MARKA 12

Dum Rianṭuantu Hna Bianabia

(Mat 21.33-46; Luk 20.9-19)

1Cun Jesuh nih tahchunhnak bia in a chimh hna. Aa thawh i, “Mipa pakhat a rak um i cu pa nih cun mitsur dum pakhat a rak ser; a kulh i mitsur nennak caah khor a cawh i ralvennak inn pakhat a sak. Cun a dum cu mi kha a hlanh hna i khualtlawn ah a kal. #Isa 5.1-2 2Mitsur thei kha lawh a cut tikah a co hnga ding a simi va lak awkah a sal pakhat kha a thlah. 3Dum a hlanhmi hna nih cun an rak tlaih i an rak velh i zeihmanh pe loin an kirter. 4Cu tikah dum ngeitu nih khan sal dang pakhat a thlah ṭhan; a lu ah an rak tuk i ningzak ngaiin an rak tuah. 5Dum ngeitu nih cun sal dang pakhat a thlah ṭhan i an rak thah; cun a dang tampi kha cu bantuk cun an rak tuah hna, a cheu cu an tuk an den hna i a cheu cu an thah hna. 6Thlah dingah a taangmi cu dum ngeitu fapate a dawt ngaingaimi lawng kha a si cang. A hmanung bik ah a fapa cu dum a hlanhmi hna sinah cun a hei thlah i, ‘Ka fapa hi cu an hmaizah ṭheo lai,’ tiah a ti. 7Sihmanhsehlaw dum a hlanhmi hna nih khan, ‘Hi pa hi dum ngeitu fapa a si. That u sih, dum hi kanmah ta a si lai,’ an ti. 8Cucaah a fapa cu an tlaih i an thah i a ruak kha dum lengah an hlonh.

9“A si ahcun, dum ngeitu nih khan zeitindah a tuah hna lai? A ra tlung lai i a thah hna lai i dum kha midang a hlanh hna lai. 10Cathiang chungah:

‘Inn satu hna nih, santlailo tiin

an hlawtmi lung cu santlai bik ah

a cang.

11Cu a tuahtu cu Bawipa a si i khuaruahhar a si kha kan hmuh,’

tiah aa ṭialmi hi nan rel bal lo maw?” tiah a ti hna. #Slm 118.22-23

12Judah upa pawl nih khan, hi bianabia cu kanmah a kan chimhnawhchan ti kha an hngalh caah Jesuh cu tlaih an timh, sihmanhsehlaw mizapi kha an ṭih hna caah an kaltak.

Ngunkhuai Peknak Kong

(Mat 22.15-22; Luk 20.20-26)

13Farasi mi tlawmpal le Herod mi tlawmpal kha, Jesuh cu a bia in tlaih i zuam awkah an hei thlah hna. 14A sinah cun an ra i, “Saya, nang cu lihchim hmang lomi na si i mi hme mi ngan ahohmanh an mithmai na zoh hna lo. Sihmanhsehlaw Pathian duhnak tu kha a ning tein na cawnpiak hna, ti kha kan hngalh. Cucaah cun Rom Siangpahrang sin i ngunkhuai pek hi kan phung he aa ralchanh maw ralchanh lo kan chim tuah, ngunkhuai cu kan pe lai maw pe lo dah?” an ti. 15Hlen an timh kha a hngalh i, “Zeicahdah foih nan ka timh len ko? Ngun tangka phar khat in rak pu u law ka zoh tuah lai,” tiah a leh hna. 16Pakhat an rak pek i, “Aho hmai le aho min dah mah hihi an si?” tiah a hal hna. Annih nih, “Siangpahrang hmai le min,” tiah an leh. 17Cun Jesuh nih, “A si ahcun, Siangpahrang ta a simi cu Siangpahrang cu va pe ko u, Pathian ta a simi cu Pathian kha va pe ko u,” tiah a ti hna i an ar ṭhup ko.

Thihnak In Thawhṭhannak Kong

(Mat 22.23-33; Luk 20.27-40)

18Cun Sadusi mi kha an ra. (Annih cu thihnak in thawhṭhannak a um lo, a timi an si). #Lam 23.8 19An i thawh i, “Saya, Moses nih phung a kan ṭialpiakmi ah: Mipa pakhatkhat cu fa ngei loin a thih ahcun fa a hrinpiak nakhnga a unau nih khan a rohmi a nupi cu a ṭhit awk a si lai, ti a si. #Deu 25.5 20Voi khat cu unau pasarih an um i an upa bik nih cun nupi a ṭhit, sihmanhsehlaw fa ngei loin a thi. 21Cucaah a hun changtu nih khan a rohmi cu a ṭhit, asinain amah zong cu fa ngei loin a thi ve. Cuticun a pathumnak zong kha a si i 22a dang zong cu an si cio: an pasarihte cun cu nu cu an ṭhit i fa ngei loin an thi dih. Cun a hmanung bik ah cu nu zong cu a thi ve. 23Cucaah thawh ṭhan ni ah mithi vialte kha thawhter an si ahcun, cu nu cu aho nupi dah a si kun lai? An pasarih tein an ṭhit cio ṭung?” an ti.

