Nʋnʋgbɩɩ 2

Kplɔɔkplɔɔ‑wugɔɔ kwlii‑ Patekɔtöylʋʋ 'kʋ

1'Zufʋnyʋaa' ‑glɩsɩɩsɩɛ wa laa lä Patekɔtö#2.1 Patekɔtöylʋʋ nä, kʋ plöö‑ lä gogolɩɩ fɩɩn ‑yä tlʋtlʋlɩɩ' ‑glɩsɩɩsɩɩ' ylʋʋ. Pakö‑glɩsɩɩsɩɛ kä plö nä, ɩ nʋ fɩa ylɩɩ gwlɩ sɔ ‑yä kʋgbä 'nɩ wa ni lä Patekɔtö‑glɩsɩɩsɩɛ. Zɛɛ 'sɩɩ Levi 23.15‑21; Detlo 16.9‑11. nä, ɛɛ' ylʋʋ ‑ŋëë lä nä, 'cɔcɩnyʋa 'fɩɩn 'wlää‑ bhä daa ‑bhlo 'wluu. 2‑Mä 'kpobhuu ‑bhlo 'kʋ, kplü ‑ghlää ‑laagɔɔ'. Ɩ ‑kʋ bhä nynä dide ‑vʋvɔlʋʋ' kplü 'nɩ ‑bhutuu ‑wa ‑kʋ bhlä 'mnö sä nä, ɩ yiu 'mnö 'kʋ yie. 3'Nɩ mɩɩ yi 'kʋ ghlä, ɩ 'wlʋʋ‑ bhä ŋnäŋnä ‑kosumɩɔ. Ɩ ‑dënö ‑dënöɔ 'mʋ 'nɩ ɩ yi nyɩkpɔ nyɩkpɔ 'wlu gɔɔ. 4'Nɩ waa' ‑lefɩɩn Kplɔɔkplɔɔ‑wugɔɔ yiwa 'kʋ kwlii 'nɩ wa yi lowu‑wälɩɩ' cilɩ 'kʋ cie. 'Klüü ʋ ŋʋʋ‑ bhlä nyɩkpɔ nyɩkpɔ nëë' nä, ɩmɩ ɔ ci bhɛ.

5‑Maa, 'Zufʋnyʋää' lʋä‑ plöö‑ bhlä 'sää Laagɔ‑bʋbɔnyʋä 'kädʋä nä, wa ‑bha 'ylʋzɔɔ dää 'fɩɩn, 'nɩ wa ‑yi bhä ‑lɔɔ Zolizalɛmʋduu'. 6Nä kplüü gbä bhɛ lä sɔɔ nä, kä nyɩkpaa' 'kpä ‑yi ‑lɔɔ. 'Nɩ sä Kplɔɔkplɔɔ‑wugɔɔ ŋʋ bhlä 'cɔcɩnyʋa nëë' nä, waa' 'kʋʋ nyɩkpɔ nyɩkpɔ 'nunɩ bhä ɔ 'bhuwälɩɩ'. 7Ɩ ‑kä 'ŋnö 'nɩ plɛkʋ 'niniwa‑. Ɩ slʋwa bhɛ nükpëë' 'nɩ wa ci bhä, wlä ‑maa, nyɩkpanää‑ sää lä 'mʋ nä, Galileenyʋä waa' bhä plöö ‑a? 8'Nɩ sɩ ‑kʋ bhä 'nɩ waa' ciciwälɩɩ, ‑anyɩa 'kʋʋ nyɩkpɔ nyɩkpɔ 'nunɩ bhä ɔ 'bhuwälɩɩ? 9‑Anyɩa nëëdë ‑nänʋä ‑kʋ ‑mɔɔ 'nɩ wa ‑bha Patöbhlɩ 'kʋ, nänʋä ‑bha Mɛdöbhlɩ 'kʋ, ‑nänʋä ‑bha Elamitöbhlɩ 'kʋ, ‑nänʋä ‑bha Mezopotamiibhlɩ 'kʋ, ‑nänʋä ‑bha Zudeebhlɩ 'kʋ, ‑nänʋä ‑bha Kapadɔsɩbhlɩ 'kʋ, ‑nänʋä ‑bha 'Pɔɔbhlɩ 'kʋ, ‑nänʋä ‑bha Aziibhlɩ 'kʋ. 10‑Nänʋä ‑bha Fliziibhlɩ 'kʋ, ‑nänʋä ‑bha Pafiliibhlɩ 'kʋ. ‑Nänʋä bha Ejipitibhlɩ 'kʋ. Libii‑bhlɩɛ yëkuu' 'lëkpëa wa laa lä Silɛnö nä, ‑nänʋä ‑bha 'sɩɩ ‑mɔɔ. ‑Nänʋä ‑bha Wlomɛɛbhlɩ 'kʋ. 11‑Nänʋä plöö‑ 'sɩɩ 'Zufʋnyʋä, 'nɩ lowia‑ bʋbɔ lä 'Zufʋnyʋaa' Laagɔɔ nä, wa ‑kʋmʋ 'sɩɩ ‑lää. Nyɩkpaa' ‑nänʋä ‑bha Klɛtöbhlɩ 'kʋ, ‑nänʋä ‑bha Alabʋbhlɩ 'kʋ. Naa, sɩ ‑kʋ bhä 'nɩ nyɩkpanä ci bhä nyɩkpɔ nyɩkpɔ ɔ 'bhuwälɩɩ' 'nɩ wa fään bhä Laagɔ 'ŋnu? 12Nyɩkpaa 'fɩɩn plɛkʋ yʋwa bhɛ 'sää 'titi 'ninio nä, wa ci bhɛ, wlä ‑mä ‑nɩnɩ 'fɩɩn, sɩ sä bhä ‑zɔɔ? 13‑Mä nyɩkpaa' ‑nänʋä ‑kʋ bhä 'sɩɩ ‑lɔɔ 'nɩ wa nyɩänʋwa bhä. Wlä nʋʋ‑ bhlʋwa lä!

