापासून तुम्हास कृपा आणि शांती लाभो.
त्यांना, जे आमच्यावर प्रीती करतात आणि ज्यांच्या रक्ताद्वारे पापांपासून आमची सुटका झाली आहे 6आणि ज्या येशूंनी परमेश्वराची व त्यांच्या पित्याची सेवा करण्यासाठी आम्हास त्यांचे राज्य व याजक म्हणून निवड केली आहे, त्यांना चिरकाल गौरव व सामर्थ्य असो! आमेन.
7“पाहा, ते मेघारूढ येत आहे,”
आणि “प्रत्येक नेत्र त्यांना पाहिल,#1:7 दानी 7:13
स्वतः त्यांना भोसकणारेही त्यांच्याकडे पाहतील”
आणि तेव्हा पृथ्वीवरील सर्व लोक “त्यांच्यामुळे दुःखाने आक्रोश करतील.”#1:7 जख 12:10
असेच होणार! आमेन.
8“मीच अल्फा व ओमेगा (प्रारंभ आणि शेवट) आहे, जो होता आणि जो येणार आहे,” ते सर्वसमर्थ परमेश्वर असे म्हणतात.
योहानाचा ख्रिस्ताविषयी दृष्टांत
9मी, योहान, तुमचा बंधू, येशूंच्या दुःखात, राज्यात व धीरात तुमचा सहभागी असलेला, परमेश्वराच्या वचनामुळे आणि येशूंच्या साक्षीमुळे पत्मोस नावाच्या बेटावर शिक्षा भोगीत होतो. 10प्रभुच्या दिवशी मी आत्म्यात संचारलो, आणि, मी माझ्यामागे रणशिंगाच्या आवाजासारखा मोठा आवाज ऐकला. 11तो म्हणाला: “तुला जे दिसते, ते एका ग्रंथपटावर लिहून काढ आणि ते इफिस, स्मुर्णा, पर्गमम, थुवतीरा, सार्दीस, फिलदेल्फिया व लावदिकीया या सात मंडळ्यांना पाठव.”
12माझ्याशी कोण बोलत आहे हे पाहण्यासाठी मी मागे वळलो, आणि जेव्हा मी मागे वळलो तेव्हा तेथे सोन्याच्या सात समया असल्याचे मला दिसले. 13त्या समयांच्या मध्यभागी मानवपुत्रासारखा दिसणारा कोणी एक उभा होता. त्यांनी पायघोळ वस्त्र घातले होते व छातीवर सोन्याचा पट्टा बांधला होता. 14त्यांच्या डोक्यावरील केस पांढर्‍या लोकरीसमान, बर्फासारखे शुभ्र होते आणि त्यांचे डोळे अग्निच्या ज्वालेसारखे भेदक होते. 15त्यांचे पाय जणू काही भट्टीतून शुद्ध केलेल्या चकचकीत सोनपितळ्यासारखे होते आणि त्यांची वाणी गर्जना करणार्‍या धबधब्यासारखी होती. 16त्यांनी त्यांच्या उजव्या हातात सात तारे धरले होते, आणि त्यांच्या तोंडातून तीक्ष्ण दुधारी तलवार निघाली. त्यांचा चेहरा मध्यान्हीच्या सूर्यप्रकाशा इतका तेजस्वी होता.
17-18त्यांना पाहता क्षणीच मी त्यांच्या पायाशी मृतवत होऊन पडलो. पण त्यांनी आपला उजवा हात माझ्यावर ठेऊन म्हटले, “भिऊ नको! मी पहिला व शेवटला, मी जिवंत असलेला तो आहे; मी मृत होतो आणि पाहा, आता मी सदासर्वकाळ जिवंत आहे! आणि मृत्यूच्या व अधोलोकाच्या किल्ल्या माझ्याजवळ आहेत.
19“तर तू जे पाहिले, जे आता आहे आणि यानंतर घडणार आहे, ते सर्व लिहून ठेव. 20तू माझ्या उजव्या हातात पाहिलेल्या सात तार्‍यांचे व सोन्याच्या सात समयांचे रहस्य हे आहे: हे सात तारे म्हणजे सात मंडळ्यांचे देवदूत आणि सोन्याच्या सात समया म्हणजे सात मंडळ्या आहेत.”
Currently Selected:
प्रकटीकरण 1: MRCV
Highlight
Share
Copy
Want to have your highlights saved across all your devices? Sign up or sign in
मराठी समकालीन आवृत्ती™, नवीन करार
ग्रंथाची मालकी © 1978, 1982, 2008, 2022 Biblica, Inc.
यांची परवानगी घेऊन केले गेले आहे. सर्व अधिकार जगभरात राखीव.
Marathi Contemporary Version™, New Testament
Copyright © 1978, 1982, 2008, 2022 by Biblica, Inc.
Used with permission. All rights reserved worldwide.