24Jesuh nih cun a leh hna i, “Nan hei palh hringhran dah! Cun zeicahdah kan palh ti nan hngal maw? Cathiang siseh, Pathian ṭhawnnak siseh nan hngalh lo caah a si. 25Mithi cu thawhter an si tikah vancungmi bantuk pei an si lai cu, an i ṭhi in an i um ti lai lo. 26Mithi mi thihnak in thawhter ṭhan an si lai le si lai lonak kong cu, Moses cauk chungah khan, burbuk a kangmi kong kha nan rel bal lo maw? Khaka ah khan Pathian nih Moses cu a thawh i, ‘Kei cu Abraham Pathian, Isak Pathian, Jakob Pathian ka si,’ a ti, tiah aa ṭial ṭung. #Exo 3.6 27Cucu a nungmi hna Pathian a si, a thimi hna Pathian a si lo, tinak a si. Nan palh cikcek!” tiah a ti hna.

Nawlbia Ngan

(Mat 22.34-40; Luk 10.25-28)

28Cuka ah cun bia an i almi a rak theitu Phungbia cawnpiaktu saya pakhat a rak um. Jesuh nih Sadusi mi hna cu ṭhalo tein a leh hna ti kha a hngalh tikah a ra i, “Nawlbia lakah hin zeidah a biapi bik?” tiah a hal. #Luk 10.25-28 29Jesuh nih a leh i, “ ‘Israel mi hna ngai tuah u; Bawipa kan Pathian lawnglawng hi Bawipa a si. 30Bawipa nan Pathian cu nan lungthin dihlak le nan nunnak dihlak le nan ruahnak dihlak le nan thazang dihlak in nan dawt lai,’ ti hi a biapi bik cu a si. #Deu 6.4-5 31Cun a pahnihnak cu, Na innpa kha nangmah naa dawt bantukin na dawt lai, ti hi a si. Hi hna pahnih nakin a biapi deuhmi nawlbia dang an um ti lo,” tiah a ti. #Lev 19.18 32Phungbia cawnpiaktu saya nih cun Jesuh cu a leh ve i, “A ṭha ngaingai, saya! Na chimmi cu a hmaan, Bawipa lawnglawng hi Pathian cu a si taktak i pathian dang zeihmanh an um ti lo. #Deu 4.35 33Cucaah mi nih hin Pathian cu kan lungthin dihlak le kan ruahnak dihlak le kan thazang dihlak in kan dawt awk a si i kan innpa cu kanmah bantukin kan dawt awk hna a si. Hi nawlbia pahnih zulh hi Pathian sin i khangh raithawinak le raithawinak dangdang zong pekchanhnak nakin a ṭha deuh,” tiah a ti. 34Jesuh nih a bialehnak cu a ṭha ngai ti kha a hmuh i, “Pathian Pennak in naa hlat lo,” tiah cu pa cu a ti. Hi hnuah hin cun ahohmanh nih Jesuh kha bia an hal ngam ti lo.

Messiah Kong

(Mat 22.41-46; Luk 20.41-44)

35Jesuh nih Biakinn chung i a cawnpiak lio hna ah khan hi biahalnak hi a hal hna: A thawh hna i, “Zeitindah Messiah cu David hrinsormi a si te lai, tiah Phungbia cawnpiaktu saya nih an ti khawh?

36Thiang Thlarau nih pei David cu:

Bawipa nih ka Bawipa cu,

Na ral hna kha na ke tangah

ka chiah hna hlantiang

ka orhlei kamah hin ṭhu ko,

tiah a chimter cu. #Slm 110.1 37David hrimhrim nih Messiah cu ‘Bawipa’ tiah a ti ahcun, zeitindah David hrinsor cu a si khawh lai?” tiah a ti hna.

Phungbia Saya Hi I Ralring Hna U

(Mat 23.1-36; Luk 20.45-47)

Mizapi nih cun Jesuh bia cu lunglawm ngaiin an ngaih. 38A cawnpiak lio hna ah cun, “Phungbia cawnpiaktu saya pawl hi i ralring hna u. Annih cu an puan fual pipi he i chawh i chawdawr tlang ah mi nih upatnak in kan biachawn hna seh, ti a duhmi an si. 39Pumhnak ah ṭhutdan a ṭha khunmi i ṭhut kha an duh i zapi rawl danghnak ah upatnak hmun i ṭhut kha an duh. 40Nuhmei kha an ei an hmuar hna i an inn an lo kha an chuh hna. Cun zapi nih kan hmu hna seh tiin thla kha sau pipi in an cam. Hi hna hi cu an dantatnak kha a fak chinchin men ko lai,” tiah a ti.

Nuhmeinu Thawhlawm

(Luk 21.1-4)

41Jesuh cu Biakinn tangka chiahnak pawngah khan a ṭhu i tangka a sanhmi kha a zoh hna. Mirum tampi nih khan tangka tampi an sanh lengmang. 42Khi lioah khan a si a fakmi nuhmei pakhat a ra ve i pia hra tluk a man a simi dar tangka pahnih a sanh ve. 43Jesuh nih khan a zultu kha a kawh hna i, “Hi a si a fakmi nuhmeinu nih hin tangka kuang ah midang vialte nakin tam bik a sanh. 44Zeicahtiah a dang nih cun an ngeih hlei kha an sanh, sihmanhsehlaw hi nu hi cu sifak ngai a si ko nain a ngeihmi vialte kha a sanh dih — a nunnak ca i a hman dingmi kha a thawh dih,” tiah a ti.

Currently Selected:

MARKA 12: HCL06

Highlight

Copy