Nʋnʋgbɩɩ 3

Pɩɛlö ‑yä Zään 'sɔ ‑yamä 'kpläkplänyɔ

1'Ylʋʋ ‑bhlo 'kʋ, 'sää bhibhie‑tänyɩɩ', ‑kugbësää' 'gliyi taa yä bhɛ klä. Nä Pɩɛlö yä Zään 'sɔ mʋ bhɛ Laagɔ‑bhutu 'kädʋʋ 'mnö bhibhie ‑kää. 2‑Maa Laagɔ‑bhutuu' ‑glënë ‑bhlo wa laa bhä 'Nägä ‑Glënë. Lɔɔ' ‑glënëa nëkʋ nä, nyɩkpa yi bhä ‑lɔɔ 'nɩ, wa ŋʋ bhä ‑lɔɔ 'kpläkplänyɔ sä ‑yä ‑wa plä bhlä Laagɔ‑bhutuu 'mnö nä, ɔ 'kwa zlaa. Nyɩkpɔnɔɔ' 'bhlʋlɛɛ na, kwa ‑gänöɔ 'nyɛ bhä ‑ya. 3Ɔ nii‑ lä Pɩɛlö ‑yä Zään 'sɔ 'yi 'nɩ wa 'kä bhɛlä Laagɔ‑bhutuu' plä nä, kɔ ‑zlʋwa. 4‑Mä Pɩɛlö ‑yä Zään 'sɔ ‑wluo ‑plɩɩ, 'nɩ Pɩɛlö yio soo, ɔ lä ‑n wlu‑anyɩ 'yii! 5'Nɩ nyɩkpɔɔ yiwa wloo ‑plɩɩ, ɔɔ' plɛ bhobho bhɛ nynä ‑mä kwa 'kɔ lʋʋ 'nyɛ. 6'Nɩ Pɩɛlö yio soo, ɔ lä nn' ‑wʋ monii ‑kä, 'nɩ nn' ‑wʋ 'sɩɩ ‑sikaa ‑kä! ‑Mä lʋʋ n ‑kä lä nä, ʋmʋ n 'kä‑ä lä 'nyɛ. Nazalɛtöö' Zozi Klisöö' 'ŋnöö 'mnö nä, ‑n ‑bha 'kʋ ‑yä ‑n nää! 7'Nɩ Pɩɛlö yio lüüklä ‑klɔgbä klä 'nɩ ɔ yio 'kʋ bhɛlɩä. ‑Mä 'kpobhuu ‑bhlo 'kʋ, nyɩkpɔɔ' bhɩɩ ‑yä ɔɔ' 'gbluŋwia 'sɔ nii‑ 'tɛtɩ, 8'nɩ 'vlikiti, ɔ yi 'kʋ ‑bha 'nɩ ɔ yi näälɩ 'kʋ cie. 'Nɩ ɔ ‑yʋwa 'sɔ yi Laagɔ‑bhutuu 'mnö plä. ‑Mä ɔ nää bhɛ, 'nɩ ɔ ‑bluu bluu bhɛ 'mʋ, 'nɩ ɔ bhlɩ bhɛ ‑Laagɔlɩ.

9'Nɩ nyɩkpaa 'fɩɩn wluo 'nɩ ɔ nää bhä 'nɩ ɔ fään bhä Laagɔ 'ŋnu. 10‑Mä nyɩkpaa nio‑ lä yi nä, kwa ‑yibhënöɔ. Wa ‑yibhë sɔɔ nynä ‑mä, Laagɔ‑bhutuu' ‑glënëa wa laa lä 'Nägä ‑Glënëa nä, ɔmɔɔ‑ ‑kʋa bhlä nëkʋ sä 'nɩ ‑ɔ zlaa bhlä 'plöplönyʋä. Ɩ ‑kä bhɛ 'ŋnö 'nɩ nykpaa plɛkʋ 'niniwa‑ 'nɩ ‑ŋänö ‑plʋwa 'sɩɩ.