Pɩɛlö soo ‑jlë wälɩ

14‑Mä wa ci bhɛ lä sɔɔ nä, kä Pɩɛlö ‑bha 'kʋ 'nɩ, Zozii' ‑mɔɔ' lobho lobhonyʋa 'kʋgbä ‑bhlo, ɔ ‑yʋwa 'sɔ 'nynigo‑. 'Nɩ ɔ yi nuwälɩ 'kʋ bhɛlɩä, ɔ lä anyɩ 'Zufʋnyʋä, ɩyä anyɩmɔ 'fɩɩn‑ ‑yi lä ‑mää Zolizalɛmʋ‑duu nä, ɩ ‑ŋwa 'kʋ nynä ‑mä, wälɩɩ n 'kä lä ci nä, a pui 'nägäsä 'nyukwli! 15Nyɩkpanä a wloo lä ‑lää nä, ka bhobho lä nynä ‑mä nʋʋ‑ bhlʋwa, ‑mä nʋʋ' bhlʋwa ‑wʋ. ‑Pɛpɛɛ zeli ze lä. ‑A ‑kʋ zëplüü' 'gliyi ‑pɛnää'. 16‑Mɔɔ ‑gɔgɔbhlää' sä 'plɔfɛtɩ Zowɛɛ cii‑ bhlä nä, sɔɔ‑ ‑glää lä ‑zɩkä. Kɔ cii‑ bhlä nynä ‑mä Laagɔ ‑sonöɔ ʋ lä

17 ‑Amʋ Laagɔ nä,

Zëkpëa bhɩä ‑gbäsɩɩ' 'tänyɩɛ 'mnö,

N yi 'naa 'Wugɔɔ 'ylʋzɔkʋnyʋa 'fɩɩn 'kʋ kwlie.

Anyɩa 'yuŋwadië ‑yä anyɩa' 'yuŋnʋgbɛnyʋä yi 'naa nüdö ‑sää.

Anyɩa' nyëblii wälɩ yiwa 'yii ghlä.

'Nɩ anyɩa' 'kɔgwlɛnyʋa yi 'ylaa ghlä.

18 ‑Ɛɛɛ, ylɩɩyɩ 'mnö nä,

'Naa ‑gänʋnyʋa ‑yä 'naa ‑gänʋŋwnɩa,

N yiwa 'naa 'Wugɔɔ 'kʋ kwlie 'nɩ

Wa yi 'naa nüdö ‑sää.