Pɩɛlö soo nyɩkpaa Laagɔ‑bhutu 'kädʋʋ 'mnö

11Mä nyɩkpɔnɔ, ɔɔ' ‑sä bhɛlä Pɩɛlö ‑yä Zään 'sɔ gwë nä, wa ‑kʋ bhɛ ‑lɔɔ dä wa laa bhlä 'Loyo Salomɔɔ' ‑Tutumëa nä, 'nɩ nyɩkpaa 'fɩɩn yi paa 'nɩ wa yiwa ‑lɔɔ yëku yi.

12Pɩɛlö nii‑ lä wälɩɩ 'yi nä, kɔ ‑soo ‑jlëa, ɔ lä anyɩ 'Yizlɛnyʋä, ‑ɔnözä 'nɩ nyɩkpɔnɔɔ' yamälɩɩ 'nini'anyɩ bhä plɛkʋ? 'Nɩ sɩ ‑kʋ bhä 'nɩ a wlu‑anyɩ bhä sɔɔ 'yɩ? A wlu‑anyɩ nynä Laagɔɔ' bʋbɔnyʋä 'kädʋä, 'nɩ ‑a ‑kä ‑anyɩa 'wludää 'päwä nä, ‑lɔɔ 'päwä 'maa‑ bhlüü‑ 'kʋ 'nɩ ‑a ‑yamä nyɩkpɔnɔ! 13‑A tɩtɩä Ablaamʋ, ‑yä Yizakö, ‑yä Zakɔpʋ, ɩyä ‑a 'bäsɩɩ' Laagɔɔ wa ‑bʋbɔ lä nä,#3.13 Zɛɛ 'sɩɩ 'Nämʋ 3.15. ʋʋ ‑gänʋnyɔ Zozii, ʋ yɔ 'klʋagbaa 'nyɛ! Zoziinɔ 'mɔ a ‑pëë lä. A cɛnöɔ‑ ‑gɔmnä Pilatö dëlü, ‑bhlɛ Pilatö tään bhɛ nynä ɔ 'kɔ 'yi ‑taa.

14‑Mä anyɩ, ɔmɔ Kplɔɔkplɔɔnyɔɔ ‑yä 'yigënyɔɔ, ka cɛnöɔ‑ 'nɩ a cii‑ nynä ‑mä, nyɩkpa‑bhlänyɔɔ 'mɔ wa lä wa ‑taa 'yi. 15A ‑gbä 'nɩ wa bhlää‑ 'pʋpʋɛɛ' käänyɔɔ 'nɩ ɔ kuu‑, ‑mä Laagɔ ‑gbä 'nɩ ɔ ‑glɔɔ 'kuëë. 'Nɩ wälɩnɩ nä, ‑anyɩ 'titi, ‑a plöö‑ ɩɩ' ‑dläfʋɛ‑lünyʋä. 16Nyɩkpɔnɔ a ni lä ‑lää 'yi nä, a ‑yio. ‑Mä Zozii' 'ŋnöö 'päwa, amää‑ ŋʋɔ‑ lä 'tɛtɩɩ'. ‑Ɔnöza bhä? ‑Anyɩ, ka ‑a ‑kä Zozii' pɔlötɛtɛ. Pɔlötɛtɛnɛ ‑a ‑kä lä ɔɔ' ‑za nä, ɛmɛɛ‑ ‑gbä 'nɩ nyɩkpɔnɔ ‑yamä lä wɩa, 'nɩ a nio lä ‑lää 'yi. 17Naa, bhelie ‑yä bhɛŋwnɩänyɩ‑, anyɩ ‑yä anyɩa' 'cifinyʋa 'sɔ, n ‑yi sɔɔ nynä ‑mä kä aa' bhɔɔ lä 'sɔɔ ‑yi nä, 'ɩɩ ‑zä a ‑klä lä Zozii nyenyisä. 18‑Mä Laagɔ nä, ‑mɔɔ ‑gɔgɔbhlää' wälɩklëa ʋ ‑ghlää lä 'plɔfɛtɩnyʋa nëë' 'nɩ wa cii‑ bhlä nä, amä ʋ ‑glää ylä. Kä Laagɔ cii‑ bhlä nynä ‑mä Klisöɔ 'kwlɩ yio bhä bhɩä. 19Nä, a ‑bha yɩ anyɩa' nyenyi zëkpëa 'mnö ‑yä a yii Laagɔ ‑yä anyɩa' nyenyii 'kä 'kʋ 'tütlüo. 20‑Lɔɔ' 'tänyɩɩ nä, Kwlienyɔɔ Laagɔ yi gbä 'nɩ, ʋʋ' Lobho lobhonyɔ Klisö, ɔ ‑sä lä anyɩa' ‑za nä, Zozii, ɔ yi yi 'nɩ ɔ yi 'kʋ wɔtɔlɩ ‑lä. 21‑Mä ‑pɛpɛɛ' ‑za nä, ɩ ‑ŋwa 'kʋ nynä ‑mä Zozi Klisö kʋ ‑bhlɛ ‑mɔɔ Laagɔ yëku. Ɔ yi ‑mɔɔ kʋ ‑aaa 'nɩ, sä Laagɔ ŋʋʋ‑ bhlä ‑mɔɔ ‑gɔgɔbhlää' kplɔɔkplɔɔ‑plɔfɛtɩnyʋa nëë' nä, 'tänyɩ yi ŋëë 'nɩ sɔɔ yi ‑glää. 22Moyizö cii‑, ɔ lä Kwlienyɔ Laagɔ yi'anyɩ ‑amʋ 'bhisäkʋ 'plɔfɛtɩ yëku lobho. ‑Lɔɔ' 'plɔfɛtɩɔ nä, ɔ ‑glö abhuyu. Nä saa 'fɩɩn ɔ 'kanyɩ lä soo nä, a ‑kä 'nɩ a yi 'sɔɔ 'nyukwli poo.#3.22 Ɩ bha Detlo 18.15‑16. 23‑Mä nyɩkpɔ kä ‑lɔɔ ‑kʋ 'nɩ, ɔ 'nö ‑lɔɔ' 'plɔfɛtɩɔ 'nyukwli ‑poo nä, wa yio Laagɔɔ' nyʋa nëëdë ‑sä, 'nɩ wa yio 'bhlä.#3.23 Ɩ bha Detlo 18.19; Levi 23.29. 24'Plɔfɛtɩnyʋa 'fɩɩn Laagɔ cii‑ lä nëë' nä, 'bhää 'plɔfɛtɩ Samɩɛ 'kʋ ‑yä, ‑n ŋëë yɩ 'plɔfɛtɩnyʋa 'fɩɩn ‑wa 'bhänöɔ‑ lä 'bɩɩ nä, wälɩnɩ 'fɩɩn ‑ɩ plö lä 'kʋ nä, kä waa' nyɩkpɔ nyɩkpɔ cii‑ bhä nynä ‑mä ɩ yi ŋëë. 25Wälɩɩ Laagɔ cii‑ bhlä 'plɔfɛtɩnyʋa nëë' nä, anyɩa' ‑zä ʋ cii bhlä. Anyɩ nä, kä a tɩtɩä ‑yä Laagɔ 'sɔ ‑mɛnö bhä. Ɩmɩ Laagɔ ‑soo lä Ablaamʋ nynä, Ablaamʋ‑, ‑naa 'lɔlʋʋ 'mʋ n 'kä lä 'kʋ ghlää ‑yä 'ylʋzɔkʋnyʋa 'fɩɩn n 'kwa lä 'nyu 'pä.#3.25 Ɩ bha Ciedä 22.18; 26.4. Nä mɛnʋnʋ ‑glö 'sɩɩ anyɩa' mɛnʋ. 26Anyɩa' ‑za 'titi Laagɔ ‑lobho lä ʋʋ' ‑Gänʋnyɔɔ. Kʋ ‑lobhuo lä ‑yä ɔ 'kanyɩ gbenyenyii' ‑blɔɔ 'kʋ ‑sä, ‑yä ɔ 'kanyɩ 'nyu 'pä.

Currently Selected:

Nʋnʋgbɩɩ 3: god

Highlight

Copy

Want to have your highlights saved across all your devices? Sign up or sign in

Learn More About GOD - u2