19 N yi ŋɔkʋ ‑daminë nʋ,

'Nɩ n yi ‑mää ‑dʋdʋkʋ 'yiziziogbɩ nʋ.

Dolu ‑yä ‑kosu ‑yä gboylokpɔ yi kwli.

20 'Fɩa ‑yä Kwlienyɔɔ' yiylʋʋ 'kä ŋëë nä,

'Ylʋkwädla yi 'cucuu' jɩjlä,

'Nɩ 'cʋʋ yi zamä nynä dolu.

Kwlienyɔɔ' yiylʋʋ nä,

Ʋ ‑glö ylʋʋ 'kädʋ.

Ʋ ‑glö 'klʋagba ylʋʋ.

21 ‑Lɔɔ' 'tänyɩyɩ 'mnö nä,

Nyɩkpɔɔ' lɔɔ ‑ɔ yi lä Kwlienyɔ wälɩ 'pä nä,

Ɔmɔɔ‑ 'gä lä ‑lɔɔ nëë' ‑bha. # 2.17‑21 Ɩ bha Zowɛɛ 3.1‑5.

22'Nɩ Pɩɛlö yi bʋkʋ ci, ɔ lä bhelienyɩ, Yizlɛnyʋänyɩ‑, a poo 'naa ciciwälɩɩ 'nyukwli! Nazalɛtöö' Zozii ‑glö nyɩkpɔɔ' lɔɔ Laagɔ ‑ghlä lä ɔɔ' 'päwaa 'kʋ 'nɩ a nia‑ lä 'yi nä. Laagɔ ‑gbä 'nɩ ɔ ‑nʋ 'yiziziogbɩ ‑yä ‑daminë 'nɩ wälɩnɩ 'fɩɩn, anyɩ 'titi, a yii. 23Zoziinɔ 'mɔ a bhlää‑ lä. ‑Mä sä Laagɔ ŋʋɩ‑ bhlä nä, sɔɔ ‑säkä ‑säkä ɩ plöö‑ lä 'kʋ. Nyɩkpaa' ‑lʋa ‑waa 'mänyɩ ‑wʋ lä Laagɔ nä, ka ‑gbä 'nɩ wa 'bhlänöɔ‑ 'kusu 'yii. 24‑Mä Laagɔ ‑gbä 'nɩ Zozii ‑bha 'kwiee ‑säklöö nëë' 'nɩ ɔ ‑glɔɔ 'kuëë. Ɩɩ' bhɔɔ 'kʋ ‑ŋwa nynä ‑mä 'kwiee sɩɔ. 25‑Ɔnöza bhää? ‑A tötɔ Davidö yɩɩ wɛzä ci. Kɔ cii‑ [Kwlienyɔ Zozii' ‑za] ɔ lä

'Naa Klwienyɔɔ n nio 'kɔɔkɔ 'yi.

Ɔ ‑kʋ'ʋ lüüklä 'kʋ.

Ɔ ‑kʋnö'ö yëku ‑yä

Nn' kä ‑kä tɩtɛ ‑ŋänöö' ‑za.

26 ‑Nɩnɩ 'mɩɩ‑ nʋ lä 'naa pleyii ‑jäkaa.

Ɩmɩɩ‑ ‑kä 'ŋnö 'nɩ 'naa ciciwälɩ 'mnö ‑pʋpɛ ‑kʋ lä ‑mɔɔ.

‑Mɔɔ glu nä

'Naa 'yɛkɛɛ yi 'kʋ wɔtɔlɩ 'ni 'nɩ,

Ɛ yi Kwlienyɔɔ dë 'tɛɛ.

27 Kwlienyɔ Laagɔ‑!

'Naa kätö ‑zuzuu nä,

N ‑yi sɔɔ nynä ‑mä ‑n 'nʋ ‑lä 'kudukʋ 'kʋ bëë!

‑Nn ‑lä ŋoo 'nɩ ‑naa Kplɔɔkplɔɔnyɔ 'kä glu 'zɛɛ.

28 ‑Bɔlɩɩ ‑ɩ sää lä 'pʋpʋɛɛ' daa 'wlu nä,

‑N yä'ä 'mɩɩ paa.

'Nɩ sä ‑n ‑kʋ ylä ‑lɔɔ nä,

Ɩ ŋʋ 'naa pleyi ‑jäkä. # 2.25‑28 Ɩ bha Lɔlɔ 16.8‑11.

29Pɩɛlö cii‑ bʋkʋ ɔ lä bhelienyɩ‑, n yi mii 'nɩ n yi'anyɩ soo wɩa. N yi'anyɩ ‑a tötɔ Davidöö' yëkuu' wälɩ soo nynä ‑ma, Davidö kuu‑ lä nä, kä wa zizio. Ɔɔ' lesi‑kpakpëa ‑kʋ ‑lätee 'bhlɩnɛ 'mnö. 30‑Mä Davidö ‑glö bhlä 'plɔfɛtɩ nä, ɔ ‑yi bhä sɔɔ nynä ‑mä, kä Laagɔ 'sɔlɩ‑ nynä ʋ yi ɔmɔ Davidöö' 'lɔlʋnyɔ 'leyi‑këpëa 'kʋ 'ŋʋ. 31Davidöö' ciciwälɩɩ 'mnö kɔ nii‑ wɛzä Klisöö' 'kuëë glɔɔlɩɩ' wälɩɩ 'yi. Ɩmɩ ɔ cii‑ lä nynä ‑mä

Laagɔ 'nöɔ ‑lä 'kudukʋ 'kʋ bëë.

'Nɩ ɔɔ' 'yɛkɛɛ' ‑lä 'kɔɔn 'zɛ. # 2.31 Ɩ bha Lɔlɔ 16.10.

32Zoziinɔ 'mɔ Laagɔ ‑gälɩä lä 'kuëë. 'Nɩ wälɩnɩ nä, ‑anyɩ 'fɩɩn ‑a plöö‑ ɩɩ' ‑dläfʋɛlünyʋä. 33Kä Laagɔ 'ŋʋnöɔ‑ 'ŋnu mʋdä. Laagɔ cii‑ bhä nynä ‑mä ʋ yio ʋʋ' Kplɔɔkplɔɔ‑wugɔɔ 'nyɛ, 'nɩ 'zaazɩ, Laagɔ nyɩɔnyʋ 'nɩ ɔ yi‑anyɩmʋ lä 'kʋ kwlie. Nä, ɩmɩ a ni la ‑lää 'yi 'ni a nu lä 'sɩɩ. 34‑A tötɔ Davidöö' ‑wʋ Laagɔɔ' gblää‑, mä kɔ cii‑, ɔ laa,

Kwlienyɔ Laagɔ ‑soo 'naa Kwlienyɔ,

Ɔ lä ‑n kʋ 'naa lüüklä 'kʋ sä!

35 ‑N kʋ ‑lɔɔ ‑aaa ‑yä

‑Naa ‑zɔbhlɛgbänyʋa,

N 'kwa ‑naa 'kʋ nämnö ‑gwädɛ 'kʋ nʋ. # 2.35 Ɩ bha Lɔlɔ 110.1.

36Nä, anyɩ 'Yizlɛnyʋä, ɩ ‑ŋwa 'kʋ nynä ‑mä a yibhë sɔɔ wɩa. A yibhë sɔɔ nynä ‑mä, Zoziinɔ a ‑bhoo bhlä 'kusuu 'yii nä, Laagɔ yɔ Kwlienyɔɔ' plüë. Ɔmɔɔ‑ plöö‑ ylä Laagɔɔ' Lobho Lobhonyɔɔ Klisö.

Nyɩkpaa' ‑bhɛgö taa yä Zozii 'kʋ ŋoo

37‑Mä nyɩkpaa nuu‑ lä Pɩɛlöö ciciwälɩɩ nä, kɩ ‑kamänʋwa yëkuu'. 'Nɩ wa yi Pɩɛlö ‑yä Zozii' ‑mɔɔ' lobho lobhonyʋa 'ylä, wlä ‑mä bhelienyɩ‑, 'nɩ sä ‑a yi bhä ‑pɛɛ nʋʋ? 38Pɩɛlö lä a ‑bha anyɩa' nyenyi‑zëkpëa 'mnö ‑yä a yii Laagɔ! Anyɩa' nyɩkpɔ nyɩkpɔ 'ŋʋ 'nyu 'wlu Zozi Klisöö' 'ŋnöö 'mnö. ‑Lɔɔ anyɩa' nyenyii yi cienöɔ, 'nɩ Laagɔ yi'anyɩ ‑kä ʋʋ' Kplɔɔkplɔɔ‑wugɔɔ 'nyɛ. 39Wälɩɩ' ‑lɩɩ Laagɔ cii‑ bhlä nynä ‑mä ʋ yi nyɩkpaa' ‑zaa nʋ nä, anyɩ ɩyä anyɩa 'yua, anyɩa' ‑za ʋ cii‑ bhlä sɔɔ. 'Fɩa 'nɩ, ‑blëlü ‑gbäsɩɩ' nyɩkpa 'fɩɩn, Laagɔ 'kä lä laa nä, ʋ cii‑ 'sɩɩ sɔɔ waa' ‑za.

40‑Mä Pɩɛlö bhlüü‑ ‑dɔɔ' nü nü nü 'kʋ, 'nɩ ɔ ‑sonʋwa. Ɔ lä 'bhlɛsʋnʋ 'mnö gbenyenyinyʋä nä, a ‑bhʋwa nëëdë! 41‑Maa, nyɩkpaa 'fɩɩn ‑wa laa‑ lä Pɩɛlöö' ciciwälɩɩ nyaasäsä nä, wa ‑mʋ 'nɩ wa ŋʋʋ‑ 'nyu 'wlu. ‑Lɔɔ' ylʋʋ ‑bhlobhlo 'kʋ, nyɩkpaa‑ yä bhlä Zozii 'kʋ ŋoo nä, wa ‑zunɔɔ pään‑ yiosä nyɩkpaa' ‑bhɛgö taa (3.000) 'kʋ.

Tɛɛtɛɛ' 'cɔcɩnyʋaa' nʋnʋgbɩɩ

42‑Mä 'cɔcɩnyʋa 'fɩɩn yi bhä 'kɔɔkɔ Zozii' lobho lobhonyʋaa' cɩalɩɩ 'nyukwli poo ‑kää. 'Nɩ wa ‑kʋ bhä nynä bhɛŋwnɩä yä bhelie. Wa lüü bhä 'kʋ, 'nɩ wa bhibhie bhä 'kʋ. 43Nyɩkpɔ nyɩkpɔ ‑guu bhä Laagɔ. 'Nɩ Zozii' lobho lobhonyʋa nʋ bhä ‑daminë ‑yä 'yiziziogbɩ ‑bhutukpä. 44Nyɩkpaa' 'fɩɩn‑ ŋoo‑ bhlä Laagɔwälɩɩ 'kʋ nä, kä wa 'jɛnyɩ‑ bhä 'nɩ wa 'wlää‑ bhä waa' ‑kääkäälɩɩ 'fɩɩn 'kʋ. 45Waa kääkäälɩɩ ‑yä waa' 'nää 'sɔ, wa ŋʋɩ bhä 'kpä, 'nɩ moniee wa ni bhlä nä wa dënɩɛ bhä wamä ‑bhlobhlo pää'. 'Nɩ nyɩkpɔ nyɩkpɔɔ' sɔ ylä bhlä nä, ɔ ni bhä sɔɔ. 46'Nɩ ylɩɩ 'fɩɩn 'kʋ wa 'ŋʋʋ bhä 'kʋ 'nɩ wa yi Laagɔ‑bhutuu 'Kädʋʋ 'mnö bʋbɔ ‑kää. 'Nɩ waa 'gbüü 'mnö, wa lüü bhä 'kʋ ‑jäkaa 'mnö ɩyä pɔlöwätɛɛ 'sɔ 'mnö. 47Wa fään bhä Laagɔɔ' 'ŋnu. 'Nɩ 'bhlɩɛ 'mnö nyɩkpaa ‑waa bhä waa' wälɩ. 'Nɩ ylɩɩ 'fɩɩn 'kʋ nä, ‑lʋa Kwlienyɔ sä bhlä ‑lɔɔ nëë' nä, wa 'ŋʋʋ bhä 'cɔcɩnyʋaa' ‑zunɔɔ 'kʋ.

Currently Selected:

Nʋnʋgbɩɩ 2: god

Highlight

Copy

Want to have your highlights saved across all your devices? Sign up or sign in

Learn More About GOD - u2